YE Ô TOBEYA FO’O AVAL ÉNYIÑE WO YE BI MELU MA ZU? Bôte béziñ ba buni na ényiñe jap é ne ntilan a na, nje fe ja wulu be, be nji bo fili ya top. Ajô ete, éyoñe ba kate tôé minsôñane miziñ, ba yene de ane jame be se ngule ya sa’ale. Ba jô na: “Jam ete é nji be na da bobane fo’o!”

Ba bevo’o ba bi biyebe amu be nji bi ngule ya sa’ale étibila’a a ékotekot é ne émo ji. Éko éziñ be jeñeya na, be bi mbamba ényiñ, ve éyoñe ba yene mam ane bita, mewôé me bôt, bibubua, a akon, mame mete ma ndamane minta’ane mi mame miap éyoñ ése. Nde ba sili bebiene na, ‘Jé ébien ma zu taé nlô valé?’

E n’été na, mam m’éziñe y’ényiñ me ne zu ndamane minta’ane mi mame miôé. (Ecclésiaste 9:11). Ve jame da, éyoñe ba kobô ajô ya ényiñe jôé ya nnôm éto, womien ô bili fo’o fane ya top. Kalate Zambe a liti na, ényiñe jôé ya melu ma zu é tii a ntobane wôé womien. Tame yene jam a jô.

Moïse, ntebe ôsu ya ayoñ Israël ya melu kôa, a nga jô ayoñe bôt ôsusua na ba nyiine Si ya Ntiñetane na: ‘Me teléya wo ényiñ a awu, ébotan a biyo’é: ajô te tobe’ ényiñ, ndemben w’aye nyiñ, womien a mvoñe bôte jôé; mfa’a ya nye’e Jehova Zambe wôé, a [vô’ôlô] tyiñe jé, a kabetane be nye.’​—Deutéronome 30:15, 19, 20.

“Me teléya wo ényiñ a awu, ébotan a biyo’é; ajô te tobe’ ényiñ.”​—Deutéronome 30:19

Ôwé! Zambe a nga kôté ayoñ Israël minkôme ya Égypte a ve be fane ya nyiñe fili meva’ été, e si ya ntiñetan. Ve mame mete mese me nji ye so be été été. Asu na be bu’uban a bibotane bite, é mbe é sili’i na be ‘tobe ényiñ.’ Aval avé? ‘Be nye’e Yéhôva Zambe, be vô’ôlô tyiñe jé, a kabetane be nye.’

Den, wo fe ô bili na wo top, a ntobane wôé wo ye liti aval ényiñe jôé ya melu ma zu ja ye bo. Nge wo tobe na wo nye’e Zambe, na wo vô’ôlô tyiñe jé, a na wo kabetane be nye, wo ye fo’o tobe ényiñ: ényiñe ya melu mese e paradis e si va. Ve, e bo mam mete mese a tinan aya?

Nye’an ô ne beta fulu ôsu Zambe a bili. Nlômane Jean ô nga tili a ngule ya mbamba nsisim na, “Zambe a ne nye’an.” (1 Jean 4:8) Amu jam ete, éyoñe be nga sili nye na atiñe da dañe metiñe mese mevok é n’avé, Yésus a nga jô na: “Nyeke’e Eso Zambe wôé a nleme wôé ôse, a nsisime wôé ôse, a nlô wôé ôse.” (Matthieu 22:37) Ajô te, nya élat a Yéhova Zambe a nji yiane bo amu bia ko nye woñ, nge bo nye mewôk teke fas, ve amu bia nye’e nye. Nde ñhe, amu jé bia yiane tobe na bia nye’e nye?

Nye’ane Yéhôva a nye’e bone be bôt ô ne ane nye’ane bebiaé be bili asu bone bap. Akusa bo be ne bebo mam abé, bebiaé ba nye’e bone bap ba ye’ele be, ba ve be ngule nyul, ba su’u be, a ba ve be meleb amu ba yi na be bu’uban a ényiñ. Bebiaé ki ba yange jé mfa’a ya bone bap? Ba yi na bone bap be nye’e be, a na be liti na ba semen a ba’ale mame mese bebiaé be nga bo asu mvo’é jap. Nga da yiane na, Ésa wongane ya yôp nye’ fe a yen aval ane bia liti nye nye’an, a ve nye akéva amu mbamba be mame bese a nga bo bia?

Nkobô ôsu be nga tili wô Bible, éfia “vô’ôlô” é wô’ô tinane na “e bo mewôk.” Ye sa ke nkômban ôte ñwô bi wô’ô bi éyoñe bia jô bongô na,“Vô’ôlô bebiaé bôé”? Aval ete fe, e vô’ôlô tyiñe Zambe a tinane na, ô yé’é mejô mé a bo nye mewôk. Mbôle bi vo’o wô’ô tyiñe nkobô Zambe nya ñwô’ane, bia vô’ôlô nye éyoñe bia lañ a tôñe Mejô me ne kalate wé été, Bible.​—1 Jean 5:3.

Asu na a liti mfi ya vô’ôlô tyiñe Zambe, Yésus a nga jô môs éziñe na: “Môt a ye nyiñ a fembé étam, ve a mejô mese me aso anyu be Zambe.” (Matthieu 4:4) Aval ane bidi ya minsôn bi ne mfi asu dangan, nde fe e bi ñyemane wo so be Zambe wo dañe mfi nalé. Amu jé? Mfefe’e Njô bôte Salomon ô nga jô na: “Amu ñyemane mame ô ne jôme ja [kamane] môt, avale fe ane moné a ne jôme ja [kamane] môt; ve nya mvaé ya ñyemane a ne na, ñyemane mam w’aba’ale ényiñ ya môte a bili wô.” (Ecclésiaste 7:12) Ñyeman a fek wo so be Zambe ô ne ba’ale bia den, a volô bia na, bi nyoñe mbamba ntyi’an a ye kee bia ényiñe ya nnôm éto melu ma zu.

Ye mia beta simesan éve’ane Yésus a nga nyoñe nlô ajô bi nga yene mvus, vôm a jô na: “Amu mbé ô ne tyôtyoé, a zen é ne zôsô nje ja ke vôme bôte ba nyiñ, a bôte ba yene je be ne tyôtyoé.” (Matthieu 7:13, 14) Nge bia wulu zen éte, bia ye yene mfi ya bi a tabe ba’aba’a a beta mvee melebe a ne liti bia zen asu na bi kui vôme bia ke: ényiñe ya nnôm éto. Nde bi bili mbamba amu ya tabe Zambe bebé. (Besam 16:8) Aval avé bi ne tabe nye bebé?

Môs ôse, bi bili abui mame bia yiane bo a abui mame bia kômbô bo. Mame mete me ne nyoñe bia abui éyoñ aval e ne na, bi nji beta bi éyoñe ya fase mame Zambe a yi na bi bo. Ajô te Kalate Zambe a ba’alane bia na: “Mi tuka’a fombô ane mi awulu, sa ane ba be ne te fek, ve ane ba be ne fek; mi tôtane mame ya biyoñ, amu melu me ne abé.” (Beéphésien 5:15, 16) Bia tabe Zambe bebé éyoñe bia bo na, élate bi bili a nye é bo jame da dañe mfi ényiñe jangan.​—Matthieu 6:33.

Akusa bo na ô se ngule ya tyendé mam ô nga bo ényiñe jôé, ô ne bo mame me ne volô wo na, womien a bôte wo nye’e mi bi mbamba ényiñe melu ma zu. Kalate Zambe a kate bia na Ésa wongane ya yôp, Yéhôva Zambe, a nye’e bia nya nye’ane a na, a kate bia jé a yi na bi bo. Tame yene jôme nkuli mejô Michée a jô:

“A môt, a litiya wo jôm é ne mvaé; a za jômô Jehova a jeñe be wo, ve na, ô bo zôsô, a nye’e mvam, a wulu nje’eban nlem, mia Zambe wôé.”​—Michée 6:8.

Ye wo ye fo’o kañese mbañete Yéhôva a ve wo na, ô wulu a nye a bu’ubane bibotan a ba’ale asu bôte ba bo nkômbane wé? Womien wo yiane top!