Ulangen 23:1-25
23 “Dilaki si enggo ikebiri si telor kelaminna enggo ihancurken ntah pe kelaminna ipotong, la banci jadi bagin umat Jahwe.+
2 “Anak haram la banci jadi bagin umat Jahwe.+ La lit sekalak pe arah keturunenna banci jadi bagin umat Jahwe.
3 “Kalak Ammon ntah pe kalak Moap la banci jadi bagin umat Jahwe.+ La lit sekalak pe arah keturunenna banci jadi bagin umat Jahwe,
4 perban la bereken kalak e pangan ras lau sanga kena ndarat arah Mesir nari,+ janah perban upahi kalak e Bilham anak Beor arah Petor si lit i Mesopotami guna numpahi kena.+
5 Jahwe Dibata kena la nggit megiken Bilham.+ Tapi perban keleng ate Jahwe Dibata kena man kena,+ ubah Jahwe Dibata kena sumpah e jadi pasu-pasu man kena.+
6 Segedang geluh kena, ula pernah sampati kalak e ntah pe erban makmur geluhna.+
7 “Ula segat ate kena kalak Edom, sebap senina kena kap kalak e.+
“Ula segat ate kena kalak Mesir, sebap pernah kena jadi kalak asing bas negrina.+
8 Keturunen kalak e si peteluken banci jadi bagin umat Jahwe.
9 “Sanga kena erkemah guna erperang ngelawan musuh-musuh kena, hati-hatilah gelah ula kena jadi najis.+
10 Adi lit sekalak dilaki si jadi najis perban ndarat air manina bas berngi wari,+ arus ia ndarat arah perkemahen janah lanai banci masuk mulihi.
11 Sanga nandangi berngi arus ia ridi, jenari kenca terbenam matawari banci ia masuk ku perkemahen.+
12 I darat perkemahen, arus lit ingan buang air besar. Adi buang air besar ate kena, arus kena ku je.
13 Bas peralaten kena, arus lit sekop. Sanga buang air besar ate kena, arus kurak kena lubang alu sekop e jenari tamburi kena kotoren kena e.
14 Sebap Jahwe Dibata kena erdalan i perkemahen+ kena guna nelamatken kena janah guna mereken musuh-musuh kena man kena, emaka perkemahen kena arus badia,+ alu bage la lit idahNa kai pe si la mehuli si erban kena itadingkenNa.
15 “Adi lit budak si kiam nadingken tuanna janah dahina kam, ula bereken budak e man tuanna.
16 Banci ia tading ras kena bas ingan si pilihna bas salah sada kota kena, i japa pe si meriah akapna. Ula ban si la mehuli man bana.+
17 “Ula sekalak pe anak kalak Israel jadi pelacur bas ingan-ingan ersembah,+ la soal anak diberu ntah pe anak dilaki.+
18 Ula ise pe maba sen guna nggalari pelacur diberu ntah pe sen guna nggalari* pelacur dilaki ku rumah Jahwe Dibata kena guna nepati janji kena, sebap duana e ciga ate Jahwe Dibata kena.
19 “Adi minjam senina kena man kena, la soal minjam sen, pangan, ntah kai pe, ula ban kena bungana.+
20 Adi man kalak asing banci ban kena bungana,+ tapi man senina kena ula.+ Alu bage, Jahwe Dibata kena masu-masu kena bas kerina pendahin kena bas negri si nandangi jadi jang kena.+
21 “Adi erjanji kena man Jahwe Dibata kena,+ mislah tepati kena.+ Sebap pasti tuntut Jahwe Dibata kena kerna si e man kena. Adi lang, erdosa kena.+
22 Tapi adi labo kena erjanji, labo kena erdosa.+
23 Kai si kataken kena arus lakoken kena,+ janah arus tepati kena janji kena si ipeseri ras persembahen sukarela man Jahwe Dibata kena.+
24 “Adi masuk kena ku kebun anggur kalak, banci pan kena buah anggurna seh ngasa puas, tapi la banci tama kena ku keranjang kena.+
25 “Adi masuk kena ku juma kalak janah lit i je gandum si lenga iperani, banci putikken kena gandumna tapi ula sabi kena.+
Cataten i teruh
^ Ntah “ntah pe penghasilen.”
