1-2. Éve’ela Angelito ja tindi môt ase ya be bia na a bo jé?

YE BEBIAÉ bôé be ne Bengaa be Yéhôva? Nge e ne nalé, te buni na ô ne bo mvôé Yéhôva fo’o ve amu bebiaé bôé be ne bemvôé be Yéhôva. Môt ase ya be bia a yiane jeñe na a bi élate jé a Yéhôva.

² Bi tame kobô ajô Mojañ Angelito. Nda bôte jé ése é ne Bengaa. Ve éyoñ a mbe mongô, a nji be a dañe wô’ôtane na ba Yéhôva be ne ngbwa. Émien a meme na: “Me mbe me kañe’e Yéhôva fo’o ve amu bôte bese ya nda bôte jam be mbe be bo’o de.” Nde Angelito a nga tyi’i na a zu tu’a yé’é Mejô me Zambe a bindi me, a taté fe na a ye’elane Yéhôva mban. A jô na: “Jam ete e nga ye’ele ma na, asu na môt a bo mvôé Yéhôva, émien a yiane yé’é yeme Nye.” Jam e nga kui Angelito da tindi bia na bi sili biabebien beta minsili mi: Nsela’ane mbé a ne zañ e yeme Yéhôva ve yôbe yôp, a e kôme yeme Yéhôva? A jé bi ne bo asu na bi kôme yeme Yéhôva?

3. Nsela’ane mbé a ne zañ e yeme Yéhôva ve yôbe yôp, a e kôme yeme nye?

³ Môt a ne buni na a yeme Yéhôva fo’o ve amu a yeme jôé dé, a mam méziñ A nga bo nge jô. Ve sa ke nyili nnye ba loone na e kôme yeme Yéhôva. Nge bia kômbô kôme yeme Yéhôva, bia yiane nyoñ éyoñe ya yé’é mbamba mefulu mé. Jam ete da ye volô bia na bi tu’a wô’ô amu jé a jô nge bo mam méziñ. Bia ye fe kui na bi yem nge Yéhôva a kañese ôsimesane wongan, mintyi’ane bia nyoñ a  mam bia bo. Éyoñe ki bi tu’aya wô’ô jame Yéhôva a yi na bi bo, bia yiane bo de.

4. Aval avé bive’ela biziñe ya Bible bi ne volô bia ?

⁴ Bôte béziñ be ne kpwe’ele bia amu bia kômbô kañe Yéhôva, nge ke wosane bia amu bia tabe bisulane Bengaa be Yéhôva. Ve nge bi too Yéhôva mebun bi ne tabe ndi na a vo’o suu bia étam môs éziñ. Jam ete da ye bo mbôka’a ya amvôé dangan a Yéhôva, amvôé da tabe nnôm éto. Éko éziñe wo sili womiene nge môt a ne kui na a bi aval élat ete a Yéhôva. Éyalan é ne na, Ôwé! Moïse ba Njôô bôte David be mbe bôt ane bia, ve be nga kui na be kôme yeme Yéhôva. Nté bia zu yen mam be nga bo, bia zu fe bi biyalane ya minsili mibaé mi : Jé é nga volô be na be kôme yeme Yéhôva? A jé éve’ela jap é ne ye’ele bia?

5. Moïse a nga tobe na a bo jé?

⁵ Moïse a nga tobe na a bo nkômbane Zambe. Éyoñ a nga bi bebé mimbu 40, Moïse a nga tobe na a jibi ke lat a ayoñe Yéhôva a lôte na be loone nye na “mone . . . ngone Pharaon.” (Beh. 11:24) A nga lume beta éto mvus. Éyoñ a nga tebe ngame bone b’Israël be mbe minkôm Égypte, Moïse a mbe a yeme’e na Pharaon a ye wô’ô jam ete mbia ôlun. Pharaon ki a mbe éko woñe si ya Égypte, bôte bese be yene’e nye ane zambe. Nga nalé a liti na Moïse a mbe a bili ngule mbunan? Moïse a mbe a too Yéhôva mebun. Avale mebun ete nde e ne mbôka’a ya élate ja tabe nnôm éto.​—Min. 3:5.

6. Jé éve’ela Moïse ja ye’ele bia?

⁶ Ñye’elan ôvé bi ne nyoñ? Ane Moïse, bia fe bi bili ntyi’ane ya nyoñ: Ye bia ye fo’o tobe na bia kañe Yéhôva fufulu a bebo bisaé bé bevok? E ne sili na bi nyume biabebiene mam méziñ asu na bi kañe Yéhôva. E ne fe kui na bôte be nji yeme Yéhôva be wosane bia. Ve nge bi too Ésaa wongane ya yôp mebun, bia ye ke mate jôm, amu bia yeme na a ye su’u bia.

7-8. Jé Moïse a nga ke ôsu a yé’é?

⁷ Moïse a nga ke ôsu a yé’é mefulu me Yéhôva a bo nkômbane wé. Éve’an é ne na, éyoñ Yéhôva a nga lôme nye na a ke kôté ayoñ Israël minkôm Égypte, Moïse a nga taté jaé ben, amu a mbe a ko woñ na a vo’o be’e avale mbe’e ete. Ve Yéhôva a nga yeme tebe été jé a volô nye. (Nk. 4:10-16) Ane Moïse a nga kui na a kate Pharaon mame Yéhôva a ye bo nye. Mvuse ya valé, Moïse a ga yen ane Yéhôva a belan éwôlô wo jé na a kôté ayoñe dé a wôé Pharaon a minkane bita mié Évele mañ.​—Nk. 14:26-31; Bs. 136:15.

⁸ Éyoñ Moïse a vaaya be minkôm Égypte, bone b’Israël be mbe éyoñ ése ve tatan a kobô menyiñ. Ve Moïse a nga yen ane Yéhôva a ke ôsu a jibi bôt émien a nga vaa minkôm a éto belo. (Bs. 78:40-43) Moïse a nga yene fe abim avé Yéhôva a ne éjote nyul éyoñ A nga tyendé ôsimesane wé ya tyam ayoñ Israël amu a nga de’ele nye mo na A jamé be.​—Nk. 32:9-14.

9. Kalate Behébreu 11:27 a liti na aval élat avé é mbe zañe Moïse ba Yéhôva?

⁹ Éyoñ Moïse a wuluya bone b’Israël, élate ba Yéhôva é nga bo abime ngul é ne na a mbe ve ane a yen Ésaa wé ya yôb été  a mis. (Lañe’e Behébreu 11:27.) Bible a kobô ajô élat éte a jô’ô na: “Yéhôva a nga kobô Moïse be lôane mesu, ane môt a kobô mvôé jé.”​—Nk. 33:11.

10. Jé bia yiane bo asu na bi kôme yeme Yéhôva?

¹⁰ Ñye’elan ôvé bi ne nyoñ? Môt a kômbô kôme yeme Yéhôva a nji yiane su’u ve na a yé’é mefulu mé, a yiane fe bo nkômbane wé. Yéhôva a yi na “bôte bese be nyiñ, a be zu yem benya mejôô.” (1 Tim. 2:3, 4) Bia bo nkômbane Yéhôva éyoñe bia volô bôte bevo’o na be yeme nye.

11. Aval avé biabebien bia tu’a yeme Yéhôva nté bia volô bôte bevo’o na be yeme nye?

¹¹ Biabebien bi wô’ô tu’a yeme Yéhôva éyoñe bia volô bôte bevo’o na be yeme nye. Éyoñe Yéhôva a volô bia na bi tôbane môt a bili nkômbane ya bo mvôé jé, bi wô’ô tu’a yen abime avé Yéhôva a wô’ô bôte mintaé. (Jean 6:44) Éyoñe bia yen ane Kalate Zambe a volô ñyé’é Bible na a jô’é mbia mefulu a jaé mfefé môt, bi wô’ô semé ngule ya Mejô me Zambe. (Beco. 3:9, 10) Éyoñe ki bia beta yen abim éyoñ é wô’ô sili bôte béziñ asu na be su’ulane kañese benya mejôô, bi wô’ô semé fulu ôjibi Yéhôva.​—Bero. 10:13-15.

12. Moïse a sili Yéhôva jé kalate Nkôlan 33:13, a amu jé?

¹² Moïse a mbe a nyane’ élate jé a Yéhôva. Akusa bo Yéhôva a nga belane nye na a bo bitua mesimba, Moïse a nga ja’é Zambe wé nge A ne volô nye na a tu’a kôme beta yeme nye. (Lañe’e Nkôlan 33:13.) Éyoñ Moïse a bo’o meye’elane mete, a mbe a lôteya mimbu 80, ve a mbe a yeme’e na a yiane ke ôsu a yé’é yem Ésaa wé ya nye’an.

13. Jam avé é ne liti na bia nyan élate jangan a Yéhôva?

¹³ Ñye’elan ôvé bi ne nyoñ? To’o bi ne nnôme mbo ésaé Yéhôva, bia yiane ke ôsu a nyan élate bia be nye. Bia liti na bia bo de éyoñe bi bili fulu ya ye’elane nye.

14. Amu jé é ne mfi na bi ye’elane Yéhôva mban nge bia kômbô tu’a yeme nye?

¹⁴ Nge wo kômbô bi mbamba élat a môt, wo yiane bo ô laan a nye. Aval ete da da, asu na bi yemete élate bia be Yéhôva, bia yiane ye’elane nye éyoñ ése, bi nji yiane ko woñe ya kate nye mam me ne bia nlem a aval bia wô’ôtan. (Beép. 6:18) Krista a nyiñe Turquie a jô na: “Éyoñ ése ma yooé Yéhôva nleme wom a yen aval a volô ma, ma tu’a nye’e nye a tabe nye mebun. Éyoñe ki ma yen aval a yalane meye’elane mam, ma tu’a yemelane na Yéhôva a ne fo’o Ésaa wom a mvôé jam.”

15. Yéhôva a nga jô na David a ne avale môt avé?

¹⁵ Nda bôte David, a bôte bese be mbe be bôma’ane nye be mbe bebo bisaé be Yéhôva. Ve sa ke jam ete nde é nga tindi David na a kañe Zambe. David émien a nga jeñe na a yemete élate jé a Yéhôva, jôm ete nje Yéhôva a mbe a nye’e nye nya abuii. Yéhôva a nga kui kui na a jô na David a ne “môt a funane nleme [Wé].” (Mam. 13:22) Jé é nga volô David some na a lat avale ngbwa ete a Yéhôva?

16. Bitétéa bi Yéhôva bi nga ye’ele David jé?

¹⁶ Bitétéa bi Yéhôva bi nga volô David na a tu’a yeme nye. Éyoñe David a mbe mongô, a mbe a lôte’ abui éyoñ a mintômba mi ésaa afan. Éko éziñ nne a nga taté na a bindi mimboane mi mam mi Yéhôva éyoñ ete. Éyoñ a mbe  a bete’e mis alu a fombô yôp, a nji a be a yene’ ve bizu’u bi ateté,a mbe a yene’e fe mefulu me Yéhôva me solô mvuse mintéane mi biôm mite. Ane a nga tili na: “Yôp da kañete étôto’o Zambe; a ñyeme yôp wo liti ésaé mo mé me nga bo.” (Bs. 19:1, 2) Éyoñ David a nga kôme fombô bôte Zambe a nga té, a nga tu’a yemelane na Yéhôva a ne susu’a mfefe’e Môt. (Bs. 139:14) Éyoñ a nga bindi mimboane mi mam mi Yéhôva, a nga ku avem, amu a nga tu’a yene na Yéhôva a ne mbetane yôp abui a dañe môta binam.​—Bs. 139:6.

17. Jé ô ne yé’é éyoñ wo bindi mimboane mi mam mi Yéhôva?

¹⁷ Ñye’elan ôvé bi ne nyoñ? Nyeke’e biôme Yéhôva a nga té. Te lôte bie asu e tele yôp. Tebe’e mone jôm, fômbô’ô bie, a semé’é! Môs ôse, bo’ ô bindi’i mam bilok, betit, bôt, a bitétéa bise bia bômane wo bi ne ye’ele wo a lat a Yéhôva. Nge ô bo de, wônaa môs ôse wo ye yé’é mfefé jam a lat a Ésaa wôé ya nye’an. (Bero. 1:20) A môs ôse, nye’ane wo nye’e Yéhôva wo ye bo ve nenenen.

18. Kalate Besam 18 a liti na David a mbe a yemela’ane jé?

¹⁸ David a mbe a yeme’e na Yéhôva nnye a volô nye. Éve’an é ne na, éyoñ a nga wôlé mone ntômba anyu ngbwengbwem a anyu ours, David a nga yeme na Yéhôva nnye a nga volô nye na a wôé bitua betite bite. Éyoñe ki a nga wôé Goliath, David a nga kôme yemelane na Yéhôva émien nnye a wulu nye. (1 Sa. 17:37) Éyoñe fe Saül a mbe a tita’ane nye amu a mbe a bo’o nye éviele, David a nga meme na Yéhôva nnye a nga kôté nye mo me nsiñe wé ate. (Suscription ya Besam 18) Nge David a mbe avale môt é ne mebun, a nga ye tametane na a nga bo mame mete mese a ngule jé. Ve David a mbe éjote nyul, jôm ete nje a mbe a yeme’e yene wo Yéhôva éyoñe jam éziñe da kui nye ényiñ.​—Bs. 138:6.

19. Jé éve’ela David é ne ye’ele bia?

¹⁹ Ñye’elan ôvé bi ne nyoñ? Bi nji yiane su’u ve na bia sili Yéhôva mvolan. Bia yiane fe kui mis a yemelan éyoñ a volô bia a aval a bo de. Nge bi ne éjote nyul, bia ye tu’a yeme na bia bo ki mam méziñ amu bia dañe ngul, ve amu Yéhôva a volô bia. Éyoñ ése bia ye yen ane Yéhôva a volô bia nalé, élate jangan a nye ja ye tu’a bo ngul. Isaac, mojañe ya Fiji, a nga yemelane jam ete. A bo Yéhôva ésaé den a ntoo abui mimbu, ve a jô na: “Éyoñ ma fas mam me nga kui ma ényiñ, ataté môs me nga kaa na ma yé’é Bible azukui den, ma yene na Yéhôva nnye a nga volô fo’o ma. Jam ete da bo na me tu’a subu nye bebé.”

20. Jé é nga bo na David a bi mbamba élat a Yéhôva, a jé jam ete da ye’ele bia?

²⁰ David a nga vu mefulu me Yéhôva. Yéhôva a nga té bia a ngule ya vu mefulu mé. (Met. 1:26) Nge bia ke ôsu a yé’é mefulu me Yéhôva, bia ye fe tu’a bo ngule ya vu nye. Mbôle David a mbe a kôme’e yeme Yéhôva, a nga vu Nye éyoñ a mbe a nyiñi’i a bôte bevok. Tame yene mon éve’ane nyi. Akusa bo David a nga bo mejian a Bath-Schéba a wôé fe nnôm, Yéhôva a nga tobe na a mvamane nye. (2 Sa. 11:1-4, 15) Amu jé? Amu David fe a mbe a yeme’e mvamane bôt. Mbamba élat David a mbe a bili a Yéhôva a nga bo na bon b’Israël be nye’e nye angôndô, a na Yéhôva a jô na David a ne  éve’ela bejôô bôte bevo’o ba yiane vu.​—1 Bb. 15:11; 2 Bb. 14:1-3.

21. Kalate Beéphésien 4:24; 5:1 a liti na bibotane bivé bia bi éyoñ bi ne “bevu be Zambe”?

²¹ Ñye’elan ôvé bi ne nyoñ? Bia yiane bo “bevu be Zambe.” Éyoñ bia vu Yéhôva, jam ete da soo bia abui bibotan, bia kui fe na bi tu’a nye yem. Éyoñ bia ve ngule ya tune mefulu me Yéhôva, bia liti na bi ne bone bé.​—Lañe’e Beéphésien 4:24; 5:1.

22-23. Bibotane bivé bia ye bi nge bia bo mam bia yé’é Bible?

²² Avale bi maneya yen, Yéhôva a volô bia na bi yeme nye a zene ya bitétéa bié a Bible. Édima Kalate bia jôô je ji é ne njalan a mbamba bive’ela bebo bisaé be Yéhôva, ane Moïse ba David. Yéhôva a boya abime dé, bia fe bia yiane bo abime dangan. Abime dangan nde é ne jé? Bia yiane kôme kui mis, a melo, a minlem miangan, asu na Mejô me Zambe me kôme nyiin été.

²³ Bia ye ke yeme Yéhôva môs éziñ akekui zuk. (Ec. 3:11) Jame da dañe mfi é nji bo na bi bi abui ñyeman, ve na bi yeme belan abime ñyeman bi bili. Nge bia bo mam bia yé’é a jeñe na bi vu Ésaa wongane ya nye’an, bia ye ke ôsu a subu nye bebé. (Jc. 4:8) Bible a liti na Yéhôva a vo’o vuane ba ba jeñe nye môs éziñ.