Ulangen 31:1-30
31 Kenca si e lawes Musa janah pesehna kata-kata enda man kerina kalak Israel,
2 nina man kalak e, “Gundari umurku enggo 120 tahun.+ Lanai aku banci jadi peminpin kena, sebap nina Jahwe man bangku, ‘Labo pagi sebrangindu Lau Jordan.’+
3 Jahwe Dibata kena pagi si erdalan arah lebe-lebe kena sanga kena nyebrang, kernepkenNa pagi bangsa-bangsa enda i lebe-lebe kena, pelawes kena pagi kalak e.+ Bagi si kataken Jahwe, Josua pagi si minpin kena guna nyebrangisa.+
4 Ban Jahwe pagi man kalak e bagi si lakokenNa man Sihon+ ras Og+ eme raja-raja kalak Amori, bage pe man negrina sanga kernepkenNa kalak e.+
5 Taluken Jahwe pagi kalak e guna kepentingen kena, janah ban kena pagi man kalak e bagi kerina si kuperentahken man kena.+
6 Emaka perpanglah kena janah megegehlah.+ Ula kena mbiar perban kalak e, tenanglah kena,+ sebap Jahwe Dibata kena si maju ras kena. Pasti kena perdiatekenNa, labo kena tadingkenNa.”+
7 Lebuh Musa me Josua janah nina man bana i lebe-lebe kerina kalak Israel, “Perpanglah kam janah megegehlah,+ sebap kam pagi si maba bangsa enda ku negri si janjiken Jahwe alu sumpah man nini bulang kalak e guna ibereken man kalak e, kam pagi si mereken negri e man kalak e jadi warisen.+
8 Jahwe pagi si maju i lebe-lebendu, lalap pagi Ia ras kam.+ Pasti kam perdiatekenNa, labo kam tadingkenNa. Ula mbiar ntah pe gentar.”+
9 Kenca si e, tulis Musa Undang-Undang e+ jenari berekenna man imam-imam eme kalak Lewi si maba Peti Perjanjin* Jahwe, bage pe man kerina peminpin kalak Israel.
10 Nina Musa man kalak e, “Bas tiap akhir tahun pepituken, bas waktu si enggo itentuken bas tahun pembebasen,+ eme sanga Perayan Sapo-Sapo,+
11 sanga kerina kalak Israel lit i lebe-lebe Jahwe+ Dibata kena bas ingan si enggo pilihNa, arus bacaken kena Undang-Undang enda man kerina kalak Israel gelah begina.+
12 Pepulunglah bangsa e,+ si dilaki, si diberu, anak-anak,* bage pe kalak asing si lit bas kota-kota* kena, gelah banci begi kalak e Undang-Undang e ibacaken, gelah erlajar kalak e je nari, janah mbiar kalak e man Jahwe Dibata kena jenari dalankenna kerina kata-kata si lit bas Undang-Undang e.
13 Kenca si e, anak-anak kalak e si lenga meteh Undang-Undang e banci pagi begina.+ Banci ka ia erlajar mbiar man Jahwe Dibata kena sedekah kena nggeluh i negri si nandangi rebut kena, kenca sebrangi kena Lau Jordan.”+
14 Nina Jahwe man Musa, “Lanai ndekah mate me kam.+ Emaka lebuhlah Josua, babalah ia ku kemah perjumpan, gelah banci ia Kulantik jadi peminpin.”+ Emaka lawes Musa ras Josua ku kemah perjumpan.
15 Kenca si e reh Jahwe bas tiang embun, janah tiang embun e lit bas pintu masuk kemah e.+
16 Emaka nina Jahwe man Musa, “Lanai ndekah mate kam, janah mulai pagi bangsa enda nembah dibata-dibata si deban si lit i sekeliling kalak e bas negri si nandangi dahi kalak e.+ Tadingken kalak e pagi Aku,+ langgar kalak e pagi perjanjin si enggo Kuban ras kalak e.+
17 Sanga si e terjadi, merawa kel pagi Aku man kalak e,+ Kutadingken pagi kalak e,+ lanai Kutulihken+ seh ngasa kalak e kernep. Kenca melala masalah ras kesusahen terjadi man kalak e,+ ning kalak e pagi, ‘Masalah-masalah enda terjadi man banta perban Dibata lanai ras kita.’+
18 Tapi bas wari e, tetap pagi la Kutulihken kalak e perban kerina kejahaten si enggo lakoken kalak e, perban ikutken kalak e dibata-dibata si deban.+
19 “Gundari tulislah lagu enda+ janah ajarken man kalak Israel.+ Arus pelajari kalak e lagu enda gelah e jadi saksiKu guna ngelawan kalak Israel.+
20 Sanga Kubaba kalak e ku negri si Kujanjiken alu sumpah man nini bulang kalak e,+ eme negri si melala kel i je susu ras madu,+ ingan kalak e man seh asa besur janah mbur,*+ ikutken kalak e janah layanina pagi dibata-dibata si deban, la ergaina Aku janah langgarna perjanjinna ras Aku.+
21 Sanga melala masalah ras kesusahen terjadi man kalak e,+ lagu enda pagi si jadi saksina (sebap e la banci ilupaken keturunen kalak e), perban enggo Kuteh sura-sura kalak e+ amin pe kalak e lenga Kubaba ku negri si Kujanjiken alu sumpah.”
22 Emaka bas wari e tulisken Musa lagu e janah ajarkenna man kalak Israel.
23 Kenca si e lantikna* Josua+ anak Nun, nina, “Perpanglah kam janah megegehlah,+ sebap kam pagi si maba kalak Israel ku negri si Kujanjiken alu sumpah man kalak e.+ Lalap pagi Aku ras kam.”
24 Kenca dung tulis Musa kerina isi Undang-Undang e bas sada buku,+
25 nina Musa man kalak Lewi si maba Peti Perjanjin Jahwe,
26 “Buatlah buku Undang-Undang e+ janah tamaken i sebelah Peti Perjanjin+ Jahwe, e pagi si jadi saksi guna mbuktiken kesalahen kena.
27 Sebap enggo kuteh maka seh kel kena mekengna,+ meriah akap kena mberontak.+ Sanga nggeluh denga pe aku, ngelawan kena man Jahwe, apai ka pagi adi enggo mate aku!
28 Pepulunglah kerina peminpin suku ras peminpin-peminpin kena gelah begiken kalak e aku ngerana. Langit ras doni pagi si jadi saksi guna ngelawan kalak e.+
29 Kuteh maka kenca mate pagi aku pasti jahat perbahanen kena,+ lanai ikutken kena kai si enggo kuperentahken man kena. Pasti terjadi pagi masalah man kena+ perban lakoken kena kai si jahat i lebe-lebe Jahwe janah sakit hati ban kena Ia perban perbahanen kena.”
30 Kenca si e belasken Musa kerina isi lagu enda seh asa dung i lebe-lebe kerina kalak Israel:+
Cataten i teruh
^ Ntah “Peti Perpadanen.”
^ As. “anak-anak si kitik denga.”
^ As. “gerbang-gerbang.”
^ Ntah “makmur.”
^ Mungkin Dibata.
