•  Menyiine me nkobô 2

•  Bidima bi mame ya Kalate Zambe 3-5

  •  Nkañete 3

  •  Enjeñané bidima bi mame ya Kalate Zambe 4

  •  Nlañane Kalate Zambe 5

•  Bo’o ésaé nkañete nya mboone 6-11

  •  Bevidéo ba liti bive’ela ya tôñ 7

  •  Éyoñ ôsu wo kañete môt 8

  •  Njoman 9

  •  Ayé’é Kalate Zambe 10

  •  Nkañete 11

•  Ényiñe Bekristen 12-13

  •  Ayé’é Bible y’akônda 13

•  Mesuu me nkobô 14

•  Bo’o atyeñ mfa’a ya nlañan a ñye’elan 15

•  Mese’esa a melep 16

•  Éyoñ 17

•  Sondô njoman 18

•  Sondô étôkan nge ke beta étôkan 19

•  Sondô Mesimesa’ane 20

•  Ntebele ya ésulan Ényiñe Kristen a ésaé nkañete 21

•  Kaso ya ésulan Ényiñe Kristen a ésaé nkañete 22

•  Ntebele bemvendé ya akônda 23

•  Mvee melep 24

•  Meba me sikôlô mevok 25

•  Bevidéo 26

1. Ésulan Ényiñe Kristen a ésaé nkañete jangan ja yiane boban aval e ne ntilane Kalate ésaé asu bisulan, a aval e ne ntilane melebe ma tôñe valé. Nkañete mbamba foé ase a yiane ve ngule ya bo ésaé ba ve nye. Bôte bese ba tabe bisulane mban be ne tilibane sikôlô, nge ba kañese miñye’elane ya Kalate Zambe, a nge ba tôñe mie ényiñe jap​.​—be-F af. 282.

 2. Nnute wua. Sondô ase, éyoñe jia a meye’elan bi maneya, kaso y’ésulane ya zañe sondô é ve bôt évé ya tu’a kômbô vô’ôlô ésulan. A yiane ngôné mam ma dañe mfi asu akônda.

  3. Nkañete: Minute awôm. Ba koone nlô ajô ya ngab éte a bone minlô mejô mife mibaé nge milale mia su’u wô Kalate ésaé asu bisulan. Mvendé nge ke diakon é ne mbamba ñye’ele mbe ba ye bo nkañete ôte. Sondô bia taté nlañane mfefé kalate ya Bible, b’aye liti vidéo a kobô ajô kalate ate. Môt a bo nkañete é liti aval avé vidéo ate a tii a nlô ajô a wulu wô. Ve a yiane fe mane la’ase bone minlô mejô mise ya ésaé jé. Nge éyoñ é nga’an, a ne timine bive’ela a befôtô ya ngab ésaé jé. A ne fe belane mam mefe ma su’u miñye’elan a ngôné.

  4. Enjeñané bidima bi mame ya Kalate Zambe: Minute awôm. Mojañ a wulu ngab éte a yiane sili bôte minsili, a nji yiane bo menyiine me nkobô nge ke mesuu me nkobô. Mvendé nge ke diakon é ne mbamba ñye’ele nje ja ye bo ésaé éte. A yiane sili akônda minsili mise mibaane. Nnye fe a tyik nge é bo na be lañe bifuse nge momo. Biyalane bi nji yiane lôt étune nnut (30 secondes).

  5. Nlañane Kalate Zambe: Minute 4. Mojañ nnye a ye bo ésaé éte. Mongô sikôlô é lañe ve abôta a bili na a lañ, teke bo menyiine me nkobô nge ke mesuu me nkobô. Kaso ya ésulan é jeñe na a volô bongô be sikôlô na be lañe ne sañesañ, be tote bifia avale da yian a avale da wô’é melo, be yeme ngôné bifia bia dañe mfi, be yeme fe tebe mefôla méziñ éyoñe ba lañ. Mbôl éfas éziñe ya nlañane Kalate Zambe é ne bo ayap ji évo’o ki étun, ntebele ya ésulan Ényiñe Kristen a ésaé nkañete a nji yiane ve môt ésaé éte tu-nlôô, a yiane tobe bongô be sikôlô ba yian asu avale ngab ése.

 6. Minute 15. Nsôñane ya éfase ji ô ne na môt ase a bi fane ya bo besisia asu ésaé nkañete, a na a tu’a bo atyeñ éyoñ a kañete a éyoñ a ye’ele. Mongô sikôlô émien a ne tyi’i nge é liti môt a kañete vidéo, nge ke ve nye kalate wua ya Bikpwelé bia ye’ele bie bôt, to’o kalate ésaé a nji jô na a bo de. Nka’ale ô ne nlô ajô na “Ô ne koon éfus éte bekalate bia ye’ele be bôt été” ô ne volô bongô be sikôlô. Ve mongô sikôlô émien nnye a tyik nge é belane melebe ya nka’ale ôte nge momo. Kalate bisulan a liti abim éyoñ ésaé ése ja yiane boban, a wô’ô fe ve bone melebe mefe biyoñe biziñ. Bongô be sikôlô be nji yiane kô’ôlan asimesan afe ésaé ba te ve be, fo’o v’amu ba kômbô belan éyoñe jap ése. Môt a ne kôme kômesan ésaé jé, ve a teke mane belane éyoñe jé. Nge nalé a sili, be ne fe ve bemvendé bisaé biziñe ya ngabe nyi. Éyoñe da kui na vidéo mfe (sa ke nyi ya bive’ela ya tôñ) a lôt éfase ji, mvendé nje ja yiane wulu minlañ mite, nge ke diakon ja kôme yeme ye’ele.

 7. Bevidéo ba liti bive’ela ya tôñ: Ngon ése, bia ye yene bevidéo ba liti bive’ela ya tôñ a la’ase mame y’été. Bevidéo bete ba ye liti bia éve’ela ya tôñ éyoñ ôsu bia kañete môt a éyoñe bia bo minjoman. Kaso ya Ényiñe Kristen a ésaé nkañete nnye é bo nlô ajô ôte.

 8. Éyoñ ôsu wo kañete môt: Mojañ nge ke sita nnye é bo ésaé éte. Be nji yiane ve fam ba minga ésaé éte nge be nji bo bibu’a ya nda bôte jia. Be ne bo je tetele, be ne fe bo je be to si. Mongô sikôlô a yiane batane môt avale ba bo vôm a nyiñ. Bongô be sikôlô ba yiane tôñ éve’ela é ne Kalate bisulan.

 9. Njoman: Mojañe nge ke sita nnye a ye bo ésaé éte. Be nji yiane ve fam ba minga ésaé éte. (km 5/97-F af. 2) Bongô be sikôlô be ne bo je be tele tetele, nge ke be to si. Mongô sikôlô a yiane liti bôte jame be ne jô éyoñ ba ke jome môt a nga kañese Mejô me Zambe éyoñ ôsu be nga kañete nye. Bongô be sikôlô ba yiane tôñe bive’ela ya Kalate bisulan.

 10. Ayé’é Kalate Zambe: Mojañe nge ke sita nnye a ye bo ésaé éte. Be nji yiane ve fam ba minga ésaé éte. (km 5/97-F af. 2) Be ne bo je be to si, nge ke be tele betetele. Môt a bo je a yiane bo v’ane be tatéya ayé’é. Mongô sikôlô a ne bo menyiine me nkobô nge ke mesuu me nkobô fo’o ve nge nne ñye’ele a fombô nye jame da y’été. A nji bo ntindane ya lañe mebeñe mese. Jam da dañe mfi e ne na a ye’ele avale da yian.

 11. Nkañete: Mojañ nnye a yiane bo ésaé éte, ja yiane bobane ve ane nkañete asu akônda.

 12. Éfas éte ja ye bo minute 15. Éyoñe jia é maneya, nlô ajô wua, nge mibaé mia ye liti aval avé Bekristen be ne tôñe miñye’elane ya Bible ényiñe jap. Bemvendé nge ke bediakon be ne mbamba beye’ele mbe b’aye bo bifase bite. Kristene fe é ne bo bie vengevenge ve kalate ésaé émien a jô nalé. Bemvendé étam mbe ba yiane bo ngab é ne na vôm akônda da yiane ve ngul.

   13. Ayé’é Bible y’akônda: Minute mewôm mela. Mvendé é ne mbamba ñye’ele nje ja ye bo éfas éte. (Nge bemvendé be nji bo abui, diakon é ne mbamba ñye’ele é ne wulu éfas éte.) Nsamba bemvendé y’akônda ñwô wo tobe bemvendé be ne ngule ya wulu ngab éte. Bemvendé ba ve ngab éte ba yiane yeme tôñesan ayé’é asu na be bo teke di éyoñ, ba yiane fe yeme ngôné bifuse bia dañe mfi, a volô bobejañe na be yen aval avé mam ba yé’é me ne volô be ényiñe jap. Be ne fe tôñe melebe ba ve môt a wulu ayé’é ya Nkume mmombô a bete. Nge akônda e kômeya mane la’ase ngabe ba yiane yé’é sôndô ate, e nji bo mfi ya ke ba limiti ayé’é zezé. Nge nalé a ne boban, sondô ase, be ne tyendé mojañ a wulu ayé’é Bible y’akônda, a nyi a lañe mebeñ. Nge kaso y’ésulan a jô môt a bo ayé’é Bible ya akônda na a tyi’i étun asu ya na ésulan é man awolo, mojañ ate a yiane yen aval a ne bo de. A ne bo teke lañe mebeñe méziñ.

  14. Minute mila. Kaso a ye bo ôbalebase y’ésulan. A yiane fe kobô ajô mintene miñye’elane ya sondô a zu. Nge éyoñ é nga’an, a ne ve môé me bongô be sikôlô ya sondô a zu. Nge ba yiane lañe kalate éziñ, nge ve foé éziñ, kaso y’ésulan nnye a ye de bo éyoñe ya mesuu me nkobô, mojañ mfe a ne bo de vengevenge ve abendé éziñ da jô nalé. Sa ke mefoé mese mme ma yiane lañebane pôspôden; mefoé ane nta’ane mam asu nkañete a mfubane ya akônda me nji yiane lañeban, ba ye ba’é me étyimbi. Nge mefoé ba yiane lañ me n’abui, kaso é kate bobejañe be bili bisaé Ényiñe Bekristene na, be li’i nye mon éyoñ. (Fombô’  abeñ 13 a  17.) Ba ye dib ésulan a jia a meye’elan.

 15. Mongô sikôlô ase a yiane ke ésulan a nsoé kalate Nlañan a ñye’elan; a ne belane wu ô ne afep nge ke wu ô ne minsini wé. Kaso y’ésulan a yiane belane nsoé kalate ôte éyoñ a lebe bongô be sikôlô. Mongô sikôlô ase a yiane tôñe nombo é ne ndeme nyi été (), fefele ésaé jé Kalate bisulan. Vôm a ne ntilan na, “Tili’i aval wo saé” a ne asu mongô sikôlô, kaso ya ésulan a nji yiane tili jôm éziñ été.

  16. Éyoñe mongô sikôlô a maneya bo ésaé jé, kaso a bili ve nnute wua asu mese’esa a melep; a yiane belane nsoé kalate Nlañan a ñye’elan éyoñ a bo de. Éyoñ kaso a loene mongô sikôlô na a ke bo ésaé jé, a nji yiane kate vôme ba fombô nye. Éyoñ mongô sikôlô a maneya bo ésaé, kaso a yiane taté se’e nye. Mvuse ya valé, a ne kate vôme ba too be fombô’ô nye, a ngôné mam a te yeme bo. Ve e ne fe sili na a kate nye évôvoé été amu jé é ne mfi na a beta ve ngule na a tu’a saé vôm ate. Kaso a ne fe la’ase mam mefe ya ésaé mongô sikôlô a te bo nge a yene na jam ete e ne volô émien nge ke akônda ese. Éyoñ ésulan é maneya nge ke môs ôfe, kaso a ne ve mongô sikôlô melebe mefe a lat a ñye’elan a too a yiane tôñ, nge ke ñye’elan ôfe ya nsoé kalate Nlañan a ñye’elan a kalate École du ministère. Nge wo kômbô yeme mam mefe a lat a mimbe’e mi kaso, nge ke mi mi mvee melep, fombô’  abeñ 17,  22, a  24.

     17. Môt ase a yiane semé éyoñ. Kaso a yiane sa’ale fulu ya kobô abui, ésulan é za bo teke man awolo. Akusa bo ba ve môt ase abim minute éziñ asu ésaé jé, nalé a nji tinane na a mba’a mba’a ve mane belan éyoñ éte ése ne meññ. Nge kaso a yene na éyoñ mongô sikôlô a too na a bo ésaé jé é kpwaaneya, a yiane telé nye évôvoé été. Nge mojañ a wulu nlô ajô ôfe a di éyoñ, mvee melep a yiane ke yene nye ba nye bebaé a lebe nye. (Fombô’  abeñ 24.) Ésulan ése ja yiane bo awolo da a minute 45, ataté jia ôsu akekui meye’elan ma su’ulan.

 18. Sondô njoman, ésulan j’aye boban aval e ne ntilane Kalate bisulan, ba ye ke bo ve Ayé’é Bible y’akônda, amu njome mekônda é belane minute 30 mite asu nkañete wé. Ôsusua na nkañete ôte wo taté, kaso a ye bo mon ôbalebase ya ésulan, a kate fe mame bia ye yé’é ésulane ya sondô a zu; a ye fe kate mefoé, a lañe bekalate ba yiane lañeban ngô’é éte, mvuse ya valé a ye loone  njome mekônda pôspôden. Njome mekônda é bo na be yia jia a te top éyoñ a maneya nkañete wé. Ve a ne bo na mojañe mfe a dib ésulan a meye’elan. Sondô ate, aba sikôlô da ye bo ve da da. Nge mon angôse bekañete ya nkobô ôfe a ne akônda ete, be ne bo ésulane jap avale ba jaé zu ba bo. Ve ba yiane zu tabe nkañete njome mekônda.

 19. Ésulan é nji yiane boban sondô bi bili étôkan nge ke beta étôkan. Kristen ése ja yiane bo ésulan éte éyoñe ya ayé’é étam, nge ke ayé’é ya nda bôt.

 20. Nge Mesimesa’ane ma bobane zañe sondô, ésulan Ényiñe Kristen a ésaé nkañete ja ye ke bobane sondô ate. Ve bisulan asu nkañete bia ye ke ôsu a boban to’o môse Mesimesa’ane.

 21. Nsamba bemvendé y’akônda wo ye tobe mvendé jia asu na é tebele ésulan Ényiñe Kristen a ésaé nkañete. Mojañ ate a yiane bo na ésulan éte é wulu mvo’é a na mam mese me boban avale melebe ma ma liti. A yiane bo a saé’ a mvee melep. Ve nné ane Kalate bisulan ya ngon a kui, a yiane taté na a bo nta’ane mam asu sikôlô ya ngon ébaé. (Fombô’  abeñ 5-11.) A yiane bo na mongô sikôlô ase a bi ésaé jé sondô éla ôsusua; é tili bisaé bite bise afep Devoir d’élève à la réunion Vie chrétienne et ministère (S-89).

  22. Sondô ase, mvendé jia j’aye bo kaso ya ésulan. (Nge bemvendé be nji bo abui, be ne belane bediakon be ne mbamba beye’ele.) A yiane kômesane menyiine me nkobô a mesuu me nkobô, a yiane fe kômesane minlañ asu bevidéo ya bive’ela ya tôñ. Nnye fe a loone bôte pôspôden asu bisaé biap, émien a ne fe bi ésaé nge teke abui bemvendé akônda dé. A nji yiane kobô abui. Nsamba bemvendé ñwô wo tyi’i na môte si môte ka a ne ngule ya bo kaso ya ésulan. Be ne ta’a na kaso ase é bo a wulu’ ésulan mvuse ngum éyoñ . E ne fe kui na mvendé éziñ é bo kaso adañe bemvendé bevok. Mvendé ése é ne ngule ya wulu Ayé’é Bible y’akônda é ne fe bo kaso y’ésulan. E ne nya mfii na kaso a se’e bongô be sikôlô a ayôñ ese, a na a ve be mbamba melep. A yiane fe véé mise na ésulan é man awolo. (Fombô’  abeñ 14 a  17.) Nge kaso a yi, a nge pôspôden a ne ndam, be ne ngule ya telé nye micro mfe ôsu, asu na a bo a kobô’ a tele valé nté môt a yiane wulu ésaé éziñ a ntele fe pôspôden. Ane fe vô’ôlô nlañane Kalate Zambe a bisaé bife ya ngabe Bo’o ésaé nkañete nya mboone a too si éto jia ya betebele be ne pôspôden. Mam mete mese me ne asu na be bo teke jañele éyoñ.

 23. Ane ô vaa bisaé bi bongô be sikôlô, ntebele bemvendé nge ke éjiane jé mbe ba tobe bôt asu bisaé bivok ya ésulane ya zañe sondô. Nalé a tinane fe na ba tobe kaso ya ésulan ése, ve ba fiale nye zañe ba ékôane bemvendé ése é nga top. Ntebele mbemvendé a yiane saé a ntebele ésulane Ényiñe Kristen a ésaé nkañete asu ya na nta’ane mame ya ésulan ése ô ba’abe étyimbi.

   24. Da dañe mvo’é na mvendé é ne atyeñ a mbamba ñye’ele nje é be’e mbe’e ôte. A yiane ve bobejañe melep; e ne sili sili biyoñe biziñe na a ve bemvendé a bediakon melebe me ne volô be na be mé fatane ñye’elane jap; melebe mete me ne fombô bisaé ba bo ngab Ényiñe Kristen a ésaé nkañete jangan, minkañete ya mengana bôt, ayé’é ya Nkume mmombô, nge ke ayé’é Bible y’akônda. A ne fe ve bobejañe ba lañe mebeñe melep. (Fombô’ô  abeñ 17.) Ve éyoñ ése a ve môte melep, a yiane de bo ve ba nye bebaé. Nge abui bemvendé e ne mbamba beye’ele, môt ase ya été a ne bo mvee melep tañe mbu wua. Ve mvee melep a nji yiane beté ôdo’é; a nji yiane vañe ke ve bôte melep éyoñ ése ba mane bo ésaé éziñ.

 25. Nge bongô be sikôlô be ne abui, akônda e ne bi abui meba me sikôlô. Aba sikôlô ese da ye bi ñye’ele a ne atyeñ, e ne mvo’é na ñye’ele a bo mvendé. Vôme be vo’o bo aval afe, diakon a ne nya atyeñe a ne be’e mbe’e ôte. Nsamba bemvendé wo ye tabe a yemelane bôte be ne be’e mbe’e ôte, a yene nge ba ye bo be folan nge momo. Ñye’ele é tôñe melebe me ne  abeñ 16. Ba ye jô bongô be sikôlô ya meba mevok na be ke meba map éyoñ ngab Enjeñané bidima bi mame ya Kalate Zambe é maneya. Ba ye bulane beta aba éyoñe éfas é ne nlô ajô na Bo’o ésaé nkañete nya mboane é maneya. Éyoñ bevidéo ba liti bive’ela ya tôñ ba lôte beta aba, bobejañ ba te ke meba me sikôlô mevok be ne yene be nge ke vô’ôlô be be too wôé. Ve nge nalé a vo’o boban, ñye’ele sikôlô a ne belane minsini wé (ordinateur, téléfôn, nge ke tablette) na a liti bobejañe ya aba sikôlô dé vidéo.

 26. Bevidéo be tii a ésulan mbe b’aye yen ésulane ya zañe sondô. Bi ne koone be application JW Library®, bi ne fe yene be abui beminsini. Nge akônda é maneya yene bevidéo ba liti bive’ela ya tôñ bisulane ya zañe sondô, bobejañe ba wulu bisulan asu nkañete be ne belane be asu ésulan éte.