Ulangen 22:1-30
22 “Adi idah kena lembu ntah pe biri-biri senina kena pulah, ula pediat kena saja.+ Arus ulihken kena asuh-asuhen e man senina kena e.
2 Adi ndauh ingan senina kena e ntah pe la tandai kena ia, arus baba kena asuh-asuhen e ku rumah kena seh ngasa darami senina kena e. Kenca si e arus ulihken kena asuh-asuhen e man bana.+
3 Bage si arus lakoken kena adi lit idat kena kelede, baju, ntah kai pe si bene jang senina kena. Ula pediat kena saja.
4 “Adi idah kena guling kelede ntah pe lembu senina kena bas dalan, ula pediat kena saja. Arus sampati kena ia ngangkat asuh-asuhen e.+
5 “Diberu la banci make baju dilaki, janah dilaki la banci make baju diberu. Sebap kalak si bage ciga ate Jahwe Dibata kena.
6 “Sanga kena bas perdalanen, adi idah kena asar perik bas batang kayu ntah pe bas taneh, janah bas asarna e lit anakna ntah pe naruhna, janah indungna sangana ngkeremken naruhna ntah pe anakna si kitik denga, ula tangkap kena indungna radu ras anak-anakna e.+
7 Anak-anakna banci tangkap kena, tapi indungna arus pulahi kena. Adi bage ban kena, sikap pagi pergeluh kena janah gedang umur kena.
8 “Adi mbangun rumah kena, arus ban kena pagar tembok i atap rumah kena,+ gelah kena ras keluarga kena la rutang dareh adi lit kalak si ndabuh arah atap rumah kena e.
9 “Ula suan kena dua jenis benih bas kebun anggur kena.+ Adi bage ban kena, kerina hasil arah benih si isuan kena eme hasil arah kebun anggur kena e ibereken man ingan si badia.
10 “Ula ban kena lembu ras kelede radu ras mbajak bas sada pasangen.*+
11 “Ula pake kena baju si iban arah campuren benang wol ras benang linen.+
12 “Banlah rumbai-rumbai bas pinggiren baju kena si arah teruh.+
13 “Adi lit sekalak dilaki ngempoi sekalak diberu jenari erhubungen seks ia ras, tapi dungna segat atena diberu e,
14 janah tuduhna diberu e ngelakoken perbahanen si la mehuli si erban mbau gelar diberu e, alu ngataken, ‘Enggo kuempoi diberu e, tapi sanga erhubungen aku ras ia, kepeken lanai ia perawan.’*
15 Bapak ras mamak diberu e arus mereken bukti man peminpin-peminpin i gerbang kota maka anakna e perawan denga.
16 Arus kataken bapak diberu e man peminpin-peminpin, ‘Enggo kubereken anakku jadi diberu dilaki e tapi dungna segat atena anakku e,
17 janah tuduhna anakku ngelakoken perbahanen si la mehuli alu ngataken, “Kepeken anakndu e lanai perawan.” Enda buktina maka anakku e perawan denga.’ Kenca si e arus kimbangken orang tua diberu e kain si jadi bukti i lebe-lebe peminpin-peminpin kota e.
18 Arus baba peminpin-peminpin kota+ e dilaki ndai janah ibereken man bana hukumen si mberat.+
19 Arus denda kalak e dilaki ndai 100 sekel* pirak janah sen e ibereken man bapak diberu ndai, sebap enggo pitnahna sekalak singuda-nguda Israel si perawan denga.+ Janah diberu e tetap jadi diberuna, la banci ceraikenna segedang geluhna.
20 “Tapi adi tuhu tuduhen dilaki e janah la lit buktina maka diberu e perawan denga,
21 arus baba kalak e diberu e ku pintu masuk rumah bapakna, janah kerina kalak si lit bas kota ingan diberu e tading arus mbenteri ia alu batu ngasa mate. Sebap perbahanen diberu e pemela-melaken,+ perban lakokenna perbahanen seks si salah* i rumah bapakna.+ Alu bage masapken kena kai si jahat arah tengah-tengah kena nari.+
22 “Adi lit dilaki si erhubungen seks ras diberu kalak si deban, duana kalak e arus mate, dilaki e ras diberu e.+ Arus masapken kena kai si jahat bas Israel nari.
23 “Adi lit sekalak singuda-nguda si enggo ertunangen, janah lit sekalak dilaki si njumpai ia bas kota jenari erhubungen seks dilaki e ras ia,
24 arus baba kena ia duana ku gerbang kota janah benteri ngasa mate. Diberu e ihukum mate perban la ia serko sanga ia i kota janah dilaki e pe ihukum mate perban permelakenna diberu kalak si deban.+ Alu bage masapken kena kai si jahat arah tengah-tengah kena nari.
25 “Tapi, adi lit sekalak dilaki jumpa ras sekalak singuda-nguda i darat kota janah diberu e enggo ertunangen, jenari perkosana diberu e, dilaki e arus mate.
26 Tapi, ula lakoken kai pe man diberu e. Diberu e la ngelakoken dosa si erban ia arus mate. Persoalen e seri ras persoalen sanga lit kalak si nyerang ras munuh kalak si deban.+
27 Sebap sanga jumpa dilaki e ras diberu e i darat kota, enggo serko singuda-nguda si enggo ertunangen e, tapi la lit si nelamatken ia.
28 “Adi lit sekalak dilaki si jumpa ras singuda-nguda si perawan denga janah lenga ertunangen, jenari paksana ras perkosana diberu e janah tereteh kalak e,+
29 dilaki si mperkosa diberu e arus mereken 50 sekel pirak man bapak diberu e.+ Arus ka empoina diberu e janah la banci ceraikenna segedang geluhna sebap enggo permelakenna ia.
30 “Ise pe la banci ngempoi diberu bapakna, gelah ula permelakenna bapakna.+
Cataten i teruh
^ Pasangen eme alat si biasa itama ku kuduk manusia ntah pe binatang guna maba baban.
^ Ntah “la kudat bukti maka ia perawan denga.”
^ Ntah “perban jadi pelacur ia.”