Éyoñe Yéhôva a nga jô bôte na be “yiane si nyô, a jôô je,” a nga liti na si ése ja ye mane bo Paradis. (Met. 1:28) Bôte bese bé nyiñe Paradis bé tôñe abendé éte. Atata’a si é nji be Paradis amu Yéhôva a mbe a ngenane teke bé afub Éden. Mvus Armaguédon, bii bi abui ésaé. Dé sili na bi bo mfubane si ése a mane kôm bevôme bese bôte be nga mane ndaman. Ésaé éte jé fo’o bo ngul.

Nalé a bo na bi simesan ésaé bone b’Israël be nga bo éyoñe be nga so minkôm Babylone. Si jap é mbe é boya mimbu 70 teke na môt éziñ a tabe été. Ve Ésaïe a nga jô na Yéhôva a ye volô be na be beta kôme si jap. Nkulan ajô ôte ô mbe ô jô’ô na: “A boya fé jé aval ane Éden, a nkôte si wé aval ane afube Yéhôva.” (És. 51:3) Yéhôva a nga volô bone b’Israël na be mane kôme si jap abeñ. Avale te da da Yéhôva a ye volô bôte ba ye nyiñe si va na be bo na é beta bo Paradis. Nde ye ô ne taté éyoñe ji na wo bo  mame ma liti na ô bili nkômbane ya bo ésaé éte?

Jam ô ne taté bo éyoñe ji é ne na ô ba’ale nda jôé a vôm ô to mfuban a mbamba nta’an. Ô ne de bo to’o bôte be ne wo mefefele be nji bo mfuban. Ô ne fe nyoñe ngap mfubane ya Aba Éjôé a bevôme bia belane be asu na bi bo beta bitôkan. Ô ne fe ke su’u bôte ba tôbane bibubua vôm ô to nge ô bili ngule ya bo de. Éyoñe wo bo nalé, wo liti na ô ne nkômesane ya volô bobenyoñ a besita. Sili’i womiene na, ‘Ye me bili atyeñe mboone mam éziñe me ne belane de nge da kui na me bi mvome ya nyiñe si va?’

Éyoñe Yésus a nga mane wômôlô ngone Jaïrus, a nga jô na be ji’a ve nye jôme ya di. (Marc 5:42, 43) Éko éziñ é nji be ayaé na be nyoñe ngap a mone mona minga ya mimbu 12 ate. Ve tame ve’ele simesan abim ésaé dé sili na bi bo éyoñe ngaka’a Yésus nyina ja ye tôéban, “bôte bese be ne mesoñ ba ye wô’ô tyiñe jé, ba ye so.” (Jean 5:28, 29) Akusa bo Kalate Zambe a kate ki bia mame mese, ve bi ne simesane na, dé sili na bôte bé wômô be bi jôme ya di, jôme ya jaé a étaba’a. Ye ô ne liti ataté éyoñe ji na wo kômbô bo môte wua ya ba ba ye volô be? Bone be mame béziñ ô ne bo éyoñe ji mbe ba.

Éyoñe ba jô na njome mekônda a zu jom akônda dôé, ye ô wô’ô bañete nye na a zu di nda jôé? Éyoñe ba lôme bobejañ a besita béziñ be mbe be bo’ok ésaé é ne ngumba aval Béthel akônda dôé, nge ke éyoñ ésaé njome mekônda ja tebe, ye ô ne volô jeñe be étaba’a? Éyoñe beta étôkan a bobane vôm ô to, ye ô ne nyoñe ntyi’ane ya ke saé ôsusua na beta étôkan a boban a memane ya beta étôkan ate a tame bôte ba so bevôme bevôm mbamba nsoon?

Avale Mam minlôman 24:15 a jô, bia yeme na abui bemillion be bôte dé wômô. Abui ya été e nji bi fane ya yem Yéhôva ôsusua  na ba wu. Ve bé bi fane éte éyoñe bé wômô. a Bitôtôlô bebo bisaé be Yéhôva bi ne mintyetyeñe beye’ele bé bo ésaé ya ye’ele be. (És. 11:9) Charlotte a nga kañete Europe, Amérique du Sud a Afrique a yange jam ete. A jô a meva’a mese na: “Me ne ôjeja’a ya ye’ele bôte bé wômô. Éyoñe ma lañe nkañete môt éziñ a nga nyiñe melu mvus, me wô’ô jô mamiene na: ‘Nge môte nyi a nga ye yeme Yéhôva, ényiñe jé é nga ye bo aval afe.’ Me ne ôjeja’a ya kobô bôte bé wômô ajô Yéhôva, a kate be aval avé be nga ye bi mbamba ényiñe nge be nga ye bo nye ésaé.”

To’o bitôtôlô bebo bisaé be Yéhôva bi nga nyiñe si va ôsusua na Yésus a so, bia yiane yé’é abui mam. Tame ve’ele simesan abime mevak a beta mvome bia ye bi éyoñe bii kate Daniel aval avé minkulane mejô a nga tili ve teke kôme wô’ô mi nga tôéban. (Dn. 12:8) Nge ke, tame ve’ele simesan aval Ruth ba Naomi ba ye bo éyoñe bé yeme na Messie a nga bialé nda bôte jap. Tame ve’ele simesan abime mevak bia ye bi éyoñe bi nyoñe ngap a beta ésaé ñye’elan a ye bobane si ése. Nlem ô bôô bia si ne mieññ, teke fe na jôm éziñ ya mbia émo Satan nyi ja ndeñele bia.

Jé ô ne bo ataté éyoñe ji asu na ô liti na ô ne nkômesane ya ye’ele bôte bé wômô? Ô ne ve ngule na ô bo ntyetyeñe nkañete a na ô bo ayôñ ésaé nkañete. (Mt. 24:14) To’o mame méziñe ma bo na ô bo teke kañete avale wo yi nge ke amu ô nto nnôm, ô ne liti na ô nto nkômesane ya ye’ele bôte bé wômô éyoñe wo ve ngule jôé ése na ô bo ésaé nkañete den.

Ôwé beta nsili a bôô a ne na, Ye ô ne fo’o ôjeja’a ya nyoñe si? Ye nlem ô ne wo njalan a mevak éyoñe wo simesane na melu ma zu ô ne bo môte wua ya ba bé kôme si, ba bé nyoñe ngap a bôte bé wômô a ye’ele be? Ô ne liti na ô nto nkômesan éyoñe wo bo jam ese da sili ataté éyoñe ji asu na ô liti na ô ne ngule ya bo bisaé bia yange wo melu ma zu éyoñe wé nyoñe si.