YE Ô ne fo’o avale môte da yeme ve akéva? Môt ase ya be bia a yiane kôme sili émiene nsili ôte. Bible a nga jô na bôte ya melu mangane ma ba ye bo “bikalak.” (2 Tim. 3:2) Éko éziñ wo yem avale bôte da buni na ba yiane saane be ngum ényiñ, a ve be biôm. Ba buni na be nji yiane ve akéva éyoñ môt a bo be mvaé. Ye ô ne wô’ô mvaé ya nyiñ a avale bôt ete nga?

Ve Yéhôva a jô bebo bisaé bé na: “Mi bo [mi va’a] akéva.” A jô na bia yiane ‘ve akéva mfa’a ya mam mese.’ (Beco. 3:15; 1 Bet. 5:18) E yeme ve akéva a ne fe fulu ja volô biabebien. Entame yenané amu jé bia jô nalé.

Jam ôsu é ne na, éyoñ bia yeme ve akéva, nalé a volô bia na bi bi mbamba ñyenane mam a lat a biabebien. Éyoñ môt a ve akéva, nalé a bo na a bi ava’a nlem, a na môt a te bo nye mvaé a wô’ô avak. Amu jé éfia akéva é ne mfi asu môt a jô je, a asu nyô a wô’ô je? Bi tame nyoñe mon éve’an: Éyoñ môt a jeñe na a volô wo, nga a ne amu a te yene na wo yiane mvolan? Ôwé, a bo de amu a nyoñe ngab a wo. Éyoñ wo yene de, nga nalé a bo na ô wô’ô avak? Bi ne simesane na nne Ruth a nga wô’ôtane nalé éyoñ Boaz a nga mvamane nye. Ruth a nga yiane wô’ô mvaé ya yeme na Boaz a nyoñe ngab a nye.​—Ruth 2:10-13.

Da beta dañe yiane na bi bo bi va’a Zambe akéva. E ne été na ô wô’ô yiane bo ô fase’e mam mese a ve wo mfa’a ya nsisim a mfa’a ya minsôn. (Dt. 8:17, 18; Mam. 14:17) Ve wo yiane fe bo ô kôme’e nyoñ éyoñe ya bindi bibotane bise a noo womien a bôte wo nye’e. Nge wo bo nalé, wo ye tu’a nye’e Yéhôva, wo ye fe tu’a wô’ôtan abim avé a nye’e wo.​—1 Jean 4:9.

Ve te su’u ve na wo simesan a bindi bibotane Yéhôva a noo wo, va’a fe nye akéva amu a ne mvam. (Bs. 100:4, 5) Bôte béziñe ba jô na môt a yeme ve akéva a ne kom ése ve mevak.

Jame baa é ne na, fulu mvean akéva ja yemete bilat. Bia bese bia nye’e éyoñe ba liti bia nye’an. Éyoñ wo ve môt akéva amu wo yene na a ne mbamba nlem, nalé a ne bo na mi bo beta bemvôé. (Bero. 16:3, 4) Nya ajôô a ne na, bôte ba yeme ve akéva mbe fe ba volô bôte tyi’ibi. Éyoñ ése môt a bo be mvaé, jam ete da nambe be a tindi be na be’e fe be mvamane bôte bevok. Éyoñe ki môt a mvamane bôte bevok, jam ete da soo nye abui meva’ ényiñ. Yésus a nga bo’olô de a jô’ô na: “Môt a ve, a nyô a nyoñ, nyô a ve a dañe yen ébotan [nge ke mevak].”​—Mam. 20:35.

Robert Emmons, ñye’ele ya Université ya Californie a nga fase nlô ajô ô tii a fulu mvean akéva, a jô na: “Asu na môt a yeme ve akéva, a yiane taté kôme yemelane na a ne yi mvolane môs éziñ. Nne ényiñ é ne nalé, ô ne volô môte den, akiti môte mfe a nga volô fe wo.” Nya ajôô a  ne na, bi vo’o kôme bu’uban ényiñ étam étam, bôte bevo’o be ne bia nya mfii. Môt a ne ve bia jôme ya di den, nyô mbo’o ke a ne ba’ale bia éyoñ bia kon. (1Bec. 12:21) Môt a yeme ve akéva a biasé ki mone jam ase môt a ne bo nye. Nde ñhe, ye ô wô’ô fo’o ve akéva éyoñ môt a mvamane wo?

Jame lale, fulu mvean akéva ja volô na bi bi mbamba ñyenane mam, ja kamane bia na bi ve mam mese ve abé abé. Bi ne jô na boo wongan a ne ane ése’ese. A ne kañese na asimesan éziñ e nyiine wo nlem, a dibe’e ke da vo’o zen. Éyoñ wo yeme ve akéva, wo dañe bem ôsimesane ve mbamba be mam, sa ke minju’u miôé. Mise me môt a yeme ve akéva me yoo aval é ne na, a ji’a yene mbamba be mam ba kui nye ényiñ, a fane ya tu’a beta ve akéva. Avale môt ete e nji yen ayaé ya tôñe melebe me Paul ma: “Va’ane be Tate biyoñe bise.”​—Beph. 4:4.

Mbia b’asimesane ba tabe ki nleme môt a yeme ve akéva. E ne ayaé na ô yene môt a yeme ve akéva a too éviele, éyôé, a mbia nlem. Ane ô vaa nalé, e nji bo tyi’ibi na ô koone môt a yeme ve akéva a too ôzañ akum. A vak a abim a bili, teke tôñesan abui mam ényiñ.​—Beph. 4:12.

Bia yeme na Satan a yi na bi bo ve éyôé éyôé éyoñ bia tôbane minju’ melu ya asu’ulane ma. A nye’e éyoñ môt a tatan éyoñ ése. Avale môt ete ki e vo’o tu’a bo akap ésaé nkañete. Bi ne fe jô na môt a yeme ve akéva a wum ébuma ya nsisim. A ne mevak amu a yene mbamba be mam bese Zambe a ve nye, a buni fe bengaka’a bese Zambe a bo nye.​—Beg. 5:22, 23.

Bi too ndi na, amu ô ne Ngaa Yéhôva, wo kañese mam mese ba te jô nlô ajô wu a lat a mvean akéva. Wo yeme fe na, fulu mvean akéva a nyi ya bi mbamba ñyenane mam me nji so atemetem. Ve te bili atek. Ô ne bi fulu mvean akéva a ba’ale je. Jé é ne volô wo? Môs ôse, nyoñe’ éyoñe ya simesane mam méziñe me ne tindi wo na ô ve akéva. Nté wo ye ke ôsu a bo nalé, mvean akéva wo ye mane bo wo fulu. Wo ye fe yen ényiñe mvaé a dañe bôte be ne valé ve na ba simesane minju’u miap. Simesa’an abim meva’a wo bi môs, amu Zambe a bôte bevok ba te ve wo ngule nyôl. Môs ôse ô ne tili mbamba be mam mebaé nge mela ma te ve wo ava’a nlem.

Beyeme mam ba jô na éyoñe bia yeme ve akéva, nalé a bo na boo wongan a dañe ba’ale ve mbamba be mam ma bo na bi nye’e ényiñe jangan. Môt a yeme ve akéva a ne meva’ éyoñ ése. Nde ñhe, yooé mis a lañe bibotane biôé, bu’ubane mbamba be mam ba kui wo ényiñ, va’a akéva! Te buni na bôte be mba’a mba’a ve mvamane wo, ve bo’o ô va’a “Yéhôva akeva, amu a ne mvaé.” Yaa, ‘va’a akéva asu mam mese.’​—1 Mka. 16:34; 1 Bet. 5:18.