Ulangen 24:1-22
24 “Adi lit sekalak dilaki si ngempoi sekalak diberu janah lanai ia senang man diberu e perban lit datna si la mehuli bas diberu e, arus ban dilaki e surat cerai+ janah berekenna man diberu e jenari suruhna diberu e lawes rumahna nari.+
2 Kenca lawes diberu e arah rumah dilaki e nari, banci ia erjabu ras dilaki si deban.+
3 Adi segat ate dilakina si peduaken e man bana, janah ban dilakina e surat cerai, jenari berekenna man diberu e, dung e pelawesna ia arah rumahna nari, ntah adi mate dilakina si peduaken e,
4 dilakina si pertama si mpelawes ia ndai la banci ngempoi diberu e mulihi perban diberu e najis man dilaki e, sebap si e ciga ate Jahwe. Ula baba kena dosa ku negri si enggo bereken Jahwe Dibata kena jadi warisen man kena.
5 “Adi sekalak dilaki mbaru denga erjabu, la ia banci ikut erperang ntah pe ibereken tugas si deban. Arus ia bebas tugas setahun dekahna janah tetap ia i rumah ras banna meriah ukur diberuna.+
6 “Ula buat gilingen tan ntah pe batu gilingen si arah datas jadi jaminen utang,+ sebap e seri saja ras muat kesah* kalak jadi jaminen.
7 “Adi lit kalak si terdat nculik temanna kalak Israel janah kejam perbahanenna man bana jenari dayakenna ia,+ kalak si nculik e arus mate.+ Arus masapken kena kai si jahat arah tengah-tengah kena nari.+
8 “Adi lit wabah penakit kusta,* tuhu-tuhulah lakoken kerina petunjuk si iperentahken imam-imam Lewi.+ Tuhu-tuhulah lakoken kena bagi si kuperentahken man kalak e.
9 Ingetlah kai si enggo lakoken Jahwe Dibata kena man Miriam sanga kena bas perdalanen ndarat arah Mesir nari.+
10 “Adi bereken kena pinjamen man kalak,+ ula kena masuk ku rumahna muat jaminen si berekenna.
11 Arus timai kena i darat, janah kalak si minjam e si arus mereken jaminen e man kena.
12 Adi sangana ia susah, ula tahan kena bajuna si arah darat si berekenna jadi jaminen seh asa paginna.+
13 Sanga terbenam matawari arus ulihken kena kai si enggo berekenna jadi jaminen, gelah banci ia medem make baju e,+ jenari pasu-pasuna kena. Alu bage, benar perbahanen kena akap Jahwe Dibata kena.
14 “Ula tipu kena kalak upahen si susah bage pe si mesera, la soal ia senina kena ntah pe kalak asing si tading i negri kena, si lit bas kota-kota* kena.+
15 Arus bereken kena upahna tiap wari+ sope terbenam matawari, sebap susah akapna janah arapkenna kel upahna e. Adi lang, ngadu-ngadu pagi ia man Jahwe janah erdosa kena.+
16 “Sekalak bapak la banci ihukum mate perban kai si lakoken anakna, janah anak pe la banci ihukum mate perban kai si lakoken bapakna.+ Tiap kalak arus ihukum mate perban dosana sendiri.+
17 “Ula putarbalikken kena keadilen sanga ngadili penduduk asing ntah pe anak si la erbapa,*+ janah ula buat kena baju si arah darat bas janda nari jadi jaminen utangna.+
18 Ingetlah maka mbarenda pe kena jadi budak nge i Mesir janah kena enggo itebus Jahwe Dibata kena arah je nari.+ E me sebapna maka kuperentahken kena ngelakoken si e kerina.
19 “Adi perani kena juma kena janah tading ban kena sada iket arah si perani kena ndai, ula buat kena mulihi. Arus tadingken kena man penduduk asing, man anak si la erbapa, bage pe man janda,+ alu bage pasu-pasu Jahwe Dibata kena kerina si lakoken kena.+
20 “Adi enggo pekpeki kena dahan-dahan batang saitun kena guna muat buahna, ula nai pekpeki kena sekali nari. Pediatlah buah si tading e man penduduk asing, man anak si la erbapa, bage pe man janda.+
21 “Sanga pepulung kena buah anggur arah kebun anggur kena, ula buat kena mulihi buah anggur si tading. Pediatlah si tading e man penduduk asing, man anak si la erbapa, bage pe man janda.
22 Ingetlah maka kena pe mbarenda jadi budak i negri Mesir. E me sebapna kuperentahken kena ngelakoken si e.
Cataten i teruh
^ Ntah “kegeluhen.”
^ Bas bahasa Heber, kata si iterjemahken jadi “kusta” banci ngertiken erbage jenis penakit kulit si langket. Banci ka ngertiken jamur bas baju ntah pe bas rumah.
^ As. “gerbang-gerbang.”
^ Ntah “anak melumang.”
