Nlômane Paul ô nga tili mvendé fo’o Timothée na: “Ma ve wo atiñe mise me Zambe, Krist Yésus a beéngele be ne ntobane na ô ba’ale mejô ma teke wu dise nge bo ôbangam.”—1 Tim. 5:21.

Asu na bi yeme beza be ne beéngele bete, bia zu kobô ajô beéngele be vo’o bo nsamba beéngele ôte. Da kôme yené na, miñwo’one 144 000 mi nji bo ngabe ya nsamba beéngele ôte. Éyoñe Paul a nga tili Timothée, ñwômane miñwuane bekristene be ne miñwo’on ô mbe ô ngenane teke taté. Minlôman a miñwo’one mi mbe mi ngenane te bo minsisim. Ajô te, mi vo’o bo nsamba beéngele be ne ntobane ba jô wô.—1 Cor. 15:​50-54; 1 Thes. 4:​13-17; 1 Jean 3:2.

Nde fe, “beéngele be ne ntobane” be vo’o bo beéngele be nga bo Yéhôva melo éyoñe ya ndône mendim. Beéngele bete be nga tebe ngame Satan a bo mbia minsisim, mmie mite mi nga wosane Yésus. (Mett. 6:2; Luc 8:​30, 31; 2 P. 2:4) Melu ma zu, ba ye fete be édok ébé été tañe mimbu 1 000. A mvuse ya valé, ba ye jiane be a Satan.—Jude 6; Nlitan 20:​1-3, 10.

Ajô te, “beéngele be ne ntobane” ba yiane bo beéngele be ne yôp été ba saé a ‘Zambe ba Krist Yésus.’

Bizu’u betoyini beéngele ba wulu ba’aba’a a Yéhôva e yôp été. (Héb. 12:​22, 23) Bi nji yiane simesane na beéngele bese be bili aval ésaé da, a na ba bo je éyoñe jia. (Nlitan 14:​17, 18) Te vuane na môs éziñ, fo’o ve éngele wua a nga wôé bezimbi 185 000 ya Assyrie. (2 Bb. 19:35) Abime beéngele éziñe da yiane bo ésaé ya “tôkane biôme bise, a bôte bese ba bo na bôte be kolé ôbak, a ba bese ba biasé atiñ, a titane be Éjôé [Yésus].” (Matt. 13:​39-41) Ba bevo’o ba yiane “tôkane mintobane mié” e yôp été. (Matt. 24:31) Be nga jô ba bevo’o na be ‘ba’ale bia mezene mangane mese.’—Bsa. 91:11; Matt. 18:10; ve’ek a Matthieu 4:11; Luc 22:43.

“Beéngele be ne ntobane” kalate 1 Timothée 5:21 a jô be, ba yiane bo beéngele be bili mbe’e ya nyoñe ngap a bikôane bekristen. Bifuse bia bôman éfuse ji, Paul a ve melep a lat a avale bemvendé ba yiane be’e mimbe’e miap. A liti fe na bôte ya ékôane bekristene ba yiane semé bemvendé. Bemvendé ki ba yiane be’e mimbe’e miap “teke wu dise nge bo ôbangam,” a be nji yiane nyoñe ntyi’an éziñe nge tyik ajô éziñe tu nlô. Beta amu a yiane tindi bemvendé na be tôñe melebe me Paul a ne na ba bo ésaé jap e “mise me Zambe, Krist Yésus a beéngele be ne ntoban.” Nalé a kôme ñhe liti na, beéngele béziñe be be’e mimbe’e mi tii a ékôane bekristen. Nalé a tinane na ba yiane ba’ale ékôane bekristen, ba yiane wulu ésaé nkañete a kate Yéhôva avale mame ma lôtan.—Matt. 18:10; Nlitan 14:6.