1. E yia bia a ve bia fane ya bo jé?

BETA ñyia bia éziñ a nga jô na: “Bifia bia bo na ô simesane mam. Mezik ma bo na ô wô’ôtane mam. Ve jia ja bo na ô wô’ôtan asimesan.” Ngo’o avale mbamba asimesane bi ne “wô’ôtan,” éyoñe bia ve Yéhôva? Ésa wongane ya yôp été duma, a liti nye na bia nye’e nye! Jôm éte nje bia bi ne mfi ékaña’a bia ve Yéhôva, to’o bia yia bie étam, nge akônda été, fufulu a bebo bisaé be Yéhôva.

2, 3. (a) Jé bôte béziñ be ne wô’ôtan éyoñe ba yia bia akônda été? (b) Minsili mivé bia zu yalan ayé’é di?

² Nde, wo wô’ôtan aya éyoñe wo yia bia bisulan? Ye wo wô’ô ôson? E metume méziñ, e ne jam ôson asu befam na be yia bia bôt été. Bôte bese ya akônda fe be ne taté na ba bo avale da, e dañedañe nge betebe ôsu ya akônda ba wô’ô ôsone ya yia bia, nge na, ba bo mam mefe éyoñe bôte bevo’o ba yia bia.​—Bs. 30:12.

³ Éyoñe bia yeme na, e yia bia a ne mfi asu ékaña’a bia ve Yéhôva, teke jôm éziñ ja ye kamane bia na bi yia bia ésulan. Ajô te, môt ase a yiane sili émiene na: ‘Aval avé ma yene bia bia yia bisulan? Jé me ne bo nge ma ko woñe ya yia bia bôt été? Jé me ne bo asu ya na, me yia bia a nlem ôse?’

4, 5. Aval avé bone b’Israël be mbe nta’an asu ñyiane bia ya ékaña’a?

⁴ Bebo bisaé be Yéhôva be jaéya zu ba belane mezik na, be ve Yéhôva duma. Jam ya semé e ne na, éyoñe bone b’Israël be mbe be wulu’u ba’aba’a a Yéhôva, bia bi mbe nya mfi. Éve’an é ne na, éyoñe Njô bôte David a nga kômesane bôt asu ésaé ya temple, a nga ta’a Belévite 4 000 asu ñyiane bia. Nsamba wop, bôte 288 be mbe “ñye’elan ñyiane bia be Yéhôva, ba bese be mbe atyeñ.”​—1 Mka. 23:5; 25:7.

⁵ Éyoñe be nga yoé temple, bôte be nga yia bia. Kalate Zambe a kañete jam e nga boban: “A nga bo na, éyoñ beloñe metoñ a beyia bia be nga bo ane nsamba wua, tyiñ é bo ve jia éyoñ be nga kañe Yéhôva a ve nye akéva; éyoñ be nga bete metyiñe mape yôp a fulane metoñ a biwoé a biôm be nga bôm, a kañe Yéhôva, . . . étôto’o Yéhôva é nga jaé nda Zambe ne lut!” Ngo’o abime be nga veane ngule nyôle môs ôte!​—2 Mka. 5:13, 14; 7:6.

6. Kañete’e ngum avale mame bone b’Israël be nga bo, éyoñe be nga yia Yéhôva jia melu Néhémie a mbe ngovina Jérusalem.

⁶ Éyoñe Néhémie a nga ta’a bone b’Israël asu ésaé meloñe ya mimfine ya Jérusalem, a nga ta’a fe Belévite asu ya na, mbe be yia bia a bôme mezik. Éyoñe be nga mane ésaé melôñ, be nga yia Yéhôva jia be bo’o ngum avale mam e mbe e liti’i na, be ne meva’a été. Be nga ta’a “beta minsamba [beyia bia] mibaé mi nga ve akéva.” Nsamba wua ô nga ke mfa’a ya mbo ngale ya temple, wu ôvo’o ki ô nga ke mfa’a ya mbo nnôm asu ya na, metyiñe map me wô’é ôyap. (Néh. 12:27, 28, 31, 38, 40, 43) Teke bisô, Yéhôva a mbe meva’a ya wôk ane bebo bisaé bé ba yia nye bia.

7. Aval avé Yésus a nga liti na, Bekristen ba yiane yia bia éyoñe ba kañe Yéhôva?

⁷ Éyoñ akônda Bekristen e nga tebe, mezi’i me nga ke ôsu a bo nya mfi asu ékaña’a. Yésus a nga yia bia alu a nga kandane lôt a beyé’é bé, mvuse tawôlô Tate.​—Lañe’e Matthieu 26:30.

8. Aval avé Bekristene ya ntete mimbu ôsu, ba ve bia mbamba éve’ela mfa’a ya ñyiane bia?

⁸ Bekristen ya ntete mimbu ôsu ba ve bia mbamba éve’ela mfa’a ya yia bia fufulu. Be nji be be bo’o bisulane temple, ve nalé a nji kamane be na, be yia Yéhôva bia a ayôñ ese. Nlômane Paul ô nga tili bobenyañe bé a ngule ya mbamba nsisime na: “Mi ye’ele’e a leban a ñyeman ôse, a bepsaume a bia a miñyiane mi bia ya nsisim, mi yi’a Zambe bia a [mvean akéva] minlem mienan été.” (Beco. 3:16) Bia bi ne kalate bia wongan bi ne ‘bia ya nsisim bia yiane yiaban a mvean akéva.’ Bi ne ngabe jia ya bidi ya nsisim ‘ôlo ô ne mewôk’ a fek wo ve bia.​—Mt. 24:45.

9. (a) Jé é ne kamane bôte béziñe na, be yia bia a nlem ôse bisulan a bitôkane biangan? (b) Aval avé bi ne yia Yéhôva bia, a za a yiane liti éve’ela mfa’a ôte? (Fombô’ô fôtô ya atata’a ya ayé’é di.)

⁹ Jé ô ne bo nge be nji bi fulu ya yia bia nda bôte jôé, metume môé, nge ke vôm ô too? Beminsini bôte ba kuli den be ne volô wo na, ô wôk avale beta beyia bia ba yia. Ve ô ne wô’ô ôson, nge ke wô’ô womien éngôngol éyoñe wo wô’ô ane bôte bete ba yia bia. Te jô’é na nalé a kamane wo na, ô yia Yéhôva  bia. Bete’e kalate bia wôé yôp, bete’e nlô, a yi’a bia a nlem ôse! (Esd. 3:11; lañe’e Besam 147:1.) Den, bifia ya kalate bia wongan bia lôte bingeñgeñ abui Meba m’Éjôé, nalé a volô na bi yia yôp été. Sikôlô bemvendé a bediakon a bili ngume ngap ja fombô ve bemvendé, ngap éte, Tin Ékôan é nga jô na, be futi ngum nlô ajô wo ngôné mfi ya yia bia. Nalé a ye’ele bemvendé na, ba yiane liti mbamba éve’ela mfa’a ya yia bia Aba Éjôé.

10. Jé bi nji yiane vuane nge bia ko woñ ya yia bia a nlem ôse?

¹⁰ Abui bôte da kate yia bia bisulan a nlem ôse amu ba ko woñ. Ba ko woñ amu ba simesane na be bili abé tyiñ, nge ke na, bôte ba ye dañe fombô be, amu tyiñe jap ja wô’é abui. Ve bia yiane ba’ale na, “bia bese bi akolô ôbak mimfa’ abui” éyoñe bia kobô. (Jc. 3:2) Ve nalé a nji kamane bia na bi kobô. Nde, ye bia yiane jô’é ñyiane bia amu na, bi bili abé tyiñ?

11, 12. Melebe mevé me ne bo bia mfi éyoñe bia yia bia?

¹¹ Éko éziñe na, bia ko woñe ya yia bia amu bi bili abé tyiñ. Ve bi ne yé’é yia bia avale da yian, nge bia tôñe melebe m’éziñ. *

¹² Ô ne yé’é na, wo yia yôp été a ngul ése, éyoñe wo vebe avale da yian. Aval ane zo’oyañe ja bo na lambe a yôñ, aval ete fe mvebe wo bo na, tyiñe jangan é bo teke tan éyoñe bia kobô, nge yia bia. Ô ne yia a tyiñe wo belane je éyoñe wo kobô, nge ke na, ô ne bete tyiñe yôp mona abim a lôte tyiñe wo kobô je. (Kele’e lañe melebe me ne kalate Tirez profit de l’École du ministère  théocratique, afebe 181 akekui 184, nlô ajô ô ne na, “Utilisez correctement votre provision d’air.”) Kalate Zambe a wô’ô jô bebo bisaé be Yéhôva na, be ‘vak’ éyoñe ba yia bia.​—Bs. 33:1-3.

13. Kate’ aval avé bi ne kômesane na, bia yia bia teke ko woñ.

¹³ Éyoñe wo bo ayé’é ya nda bôt, nge ke ayé’é étam dôé, jeñe’e na ô tôñe melebe ma: tobe’e jia wo dañe nye’e kalate bia wongan. Lañe’e bifia ya été yôp été. Bela’ane tyiñe nkobô jia, asu ya na ô mane lañe nnôñe bifia wua teke wo’on. Mvuse ya valé, yi’a nnoñe bifia ôte a tyiñe nkobô jia. (És. 24:14) Tyiñe jôé ja ye bo abeñ éyoñe wo yia bia. Te jôé na tyiñe jôé é kamane wo na ô yia bia!

14. (a) Aval avé bi ne yoé menyu mangan éyoñe bia yia bia? (Kele’e lañe nka’ale ô ne nlô ajô na, “ Mame me ne volô wo na ô yeme yia bia.”) (b) Melebe méziñe me ne volô wo na, ô kôme tyiñ, mevé wo yene mfi?

¹⁴ Ô vo’o kôme yia bia nge ô nji tu’a yoé anyu dôé. Ajô te, wo yiane yoé anyu dôé a dañe abime wo yoé de éyoñe wo kobô. Jé ô ne bo nge ô bili mone tyiñ, nge tyiñe ja dañe wô’é? Mbamba melebe me ne kalate Tirez profit de l’École du ministère théocratique afebe 184, nka’ale ô ne nlô ajô na, “Quelques problèmes particuliers à surmonter.”

15. (a) Foé fé be nga kate bôte beta ékôane Tin Ékôan é nga bo mbu 2016? (b) Jé é nga tindi Tin Ékôan na é kuli mfefé kalate bia?

¹⁵ Mbu 2016, beta ékôane Société Watch Tower Bible and Tract Society of Pennsylvania, a wô’ô bo mbu ôse, Mojañe Stephen Lett, ébu’a jia ya Tin Ékôan a nga yôtane na mfefé kalate bia ô kuiya ô to nlô ajô na, “Yi’a Yéhôva bia a nleme wôé ôse.” Bôte be nga wô’ô angôndô ya mevak éyoñe be nga wô’ô foé éte. Mojañe Lett a nga jô na,  nsôñane wua ô nga tindi Tiñ Ékôane na é kuli mfefé Kalate bia ôte ô mbe na, a lu’an a mfefé Kalate Zambe Traduction du monde nouveau (nkobô Énglis). Nalé a mbe a tina’ane na, asu minkobô miziñ, be nga yiane bo na, bifia bi ne kalate bia wongan, bi lu’an a bi ya mfefé Kalate Zambe. Ajô te, be nga kô’ôlane mimfefé mi bia a lat a ésaé nkañete, a mvean akéva wongan asu ntañ. Nde fe, mbôle bia bi ne nya mfi asu Ékaña’a bia ve Yéhôva, Tin Ékôan é nga kômbô kuli mfefé kalate bia a to angôndô ya abeñ. Kalate bia ate ba mfefé Kalate Zambe ba funane bevôme bebaé: Ékô’ôla a miñwôndé.

16, 17. Mam mevé me nga tyendé mfefé kalate bia?

¹⁶ Asu ya na bi yeme belane kalate bia wongan, be nga mane ta’a minlô mejô. Bia 12 bia taté, bia kobô ajô Yéhôva, bia 8 bia tôé valé, bia kobô ajô Yésus a ntañ, a abui minlô mejô mife. Minlô mejô mite mi ne mfi, amu mi ne volô bobejañe ba bo minkañete ya mengana bôte na, be ji’a yene jia ja lu’an a nkañete wop.

¹⁷ Asu ya na, môt ase a yia bia a nleme wé ôse, be nga tyendé bifia ya nkobô Énglis bi mbe ayaé ya wôk, a bi bôte be nji beta belane bie den. Be nga futi bifia abui bôte da belane bie éyoñe ji, bi to fe tyi’ibi ya wôk. Éve’an é ne na, nkobô Fulasi jia é mbe nlô ajô na: “Préserve ton coeur” é nga tyendé, éyoñe ji é nto nlô ajô na: “Préservons nos coeurs” (“Bia ba’ale minlem miangan”). Amu jé be nga tyendé jia éte? Amu na, éyoñe môt a mbe a yia jia éte, a mbe ve ane a kobô môte mfe. Nalé a mbe ve ndeñele bôte ba tabe bisulan, bitôkan, a beta bitôkan aval ane bôte be ndeme duban, bôte ba nye’e benya mejôô, bisoé, a besita. Jôm éte nje be nga tyendé nlô ajô a bifia ya jia éte.

18. Amu jé bia yiane yembane bia ya mfefé kalate bia wongan? (Kele’e lañ ayemé.)

¹⁸ Abui bia ya kalate bia wongan “Yi’a Yéhôva bia a nleme wôé ôse” e ne ane meye’elan. Éyoñe wo yia bia bite, ô bili fane ya kate Yéhôva avale wo wô’ôtan mam. Bia bivo’o bia ye “tindi [bia] mfa’a ya nye’an a mbamba mimboane mi mam.” (Beh. 10:24) Bia kômbô mane yembane bia, mezik, a bifia ya bia biangan. Ô ne de bo éyoñe wo wô’ô mezi’i jw.org. Éyoñe wo yé’é yia bia nda, ô ne kui na ô yia a nleme wôé ôse, teke ko woñ. *

19. Aval avé bôte bese ya akônda be ne kañe Yéhôva?

¹⁹ Ba’ale’e na mezik me ne nya mfi ékaña’a bia ve Yéhôva. A ne beta zene ya liti Yéhôva na, bia nye’e nye a na, bia ve nye akéva. (Lañe’ Ésaïe 12:5.) Éyoñe wo yia bia a nlem ôse, wo ve bôte bevo’o ngule nyôle na, be fe be yia bia a nlem ôse. Nalé a bo fe na, bôte bese ya akônda, bisoé, minnôm, bôte ba nye’e benya mejôô, be yia Yéhôva bia a nlem ôse. Nde ñhe, te ko woñe ya yia bia. Ve, tôñe’e melebe me ntili Besam ma: “Yi’a Yéhôva jia.” Ôwé, yi’a Yéhôva bia a nleme wôé ôse!​—Bs. 96:1.