Ulangen 4:1-49
4 “O Israel, begikenlah peraturen ras undang-undang si kuajarken man kena. Patuhilah kerina e gelah banci kena nggeluh+ janah masuk bage pe ngerebut negri si bereken Jahwe Dibata nini bulang kena man kena.
2 Ula tambahi ntah pe kurangi kena kata-kata si kuperentahken man kena,+ gelah banci patuhi kena perentah-perentah Jahwe Dibata kena si enggo kupeseh man kena.
3 “Enggo idah kena kai si lakoken Jahwe man kalak si nembah Baal i Peor. Jahwe Dibata kena enggo engkernepken kalak si ngikutken Baal Peor arah tengah-tengah kena nari.+
4 Tapi si tetap setia man Jahwe Dibata kena nggeluh denga seh ngasa wari enda.
5 Enggo kuajarken peraturen ras undang-undang man kena,+ bagi si perentahken Jahwe Dibataku, gelah banci patuhi kena kerina e bas negri si nandangi rebut kena.
6 Arus tuhu-tuhu patuhi kena kerina e.+ Alu bage kepentaren+ ras pengertin+ kena banci idah bangsa-bangsa si deban. Sanga begi bangsa-bangsa e kerna kerina undang-undang e, nina kalak e, ‘Bangsa si mbelin enda tuhu-tuhu bangsa si pentar janah lit pengertinna.’+
7 Sebap bangsa si mbelin si apai kin si dibatana ndeher ras ia, bagi Jahwe Dibatata si ndeher ras kita? Dibatata ndeher ras kita katawari pe Ia silebuh.+
8 Bangsa si mbelin si apai kin si adil peraturen ras undang-undangna bagi kerina Undang-Undang si kupeseh man kena wari enda?+
9 “Erjaga-jagalah kena janah hati-hati, gelah la lupaken kena kerina si enggo idah kena, gelah kerina e tetap lit bas pusuh kena segedang geluh kena. Arus kataken kena kerina e man anak-anak kena bage pe man kempu-kempu kena.+
10 Sanga tedis kena i lebe-lebe Jahwe Dibata kena i Horep,* nina Jahwe man bangku, ‘Pepulung bangsa e gelah begiken kalak e kata-kataKu.+ Alu bage erlajar kalak e mbiar man bangKu+ segedang geluh kalak e i doni, gelah banci ajari kalak e anak-anakna.’+
11 “Emaka deheri kena gunung e, tedis kena i teruhna. Gunung e gara, apina seh ku langit. Gelap bas gunung e janah lit embun mbiring si mekapal i je.+
12 Ngerana Jahwe arah api e.+ Begi kena kata-kataNa tapi la idah kena Ia bas bentuk kai pe,+ sora ngenca begi kena.+
13 Kenca si e pesehNa perjanjinNa man kena,+ si perentahkenNa gelah patuhi kena, eme Sepuluh Perentah.+ TulisNa kerina e bas dua lembar batu.+
14 Paksa si e, suruh Jahwe gelah kuajarken peraturen ras undang-undang e man kena. E me si arus patuhi kena bas negri si nandangi imasuki kena guna jadi jang kena.
15 “Emaka arus kena hati-hati sebap sanga ngerana Jahwe man kena arah tengah api i Horep,* la idah kena bentuk kai pe.
16 Ula kena erdosa alu erban patung bas bentuk kai pe, si mirip bagi dilaki ntah pe diberu,+
17 si mirip bagi binatang kai pe si lit i doni ntah pe si mirip bagi perik kai pe si kabang i langit,+
18 si mirip bagi binatang kai pe si njoler bas taneh ntah bagi ikan kai pe si lit bas lau.+
19 Sanga tatap kena ku langit janah idah kena matawari, bulan, bintang, ras kerina si lit i je, ula kena tergoda sujud ras nembah kerina e,+ si enggo bereken Jahwe man kerina bangsa si lit i teruh langit.
20 Tapi kena kap kalak si buat Jahwe ras si babaNa ndarat arah Mesir eme ingan ngelebur besi, guna jadi umatNa+ bagi si terjadi wari enda.
21 “Merawa Jahwe man bangku gara-gara kena,+ ersumpah Ia maka la kusebrangi Lau Jordan, la aku masuk ku negri si mejile si bereken Jahwe Dibata kena man kena jadi warisen.+
22 Mate pagi aku i negri enda. Labo pagi kusebrangi Lau Jordan,+ tapi kena, sebrangi kena janah rebut kena pagi negri si mejile e.
23 Hati-hati kena, ula lupaken perjanjin si ban Jahwe Dibata kena ras kena.+ Ula ban kena patung bas bentuk kai pe bagi si enggo ilarang Jahwe Dibata kena.+
24 Jahwe Dibata kena bagi api si engkernepken,+ Ia saja ngenca ateNa isembah.+
25 “Adi enggo lit anak-anak kena ntah pe kempu kena janah enggo ndekah kena tading i negri e, kenca si e erdosa kena alu erban patung bas bentuk+ kai pe, janah lakoken kena kai si jahat akap Jahwe Dibata kena si erban nembeh ateNa,+
26 labo kena ndekah tading i je, mis pagi kena ikernepken.+ Bas wari enda, kuban langit ras doni jadi saksi ngelawan kena maka pasti janah mis kena ikernepken arah negri si enggo irebut kena kenca sebrangi kena Lau Jordan.
27 Pasti ban Jahwe kena merap i tengah bangsa-bangsa.+ Kenca pelawes Jahwe kena, sitik nari ngenca kena si selamat.+
28 I je layani kena dibata-dibata si iban manusia arah kayu ras batu+ si la banci ngidah, megi, man, bage pe nganggeh.
29 “Tapi adi darami kena Jahwe Dibata kena alu bulat ukur ras asa gegeh kena,+ pasti jumpa kena ras Ia.+
30 Sanga terjadi si e kerina janah susah kel akap kena, mulih kena ku Jahwe Dibata kena janah begiken kena kata-kataNa.+
31 Sebap Jahwe Dibata kena Dibata si perkuah kap.+ La tadingkenNa kena, la kena kernepkenNa, janah la lupakenNa perjanjin si enggo banNa ras nini bulang kena.+
32 “Gundari cuba ukuri kena jaman si nai sope lenga kena lit, eme sanga manusia iciptaken Dibata i doni. Cuba darami arah ujung langit ku ujung langit, pernah kin kejadin si hebat enda terjadi? Pernah kin begi kalak si bagenda?+
33 Lit kin bangsa si bagi kena si pernah megi sora Dibata ngerana arah api nari tapi tetap nggeluh?+
34 Ntah pernah kin cubaken Jahwe Dibata kena milih sada bangsa arah kerina bangsa si deban guna jadi jangNa, bagi si lakokenNa man kena i Mesir? I lebe-lebe kena banNa hukumen, tanda-tanda, mukjizat-mukjizat,+ perang,+ cidahkenNa kuasaNa+ ras gegehNa si mbelin bage pe perbahanenNa si erban mbiar.+
35 Kerina e enggo terjadi i lebe-lebe kena gelah teh kena maka Jahwe ngenca Dibata si benar,+ la lit Dibata si deban selain Ia.+
36 BanNa terbegi soraNa arah langit nari guna ngajarken kena gelah patuh man baNa. Bas doni, banNa idah kena apiNa si mbelin bage pe banNa begi kena kata-kataNa arah api e nari.+
37 “Perban keleng ateNa nini bulang kena janah enggo pilihNa keturunen kalak e,+ arak-arakNa kena sanga babaNa kena ndarat arah Mesir nari alu kuasaNa si mbelin.
38 PelawesNa bangsa si belinen ras gegehen asangken kena arah lebe-lebe kena nari, gelah babaNa kena masuk ku negri kalak e janah berekenNa negri e jadi warisen man kena, bagi si terjadi wari enda.+
39 Emaka wari enda, ingetlah janah ula pernah lupaken kena, Jahwe kap Dibata si benar si lit i langit ras i doni.+ La lit Dibata si deban.+
40 Arus patuhi kena peraturen-peraturenNa ras perentah-perentahNa si kupeseh wari enda, gelah sikap pergeluh kena bage pe keturunen kena, janah gelah ndekah kena tading bas negri si bereken Jahwe Dibata kena.”+
41 Paksa si e, pilih Musa telu kota i sebelah timur Lau Jordan.+
42 Adi lit kalak si la sengaja munuh temanna janah labo perban segat atena,+ arus ia kiam ku salah sada kota e gelah tetap nggeluh.+
43 Kota si ipilih man suku Ruben eme Beser+ si lit i taneh mesawang* i dataren tinggi. Kota si ipilih man suku Gat eme Ramot+ i Gileat. Kota man suku Manase+ eme Golan+ si lit i Basan.
44 Enda ndai me Undang-Undang+ si bereken Musa man kalak Israel.
45 Enda ndai me penginget, peraturen, ras undang-undang si bereken Musa man kalak Israel kenca kalak e ndarat arah Mesir,+
46 sanga kalak e i daerah Lau Jordan, bas lembah si lit i lebe-lebe Betpeor,+ eme negri Sihon raja kalak Amori si tading i Hesbon.+ Raja e italuken Musa ras kalak Israel kenca ndarat kalak e arah Mesir.+
47 Rebut kalak e negrina ras negri Og+ raja Basan, eme dua raja kalak Amori si lit i sebelah timur Lau Jordan.
48 Negri e mulai Aroer+ nari si lit i tepi Lembah* Arnon seh ku Gunung Sion eme Gunung Hermon,+
49 termasuk kerina Araba i sebelah timur Lau Jordan seh ku Laut Araba* i dasar lereng Pisga.+
Cataten i teruh
^ Ntah “Gunung Sinai.”
^ Ntah “Gunung Sinai.”
^ Taneh si mbelang si jarang iingani.
^ Maksudna, Laut Garam ntah pe Laut Mati.
