Ulangen 21:1-23
21 “Adi lit idah kena sekalak jelma si mate terbunuh bas negri si bereken Jahwe Dibata kena man kena janah la teh kena ise si munuhsa,
2 peminpin-peminpin ras hakim-hakim kena+ arus ku je guna ngukur jarak mayat e ku kota-kota si lit i sekelilingna.
3 Kenca si e peminpin-peminpin kota si ndeherna ku mayat e arus muat lembu si nguda denga, si lenga pernah ipake erdahin eme si lenga pernah maba baban.*
4 Jenari arus baba peminpin-peminpin kota e lembu si nguda ndai ku lembah* si ipaleri lau, si tanehna lenga pernah iperjumai ntah pe lenga pernah isuani benih. Bas ingan e arus penggelken kalak e kerahung lembu ndai.+
5 “Imam-imam Lewi pe arus reh ku je perban kalak e enggo pilih Jahwe Dibata kena guna ngelayani Ia,+ eme guna masu-masu bas gelar Jahwe.+ Katakenna kari uga cara ndungi tiap masalah si lit hubungenna ras kejahaten.+
6 Kenca si e kerina peminpin kota si ndeherna ku mayat e arus nuci tanna+ i datas lembu ndai si kerahungna enggo ipenggelken i lembah e.
7 Arus bagenda nina kalak e: ‘Labo kami si munuhsa janah labo idah kami ia ibunuh.
8 O Jahwe, ula min salahkenNdu umatNdu Israel si enggo tebusNdu.+ Ula min akapNdu umatNdu Israel si ertanggung jawap nandangi dareh kalak e.’+ Alu bage, kena la ertanggung jawap nandangi dareh e.
9 Adi bage ban kena, lakoken kena kai si benar menurut Jahwe, janah la kena ertanggung jawap nandangi dareh kalak si la ersalah e.
10 “Adi erperang kena ngelawan musuh kena janah taluken Jahwe Dibata kena kalak e, jenari taban kena kalak e,+
11 janah idah kena sekalak diberu si mejile arah kalak si itaban e, ngena ate kena ia, janah empoi kena ate kena ia,
12 banci baba kena ia ku rumah kena. Arus cukur diberu e bukna janah urusna silu-siluna,
13 gantina baju si pakena sanga ia itaban, jenari banci ia tading bas rumah kena. Arus tangisina bapakna ras mamakna sada bulan dekahna.+ Kenca si e maka banci kena erhubungen seks, jenari kena jadi dilakina janah ia jadi diberu kena.
14 Tapi adi lanai ate kena ngena, pediatlah ia lawes+ ku ja pe atena. Tapi ula dayaken kena ia, ula kasar kena man bana, sebap enggo permelaken kena ia.
15 “Adi lit dilaki si dua diberuna, janah sekalak ngenca atena si ngenana, jenari duana diberuna e melahirken anak dilaki, kepeken anak sintua lahir arah diberu si la atena ngena,+
16 sanga bagikenna warisenna man anak-anakna si dilaki, la banci berekenna warisen anak sintua man anak arah diberuna si ngena atena e, sebap e ngerugiken anak sintua arah diberuna si la atena ngena ndai.
17 Arus akuina maka anak arah diberu si la atena ngena ndai me anak sintua alu cara mereken dua kali lipat arah kerina si lit bas ia, sebap ia kap anakna si pertama lahir.* Baginna kap hak anak sintua.+
18 “Adi lit sekalak anak dilaki si keras kepala, ngelawani lalap, la patuh man bapakna ras mamakna,+ janah enggo usahaken orang tuana mpersingeti ia tapi la begikenna,+
19 arus baba bapakna ras mamakna ia ndahi peminpin-peminpin i gerbang kota,
20 janah nina man peminpin-peminpin kota e, ‘Anak kami enda keras kepala, ngelawani lalap, la megiken kata, rangap,+ janah pemabuk.’+
21 Kenca si e kerina kalak bas kota e arus mbenteri ia alu batu ngasa mate. Alu bage imasapken kena kai si jahat arah tengah-tengah kena nari, janah mbiar kerina kalak Israel megi kerna si e.+
22 “Adi lit kalak si ngelakoken dosa si erban ia arus ihukum mate jenari ibunuh+ ia janah igantung mayatna bas tiang,+
23 mayat e la banci pediat kena erberngi bas tiang e.+ Tapi, arus kuburken kena bas wari e, sebap kalak si igantung bas tiang, kena sumpah Dibata kap.+ Ula ban kena najis negri si bereken Jahwe Dibata kena jadi warisen man kena.+
Cataten i teruh
^ Ntah “pasangen.” Pasangen eme alat si biasa itama ku kuduk manusia ntah pe binatang guna maba baban.
^ Ntah “ia kap gegehna si tangtangna guna ngasilken keturunen.”
