Yéhôva a nga jô bone b’Israël na be bo ayoñ e ne étyi. Asu na be bo de, a nga jô be na: “Te ke wo ndeñ mfu’u bôte bôé été; nalé fe te tebe metyi me môt a to wo bebé ngam yat. Ma me ne Yéhôva.”​—Lv. 19:2, 16.

Nnoñe bifia “tebe . . . ngame yat” ô ne mbamba nkôñelane ya bifia be nga belane bie nkobô Hebreu, ve bifia bite bia tinan aya? Kalate Bejuif éziñ a timin nnoñe bifia ôte a jô’ô na: “E nji bo . . . tyi’ibi ya kôme wô’ô mejô mete amu e ne ayaé ya yem atinane ya bifia bite nkobô Hébreu, nge bia kôñelan éfia ése ya nnoñe bifia ôte bi ne jô na, te tebe ôsu, mvus, fefel.’”

Bôte béziñ ba jô na nnoñe bifia ôte ô tii a mejô ya éfuse 15, ma jô na: “Te bo’an ékotekot éyoñ mia tyi’i mejô. Te semé nyôl nzôzoé, nge wumu nyôl éwôlô môt. Ve ô tyi’i môt a to wo bebé mejô zôsô.” (Lv. 19:15) Nde ñhe, atiñ bia koone de éfus 16 da jô na môt a bo te “tebe metyi me môt a to [nye] bebé ngam yat” e ne tinane na, bone b’Israël be nji be be yiane bo jam e ne ékotekot éyoñ ba tyi’i mejô, nge éyoñ ba bo mam me moné, nge ke nda bôt été. Nde fe, mon Israëlite a nji be a yiane bo mvôl asu na nnye étam a bi nsenge. E ne été na bi nji yiane bo avale mam ete, ve abendé ya éfuse 16 ete e ne volô bia mimfa’a mife.

Bi tame yen aval éfus éte ja taté. Yéhôva a nga jô bebo bisaé bé na be bo teke bo mfuk. E ne été na éyoñ môt a bo ékobôkobô, a ne tômetan bôte minlô, ve jam da dañ abé e ne éyoñ a bo mfuk. (Min. 10:19; Éc. 10:12-14; 1 Tim. 5:11-15; Jc. 3:6) Môt a bo mfuk a fañe té minsos asu na a ve môt éyôlé mvit. A ne fe té minsos asu na a bo’olô môt ajô, to’o minsos mite mi ne wôé môt ate. Tame ve’ele simesan avale bôt be nga laan minsos a lat a Naboth, a avale minsos mite mi nga telé nye mbia été. (1 Bb. 21:8-13) Ajô te, avale bia te mane yene Lévitique 19:16, môt a ne mfuk a ne tebe môt ngame yat, a bo na môt ate a wu.

Nde fe, môt a ne ve nyi mbok éyôlé mvit amu a siñe nye. 1 Jean 3:15 a jô na: “Môt ase a vini monyañe wé, nnye a ne ñwôé bôt; a mia yeme na, teke ñwôé bôt a bili ényiñ ya melu mese é to be nye.” Ajô te, éyoñe Zambe a maneya jô na te tebe metyi me môt a to wo bebé ngam yat, a nga beta jô na “Te siñe monyoñ nleme wôé été.”​—Lv. 19:17.

Nde ñhe, étua atiñ bia koone de Lévitique 19:16 da ve Bekristen beta melep. Da ye’ele bia na bia yiane titan mbia b’asimesan, a sa’ale fulu mfuk. Bi ne jô tyi’ibi na, bia “tebe môt ngame yat” éyoñ bia ve nye éyôlé mvit, amu bia vini nye nge ke amu bia bo nye éviele. Nalé a bo’olô na bia siñ môt ate. Bekristen be be nji yiane siñ môt éziñ.​—Mt. 12:36, 37.