Tiap tahun, iban Saksi-Saksi Jahwe melala video guna iputarken bas kebaktin kalak e. Buen arah video e iban i bas bahasa Inggris. Tapi, kerina hadirin bas kebaktin e reh arah melala bangsa ras ratusen bahasa. Emaka uga carana gelah banci angkai kalak e video-video ndai? Bas melala bahasa, video e i-dubbing. Maksudna, rekamen bas bahasa Inggris iganti jadi bahasa si ipake hadirin bas kebaktin e. Kai nge gunana man kalak e?

Mari sibegiken kai nina piga-piga kalak si labo Saksi Jahwe si reh ku kebaktin i Meksiko ras Amerika Tengah:

• “Kuangkai kel video e, tempa-tempa lit aku i je. Kena kel ku pusuhku.”​—Hadirin bas kebaktin si nggunaken bahasa Popoluca, i Veracruz, Meksiko.

• “Tempa-tempa sangana aku ngerana ras teman sada kutaku. Video-video e jilen asangken film, perban banci kuangkai kerina isina.”​—Hadirin bas kebaktin si nggunaken bahasa Nahuatl, i Nuevo León, Meksiko.

• “Sanga kutonton video-video e bas bahasaku, bagi tempa langsung ngerana kalak si bas video e man bangku.”​—Hadirin bas kebaktin si nggunaken bahasa Chol, i Tabasco, Meksiko.

• “Sampati organisasi enda atena kalak alu nggunaken bahasa si iangkai kalak e. La lit kuidah organisasi si bage!”​—Hadirin bas kebaktin si nggunaken bahasa Cakchiquel, i Sololá, Guatemala.

La isewa Saksi-Saksi Jahwe kalak si ahli bas dahin perekamen ntah pe kalak si beluh kel ngisi sora. Rusur ka kalak e arus rekamen bas ingan si seh kel dauhna ntah pe bas ingan si terbatas peralatenna bage pe kerina si iperluken guna ngelakoken dahin e. Emaka, uga maka banci ban kalak e rekamen si mejile?

Guna kebaktin tahun 2016, kantor cabang Saksi-Saksi Jahwe i Amerika Tengah enggo aturkenna gelah video-video kebaktin i-dubbing ku bahasa Spanyol ras 38 bahasa daerah. Lit kira-kira 2.500 kalak si sukarela nampati bas proyek enda. Kalak si ngelakoken dahin perekamen bage pe tim-tim penerjemah ngelakoken perekamen i kantor cabang bage pe i kantor-kantor penerjemahen. Bas piga-piga ingan, arus ka iban kalak e piga-piga studio sementara. Kerina perekamen enda ilakoken bas lebih 20 ingan i Belize, Guatemala, Honduras, Meksiko, ras Panama.

Guna erban studio sementara, kalak si sukarela nampati arus nggit erusaha janah tutus atena erdahin. Iban kalak e ruangen si kitik si la banci masuk sora ku bas. Gunaken kalak e barang-barang kai pe si lit i je, misalna lembut ras tilam.

Buen kalak si ngisi sora guna video bahasa daerah e sederhana pergeluhna. Melala si arus ikorbanken kalak e gelah banci kalak e rekamen. Lit si 14 jam dekahna bas perdalanen maka seh ku studio! Lit ka sekalak perbapan ras anakna si arus erdalan kira-kira waluh jam dekahna.

Kitik-kitik nari, rusur sampati Naomi keluargana erban studio sementara. Nina, “Tima-timai kami kel lalap waktuna rekamen. Tutus kel ate Bapak ngaturken kerinana, janah Mamak erdakan guna kalak si sukarela nampati. Mon-mon seh 30 kalak.” Gundari Naomi nampati bas kantor penerjemahen i Meksiko. Nina, “Meriah kel kuakap perban banci kugunaken waktuku nampati kalak erlajar Pustaka bas bahasana. Enda tuhu-tuhu dahin si erban meriah ukur.”

Tiap tahun, Saksi-Saksi Jahwe i sebelang doni erban kebaktin janah ise pe banci reh. Guna ndatken terbuen keterangen, banci nenndu halamen KEBAKTIN.