“Tempa-tempa iteh Jahwe isi pusuh orang tua.” Bage me nina sekalak perbapan i Malaysia kerna video animasi si erbagin-bagin Jadi Teman Jahwe.

Mulai kin video-video e ipetandaken, enggo iban Saksi-Saksi Jahwe video animasi si erbagin-bagin kerna Kalep ras keluargana. Video-video e lit bas jw.org/btx. Banci dat anak-anak pelajaren penting arah video e eme gelah mehuli perbahanenna janah banci ia ndeher ras Dibata. Contohna engkai maka kalak e la banci nangko janah uga carana ertoto man Dibata.

Video si pertama arah video si erbagin-bagin enda enggo iterjemahken ku 131 bahasa, emaka e banci itonton anak-anak si lit i sebelang doni.

Lit sekalak pernanden lima anakna. Tulisna surat, nina, “Minggu si lewat, aloken kami DVD Dengarkan, Taati, dan Terimalah Berkat. Mulai je nari, enggo lit kira-kira 50 kali tonton kami.”

Millie, si umurna 12 tahun i Inggris, lit abangna umurna 15 tahun si gelarna Thomas. Ia kena sindrom Down. Itulis Millie, “Lit video Kalep bas iPad Thomas, emaka banci putarkenna e man teman-temanna i sekolah. Meriah kel kapna lagu-lagu e. Lit sekalak turang seninata si ngandung perban kena kel ku pusuhna sanga begina Thomas ngendeken lagu-lagu e. Luar biasa kel e.”

Ava, si katakenna umurna 8 tahun 9 bulan ras 25 wari, nulisken, “Mantap kel Kalep ras kakakna ngajari anak-anak.”

Itulis Mikaylah, “Umurku enem tahun. Bujur ningku perban DVD Dengarkan, Taati, dan Terimalah Berkat. Iajari aku gelah kubegiken bapakku ras mamakku perban e erban Jahwe senang.”

Lit sekalak dilaki si nguda denga si erban gambar animasi. Ia labo Saksi Jahwe, janah tontonna video Ula Nangko. Luar biasa kel kapna, khususna kenca tehna maka sitik kel ngenca kalak si ikut erban video e. Nina, “Lit kutandai piga-piga kalak si erdahin bas studio animasi si galang bage pe si kitik. Mon-mon, ngarap aku banci min aku erdahin i je. Tapi, hasil kerja keras kalak e erban kalak tawa saja ngenca, e pe ntisik saja. Animasi si iban kena banci ngubah kegeluhen anak-anak, ngajari kalak e kai si benar, janah nampati kalak e erban keputusen si mehuli. Mejile kel si lakoken kena e, sebap e erguna man nterem jelma.”

Setuju kel orang tua si lit i sebelang doni. Nina sekalak pernanden, “Sanga si e, anakku Quinn si umurna telu tahun nonton video Teman Jahwe (Gaining Jehovah’s Friendship). Sanga lagu e iputarken, tatapna aku, tamana tanna ku dadana, janah nina, ‘Mak, meriah kuakap nontonsa.’”