Ye wo te fo’o tu’a lañe minlô mejô ya Nkume mmombô a bete ya mbu wu? Tame yene nge ô ne ngule ya yalane minsili mi:

Éve’ela évé Yéhôva a liti bia a lat a avale bia yiane yene binga?

Yéhôva a nji bo ôbangam, a nji nye’e befam a dañe binga. Zambe a vô’ôlô binga, a nyoñe ngap a avale ba wô’ôtan, a nyoñe fe ngap a mame ma tyelé be minleme yôp. A too ndi na be ne bo ésaé a nga ve be.—w24.01, af. 15-16.

Aval avé bi ne tôñe melebe bia koone me kalate Beéphésien 5:7 a jô na: “Te mia bo ane ba bo”?

Nlômane Paul ô nga ve bia abendé na bi bo teke yeñ a bôte be ne bo na bi kate tôñe memvinda me Zambe. Abendé éte é ne asu bôte bia be be bia lôt éyoñe nsamba vôme wua nge ke beréseau sociaux.—w24.03, af. 22-23.

Minkañete mi ne minsose mivé bia yiane tabe mie ntyel?

Bia yiane tabe ntyel a mefoé bemvôé bangane ba kate bia teke taté nyoñ éyoñe ya fase nge mame ba kate bia me ne été. Bia yiane fe tabe ntyel a bekalate bôte bia yeme ki ba lôme bia a minkañete mi ne minsose mi ne so beapostat.—w24.04, af. 12.

Mame mevé bi nji yem a mevé bia yem a lat a avale Yéhôva a ye tyi’i Njô bôte Salomon ajô a bôte be nga wu Sodome a Gomorre nge ba be nga wu ndône mendim?

Bi nji tu’a yeme nge Yéhôva a ye ke wômôlô be. Ve bia yeme na Yéhôva a yeme mame mese a na a ne mvam abui.—w24.05, af. 3-4.

Kalate Zambe a jô na Yéhôva a ne “Akok” dangan. Aval avé jam éte da bôé bia minleme si? (Deut. 32:4)

Bi ne ke sobô be Yéhôva. A ne étabe ndi, a tôé bengaka’a bé kom ése. A ne fe teke tyendé mefulu mé nge minsôñane mié.—w24.06, af. 26-28.

Jé é ne volô wo na ô yembane mfefé ékôane bekristene wôé?

Tabe’e ndi na Yéhôva a ye volô wo aval a nga volô bebo bisaé bé ya melu mvus. Te ve’e mfefé ékôane bekristene wôé a wu ô nga taté be. Nyoñe’e ngap a mame ma bobane mfefé ékôane bekristene wôé a jeñe’e na ô bi mimfefé bemvôé.—w24.07, af. 26-28.

Besikôlô bevé bia nyoñe minkana milale bia koone mie Matthieu kabetôlô 25?

Nkana mintômba a bikela wo ye’ele bia mfi ya wulu ba’aba’a a Yéhôva a yeme ba’ale élat. Nkana mimfefek a mekute bindune bengone wo ye’ele bia na bia yiane kômesan a mombô. Nkana betalent wo liti mfi ya saé a ngul ése a bo ayôñe mfa’a ya nsisim.—w24.09, af. 20-24.

Mbala’a si ya Temple Salomon ô mbe abime nté avé?

E kalate 2 Minkañete 3:​4, minnôme mintilane miziñe mia jô na mbala’a si ô mbe “menyi’i me mo 120” nté ya yôp, nalé a tinane na ô mbe ô yiane bo ndame meta 53 (medaa mebo 175). Ve mintilane mife mi nga tili na “menyi’i me mo 20,” nalé a tinane na mba’ala’a si ô mbe meta ébul (medaa mebo 30). Mintilane mia kobô ajô menyi’i me mo 20 mmie mia yené ane mia wô’an a abim afibe mfime ya Temple é mbe.—w24.10, af. 31.

Mvolô a yiane bo “nnôme ya minga wua.” Nalé a tinan aya? (1 Tim. 3:12)

Nalé a tinane na a bili fo’o ve minga wua a na a nji yiane bo mvite mame ya bisôk. Nde fe a nji yiane ve’ele bo binga befe ayas.—w24.11, af. 19.

Amu jé bi ne jô na mejô bia koone me Jean 6:53 me nji bo mbôka’a ya avale ba yiane bo Tawôlô Tate?

Jean 6:53 a liti mfi ya di minsône mi Yésus a nyu metyi mé. Yésus a nga jô mame mete mbu 32 ya É.J. E Galilée, a mbe a kobô’ô bejuif be mbe be yiane liti na ba buni nye. Ve Yésus a nga telé Tawôlô Tate mbu wua mvuse ya valé e Jérusalem. Ngô’é éte, Yésus a mbe a kobô’ô bôte ba ye jôé a nye yôp été.—w24.12, af. 10-11.