Ulangen 7:1-26
7 “Sanga Jahwe Dibata kena maba kena ku negri si nandangi imasuki ras irebut kena,+ pelawesNa pitu bangsa si teremen ras gegehen asangken kena+ arah lebe-lebe kena nari.+ Kalak e eme kalak Het, kalak Girgasi, kalak Amori,+ kalak Kanaan, kalak Peris, kalak Hewi, ras kalak Jebusi.+
2 Jahwe Dibata kena mereken kalak e man kena janah taluken kena kalak e.+ Arus pagi kernepken kena kalak e.+ Ula ban kena perjanjin ras kalak e janah ula ate kena mekuah man kalak e.+
3 Ula ban kena hubungen ras kalak e arah perjabun. Ula bere kena anak kena si diberu erjabu ras anakna si dilaki, ula bere kena anak kena si dilaki erjabu ras anakna si diberu.+
4 Sebap banna pagi anak-anak kena lanai ngelayani Dibata janah sembahna dibata-dibata si deban.+ Alu bage merawa kel Jahwe man kena janah mis kena kernepkenNa.+
5 “Enda si arus lakoken kena: Runtuhkenlah ingan nutung* persembahen kalak e, hancurken tugu-tuguna si badia+ ras tiang-tiangna si badia,*+ janah tutung patung-patungna.+
6 Sebap kena kap bangsa si badia man Jahwe Dibata kena. Arah kerina bangsa si lit i doni, kena kap umatNa si istimewa* si pilih Jahwe Dibata kena arah kerina bangsa.+
7 “Keleng ate Jahwe man kena, pilihNa kena labo perban kena si enteremna i antara kerina bangsa,+ situhuna kena nge si sitikna.+
8 Tapi perban keleng ate Jahwe man kena, tepatiNa ateNa janjiNa man nini bulang kena,+ baba Jahwe kena ndarat alu tanNa si megegeh guna nebus kena arah ingan perbudaken,+ eme arah kuasa* raja Mesir.
9 Enggo tuhu-tuhu teh kena maka Jahwe Dibata kena e Dibata si benar, Dibata si setia, Dibata si nepati janji, janah buktikenNa kekelengenNa si setia man kalak si engkelengi Ia ras si patuh man perentah-perentahNa seh ku keturunenna si peseribuken.+
10 Tapi balasNa kalak si rate segat man baNa janah kernepkenNa.+ Mis hukumNa kalak si rate segat man baNa janah balasNa kalak e.
11 Emaka tutuslah ate kena ndalanken perentah-perentah, peraturen-peraturen, ras undang-undang si kubereken man kena wari enda.
12 “Adi lalap begiken kena undang-undang enda janah patuhi kena ras dalanken kena, tepati Jahwe Dibata kena pagi janjiNa janah buktikenNa kekelengenNa si setia bagi si janjikenNa man nini bulang kena.
13 KelengiNa ras pasu-pasuNa kena, banNa kena jadi enterem. BanNa enterem anak-anak kena,+ mbue hasil taneh kena, biji-bijin* kena, anggur kena si mbaru, minak,+ bage pe anak lembu kena ras anak biri-biri kena i negri si janjiken Dibata alu sumpah man nini bulang kena guna ibereken man kena.+
14 Kena si mbuena dat pasu-pasu i antara kerina bangsa.+ La lit diberu ntah pe dilaki si mandul i antara kena, termasuk asuh-asuhen kena.+
15 Pasti masapken Jahwe kerina penakit arah kena nari. Kerina penakit si mekelek si idah kena bas Mesir,+ la banNa terjadi man kena tapi terjadi man kalak si rate segat man kena.
16 Kernepkenlah kerina bangsa si serahken Jahwe Dibata kena man kena.+ Ula ate kena mekuah man kalak e,+ ula sembah kena dibata-dibata kalak e,+ perban e banci jadi siding man kena.+
17 “Banci saja tersungkun-sungkun kena bas pusuh kena, ‘Bangsa-bangsa e teremen asangken kami, ngasup kin kami mpelawes kalak e?’+
18 Tapi ula kena mbiar man kalak e.+ Ingetlah kai si enggo lakoken Jahwe Dibata kena man raja Mesir bage pe man kerina kalak Mesir.+
19 Ingetlah uga Jahwe enggo erban hukumen si mberat man kalak e. Enggo banNa tanda-tanda, mukjizat-mukjizat,+ gunakenNa tanNa si megegeh ras kuasaNa i lebe-lebe kena guna maba kena ndarat i je nari.+ Bage ka pagi ban Jahwe Dibata kena man bangsa-bangsa si erban kena mbiar.+
20 Ban Jahwe Dibata kena kalak e lanai semangat* janah kernepkenNa kalak si tading denga+ bage pe kalak si cebuni.
21 Ula kena mbiar perban kalak e, sebap Jahwe Dibata kena ras kena kap.+ Ia Dibata si hebat ras luar biasa.+
22 “Bangsa-bangsa e pasti ipelawes Jahwe Dibata kena arah lebe-lebe kena alu manjar-anjar.+ Labo pediatNa kernepken kena kalak e sekaligus, gelah ula reh buena binatang buas si banci erban kena bahaya.
23 Jahwe Dibata kena pasti mereken kalak e man kena janah talukenNa ras kernepkenNa pagi kalak e seh ngasa keri.+
24 SerahkenNa raja-raja kalak e man kena,+ masapken kena pagi gelar kalak e arah doni enda nari.+ La lit ise pe si ngasup ngelawan kena.+ Kernepken kena pagi kalak e kerina.+
25 Tutunglah kerina berhala kalak e.+ Ula ate kena morah man emas ras pirak si lit bas berhala-berhala e,+ sebap e banci jadi siding man kena. Ula buat kena berhala-berhala kalak e, sebap ciga ate Jahwe Dibata kena nandangi kerina e.+
26 Ula baba kena ku rumah kena barang kai pe si erban ciga ate Dibata. Adi baba kena pasti kena ikernepken bagi barang-barang e. Arus segat ate kena barang-barang e ras cigalah ate kena, sebap barang-barang si bage arus ikernepken.
Cataten i teruh
^ Ntah “umatNa si keleng ateNa.”
^ As. “tan.”
^ Ntah banci saja “kalak e mbiar; kalak e panik.”