Ulangen 5:1-33
5 Kenca si e lebuh Musa kalak Israel, nina man kalak e, “O Israel, begikenlah peraturen ras undang-undang si kupeseh man kena wari enda. Arus pelajari kena e janah tutus ate kena ndalankenca.
2 Ban Jahwe Dibatata perjanjin ras kita i Horep.*+
3 Perjanjin e labo ban Jahwe ras nini bulangta, tapi ras kita kerina si nggeluh denga bas wari enda.
4 Jahwe langsung ngerana ras kena arah api i gunung e.+
5 Paksa si e aku lit i antara kena ras Jahwe+ guna mpeseh kata-kata Jahwe man kena, perban mbiar kena man api e janah la kena nangkih ku gunung e.+ Nina Dibata,
6 “‘Aku kap Jahwe Dibata kena, si maba kena ndarat arah Mesir nari, arah ingan kena iperbudak.+
7 Aku saja ngenca si arus sembah kena. Ula ndigan pe sembah kena dibata-dibata si deban.+
8 “‘Ula ban kena patung ntah kai pe si bentukna+ mirip ras kai pe si lit i langit, i doni, ras si lit bas lau.
9 Ula kena sujud ntah pe tergoda nembah man bana.+ Sebap Aku kap Jahwe Dibata kena, Aku saja si arus sembah kena.+ Adi lit kalak si rate segat man bangKu, Kupediat pagi anak-anakna seh ku keturunenna si peteluken ras si peempatken dat akibat arah dosa-dosana.+
10 Tapi, Kubuktiken pagi kekelengenKu si setia man kalak si engkelengi Aku ras si patuh man perentah-perentahKu seh ku keturunenna si peseribuken.
11 “‘Ula gunaken gelar Jahwe Dibata kena alu sembarangen,+ perban ise pe si nggunaken gelarNa alu sembarangen pasti hukum Jahwe.+
12 “‘Dalankenlah wari Sabat, pebadialah wari e, bagi si perentahken Jahwe Dibata kena man kena.+
13 Enem wari dekahna kena erdahin.+
14 Tapi wari si pepituken eme wari Sabat man Jahwe Dibata kena.+ Bas wari e, la kena banci erdahin,+ termasuk anak-anak kena si dilaki ras si diberu, budak kena si dilaki ras si diberu, lembu kena, kelede kena, asuh-asuhen kena, bage pe penduduk asing si tading bas kota* kena.+ Alu bage kerina budak kena banci istrahat bagi kena.+
15 Ingetlah maka mbarenda pe budak nge kena i negri Mesir janah Jahwe Dibata kena enggo maba kena ndarat i je nari alu gegeh ras kuasaNa si mbelin.+ E me sebapna maka Jahwe Dibata kena nuruh kena ndalanken wari Sabat.
16 “‘Hamatilah bapak kena ras mamak kena,+ bagi si perentahken Jahwe Dibata kena, gelah gedang umur kena janah sikap pergeluh* kena bas negri si bereken Jahwe Dibata kena man kena.+
17 “‘Ula kena munuh.+
18 “‘Ula kena erlua-lua.+
19 “‘Ula kena nangko.+
20 “‘Ula ban kena tuduhen palsu kerna kalak si deban.+
21 “‘Ula kena merhat nandangi diberu kalak.+ Ula kena merhat nandangi rumah kalak ntah pe jumana, budakna si dilaki, budakna si diberu, lembuna, keledena, ntah kai pe si lit bas kalak si deban.’+
22 “Perentah-perentah enda kap si kataken Jahwe man kena kerina sanga kena pulung i teruh gunung e. Ngerana Ia man kena alu sora si megang arah api ras embun si mekapal janah la lit si tambahiNa.+ Kenca si e tuliskenNa kerina e bas dua lembar batu jenari berekenNa man bangku.+
23 “Tapi kenca begi kena sora arah embun mbiring si mekapal e, sanga gara gunung e iban api,+ kerina kepala suku kena ras kerina peminpin kena reh ndahi aku.
24 Kenca si e nina kalak e, ‘Jahwe Dibatata enggo ncidahken kemulianNa ras kuasaNa man banta janah soraNa terbegi arah api e.+ Wari enda enggo siteh maka manusia banci tetap nggeluh amin pe ngerana ia ras Dibata.+
25 Tapi la ate kami mate, sebap banci kami tertutung api si gurlah e. Adi terus begiken kami sora Jahwe Dibatata pasti kami mate.
26 Lit kin manusia si bagi kita, si tetap nggeluh amin pe enggo sibegi Dibata si nggeluh ngerana arah api nari?
27 Kam sajalah lawes ku jah guna megiken kerina si kataken Jahwe Dibatata. Kam pagi si mpesehsa man kami kerna kerina si kataken Jahwe Dibatata. Begiken kami nge pagi ras dalanken kami.’+
28 “Begi Jahwe kerina si kataken kena e, nina Jahwe man bangku, ‘Enggo Kubegi kerina si kataken kalak e man bandu. Payo si kataken kalak e.+
29 Adi terus kalak e mbiar man bangKu arah pusuhna nari+ janah patuh man perentah-perentahKu,+ sikap pagi pergeluh kalak e bage pe keturunenna seh rasa lalap.+
30 Suruhlah kalak e mulih ku kemahna.
31 Tapi kam arus tading i jenda ras Aku gelah Kukataken kerina perentah, peraturen, ras undang-undang si arus ajarkenndu man kalak e. Kerina e arus dalanken kalak e bas negri si nandangi Kubereken man bana.’
32 Pastikenlah maka kerina e arus dalanken kena bagi si perentahken Jahwe Dibata kena man kena.+ Arus patuhi kena perentah-perentah e.+
33 Arus kena erdalan bas dalan si kataken Jahwe Dibata kena man kena,+ gelah banci kena nggeluh janah sikap pergeluh kena bage pe gedang umur kena bas negri si nandangi rebut kena.+
