Ulangen 20:1-20
20 “Adi erperang kena ngelawan musuh kena janah idah kena maka ndauh buen kudana, gereta perangna, ras pasukenna asangken kena, ula kena mbiar, sebap Jahwe Dibata kena si maba kena ndarat arah Mesir nari lit ras kena.+
2 Sope lawes erperang, imam arus reh janah ngerana ras kena.+
3 Arus kataken imam e man kena, ‘O Israel, begikenlah. Kentisik nari erperang kena ngelawan musuh kena. Ula mbiar ntah pe gentar. Ula kena gentar man musuh kena,
4 sebap Jahwe Dibata kena lit ras kena. Ia pagi si erperang ngelawan musuh-musuh kena janah Ia si nelamatken kena.’+
5 “Peminpin-peminpin pe arus ka bagenda nina man prajurit-prajurit, ‘Ise arah kena si mbangun rumah tapi lenga banna acara guna masuk ku rumahna si mbaru e? Mulihlah ia ku rumahna. Sebap, adi mate ia bas peperangen, kalak si deban dungna si erban acara guna rumahna e.
6 Ise arah kena si nuan anggur bas jumana tapi lenga peranina buahna? Mulihlah ia ku rumahna. Sebap, adi mate ia bas peperangen, kalak si deban dungna si mperanisa.
7 Ise si enggo tunangen ras sekalak diberu janah lenga empoina diberu e? Mulihlah ia ku rumahna.+ Sebap, adi mate ia bas peperangen, dilaki si deban dungna si ngempoi diberu e.’
8 Selain si e, bagendalah nina peminpin-peminpin man kalak e, ‘Ise arah kena si mbiar janah lanai pang?+ Mulihlah ia ku rumahna, gelah ula banna temanna pe ikut mbiar bagi ia.’+
9 Kenca dung peminpin-peminpin e ngerana, arus ka ipilih kalak e peminpin-peminpin pasuken.
10 “Adi serang kena ate kena sada kota, arus kataken kena man pendudukna syarat-syarat perdamen.+
11 Adi aloken kalak e syarat-syarat kena janah bukana gerbang kotana man kena, kerina kalak bas kota e jadi jang kena guna ngelakoken kerja paksa, janah layani kalak e kena.+
12 Tapi adi la kalak e nggit erdame janah erperang atena ras kena, arus kepung kena kota e.
13 Kalak e pasti iserahken Jahwe Dibata kena ku tan kena, janah arus bunuh kena kerina dilaki si lit bas kota e alu pedang.
14 Tapi, diberu, anak-anak, asuh-asuhen, ras kerina si lit bas kota e, banci buat kena jadi jang kena.+ Banci pan kena hasil jarahen arah musuh-musuh kena e, si enggo bere Jahwe Dibata kena man kena.+
15 “Bage si arus lakoken kena man kota-kota si ndauh arah negri si nandangi ingani kena.
16 Tapi i kota-kota si lit bas daerah bangsa-bangsa si enggo bereken Jahwe Dibata kena jadi warisen man kena, la banci sekalak jelma pe* ipediat kena nggeluh.+
17 Kerina e arus kernepken kena, eme kalak Het, kalak Amori, kalak Kanaan, kalak Peris, kalak Hewi, bage pe kalak Jebusi,+ bagi si perentahken Jahwe Dibata kena man kena.
18 Alu bage la banci ajarina kena ngikuti kerina perbahanenna si erban ciga ate si enggo lakokenna guna dibata-dibatana, si erban kena erdosa man Jahwe Dibata kena.+
19 “Adi kepung kena sada kota guna ngerebut kota e janah kena enggo erperang piga-piga wari dekahna, ula tabahi kena batang kayuna. Banci pan kena buahna, tapi ula tabah batangna.+ Batang kayu labo jelma, jadi la perlu serang kena.
20 Batang kayu si la erbuah ngenca si banci tabah kena. Batang kayu si bage banci tabah kena adi pake kena kayuna guna ngepung kota si erperang ras kena, seh ngasa talu kota e.
Cataten i teruh
^ Ntah “la banci kai pe si erkesah.”
