Ulangen 28:1-68
28 “Adi tuhu-tuhu begiken kena kata Jahwe Dibata kena, eme alu tutus ndalanken kerina perentahNa si enggo kupeseh man kena bas wari enda, pasti hebaten pagi kena ban Jahwe Dibata kena asangken kerina bangsa i doni enda.+
2 Perban begiken kena kata Jahwe Dibata kena,+ kerina pasu-pasu enda reh ku kena janah la banci kena kiam arah e nari:
3 “Ipasu-pasu pagi kalak si lit i kota, janah ipasu-pasu pagi kalak si lit i juma.+
4 “Ipasu-pasu pagi anak-anak kena,+ hasil juma kena, anak asuh-asuhen kena, anak lembu kena, bage pe anak biri-biri kena.+
5 “Ipasu-pasu pagi keranjang kena+ bage pe ingan adonen roti kena.+
6 “Ipasu-pasu pagi kena ku ja pe kena lawes, janah ipasu-pasu kai pe si lakoken kena.
7 “Ban Jahwe pagi talu musuh-musuh si ngelawan kena.+ Serang kalak e kena arah sada arah, tapi kiam kalak e ku pitu arah.+
8 Pasu-pasu Jahwe pagi gudang-gudang kena+ ras kerina pendahin kena, janah pasti pasu-pasuNa kena bas negri si bereken Jahwe Dibata kena man kena.
9 Adi terus patuhi kena perentah Jahwe Dibata kena,+ janah erdalan kena bas dalan-dalanNa, pasti ban Jahwe kena jadi umatNa si badia, bagi si enggo janjikenNa alu sumpah man kena.+
10 Pasti pagi idah kerina bangsa i doni maka kena umat si maba gelar Jahwe,+ janah mbiar kalak e man kena.+
11 “Ban Jahwe pagi enterem anak-anak kena, banNa melala asuh-asuhen kena, janah melala hasil juma kena+ bas negri si janjiken Jahwe alu sumpah man nini bulang kena guna ibereken man kena.+
12 Buka Jahwe pagi gudang-gudangNa si dem isina, eme langit, guna mereken udan ku negri kena bas musimna+ janah pasu-pasuNa kerina si lakoken kena. Bereken kena pinjamen man melala bangsa tapi kena la perlu minjam.+
13 Adi terus patuhi kena perentah-perentah Jahwe Dibata kena si kupeseh man kena bas wari enda guna ipatuhi kena ras idalanken kena, ban Jahwe pagi kena jadi takal, labo jadi ikur, janah banNa kena i datas+ labo i teruh.
14 Ula kena nilah arah kata-kata si kupeseh bas wari enda. Ula kena nilah ku kanan ntah pe ku kiri,+ guna ngikutken ras nembah dibata-dibata si deban.+
15 “Tapi adi la begiken kena kata Jahwe Dibata kena, adi la diate kena kerina perentahNa bage pe peraturen-peraturenNa si enggo kupeseh man kena bas wari enda, kena sumpah pagi kena janah la kena banci kiam arah e nari. Enda kerina sumpah e:+
16 “Kena sumpah pagi kalak si lit i kota, janah kena sumpah pagi kalak si lit i juma.+
17 “Kena sumpah pagi keranjang kena+ bage pe ingan adonen roti kena.+
18 “Kena sumpah pagi anak-anak kena,+ hasil juma kena, anak asuh-asuhen kena, anak lembu kena, bage pe anak biri-biri kena.+
19 “Kena sumpah pagi kena ku ja pe kena lawes, janah kena sumpah pagi kai pe si lakoken kena.
20 “Perban la mehuli perbahanen kena janah perban tadingken kena Jahwe, kena sumpah pagi kena banNa, kacau pagi kena, janah ihukum pagi kena bas kerina pendahin kena seh asa kena ikernepken janah rempet kena bene.+
21 Ban Jahwe pagi kena lalap kena penakit seh ngasa kena kernepkenNa arah negri si nandangi rebut kena.+
22 Serang Jahwe pagi kena alu penakit TBC,* demam tinggi,+ bengkak, panas si luar biasa, pedang,+ angin si melas, ras hama jamur.+ Kerina e ngayaki kena seh ngasa kena kernep.
23 Langit kena jadi tembaga, janah taneh jadi besi.+
24 Penusur Jahwe pagi udan abu ras kersik arah langit ku negri kena seh asa kena kernep.
25 Ban Jahwe pagi kena italuken musuh-musuh kena.+ Serang kena pagi kalak e arah sada arah, tapi kiam pagi kena ku pitu arah. Ngeri pagi akap kerina kerajan i doni enda ngidah kena.+
26 Mayat-mayat kena jadi pangan perik-perik i langit ras pangan binatang i daraten, la pagi lit ise pe si erban perik-perik ras binatang e kiam perban mbiar.+
27 “Serang Jahwe pagi kena alu bisul Mesir, ambeien, ras erbage penakit kulit si la banci pepalem kena.
28 Ban Jahwe pagi kena adon, pentang,+ ras bingung.*
29 Paksa ciger, cidadap kena erdalan bagi kalak pentang cidadap bas kegelapen.+ Kai pe si lakoken kena la berhasil. Lalap kena itipu, irampok, janah la lit si nampati kena.+
30 Ertunangen kena ras sekalak diberu, tapi perkosa dilaki si deban ia. Bangun kena rumah tapi la kena si ngianisa.+ Suan kena anggur, tapi la pan kena buahna.+
31 Lembu kena igeleh i lebe-lebe kena, tapi la pan kena. Kelede kena itangko i lebe-lebe kena, tapi lanai iulihken man kena. Biri-biri kena ibereken man musuh-musuh kena, tapi la lit si nelamatkenca.
32 Anak-anak kena si dilaki ras si diberu ibereken man kalak si deban+ i lebe-lebe kena, janah tedeh kel ate kena kalak e, tapi la lit si banci lakoken kena.
33 Hasil juma kena bage pe kerina si hasilken kena, kalak si la tandai kena si manganisa,+ lalap kena itipu ras isiksa.
34 Adon pagi kena perban kai si idah kena.
35 “Serang Jahwe pagi kena alu bisul si mekelek si la terpepalem i nahe kena ras i tiwen kena, mulai ujung nahe kena seh ku takal kena.
36 Pelawes Jahwe pagi kena ras raja si pilih kena ku bangsa si la tandai kena ras si la tandai nini bulang kena.+ I je sembah kena pagi dibata-dibata si deban, eme dibata si iban arah kayu ras batu.+
37 Ngeri pagi akap kalak ngidah kena. Hina* kalak pagi kena janah tokohina i tengah-tengah bangsa si ku je kena pelawes Jahwe.+
38 “Melala pagi benih si suan kena bas juma, tapi sitik ngenca dat kena hasilna,+ sebap keri pan labang.
39 Suan kena pagi anggur janah urus kena, tapi la dat kena hasilna ntah pe la inem kena launa,+ sebap keri pan nipe-nipe.
40 Lit batang saitun kena bas kerina daerah kena, tapi la banci minaki kena daging kena alu minakna, perban ndabuhen buahna.
41 Lit anak kena dilaki ras diberu, tapi la banci tetap jadi jang kena, sebap itaban pagi kalak e.+
42 Kerina batang kayu kena ras hasil juma kena keri pangani serangga.
43 Penduduk asing si lit i tengah-tengah kena reh hebatna, tapi kena reh lemahna.
44 Bereken kalak e pinjamen man kena, tapi kena la mereken pinjamen man kalak e.+ Kalak e jadi takal, tapi kena jadi ikur.+
45 “Kerina sumpah e+ pasti reh man kena janah la kena banci kiam arah e nari seh ngasa kena kernep,+ sebap la begiken kena kata-kata Jahwe Dibata kena, la diate kena kerina perentahNa bage pe peraturen-peraturenNa si enggo kupeseh man kena.+
46 Kerina e lalap terjadi man kena bage pe man keturunen kena janah jadi tanda ras persinget seh rasa lalap,+
47 perban sanga la kena kurang kai pe, la meriah ukur kena ngelayani Jahwe Dibata kena.+
48 Ban Jahwe pagi kena iserang musuh-musuh kena, janah layani kena pagi kalak e+ sanga kena melihe,+ sanga kena muas, tilanjang, janah kade kena pe lanai lit. TamakenNa pagi pasangen* si iban arah besi nari ku kuduk kena seh asa kena ikernepkenNa.
49 “Ban Jahwe pagi bangsa si ndauh+ si reh arah ujung doni nari nyerang kena, janah la teh kena bahasana.+ Bangsa e bagi kuliki+ si nangkap mangsana.
50 Bangsa e kejam kel, la diatena si enggo metua janah la atena mekuah si nguda denga.+
51 Pan kalak e pagi asuh-asuhen kena bage pe hasil juma kena seh ngasa kena kernep. Baba kalak e pagi kerina biji-bijin* kena, lau anggur si mbaru, minak saitun si mbaru, anak lembu kena, ras anak biri-biri kena seh asa kernepken kalak e kena.+
52 Ikepung kalak e pagi kena janah ikurungna bas kerina kota* si lit i negri kena seh asa runtuh benteng-benteng si meganjang ras paguh si andalken kena. Pasti kepung kalak e pagi kena bas kerina kota si lit i negri kena si bereken Jahwe Dibata kena man kena.+
53 Sanga kena ikepung musuh, ngeri janah susah kel akap kena. Dungna terpaksa pan kena daging anak-anak kena,+ si enggo bereken Jahwe Dibata kena man kena.
54 “Dilaki si lembutna kel pe ras si biasana entabeh pergeluhna la tena mekuah man seninana, man diberuna si keleng atena, ntah pe man anak-anakna si lit denga.
55 La ia nggit mbagiken daging anak-anakna si nandangi panna e, sebap sanga kepung musuh kota-kota kena, ngeri janah susah kel akapna.+
56 Diberu si lembutna kel pe ras si biasana entabeh pergeluhna si la pernah ndedeh taneh perban manjana,+ lanai atena mekuah man dilakina si keleng atena ntah pe man anak-anakna,
57 bage pe man ari-ari si ndarat arah beltekna ras man anak-anak si lahirkenna. Erbuni-buni ia manca, perban sanga ikepung musuh kota-kota kena, ngeri kel akapna janah susah.
58 “Adi la ate kena tutus ndalanken kerina kata-kata si lit bas Undang-Undang si itulis bas buku enda,+ janah la kena mbiar man gelar Jahwe+ Dibata kena si mulia ras luar biasa,+
59 ban Jahwe pagi terjadi wabah penakit si mekelek man kena ras keturunen kena, wabah penakit si mekelek ras la erngadi-ngadi,+ bage pe penakit si ganas ras la malem-malem.
60 BanNa ka terjadi man kena kerina penakit Mesir si man kebiaren kena, janah penakit e la malem-malem.
61 Selain si e, ban Jahwe kerina penakit ntah wabah penakit si la tertulis bas buku Undang-Undang enda terjadi man kena, seh ngasa kena kernep.
62 Aminna pe kena enggo seh kel buena bagi bintang i langit,+ tapi jadi sitik pagi kena,+ perban la begiken kena kata Jahwe Dibata kena.
63 “Bagi riahna ukur Jahwe erban kena jadi enterem ras makmur, bage ka pagi riahna ukur Jahwe engkernepken kena ras nasapken kena. Ipedarat pagi kena arah negri si nandangi jadi jang kena.
64 “Ban Jahwe pagi kena merap ku kerina bangsa, arah ujung doni ku ujung doni.+ Sembah kena pagi i je dibata-dibata si iban arah kayu ras batu, si la pernah tandai kena ras si la tandai nini bulang kena.+
65 I tengah bangsa-bangsa e la lit dat kena kedamen+ ntah pe ingan istrahat man nahe kena. Ban Jahwe kena kuatir,+ banNa latih mata kena, janah banNa kena putus asa.+
66 Geluh kena lalap bas bahaya. Suari ras berngi mbiar pagi kena janah la banci pastiken kena selamat kena ntah lang.
67 Sanga erpagi-pagi, berngi min ate kena. Sanga berngi, erpagi-pagi min ate kena, perban mbiar kena janah perban kai si idah kena.
68 Amin pe enggo pernah kukataken maka lanai pagi idah kena Mesir, pasti baba Jahwe kena mulihi ku Mesir alu kapal. I je dayaken kena pagi diri kena man musuh kena jadi budakna, tapi la lit si nukursa.”
Cataten i teruh
^ Ntah “tuberkulosis.”
^ Ntah “serbut ukur kena.”
^ As. “Jadi kuan-kuan.”
^ Pasangen eme alat si biasa itama ku kuduk manusia ntah pe binatang guna maba baban.
^ As. “gerbang.”
