Ulangen 9:1-29
9 “O Israel, wari enda sebrangi kena Lau Jordan+ guna masuk ras ngerebut daerah bangsa-bangsa si teremen janah gegehen asangken kena.+ I je lit kota-kota si galang si bentengna seh ku langit,+
2 si tading i je eme keturunen Enak+ si gedang mbelin. Enggo begi kena janah teh kena maka la lit si ngasup ngelawan keturunen Enak.
3 Perban si e, bas wari enda arus teh kena maka Jahwe Dibata kena lit i lebe-lebe kena.+ Ia bagi api si engkernepken,+ kernepkenNa me kalak e. TalukenNa pagi kalak e i lebe-lebe kena gelah banci mis pelawes kena kalak e, janah kernepken kena bagi si janjiken Jahwe man kena.+
4 “Sanga Jahwe Dibata kena mpelawes kalak e arah lebe-lebe kena nari, ula ning kena bas pusuh kena, ‘Baba Jahwe aku ku negri enda guna ngerebutsa perban aku kalak si benar.’+ Pelawes Jahwe kalak e arah lebe-lebe kena perban kalak e seh kel jahatna.+
5 Rebut kena pagi negri e, labo perban kena kalak benar ntah pe kalak bujur. Jahwe Dibata kena mpelawes kalak e arah lebe-lebe kena nari+ perban seh kel jahatna bangsa-bangsa e, bage pe guna nepati janji Jahwe man nini bulang kena eme Abraham,+ Isak,+ ras Jakup.+
6 Emaka arus teh kena maka Jahwe Dibata kena mere negri si mejile enda man kena labo perban kena benar. Situhuna kena bangsa si mekeng.+
7 “Ingetlah janah ula pernah kena lupa, mbarenda i taneh mesawang* ban kena Jahwe Dibata kena merawa.+ Mulai kena ndarat Mesir nari seh asa kena seh ku ingan enda, enggo mberontak kena man Jahwe.+
8 I Horep* pe ban kena merawa kel Jahwe, menam kernepken Jahwe kena.+
9 Sanga aku nangkih ku datas gunung guna ngaloken dua lembar batu+ si risiken perjanjin si ban Jahwe ras kena,+ tetap aku tading i gunung e 40 wari 40 berngi dekahna.+ La aku man ras la minem.
10 Kenca si e bere Jahwe man bangku dua lembar batu si tulisNa alu jari-jariNa. I je tertulis kerina kata-kata si belasken Jahwe arah api man kena sanga kena pulung i teruh gunung.+
11 Kenca 40 wari 40 berngi, bereken Jahwe man bangku dua lembar batu si isina perjanjin.
12 Kenca si e nina Jahwe man bangku, ‘Mislah kam nusur perban bangsa si babandu ndarat Mesir nari enggo jahat perbahanenna.+ Mis kel kalak e nilah arah perentah-perentahKu. Enggo ban kalak e patung berhala.’+
13 Kenca si e nina Jahwe man bangku, ‘Enggo Kuidah maka bangsa e seh kel mekengna.+
14 Ula halang-halangindu Aku. Kukernepken ateKu kalak e, Kumasapken ateKu gelarna arah doni enda nari. Padin keturunenndu saja si Kuban jadi bangsa si gegehen ras belinen asangken kalak e.’+
15 “Kenca si e nusur aku arah gunung e nari. Paksa si e gunung e sangana gara perban api,+ janah dua lembar batu si risiken perjanjin e lit bas tanku.+
16 Kenca si e kuidah kena enggo erdosa man Jahwe Dibata kena! Ban kena patung anak lembu. Meter kel kena nilah arah kai si enggo perentahken Jahwe man kena.+
17 Emaka kubenterken dua lembar batu si lit bas tanku e, hancur i lebe-lebe kena.+
18 Kenca si e sujud aku i lebe-lebe Jahwe 40 wari 40 berngi dekahna bagi si sebelumna. La aku man ntah pe minem,+ e kerina perban dosa kena. Lakoken kena kai si jahat i lebe-lebe Jahwe si erbanca merawa kel Ia.
19 Mbiar kel aku perban merawa kel Jahwe man kena,+ menam kernepkenNa ateNa kena. Tapi paksa si e nggit denga Jahwe megiken aku sekali nari.+
20 “Merawa kel Jahwe man Harun emaka menam kernepkenNa ateNa ia,+ tapi paksa si e mindo aku guna kepentingen Harun.
21 Kenca si e kubuat patung anak lembu+ si erbanca kena erdosa e, jenari kututung janah kuhancurken seh ngasa jadi abu. Kenca si e kuambekken abuna ku lau si maler arah gunung e nari.+
22 “Bage ka pe sanga i Tabera,+ i Masa,+ ras i Kiberot Taawa+ ban kena ka merawa Jahwe.
23 Sanga suruh Jahwe kena lawes arah Kades-Barnea,+ katakenNa man kena, ‘Majulah, janah rebut negri si pasti Kubereken man kena!’ i je pe lawan kena ka perentah Jahwe Dibata kena.+ La kena erkiniteken+ man baNa, la patuhi kena Ia.
24 Mulai tangtangna nari kena kutandai, enggo mberontak kena ngelawan Jahwe.
25 “Emaka sujud aku i lebe-lebe Jahwe 40 wari 40 berngi dekahna.+ Bage kuban perban nina Jahwe kernepkenNa ateNa kena.
26 Emaka ertoto aku man Jahwe, ningku, ‘O Jahwe, Tuhan Si Meganjangna, ula min kernepkenNdu umatNdu e. Kam kap si mpuna kalak e.+ Enggo tebusNdu kalak e alu kuasaNdu si mbelin janah babaNdu kalak e ndarat arah Mesir nari alu tanNdu si megegeh.+
27 Inget min budak-budakndu Abraham, Isak, ras Jakup.+ Ula min nenNdu uga kengna bangsa enda bage pe kejahaten ras dosa kalak e.+
28 Adi kernepkenNdu kalak e, banci saja bagenda nina kalak Mesir, “La ngasup Jahwe maba umatNa ku negri si janjikenNa man kalak e. BabaNa kalak e ku taneh mesawang* janah kernepkenNa i je perban segat ateNa kalak e.”+
29 BangsaNdu kap kalak e, Kam kap si mpuna kalak e,+ enggo babaNdu kalak e alu kuasaNdu si mbelin ras tanNdu si megegeh.’+
Cataten i teruh
^ Taneh si mbelang si jarang iingani.
^ Ntah “Gunung Sinai.”
^ Taneh si mbelang si jarang iingani.
