Ulangen 30:1-20
30 “Sanga kerina kata-kata enda terjadi man kena, la soal e pasu-pasu ntah sumpah si enggo kupeseh,+ janah inget kena si e+ bas kerina bangsa ingan kena imerapken Jahwe Dibata kena,+
2 janah mulihken kena ku Jahwe Dibata kena+ ras anak-anak kena alu bulat ukur ras asa gegeh kena,+ jenari begiken kena kataNa bagi kerina si enggo kupeseh man kena bas wari enda,
3 Jahwe Dibata kena pasti maba kena mulih arah ingan kena itaban,+ mekuah ateNa man kena+ jenari pepulungNa kena mulihi arah erbage bangsa ingan kena imerapken Jahwe Dibata kena.+
4 Amin pe kena enggo merap seh ku ujung-ujung doni, pepulung Jahwe Dibata kena pagi kena arah je nari, dung e babaNa kena mulih.+
5 Jahwe Dibata kena maba kena pagi ku negri si irebut nini bulang kena, janah jadi jang kena pagi negri e. IbanNa pagi kena jadi makmur janah reh teremna, teremen asangken nini bulang kena.+
6 Jahwe Dibata kena mbersihken pusuh kena pagi bage pe pusuh keturunen kena,+ alu bage kelengi kena pagi Jahwe Dibata kena alu bulat ukur ras asa gegeh kena, janah banci pagi kena nggeluh.+
7 Kenca si e, iban Jahwe Dibata kena pagi kerina sumpah e terjadi man musuh-musuh si rate segat man kena ras si nyiksa kena.+
8 “Kenca si e mulihken pagi kena janah begiken kena kata Jahwe, jenari dalanken kena kerina perentah-perentahNa si enggo kupeseh man kena bas wari enda.
9 Jahwe Dibata kena erban kena berhasil bas kerina pendahin kena,+ banNa enterem anak-anak kena, melala banNa anak asuh-asuhen kena, janah mbue banNa hasil juma kena, sebap mulihi meriah akap Jahwe erban kena jadi makmur, bali bagi sanga meriah ukurNa ngenen nini bulang kena.+
10 Kenca si e, begiken kena pagi kata-kata Jahwe Dibata kena janah dalanken kena perentah-perentahNa bage pe peraturen-peraturenNa si tertulis bas buku Undang-Undang enda, janah mulihken kena ku Jahwe Dibata kena alu bulat ukur ras asa gegeh kena.+
11 “Perentah-perentah si kupeseh bas wari enda labo meserasa ngangkaisa ras ndalankenca.*+
12 Perentah-perentah e labo bas langit, emaka labo perlu sungkun kena, ‘Ise pagi si nangkih ku langit muatca, gelah banci sibegiken ras sidalanken?’+
13 Perentah-perentah e labo i sebrang laut, emaka labo perlu sungkun kena, ‘Ise pagi si nyebrangi laut muatca, gelah banci sibegiken ras sidalanken?’
14 Kata-kata e seh kel deherna ras kena, eme bas babah kena ras bas pusuh kena,+ gelah banci dalanken kena.+
15 “Bas wari enda, kubereken pilihen man kena, kegeluhen ntah kematen, si mehuli ntah si la mehuli.+
16 Adi begiken kena perentah Jahwe Dibata kena si kupeseh man kena bas wari enda, eme alu engkelengi Jahwe Dibata kena,+ erdalan bas dalan-dalanNa, matuhi perentah-perentahNa ras peraturen-peraturenNa, bage pe undang-undangNa, alu bage nggeluh kena+ janah reh teremna. Jahwe Dibata kena pasti masu-masu kena bas negri si nandangi jadi jang kena.+
17 “Tapi adi tadingken kena Dibata,+ la begiken kena Ia, jenari tergoda kena nembah ras sujud man dibata-dibata si deban,+
18 kernep pagi kena.+ La pagi gedang umur kena i negri si nandangi rebut kena kenca sebrangi kena Lau Jordan.
19 Enggo kubereken kena pilihen, eme kegeluhen ntah kematen, ipasu-pasu ntah isumpahi.+ Kuban langit ras doni jadi saksi kerna kai si lakoken kena. Pilihlah kegeluhen, gelah kena ras keturunen kena+ tetap nggeluh.+
20 Kelengilah Jahwe Dibata kena,+ begiken Ia, setialah man baNa,+ sebap Ia kap si mereken kegeluhen janah Ia si erban kena banci ndekah tading bas negri si janjiken Jahwe alu sumpah man nini bulang kena eme Abraham, Isak, ras Jakup.”+
Cataten i teruh
^ Ntah “labo meserasa ntah pe la terjaka.”
