1. Mbôle be nga bialé abé été, bebo bisaé be Yéhôva béziñ be wô’ô wô’ôtan aya?

“NGO’ éngôngole môt me né!” (Bero. 7:24) Abui bebo bisaé be Yéhôva da kañese na bifia bi Paul bite bia nambe be. Bia bese bia tôbane minjuk amu bi nga bialé abé été. Éyoñe fe nleme wongan wo tindi bia na, bi bo mam Yéhôva a vini, bi wô’ô wô’ô biabebien éngôngo. Bekristen béziñ be nga bo minsem be wô’ô su’ulane simesane na, Yéhôva a vo’o ke jamé be.

2. (a) Aval avé Besam 34:22 a liti na bebo bisaé be Yéhôva be nji yiane bili atek amu mam abé map? (b) Jé bia zu yen ayé’é di? (Kele’e lañe nka’ale ô ne nlô ajô na, “ A ne jé, ye besikôlô, ye bive’ela?”)

² E ne été na, Kalate Zambe a jô bia na, bôte bese ba sobô be Yéhôva be nji yiane bili atek amu mam abé map. (Lañe’e Besam 34:22.) Jé ja tinane na, e ke sobô be Yéhôva? Mam mevé bia yiane bo asu ya na, Yéhôva a ko bia éngôngo a jamé bia? Bia ye bi biyalane ya minsili mite éyoñe bia ye fas ajô ya minlame ya sobô Yéhôva a nga telé ayoñ Israël. Nta’ane mam ôte ô nga taté melu me Moïse, Yéhôva a nga tyendé wô  Pentecote ya mbu 33 ya É.J. Te vuane na, Atiñ ete e nga so be Yéhôva. Nta’ane mame ya minlame ya sobô wo ye’ele bia avale Yéhôva a yene nsem, aval a yene bôte ba bo minsem, a ba ba kôñelane minlem. Bia zu taté yene nsôñane Yéhôva a mbe a bili éyoñ a nga telé minlame ya sobô.

3. Aval avé b’Israëlite be mbe be yiane bo éyoñe môt a wôé nyi mbok?

³ Yéhôva a wô’ô angôndô ya abé éyoñe môt a wôé nyu mbok. Éyoñe mone Israëlite a mbe a wôé nyi mbok, môt a mbe évuvumane ya nyi ba te wôé, “nkune metyi,” a mbe a yiane kune môte wé. (Nb. 35:19) Ñwôé bôt ate fe a mbe a yian awu. Nalé a mbe a bo’o na Si ya Ntiñetan é tabe mfuban mise me Yéhôva, amu émien a nga jô na: “Nalé ate mi aye bo te ve si mvin vôm mi né: amu metyi [me bôte] mme m’ ave si mvin.”​—Nb. 35:33, 34.

4. Aval avé b’Israëlite be mbe be tyi’i ajô ya môt a nji vañe wôé nyi mbok?

⁴ Aval avé b’Israëlite be mbe be tyi’i ajô ya môt a nji vañe wôé nyi mbok? Akusa bo na, jam ete e mbe e kui atemetem, môt a nga wôé nyi mbok a mbe a be’e ayeme ya ajô ete. (Met. 9:5) Ve a mbe a bili fane ya tube nlame wua ya minlame ya sobô misamane Yéhôva a nga telé. A mbe ve ke sobô wôé. Ñwôé bôt ate a mbe a yiane tabe nlam ôte akekui beta prêtre a wu.​—Nb. 35:15, 28.

5. Aval avé minlame ya sobô mia volô bia na, bi kôme yeme Yéhôva?

⁵ Nta’ane mam ya telé minlame mite ô nji be ô so’o be môta binam. Yéhôva émien a nga jô Josué na: “Kobô’ô bone be Israël na, Telane minlame ya sobô.” Minlame mite mi mbe étyi. (Jos. 20:1, 2, 7, 8) Mbôle Yéhôva émien nnye a nga telé minlame mite ane minlame mi ne étyi, bi ne sili na: Aval avé nta’ane mam ôte, wo volô bia na bi yem avale Yéhôva a ko bôt éngôngo? Jé nta’ane mam ôte wo ye’ele bia a lat a avale bi ne ke sobô be Yéhôva melu ma?

6, 7. (a) Ésaé évé bemvendé be mbe be bo’ok? (Fombô’ô fôtô ya atata’a ya ayé’é di.) (b) Amu jé môte nyi a mbe a yiane ke yene bemvendé?

⁶ Môt a nji vañe wôé nyu mbok, a mbe a yiane taté “kañete ajô dé melo bemvendé,” a tele anyiine mbé, aka’a ya nlam a te ke sobô. Bôte ya nlam ôte be mbe be yiane nyoñe nye mvo’é. (Jos. 20:4) Mvus abim éyoñ éziñ, be mbe be yiane lôme nye nlam a nga wôé môt asu ya na, bemvendé ya wôé be tyik ajô dé. (Lañe’e Nlañane Bôt 35:24, 25.) A mbe ngule ya bulane nlame ya sobô fo’o ve nge bemvendé ba tyi’i na, a nji vañe wôé môt ate.

⁷ Ésaé évé bemvendé be mbe be bo’ok? Be mbe be yiane ba’ale ayoñ Israël mfuban, be mbe fe be yiane volô môt a te wôé nyi mbo’o teke vañ na, a bu’ubane mvame Yéhôva. Beta ñyeme mam éziñ a nga tili na, nge môte nyi a teke ke yene bemvendé, “a mbe a yian awu.” A ke ôsu a jô na: “Émien a mbe a be’e ayeme ya awu dé, amu a nji ke sobô vôme Zambe a nga mane kômesan.” Bemvendé be mbe fo’o be yiane volô môt a te wôé nyi mbo’o teke vañ, ve émien a mbe a yiane ke jeñe mvolan, a kañese wô. Nge a teke tup a ke sobô minlame ya sobô avale Yéhôva a nga jô, nkune metyi a mbe fili ya wôé nye.

8, 9. Amu jé Kristen ja te bo nsem ja yiane jeñe mvolane be bemvendé?

 ⁸ Den, Kristen ja jôbane nseme wé, a yiane ke yene bemvendé na be volô nye. Amu jé nalé a ne mfi? Amu ôsu a ne na, avale Kalate Zambe a jô, Yéhôva nnye a nga tyi’i na bemvendé ba yiane volô môt a te bo nsem. (Jc. 5:14-16) Amu baa a ne na, nta’ane mam ôte wo volô môt a jôbane na, a beta bo mfubane mise me Yéhôva, a na, a bo te beta bo nsem ôte. (Beg. 6:1; Beh. 12:11) Amu lale a ne na, Yéhôva nnye a nga ve bemvendé ésaé éte, a yañele fe be asu ya na, be yeme nge môt a te bo nsem a jôban abé dé. Yéhôva a jô na bemvendé be ne ane “asoé ba sobô ôkôs.” (És. 32:1, 2) Ye ô nji yene na, nta’ane mam ôte wo liti na, Yéhôva a wô’ô bia éngôngo?

⁹ Abui bebo bisaé be Yéhôva e nga yene na, a ne mbamba jame ya jeñe mvolane bemvendé, a kañese wô. Bi bili éve’ane mojañe Daniel, a nga bo beta nsem, ve a nga bo abui bengon a ko woñe ya ke yene bemvendé. A jô na: “Éyoñe me nga yene na, abui éyoñ e lôteya, nde me nga simesane na, bemvendé be vo’o beta bo jôm éziñ asu dam. Ane me nga ba’a mo, me yange’e fo’o jam ese da ye kui. Ve éyoñe me nga ye’elane Yéhôva, nde me nga yeme na, ma yiane taté sili nye njaman.” Mvuse ya valé nde Daniel a nga ke yene bemvendé. Den, éyoñ a beta simesane jam e nga kui, a jô na: “Me mbe me ko woñe ya ke yene be. Ve éyoñe me nga bo de, me nga wô’ôtane fo’o ve ane ba vaa ma beta mbe’e bitul. Éyoñe ji, ma yeme na, me ne subu Yéhôva bebé teke ko jôm éziñe woñ.” Den, Daniel a mbili mone môte ya nlem a ne mfuban, a ndôme fe bo diakon.

10. Môt a nji vañe wôé nyi mbok a mbe a yiane bo jé asu ya na, be ko nye éngôngo?

¹⁰ Môt a nji vañe wôé nyi mbok a mbe a yiane bo jam éziñ asu ya na, be ko nye éngôngo. A mbe a yiane tup a ke nlame  ya sobô ô ne nye bebé. (Lañe’e Josué 20:4.) Môt ate a nji be ve bo fianga a nta’ane mam ôte; a mbe ve wu nge a teke ji’a tup nlam ôte a ke tabe wôé! A mbe a yiane nyum émiene mam méziñ. A mbe a yiane li’i asu ésaé dé, abeñe nda dé, a nji fe be fili ya wulu aval a yi. A mbe a yiane bo mam mete mese akekui awu beta prêtre. * (Nb. 35:25) Aval ényiñ ete e nji be tyi’ibi. Be mbe ve wôé nye nge a kôlô nlam ôte, amu nalé a mbe a liti’i na a biasé nseme wé.

11. Jé môt a te bo abé a yiane bo asu ya na a liti na, Yéhôva a nji bo ntindane ya jamé nye?

¹¹ Melu ma fe, mbo abé a kôñelane nlem a yiane nyum émiene mam méziñ asu ya na, Yéhôva a mvamane nye. A yiane jô’é abé dé, nalé a tinane na, a yiane sa’ale mone jam ase a ne tindi nye na a bo nsem. Nlômane Paul ô nga kate mame Bekristene ya Corinthe be nga bo mfa’a ya liti na, be kôñelaneya minlem. A nga tili na: “Mi nga veban ôlune minlem aval ane di ya be Zambe, aka’a mbamba mba’alan e nga bo be mia, ya, aka’a nkamane miabebien, ya, aka’a nyaan, ya, aka’a woñ, ya, aka’a nkômban, ya, mvean ngu, ya, aka’a akuna’a!” (2 Bec. 7:10, 11) Nge bia ve ngul ése na bi jô’é abé bi nga bo, bia ye liti Yéhôva na, bia jôban abé ete, a na, bi nji simesane na Yéhôva a ne ntindane ya jamé bia.

12. Jé Kristen ja yiane bo asu ya na, Yéhôva a ke ôsu a jamé nye?

¹² Jé Kristen ja yiane bo asu ya na, Yéhôva a ke ôsu a jamé nye? A yiane bo nkômesane ya jô’é mam a nye’e, to’o ma me ne dia mise mé, nge a yene na, ma tindi nye na a bo nsem. (Mt. 18:8, 9) Nge bemvôé bôé béziñe ba tindi wo na, ô bo mame Yéhôva a vini, ye wo ye ke ôsu a yeñ a be? Nge wo kômbô sé’é abime meyo’o wo nyu, nga wo yiane sa’ale mam me ne bo na ô nyu abui? Nge wo yen ayaé ya kandan a mam bisôk, ye wo sa’ale befilm, menjeñe mefoé, nge mam mese me ne bo na, ô bi mbia b’asimesan? Yéhôva a nye’e ngul ése wo ve asu ya na, ô ba’ale élate jôé a nye. Teke jôm éziñ é ne abé ane Yéhôva a lume wo mvus. Avale da fe, teke jôm éziñe ja dañe mvaé ane ‘mvame jé ya nnôm éto.’​—És. 54:7, 8.

13. Kate’ amu jé môt a tup a mbe ve nyiñe meva’ été nlame ya sobô, teke ko jôm éziñe woñ?

¹³ Nté môt a nga wôé nyi mbok teke vañ, a ngenane teke nyiine nlame ya sobô, nkune metyi a mbe ngule ya wôé nye. Yéhôva a nga jô na, minlame mite “mia ye bo mia asoé ya sobô.” (Jos. 20:2, 3) Yéhôva a nji be a kômbô’ô na, éyoñe môt ate a keya nyiine nlame ya sobô, bemvendé ya wôé be beta tyi’i ajô dé. Nde fe, a nji be a kômbô’ô na, nkune metyi a ke wôé môt ate éyoñ a nto nlam ôte. Môt a tup a nji be a yiane ko jôm éziñe woñe wôé. Yéhôva a mbe a ba’ale nye. A nji be mimbôk. A mbe a bili fane ya saé, fane ya volô bôte bevok, a fane ya kañe Yéhôva mvo’é été. A mbe ngule ya bu’uban ényiñ!

14. Jé Kristen ja kôñelane nlem ja yiane yem?

¹⁴ Bebo bisaé be Yéhôva béziñ be nga bo beta minsem, ba ke ôsu a wô’ôtan ane be ne “mimbôk,” to’o be kôñelaneya minlem. Ba ve bebiene mekua, ba buni na, Yéhôva a nji jamé be. Nge wo fe ô tele été éte, wo yiane yeme na, Yéhôva a jamé éyoñe jia ya biyoñe bise, a na,  ô nji yiane beta ve womiene mekua amu minseme miôé! Mojañe Daniel bia te jôô nye mebeñe ya yôp a nga yeme na, jam ete e ne abôm ane koé. Éyoñe bemvendé be nga ve nye melep a volô nye, ane a nga beta bi mone môte ya nlem a ne mfuban. A jô na: “Éyoñe ji nlem ô bômbôya ma si. Me nji beta ve mamiene mekua. Éyoñe Yéhôva a jameya wo, a ne ane a te tyam abé dôé. Aval émien a jô, a wua abé dôé ôyap. Te beta ve womiene mekua.” Nné ane a nyiineya nlame ya sobô, môt a te wôé nyi mbok teke vañ, a nji be a beta ko nkune metyi woñ. Avale da fe, éyoñe Yéhôva a jaméya bia, bi nji yiane beta ko woñe na, a ye foñôsô bia amu abé bi nga bo.​—Lañe’e Besam 103:8-12.

15, 16. Aval avé éto Yésus a bili ane Nkôté a Beta Prêtre é ne yemete ndi nlem ô bili na, Yéhôva a jamé wo?

¹⁵ Melu ma, bia fe bi bili beta amu ya tabe ndi na Yéhôva a ko bia éngôngo. Paul a nga jô na, a ne éngôngo amu a kate bo Yéhôva mewô’ô ne tiññ. Mvuse ya valé a nga jô na: “Me ave Zambe akéva amu Yésus Krist Tate wongan.” (Bero. 7:25) Paul a mbe a to ndi na, Yéhôva a ye jamé nye a zene ya be Yésus amu a nga kôñelane nlem, akusa bo a mbe a kele’ ôsu a juane nsem, a mbia be mam a nga bo. Yésus, Nkôté wongan a bo na, bi bi mone môte ya nlem a ne mfuban, a ve fe bia mvô’é ya nlem. (Beh. 9:13, 14) Beta Prêtre wongan, “a ne ngule ya nyii ba be azu bebé be Zambe amu nye, nya nyiane, amu a to nnôm éto a vañ amu ajô dap.” (Beh. 7:24, 25) Nge beta prêtre a mbe a va’a bone b’Israël ngule nyule na, Yéhôva a ye jamé mam abé map, ngumane ke Beta Prêtre wongan, Yésus. A jô bia na, “bia ye kooban éngôngo a yene mvam, nde bia ye nyoñe mvolan éyoñe ja yian.”​—Beh. 4:15, 16.

¹⁶ Asu ya na, bi sobô be Yéhôva, bia yiane liti a mimboan na, bia buni jame Yésus a nga bo. Te simesane fo’o ve na, ntañ ô ne mfi asu bôte bese, jeñe’e na womiene fe ô yene mfi ya ntañ. (Beg. 2:20, 21) Yeme’e na, ntañ ñwô wo bo na Yéhôva a jamé wo. Yeme’e fe na, ntañ wo ve wo fane ya bi ényiñe ya melu mese. Ntañ ô ne fo’o dase da so wo be Yéhôva.

17. Amu jé wo yiane ke sobô be Yéhôva?

¹⁷ Minlame ya sobô mia liti na, Yéhôva a ko bia éngôngo. Nta’ane mam ôte wo liti na, Yéhôva a yen ényiñ ane jôm é ne étyi. Wo liti avale bemvendé ba volô bia, wo liti atinane ya nya nkôñelane nlem, wo liti fe amu jé bia yiane tabe ndi na, Yéhôva a jamé éyoñe jia ya biyoñe bise. Ye wo ke fo’o sobô be Yéhôva? A ne mbamba asoé! (Bs. 91:1, 2) Ayé’é da zu, bia ye yen avale minlame ya sobô mi ne volô bia na bi vu éve’ela zôsô, a nkoon éngôngole Yéhôva.