Ulangen 25:1-19
25 “Adi lit dua kalak si ermasalah, banci jumpai kalak e hakim.+ Hakim pagi si ngadili kalak e. Kenca si e katakenna kalak si benar la ersalah tapi kalak si jahat ersalah.+
2 Adi patut kalak si jahat e ipekpeki,+ isuruh hakim e ia langkem* janah ipekpeki ia i lebe-lebe hakim e. Piga kali ia ipekpeki tergantung kejahaten si lakokenna.
3 Tapi ula lebih 40 kali ia ipekpeki.+ Adi ipekpeki ia lebih asa si e, mela pagi akapna ngidah kena.
4 “Ula tutupi babah lembu si sangana ngerik gandum.+
5 “Adi lit dua kalak si ersenina ras tading, jenari mate salah sada arah kalak e, tapi la lit anakna dilaki, diberu dilaki si mate e la banci erjabu ku keluarga si deban. Senina dilaki si mate e arus ndalanken tanggung jawapna man diberu e janah empoina ia.+
6 Anak sintua si lahirken diberu e nerusken gelar dilakina si mate ndai,+ alu bage gelarna la masap arah Israel nari.+
7 “Adi la nggit dilaki e ngempoi diberu e, diberu e arus lawes ndahi peminpin-peminpin bas gerbang kota janah nina, ‘Senina dilakiku la nggit nerusken gelar seninana bas Israel. La ia nggit ngelakoken tanggung jawapna janah la ia nggit ngempoi aku.’
8 Arus lebuh peminpin-peminpin kota dilaki e janah ngerana kalak e man bana. Adi tetap dilaki e la nggit ngempoi diberu ndai,
9 arus deheri diberu e dilaki ndai i lebe-lebe peminpin e, janah lepaskenna selop dilaki+ e jenari cidurina ayona, nina, ‘Bage si arus ilakoken man kalak si la nggit mereken keturunen man seninana.’
10 Kenca si e, gelar keluarga dilaki e* bas Israel iban jadi ‘Keluarga si ilepasken selopna.’
11 “Adi lit dua dilaki sangana rubati janah reh diberu salah sada dilaki e guna nampati dilakina arah serangen imbang dilakina e, jenari pecek diberu e alat kelamin imbang dilakina e,
12 arus ipotong kena tan diberu e. Ula ate kena mekuah man bana.
13 “Ula ban kena dua jenis batu timbangen bas kantong kena+ eme batu si galang ras batu si kitik.
14 Ula ban kena dua sukat-sukat* bas rumah kena,+ sada galang janah sada nari kitik.
15 Timbangen ras sukat-sukat kena arus pas ras benar, gelah gedang umur kena bas negri si bereken Jahwe Dibata kena man kena.+
16 Sebap kerina kalak si la jujur si ngelakoken si bage, ciga ate Jahwe Dibata kena.+
17 “Ingetlah kai si enggo lakoken kalak Amalek man kena sanga kena bas perdalanen ndarat arah Mesir nari.+
18 Ayakina kena bas perdalanen janah kerina si erdalan erpala-pala perban enggo latih janah ngalah akapna iserang kalak e arah pudi nari. Kalak e la mbiar man Dibata.
19 Sanga Jahwe Dibata kena mereken ketenangen arah kerina musuh si lit i sekeliling kena, eme bas negri si bereken Jahwe Dibata kena jadi warisen kena,+ arus kernepken kena kalak Amalek arah doni nari gelah ise pe lanai ngingetsa.+ Ula kena lupa.
