Ulangen 29:1-29
29 Selain erban perjanjin ras bangsa Israel i Horep,*+ suruh Jahwe ka Musa erban sada perjanjin nari ras bangsa e i Moap. SuruhNa Musa mpeseh kata-kata perjanjin e man bangsa e.
2 Emaka lebuh Musa kerina kalak Israel, nina man kalak e, “Enggo idah kena kerina si lakoken Jahwe man raja Mesir i Mesir, man kerina pelayanna, bage pe man negrina.+
3 Enggo idah kena ban Dibata melala tanda-tanda ras mukjizat si luar biasa guna ngukum kalak e.+
4 Tapi seh asa gundari, la bere Jahwe man kena pusuh guna ngangkai, mata guna ngenen, ras cuping guna megi.+
5 ‘Sanga Kutegu-tegu kena 40 tahun dekahna bas taneh mesawang,*+ baju kena la male janah selop si pake kena la ceda.+
6 La pan kena roti janah la inem kena lau anggur ntah kai pe si lit alkoholna, alu bage teh kena maka Aku kap Jahwe Dibata kena.’
7 Dungna seh kena bas ingan enda. Kenca si e, Sihon raja Hesbon+ ras Og raja Basan+ reh ndahi kita guna erperang, tapi sitaluken kalak e.+
8 Sibuat negri e janah sibereken jadi warisen man suku Ruben, suku Gat, ras setengah suku Manase.+
9 Emaka patuhi kerina si lit i bas perjanjin e janah dalankenlah, gelah kerina si lakoken kena berhasil.+
10 “Gundari, kerina kena tedis i lebe-lebe Jahwe Dibata kena, la soal peminpin suku kena, peminpin-peminpin, pengawas-pengawas, kerina dilaki bas Israel,
11 anak-anak, diberu kena,+ ras penduduk asing+ si lit i tengah-tengah kena si muat ranting ras si muat lau kena.
12 Pulung kena i jenda guna ngueken perjanjin si ban Jahwe Dibata kena alu sumpah, eme perjanjin si ban Jahwe Dibata kena ras kena wari enda.+
13 Alu bage banci Ia jadi Dibata kena,+ janah bas wari enda banNa kena jadi umatNa+ bagi janjiNa man kena bage pe sumpahNa man nini bulang kena Abraham,+ Isak,+ ras Jakup.+
14 “Perjanjin si iban alu sumpah e labo ras kena saja ngenca iban,
15 tapi termasuk ras kalak si tedis i lebe-lebe Jahwe bage pe keturunen si nandangi reh.*
16 (Enggo teh kena uga keadanta sanga kita tading i Mesir janah uga kita erdalan ngelewati erbage bangsa.+
17 Enggo idah kena kerina patung-patung bage pe berhala-berhala si erban ciga ate,*+ si ban kalak e arah kayu, batu, pirak, ras emas, si lit i tengah-tengah kalak e.)
18 Ula pernah lit dilaki, diberu, keluarga, ntah pe suku si nadingken Jahwe Dibatata guna ngelayani dibata-dibata bangsa e.+ Kalak si bage bagi urat si turah jadi sinuan-sinuan si pagit ras lit racunna i tengah-tengah kena.+
19 “Tapi adi lit si enggo megi sumpah enda janah sombong ia jenari nina bas pusuhna, ‘Labo pagi aku kaden pe amin gia kuikutken sura-sura pusuhku,’ e me si erban kai pe si lit bas dalanna hancur.
20 Labo pagi ampuni Jahwe ia.+ Tapi merawa kel Jahwe man bana, kerina sumpah si itulis bas buku enda terjadi man bana,+ masapken Jahwe pagi gelarna arah doni enda nari.
21 Pisahken Jahwe pagi ia arah kerina suku Israel janah susah ia perban kena sumpah si lit bas perjanjin si itulis bas buku Undang-Undang enda.
22 “Kerina keturunen anak-anak kena bage pe kalak asing bas negri si ndauh pasti ngidah bencana si ban Jahwe ku negri enda.
23 KirimNa pagi belerang, sira, ras api, emaka lanai pagi turah kai pe bas taneh, bagi si terjadi bas Sodom ras Gomora+ bage pe Adma ras Seboim,+ si hancurken Jahwe perban merawa kel Ia.
24 Tersungkun-sungkun pagi kalak e bage pe kerina bangsa, nina, ‘Engkai maka bage ban Jahwe man negri enda?+ Engkai maka merawa kel Ia?’
25 Kenca si e nina kalak ngaloisa, ‘Enda terjadi perban langgar kalak e perjanjinna ras Jahwe+ Dibata nini bulang kalak e, eme perjanjin si banNa ras kalak e sanga kalak e ndarat arah Mesir nari.+
26 Sembah kalak e dibata-dibata si deban janah sujud kalak e man bana. Dibata-dibata e la tandai kalak e janah larang Dibata kalak e nembahsa.+
27 Emaka merawa kel Jahwe janah banNa terjadi kerina sumpah si tertulis bas buku e man negri e.+
28 Perban merawa kel Jahwe man kalak e, cabutNa kalak e arah negri e nari+ janah ambekkenNa ku negri si deban eme ingan kalak e gundari.’+
29 “Kerina rahasia iteh Jahwe Dibatata+ tapi kerina si ateNa pebetehkenNa, percayakenNa man banta ras keturunenta seh rasa lalap, gelah sidalanken kerina Undang-Undang e.+
Cataten i teruh
^ Ntah “Gunung Sinai.”
^ Taneh si mbelang si jarang iingani.
^ As. “bage pe si la ras kita gundari.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
