Ulangen 27:1-26
27 Kenca si e bereken Musa ras peminpin-peminpin Israel perentah man bangsa e, nina, “Patuhilah kerina perentah si kupeseh man kena bas wari enda.
2 Bas wari sebrangi kena Lau Jordan guna masuk ku negri si bereken Jahwe Dibata kena man kena, susunlah batu-batu si galang jenari lapisi alu plester.+
3 Kenca kena nyebrang, tuliskenlah kerina Undang-Undang e bas batu-batu ndai, alu bage banci kena masuk ku negri si bereken Jahwe Dibata kena man kena eme negri si melala kel i je susu ras madu, bagi si janjiken Jahwe Dibata nini bulang kena.+
4 Kenca sebrangi kena Lau Jordan, arus susun kena batu-batu e i Gunung Ebal+ janah lapisilah alu plester, bagi si kuperentahken wari enda.
5 Ban kena ka i je ingan nutung* persembahen man Jahwe Dibata kena, eme ingan nutung persembahen si iban arah batu-batu nari. Sanga erbanca, ula gunaken kena peralaten arah besi nari.+
6 Ingan nutung persembahen man Jahwe Dibata kena arus iban arah batu-batu si la ipahat janah i datasna persembahkenlah persembahen tutungen man Jahwe Dibata kena.
7 Arus persembahken kena korban persadan,+ jenari pan kenalah i je.+ Arus kena ermeriah ukur i lebe-lebe Jahwe Dibata kena.+
8 Tulislah alu jelas kerina Undang-Undang enda i datas batu-batu e.”+
9 Kenca si e, ngerana Musa bage pe imam-imam Lewi man kerina kalak Israel, nina, “O kalak Israel, perdiatekenlah janah begikenlah. Bas wari enda kena enggo jadi umat Jahwe Dibata kena.+
10 Arus begiken kena kata Jahwe Dibata kena janah dalankenlah perentah-perentahNa+ ras peraturen-peraturenNa, si enggo kupeseh man kena wari enda.”
11 Bas wari e bereken Musa perentah man bangsa e, nina,
12 “Kenca sebrangi kena Lau Jordan, suku-suku enda pagi si tetap tedis i Gunung Gerisim+ guna masu-masu bangsa enda, suku e eme: Simeon, Lewi, Juda, Isakar, Jusup, ras Benyamin.
13 Janah suku-suku si tetap tedis i Gunung Ebal+ guna numpahi eme: Ruben, Gat, Aser, Sebulon, Dan, ras Naptali.
14 Meganglah sora kalak Lewi ngerana man kerina kalak Israel, nina:+
15 “‘Kena sumpah pagi kalak si erban patung pahaten+ ntah pe patung arah logam nari+ bage pe kalak si munikenca. Ciga ate Jahwe kalak si erban si bage.’+ (Kerina bangsa e arus ngataken, ‘Amin!’*)
16 “‘Kena sumpah pagi kalak si la hamatina bapakna ntah pe mamakna.’+ (Kerina bangsa e arus ngataken, ‘Amin!’)
17 “‘Kena sumpah pagi kalak si mindahken batas taneh temanna.’+ (Kerina bangsa e arus ngataken, ‘Amin!’)
18 “‘Kena sumpah pagi kalak si erban kalak pentang jadi papak.’+ (Kerina bangsa e arus ngataken, ‘Amin!’)
19 “‘Kena sumpah pagi kalak si la adil keputusenna+ man penduduk asing, man anak si la erbapa,* bage pe man janda.’+ (Kerina bangsa e arus ngataken, ‘Amin!’)
20 “‘Kena sumpah pagi kalak si erhubungen seks ras diberu bapakna, sebap la hamatina bapakna.’+ (Kerina bangsa e arus ngataken, ‘Amin!’)
21 “‘Kena sumpah pagi kalak si erhubungen seks ras binatang.’+ (Kerina bangsa e arus ngataken, ‘Amin!’)
22 “‘Kena sumpah pagi kalak si erhubungen seks ras turangna, eme turangna anak bapakna ntah pe anak mamakna.’+ (Kerina bangsa e arus ngataken, ‘Amin!’)
23 “‘Kena sumpah pagi kalak si erhubungen seks ras mamina.’*+ (Kerina bangsa e arus ngataken, ‘Amin!’)
24 “‘Kena sumpah pagi kalak si erbuni-buni nyerang temanna janah bunuhna.’+ (Kerina bangsa e arus ngataken, ‘Amin!’)
25 “‘Kena sumpah pagi kalak si ngaloken upah guna munuh kalak si la ersalah.’+ (Kerina bangsa e arus ngataken, ‘Amin!’)
26 “‘Kena sumpah pagi kalak si la ngergai Undang-Undang enda janah la dalankenna.’+ (Kerina bangsa e arus ngataken, ‘Amin!’)
