Ulangen 3:1-29
3 “Kenca si e mutar balik kita, lawes kita arah Dalan Basan. Janah reh Og raja Basan ras kerina prajuritna njumpai kita guna erperang i Edrei.+
2 Emaka nina Jahwe man bangku, ‘Ula mbiar man bana, sebap Kubereken pagi ia ras kerina rakyatna bage pe negrina ku tanndu. Lakokenndu pagi man bana bagi si lakokenndu man Sihon raja kalak Amori si tading i Hesbon.’
3 Emaka Jahwe Dibatata nyerahken Og raja Basan bage pe kerina prajuritna ku tanta, janah sitaluken ia seh ngasa lanai lit sada pe si selamat.
4 Kenca si e sirebut kerina kotana. La lit sada pe si tading. Kerina kota si lit i daerah Argop lit 60 kota, eme daerah si iperentah Og raja Basan.+
5 Kerina kota e meganjang bentengna, lit gerbangna ras palang-palangna, janah melala ka kota si kitik.
6 Tapi kerina sikernepken+ bagi si enggo silakoken man Sihon raja Hesbon. Sikernepken kerina kotana, sikernepken kerina dilaki, diberu, bage pe anak-anak.+
7 Sibuati ka kerina asuh-asuhen ras barang-barang arah kota e.
8 “Paksa si e, sirebut negri e arah dua raja kalak Amori+ si tading bas daerah Lau Jordan, arah Lembah* Arnon nari seh ku Gunung Hermon+
9 (kalak Sidon nggelari gunung e Sirion, janah kalak Amori nggelarisa Senir),
10 kerina kota si lit bas dataren tinggi, kerina daerah Gileat, bage pe kerina daerah Basan seh ku Saleka ras Edrei,+ eme kota-kota si iperentah Og raja Basan.
11 Og raja Basan eme keturunen Repaim si terakhir. Ingan mayatna iban arah besi,* janah ingan e lit denga bas Raba kota kalak Ammon. Gedangna kira-kira empat meter janah belangna kira-kira dua meter* menurut ukuren si biasa.
12 Paksa si e, sirebut negri enda: arah Aroer+ si lit i Lembah* Arnon, ras setengah arah daerah pegunungen Gileat. Kota-kotana kubereken man suku Ruben ras suku Gat.+
13 Sisa daerah Gileat ras kerina daerah Basan si iperentah Raja Og enggo kubereken man setengah suku Manase.+ Kerina daerah Argop si lit i Basan e, mbarenda igelari negri kalak Repaim.
14 “Buat Jair+ kerina daerah Argop+ seh ku perbatasen daerah Gesur ras daerah Maakat+ (Jair e anak Manase). Kenca si e banna gelar kuta-kuta Basan bagi gelarna eme Hawot Jair,*+ seh asa gundari.
15 Gileat kubereken man Mahir.+
16 Man suku Ruben ras suku Gat+ kubereken daerah arah Gileat seh ku Lembah* Arnon si batasna bagin tengah lembah e, janah seh ku Jabok eme lembah si jadi batas daerah kalak Ammon.
17 Kubereken ka man kalak e daerah Araba, Lau Jordan, ras daerah perbatasen arah Kineret seh ku Laut Araba eme Laut Mati,* si lit i dasar lereng Pisga arah sebelah timur.+
18 “Kenca si e kubereken perentah enda man kena, ‘Jahwe Dibata kena enggo mereken negri enda guna irebut kena. Kerina dilaki si megegeh ersikap guna erperang ras nyebrang i lebe-lebe kalak Israel si debanna.+
19 Kalak si banci tetap tading bas kota-kota si enggo kubereken man kena eme diberu kena, anak-anak kena, ras asuh-asuhen kena (kuteh nge maka melala kel asuh-asuhen kena).
20 Lalap pagi bagenda seh ngasa ban Jahwe entabeh pergeluh senina-senina kena bagi si lakokenNa man kena, janah seh asa rebut kalak e negri si lit i sebrang Lau Jordan eme negri si bereken Jahwe Dibata kena man kalak e. Kenca si e maka banci kena masing-masing mulih ku taneh si enggo kubereken man kena.’+
21 “Paksa si e kubereken perentah enda man Josua,+ ‘Enggo idahndu kerina si lakoken Jahwe Dibata kena man dua raja e. Bage ka pagi si lakoken Jahwe man kerina kerajan si nandangi idahi kena.+
22 Ula kena mbiar man kalak e, sebap Jahwe Dibata kena kap si erperang guna kena.’+
23 “Paksa si e mindo kel aku man Jahwe, ningku,
24 ‘O Dibata Jahwe Si Meganjangna, enggo cidahkenNdu man budakNdu enda kemulianNdu ras kuasaNdu si mbelin.+ Bas langit ntah pe doni la lit dibata si banci ngelakoken perbahanen-perbahanen si hebat bagi si lakokenNdu.+
25 Pediat min kusebrangi Lau Jordan gelah kunen negri Libanon ras daerah pegunungen si mejile e.’+
26 Tapi merawa denga Jahwe man bangku perban kena.+ La Ia nggit megiken aku. Nina Jahwe man bangku, ‘Enggo bias, ula nai singetken kerna si e!
27 Nangkihlah kam ku puncak Pisga,+ tataplah ku barat, ku utara, ku selatan, ras ku timur. Tataplah negri e, sebap labo pagi kam ikut nyebrangi Lau Jordan e.+
28 Lantiklah Josua+ jadi peminpin, pegegehi ia, ban ia semangat, sebap ia pagi i lebe-lebe bangsa e sanga nyebrangi+ Lau Jordan, ia pagi si minpin kalak e guna ndatken negri si idahndu e.’
29 Kerina enda terjadi sanga kita tading i lembah si lit i lebe-lebe Betpeor.+
Cataten i teruh
^ Ntah banci saja “batu basal si mbiring.”
^ Ertina “Kuta-Kuta Perkemahen Jair.”
^ Ntah “Laut Garam.”
