Gelar Dibata si itulis bas hurup mati Heber יהוה, lit hampir 7.000 kali bas Kitap-Kitap Heber. Empat hurup e ikataken Tetragramaton. Bas terjemahen enda, empat hurup e iterjemahken jadi “Jahwe.” Gelar e me si rusurna ikataken bas Pustaka si Badia janah ndauh buen asangken gelar si deban. Amin gia penulis Pustaka make piga-piga penggelaren ras istilah man Dibata, bagi “Si Madakuasa,” “Si Meganjangna,” “Tuhan,” tapi gelar si pake kalak e man Dibata eme Tetragramaton ngenca.

Dibata Jahwe negu-negu penulis Pustaka guna make gelarNa. Contohna, tegu-teguna nabi Joel guna nulisken, “Ise pe si erlebuh man gelar Jahwe, iselamatken pagi.” (Joel 2:32) Janah ban Dibata ka sekalak Pemasmur nulisken, “Alu bage teh kalak maka Kam, si ergelar Jahwe, Kam ngenca Si Meganjangna i belang-belang doni.” (Masmur 83:18) Situhuna, gelar Dibata lit kira-kira 700 kali bas buku Masmur saja, buku e isina puisi si iendeken ras ikataken umat Dibata. Jadi engkai maka bas melala terjemahen Pustaka la lit gelar Dibata? Engkai maka terjemahen enda make bentuk kata “Jahwe”? Janah kai erti gelar Dibata Jahwe e?

Engkai maka gelar Dibata la lit bas melala terjemahen Pustaka si Badia? Lit piga-piga alasenna. Lit si erpengakap maka labo perlu lit gelar khusus man Dibata Si Madakuasa. Si deban terpengaruh man tradisi kalak Jahudi si la nggit make gelar e, mungkin perban mbiar kalak e erban gelar e ceda. Lit ka si erpengakap maka perban la lit si banci mastiken uga mbelasken gelar Dibata, padin ipake gelar bagi “Tuhan” ntah pe “Dibata.” Tapi alasen-alasen si bage la masuk akal perban:

•   Kalak si erpengakap maka labo perlu lit gelar khusus man Dibata Si Madakuasa, situhuna la perdiatekenna bukti-bukti maka lit nge gelar Dibata bas salinen kata Dibata si tangtangna, termasuk si lit denga sope jaman Kristen. Bagi si ikataken ndai, ipastiken Dibata gelah gelarNa imasukken bas KataNa kira-kira 7.000 kali. Jelas me, ateNa gelah siteh ras sipake gelarNa e.

• Penerjemah si benekenna gelar e guna ngergai tradisi Jahudi, la sadarina kerna sada fakta si penting. Amin gia penyalin Jahudi la nggit mbelasken gelar e, labo beneken kalak e gelar e arah salinen Pustaka si ibanna. Bas gulungen-gulungen si nai si idat bas Qumran, i deher Laut Mati, melala kel gelar e. Piga-piga penerjemah Pustaka gantina gelar Dibata ras penggelaren “TUHAN” (bas hurup galang), je nari teridah maka gelar Dibata lit bas teks aslina. Jadi situhuna akui kalak e nge maka gelar e lit ribun kali bas teks Pustaka. Jadi engkai maka ate-ate penerjemah e meneken ntah pe ngganti gelar Dibata arah Pustaka? Ise si mereken ijin man kalak e guna ngubahsa? Kalak e ngenca si banci njawapsa.

• Kalak si ngataken maka gelar Dibata la banci ipake perban la iteh uga pastina mbelaskenca, tetap nge pakena gelar “Jesus.” Padahal, cara murid-murid Jesus bas abad pertama mbelasken gelar e beda nge ras cara melala kalak Kristen si gundari. Banci saja kalak Kristen Jahudi mbelasken gelar Jesus eme Yeshua. Janah gelar “Kristus” mungkin ibelasken Masyiakh, ntah pe “Mesias.” Kalak Kristen si make bahasa Junani nggelari ia Iesous Khristos, janah kalak Kristen si make bahasa Latin nggelari ia Iesus Christus. Alu penegu-negu Dibata, gelar e icatat bas Pustaka make bahasa Junani. Si e ncidahken maka kalak Kristen abad pertama make gelar Jesus si biasa ipake bas bahasana. Bage ka pe Panitia Penerjemahen Pustaka si Badia Doni si Mbaru erpengakap maka masuk akal nge make bentuk kata “Jahwe,” amin pe cara mbelasken gelar Dibata la pas kel ras cara mbelaskenca bas bahasa Heber si nai.

Engkai maka Terjemahen Doni si Mbaru make bentuk kata “Jahwe”? Bas bahasa Karo, empat hurup Tetragramaton (יהוה) itulis bas hurup mati YHWH. Bas Tetragramaton la lit hurup hidup, bali bagi kerina kata-kata si deban si itulis bas bahasa Heber si nai. Sanga bahasa Heber si nai ipake tiap wari, mis tambahken kalak hurup hidup si cocok sanga mbacasa.

 Kira-kira seribu tahun kenca Kitap-Kitap Heber dung itulis, ahli-ahli Jahudi erban aturen kerna tanda guna mbelasken kata Heber, guna ncidahken hurup hidup kai si ipake sanga mbaca tulisen Heber. Tapi sanga si e, enterem kalak Jahudi si tek man takhayul erpengakap maka gelar Dibata la banci ibelasken, emaka pakena istilah-istilah guna nggantikenca. Jadi sanga salin kalak e Tetragramaton, gabungkenna hurup hidup arah istilah-istilah pengganti ndai ras empat hurup mati bas gelar Dibata. Emaka amin gia bas teks e lit tanda guna mbelaskenca, tapi e labo ncidahken uga pastina cara mbelasken gelar Dibata bas bahasa Heber. Lit si erpengakap cara mbelasken gelar e eme “Yahweh,” tapi lit ka si ngataken cara si deban. Gulungen Laut Mati si isina sebagin buku Imamat bas bahasa Junani nerjemahken gelar Dibata jadi lao. Penulis Junani si deban erpengakap maka cara mbelaskenca eme lae, labe, ras laoue. Tapi la banci sitentuken si apai cara mbelasken si benar. La siteh uga umat Dibata si mbarenda mbelasken gelar e bas bahasa Heber. (Kejadin 13:4; Keluaren 3:15) Si pasti eme mulih-ulih pake Dibata gelarNa sanga ngerana ras umatNa. Janah bebas kalak e make gelar e sanga ngerana ras Dibata ntah pe ras kalak si deban.—Keluaren 6:2; 1 Raja-Raja 8:23; Masmur 99:9.

Engkai terjemahen enda make bentuk kata “Jahwe”? Perban bentuk kata enda enggo ndekah ipake bas bahasa Karo.

Pustaka bahasa Batak Karo si pertama, iterjemahken J.H Neumann, janah iterbitken tahun 1928 (Perjanjin Baru). Terjemahkenna ka Perjanjin Lama ku bahasa Batak Karo. Kenca  si e iterbitken tahun 1953. Penerbitna Persadan Kongsi Kitab si Badia Balai Alkitab i Jakarta. Bas Perjanjin Lama lit ribun kali gelar Dibata bas bentuk kata “Jahwe.” Selain si e, bentuk kata “Jahwe” ipake ka bas piga-piga lagu gereja. Emaka jelas me gelar Dibata bas bentuk kata “Jahwe” pernah ipake puluhen tahun si enggo lewat. Si e bali ras bentuk gelar Jahwe bas bahasa si deban.

Gelar Dibata tangtangna lit bas Pustaka bahasa Inggris tahun 1530, bas Pentateukh terjemahen William Tyndale. Ipakena bentuk “Iehouah.” Dungna, bahasa Inggris berubah, janah ejaan gelar Dibata iban reh modernna. Contohna, bas tahun 1612, Henry Ainsworth make bentuk “Iehovah” bas kerina buku Masmur si terjemahkenna. Bas tahun 1639, sanga buku e irevisi ras icetak radu ras Pentateukh, ipake me bentuk kata “Jehovah.” Bas tahun 1901, penerjemah si erban Pustaka si Badia American Standard Version make bentuk kata “Jehovah” tiap lit gelar Dibata bas teks Heber.

Kai erti gelar Jahwe? Bas bahasa Heber, gelar Jahwe asalna arah kata kerja si ertina “jadi.” Melala ahli erpengakap maka gelar Jahwe eme bentuk kausatif (bentuk si ncidahken penyebab) man kata kerja Heber e. Emaka angkai Panitia Penerjemahen Pustaka si Badia Doni si Mbaru maka erti gelar Dibata eme “Ia si Erbanca Jadi.” Melala ahli si la seri pendapatna, emaka la banci sikataken e ngenca erti si pasna. Tapi erti e cocok kel man Jahwe sebap Ia Si Nciptaken kerinana janah sura-suraNa lalap terjadi. Ia si erban alam semesta jadi lit bage pe mahluk si cerdas. Tapi selain si e, terus denga banNa sura-suraNa terjadi bage pe tujunNa.

Emaka erti gelar Jahwe la terbatas man kata kerja si lit bas Keluaren 3:14, si isina, “Aku Banci Jadi Kai Pe AteKu.” Kata-kata e labo njelasken kerina erti gelar Dibata, tapi ncidahken sada sipat Dibata ngenca, eme Ia banci jadi kai pe si iperluken bas tiap keadaan guna njadiken sura-suraNa. Amin pe gelar Jahwe banci ertina Ia si jadi kai pe bagi sura-suraNa, tapi labo ngasa je ngenca ertina. Erti gelar e termasuk ka Ia si erban ciptanNa jadi kai pe si iperluken guna erban sura-suraNa terjadi.