Momo. Jame David a nga tili e mbe été.

Bi tame zu yene jam a nga tili éfus éte a bifuse bife bia funane dili. A nga jô na: “Ma ye yia jôé dôé bia ya ékaña’a nnôm éto, nde ma ye bo ngule ya tôé mintiñetane miam môs ôse.” “Ma ye kañe wo, a Tate Zambe wom, a nleme wom ôse; a ma ye wumulu jôé dôé nnôm éto.” “Ma ye kañe jôé dôé nnôm éto a nnôm éto.”​—Bs. 61:8; 86:12; 145:1, 2.

Éyoñe David a nga tili mejô mete, a nji be a simesane na a ye ke wu môs éziñ. A mbe a yeme’e na Yéhôva a nga jô na ma’ane ya abé môta binam a nga bo me ne awu. Nde fe David a mbe a yeme’e na a ne mbo mam abé. (Met. 3:3, 17-19; Bs. 51:4, 5) A mbe a yeme’e na to’o bezôsô be bôt aval ane Abraham, Isaac a Jacob be nga wu. Ajô te David a mbe a yeme’e na nye fe é su’ulane wu. (Bs. 37:25; 39:4) Ve mejô bia koone me kalate Besam 61:8 me mbe me liti’i nkômban a évak David a mbe a bili na a kañe Yéhôva nnôm éto. Nalé a tinane na nté ôse é nyiñe si va.​—2 Sa. 7:12.

Bevôme béziñ, David a nga tili minjuk a nga tôbane mie ényiñe jé, a bi ne lañe mie minkañete bia koone mie kalate Besam kabetôlô 18, 51 a  52. E Besam 23 David a jô na Yéhôva a ne mba’ale a ve melep, nyi a volô minlem a nyi a kamane bia. David a mbe avale mba’ale te. A mbe a kômbô’ô kañe Yéhôva ‘melu mese ya ényiñe jé.’​—Bs. 23:6.

Te vuane na mbamba nsisime Yéhôva nnye a nga tindi David na a tili mejô mete. A nga tili fe minkulane mejô mi mbe na mia yiane tôébane melu ma zu. Éve’an é ne na kalate Besam 110, David a nga kobô ajô ya éyoñe Tate a ye “tabe mbo nnôme [Zambe]” yôp été a éyoñe Zambe a ye ve nye beta ngul. Ngule ya bo jé? Ngule ya bo na besiñe be Zambe be bo bitelé mebo a “tyi’i mejô meyoñ me bôt été.” Messie a mbe a so’o mvoñe bôte David a nnye a mbe a yiane jôé yôp été ane “prêtre nnôm éto.” (Bs. 110:1-6) Yésus a mbe a yeme’e na nkulan ajô bia koone wô kalate Besam 110 wo fombô nye a na wo ye tôébane melu ma zu.​—Mt. 22:41-45.

Ôwé nsisime Yéhôva ñwô ô nga tindi David na a tili mame me nga boban éyoñe jé, a ma ma ye boban éyoñ é wômô melu ma zu, éyoñ é bi fane ya kañe Yéhôva nnôm éto. Ajô te Besam 37:10,11, 29 a kobô ajô ya ékaña’a David a mbe a va’ak Yéhôva melu mvus a di a ye ve nye melu ma zu. Mejô mete me nga tôéban melu mvus ayoñ Israël a ma ye fe tôéban melu ma zu. Fombô’ô nlô ajô ô ne na “Bia wo bia ye tabe Paradis” Nkume mmombô nyi, abeñ 8.

Kalate Besam 61:8 a bifuse bife bia liti na David a mbe a kômbô’ô kañe Yéhôva ataté Israël ya melu mvus akekui awu. Nalé a liti jame David é bo ngule ya bo melu ma zu éyoñe Yéhôva é wômôlô nye.