Ulangen 6:1-25
6 “Enda perentah, peraturen, ras undang-undang si bereken Jahwe Dibata kena guna ngajari kena. Arus patuhi kena kerina e bas negri si nandangi rebut kena kenca kena nyebrang.
2 Alu bage, mbiar kena man Jahwe Dibata kena janah patuhi kena kerina peraturen ras perentahNa si kupeseh man kena, man anak kena, bage pe man kempu kena+ segedang geluh kena, gelah gedang umur kena.+
3 O Israel, arus begiken kena ras tutus ate kena matuhisa gelah sikap pergeluh kena janah jadi enterem kel kena i negri si melala kel i je susu ras madu, bagi si janjiken Jahwe Dibata nini bulang kena man kena.
4 “O Israel, begikenlah: Jahwe kap Dibatata, Jahwe e sada ngenca.+
5 Arus kelengi kena Jahwe Dibata kena alu kerina pusuh kena, kegeluhen kena,+ ras gegeh kena.+
6 Kata-kata si kupeseh wari enda arus lit bas pusuh kena,
7 arus ulih-ulihi kena ngajarkenca man anak-anak kena.+ Cakapkenlah e sanga kundul i rumah, sanga bas perdalanen, sanga nandangi medem, ras sanga kena medak.+
8 Iketkenlah e bas tan kena bage pe perdempaken* kena guna jadi penginget man kena.+
9 Tuliskenlah e bas kusen pintu rumah kena bage pe bas gerbang kena.
10 “Jahwe Dibata kena enggo erjanji alu sumpah man nini bulang kena Abraham, Isak, ras Jakup, guna mereken ras maba kena+ ku negri si melala i je kota si galang ras mejile, si labo kena mbangunsa.+
11 Rumah-rumah si lit i je dem barang-barang si mejile si labo kena erbanca. Lit ka i je sumur* si labo kena nggalisa, kebun-kebun anggur ras batang-batang saitun si labo kena nuanca, janah man kena ngasa besur.+
12 Paksa si e ula sempat lupaken kena Jahwe,+ si maba kena ndarat arah Mesir nari, arah ingan kena iperbudak.
13 Arus kena mbiar man Jahwe Dibata kena,+ arus layani kena Ia.+ Adi ersumpah kena, ersumpahlah bas gelarNa.+
14 Ula ikutken kena dibata-dibata si deban eme dibata-dibata kalak si lit i sekeliling kena,+
15 sebap Jahwe Dibata kena si lit i tengah-tengah kena eme Dibata si Ia saja ngenca ateNa isembah.+ Adi la bage ban kena, merawa kel Jahwe+ Dibata kena janah kernepkenNa kena arah doni enda nari.+
16 “Ula cubai kena Jahwe Dibata kena,+ bagi si lakoken kena i Masa.+
17 Arus tuhu-tuhu patuhi kena perentah Jahwe Dibata kena, bage pe penginget ras peraturen si perentahkenNa guna ipatuhi kena.
18 Arus lakoken kena kai si benar ras si mehuli akap Jahwe, gelah sikap pergeluh kena janah banci kena masuk ras ngerebut negri si mejile si janjiken Jahwe alu sumpah man nini bulang kena.+
19 Pelawes kena pagi kerina musuh kena arah lebe-lebe kena nari, bagi si janjiken Jahwe.+
20 “Adi sungkun anak-anak kena pagi kena, ‘Engkai maka Jahwe Dibatata mereken penginget, peraturen, ras undang-undang enda?’
21 Arus bagenda ning kena, ‘Mbarenda, kita jadi budak raja Mesir* i Mesir, tapi baba Jahwe kita ndarat arah Mesir nari alu tanNa si megegeh.
22 I lebe-lebe matata, terus ban Jahwe tanda ras mukjizat si hebat ras si ncedai man kalak Mesir,+ man raja Mesir, ras man kerina si lit bas rumahna.+
23 Jenari babaNa kita ndarat jah nari ku jenda gelah berekenNa man banta negri si enggo janjikenNa alu sumpah man nini bulangta.+
24 Kenca si e perentahken Jahwe kita gelah sidalanken kerina peraturen enda janah mbiar man Jahwe Dibatata guna kiniulinta seh rasa lalap.+ Alu bage banci kita tetap nggeluh+ bali bagi wari enda.
25 Adi sipatuhi Jahwe Dibatata janah tutus ateta matuhi kerina perentahNa, ngena ateNa kita.’+
Cataten i teruh
^ As. “i antara mata.”
^ Maksudna, lubang guna nimpan lau.
^ As. “Paro; Firaun.” Penggelaren man raja Mesir.
