Ulangen 26:1-19
26 “Adi enggo masuk pagi kena ku negri si bereken Jahwe Dibata kena jadi warisen, janah enggo rebut kena ras tading kena i negri e,
2 buatlah hasil si pertama arah juma kena, si enggo pepulung kena arah negri si bereken Jahwe Dibata kena man kena. Kenca si e tamaken kerina bas keranjang jenari laweslah ku ingan si enggo pilih Jahwe Dibata kena guna gelarNa.+
3 Arus dahi kena imam si ertugas sanga si e janah kataken bana, ‘Gundari kukataken man Jahwe Dibatata maka enggo seh aku bas negri si enggo janjiken Jahwe alu sumpah man nini bulangta guna ibereken man banta.’+
4 “Kenca si e ibuat imam keranjang si baba kena e janah tamakenna bas ingan nutung* persembahen man Jahwe Dibata kena.
5 Kenca si e arus umumken kena i lebe-lebe Jahwe Dibata kena bagenda: ‘Nini bulangku eme kalak Aram si meriah kapna pindah-pindah.+ Lawes ia ku Mesir+ janah tading ia i je jadi kalak asing radu ras keluargana si sitik denga.+ Dungna jadi bangsa si mbelin ras megegeh ia bas ingan e.+
6 Tapi kejam kalak Mesir man kami janah tindasna kami, jenari paksana kami jadi budak.+
7 Emaka mindo penampat kami man Jahwe Dibata nini bulang kami, jenari begi Jahwe sora kami janah idahNa kesusahen kami, masalah kami, bage pe siksan si alami kami.+
8 Dungna baba Jahwe kami ndarat arah Mesir nari alu kuasaNa si luar biasa ras perbahanenNa+ si erban mbiar bage pe alu tanda-tanda ras mukjizat.+
9 Jenari babaNa kami ku ingan enda janah berekenNa negri enda man kami, eme negri si melala kel i je susu ras madu.+
10 Gundari, enggo kubaba hasil si pertama arah taneh si bere Jahwe man bangku.’+
“Arus tamaken kena e i lebe-lebe Jahwe Dibata kena jenari sujud kena i lebe-lebe Jahwe Dibata kena.
11 Perban Jahwe Dibata kena enggo mereken kerina si mehuli man kena ras keluarga kena, meriahlah ukur kena radu ras kalak Lewi bage pe penduduk asing si lit i tengah-tengah kena.+
12 “Kenca enggo dung buat kena sepersepuluh+ arah kerina hasil rani kena bas tahun si peteluken, eme tahun persepuluhen, si e arus bereken kena man kalak Lewi, penduduk asing, anak si la erbapa,* ras janda. Pan kalak e pagi si e seh ngasa besur bas kota-kota* kena.+
13 Kenca si e bagendalah ning kena i lebe-lebe Jahwe Dibata kena: ‘Enggo kupindahken bagin si badia e arah rumahku nari janah kubereken man kalak Lewi, penduduk asing, anak si la erbapa, ras janda,+ bagi si perentahkenNdu man bangku. La kulanggar janah la kulupaken perentahNdu.
14 Si e la kupan sanga aku erceda ate, la kupindahken sanga aku najis, janah la kubereken man kalak mate. Enggo kupatuhi kata-kata Jahwe Dibataku janah kulakoken kerina si perentahkenNdu man bangku.
15 Arah inganNdu si badia nari eme surga, nen min ku teruh. Pasu-pasu min umatNdu Israel bage pe negri si enggo berekenNdu man kami,+ negri si melala kel i je susu ras madu,+ bagi si enggo janjikenNdu man nini bulang kami.’+
16 “Bas wari enda, Jahwe Dibata kena merentahken kena guna ndalanken kerina peraturen ras undang-undang enda. Patuhi janah dalankenlah si e kerina alu bulat ukur+ ras asa gegeh kena.
17 Gundari, enggo dat kena jaminen arah Jahwe maka Ia jadi Dibata kena adi erdalan kena bas dalan-dalanNa, janah patuhi kena peraturenNa,+ perentah-perentahNa,+ ras undang-undangNa,+ janah adi begiken kena kataNa.
18 Gundari, Jahwe pe enggo dat jaminen arah kena maka jadi umatNa kena, jadi jangNa si istimewa,*+ bagi si enggo janjikenNa man kena, janah dalanken kena kerina si perentahkenNa.
19 Adi buktiken kena maka kena bangsa si badia man Jahwe Dibata kena,+ banNa pagi kena hebaten asangken kerina bangsa si enggo banNa.+ BanNa pagi kena ipuji, terkenal, ras imuliaken, bagi si enggo janjikenNa.”
