YE WO yen ayaé ya yé’é Kalate Zambe sondô ase? Nge ke na, ye wo yene na da soo ki wo mevak? Bia bese bi wô’ô wô’ôtane nalé biyoñe biziñ. Ve tame simesane mame bia bo éyoñ ése, aval ane ñwobane mendim. Mewobane ma nyoñe bia abui éyoñ a ngul, ve éyoñe bi maneya woban, bia kôme wôk ane nyule ja vobô bia! Ayé’é ya Kalate Zambe fe é ne bo ane ñwobane mendim “a zene ya mejô me Zambe.” (Éphé. 5:26) Bi tame zu yene bone be mame be ne volô bia:

• Bo’o nta’ane mam. Ayé’é Kalate Zambe é ne jame da ya “mame ma dañe mfi” kristen é nji yiane nyoñ éngbwemese. (Philip. 1:10) Asu na ô bo te vuane nta’ane mame wôé, ô ne ba’é wô vôme wo ye ji’a yen, ane étyimbi nge ke mbé ya frigo wôé. Ô ne fe futi alarme e téléfône wôé asu na a kate wo na éyoñ ayé’é é ntoo bebé.

• Tobe’e éyoñ a fatan ayé’é bi ne bo mvo’é asu dôé. Jé ja dañe tyi’ibi asu dôé, ye nyoñ abui éyoñ éyoñe wo yé’é Kalate Zambe, ye nyoñe fo’o ve bone minutan? Womien ô bili tyé melende. Bo’o nta’ane mame wo yiane wo asu ayé’é. Nge wo wô’ô nju’u ya yé’é éyoñ awolo ayé’é da kui, nga ô ne nyoñe fo’o ve minutan awôm asu na ô yé’é? To’o wo nyoñe fo’o ve minutan awôm, ô ne yé’é angôndô ya abui mam, a nné ane wo ye taté ayé’é dôé, éko éziñe wo ye fe bi nkômbane ya kee de ôsu.—Philip. 2:13.

• Tobe’e minlô mejô ôsusua na wo bo ayé’é dôé. Nge ô tabe si a taté na wo jeñe jôme wo zu yé’é, ô ne bo teke ‘yeme belan éyoñe jôé.’ (Éphé. 5:16) Jeñe’e na ô tili minlô mejô wo kômbô yé’é. Nge jam éziñe da so wo ôsimesan, tili’i de. Éyoñ ayé’é é maneya, ô ne ke vôm ô nga tili a kô’ôlane mame mefe wo kômbô beta yé’é.

• Bo’o mintyendane mia sili. Jeñe’e na ô bo mintyendane miziñe nta’ane mame wôé, mintyendane mite mi ne bo a lat a abim éyoñe wo lôte na wo yé’é, nge minlô mejô wo te top. Jame da dañe mfi é ne na ô bo ayé’é dôé mban, sa ke môse nge awolo wo te tobe na wo yé’é, nge ki abim éyoñe wo lôte na wo yé’é, a mame wo yé’é.

Bia bi abui bibotan éyoñe bia bo mame ya nsisime mban. Amvôé dangan a Yéhôva da tu’a bo ngul, bia nyoñe mbamba mintyi’an ényiñe jañgan a bia bi ngule nyul.—Jos. 1:8.