1. Jé bi nji yiane vuan nté bia bo ésaé nkañete jangan, a jé bi ne tabe je ndi?

 NTÉ bia bo ésaé nkañete jangan, bi nji yiane vuane na bii tôbane mewosan. Ane éyoñe ja lôt, mewosane mete me ne tu’a bo ngul. (Dn. 11:44; 2 Tim. 3:12; Nli. 16:21) Ve da bia yiane tabe ndi na Yéhôva é ve bia mvolane wo yian. Amu jé? Yéhôva a zuya a volô bebo bisaé bé na be bo ésaé jap​—to’o be tele avale nju’u avé. Asu na bi tu’a wô’ô de, bi tame zu yen mam me nga kui ényiñe nkulu mejô Ézéchiel, nnye ate a nga kañete Bejuif be mbe minkôme Babylon.

2. Jé Yéhôva a nga jô a lat a bôt Ézéchiel a mbe a kañete’e, a jé bia zu yen ayé’é di? (Ézéchiel 2:3-6)

² Ézéchiel a mbe a kañete’ avale bôt avé? Yéhôva a nga jô na be ne “ésas,” “minleme ayet,” a “ba ben njôan.” Be mbe fe be luman ane biyo a alé. Bia tu’a wôk amu jé Yéhôva a nga jô Ézéchiel abui biyoñe na: “Te ko . . . woñ”! (Lañe’e Ézéchiel 2:3-6.) Ézéchiel a nga kui na a jalé ésaé nkañete jé amu (1) Yéhôva nnye a nga lôme nye, (2) a mbe a bili mbamba nsisim Yéhôva, a (3) Mejô me Zambe me nga yemete mbunane wé. Aval avé mam mete melal me nga volô Ézéchiel? A aval avé me ne volô bia den?

3. Bifia bivé bi nga yiane ve Ézéchiel ngule nyul, a aval avé Yéhôva a nga liti nye na é su’u nye?

³ Yéhôva a nga jô Ézéchiel na: “Ma lôme wo.” (Éz. 2:3, 4) Mejô mete me nga yiane ve Ézéchiel ngule nyul. Amu jé? Éko éziñ a nga simesane na Yéhôva a nga belan avale bifia ete éyoñ a nga lôme Moïse ba Isaïe, bekulu mejô bé. (Nk. 3:10; És. 6:8) Ézéchiel a mbe fe a yeme’e aval avé Yéhôva a nga volô bekulu mejô bete bebaé na be dañe  minju’u be nga tôbane mie. Ajô te, éyoñe Yéhôva a nga jô nye éyoñe baa na: “Ma lôme wo,” Ézéchiel a mbe a bili mbamba beamu ya tabe ndi na Yéhôva é su’u nye. Nde fe kalate Ézéchiel bia koone bifia bi: “Ane ajô Yéhôva é nga zu be ma” nge ke bi bia funane bie abui biyoñ (Éz. 3:16) Yéhôva a nga belane bifia bite abui biyoñ asu na liti nkulu mejô wé na nnye a lôme nye a na é su’u nye. Teke bisô na bifia bite bi nga volô Ézéchiel na a yeme na Yéhôva nnye fo’o a lôme nye. Nde fe, mbôle Ézéchiel a mbe mone prêtre, ésaa a nga yiane kate nye aval avé Yéhôva a zuya a suk bekulu mejô bé. Yéhôva a nga jô Isaac, Jacob, a Jérémie na: “Me ne be wo.”​—Met. 26:24; 28:15; Jr. 1:8.

4. Mbamba bifia bivé bi nga yiane ve Ézéchiel ngule nyul?

⁴ Aval avé abui b’Israëlite e nga nyoñe foé Ézéchiel a mbe a kañete’e be? Yéhôva a nga jô na: “Nda bôt Israël ja ye ke vô’ôlô wo; amu ba ye ke vô’ôlô ma.” (Éz. 3:7) Éyoñe be nga bene vô’ôlô Ézéchiel, Yéhôva nnye be nga bene vô’ôlô. Mejô mete me nga liti Ézéchiel na, nge bone b’Israël ba bene vô’ôlô nye, nalé a nji tinane na a dimine bo ésaé nkulu mejô jé. Yéhôva a nga jô fe Ézéchiel na, éyoñe mefoé a kañete mé tôéban, ayoñe Israël da ye “yeme na nkulu mejô a nga to be be.” (Éz. 2:5; 33:33) Teke bisô na mejô mete me nga ve Ézéchiel ngul é mbe é sili’i nye asu na a bo ésaé nkañete jé.

5. Kalate Ésaïe 44:8 a jô na ngule jangan ja so vé?

⁵ Bia fe bia bi ngule nyul éyoñe bia yeme na Yéhôva nnye a lôme bia na bi ke kañete. A loone bia na “Bengaa” bé. (És.  43:10) Abime beta mvom ete! Yéhôva a nga jô Ézéchiel na: “Te ko . . . woñ,” Yéhôva a jô fe bia na: “Te kôane woñ.” Amu jé bi nji yiane ko besiñe bangane woñ? Aval ane Ézéchiel, Yéhôva nnye a lôme bia a suk fe bia.​—Lañe’e Ésaïe 44:8.

6. (a) Aval avé Yéhôva a liti na é su’u bia? (b) Nde bia nyoñe ngule nyul a mvolane nleme vé?

⁶ Yéhôva a ka’ale na é su’u bia. Éve’an é ne na, ôsusua na Yéhôva a jô na: “Mi ne Bengaa bam,” A nga taté jô na: “Éyoñe wo [ye] lôt mendim été, ma ye tabe be wo; a asôé été, da ye bo te yandane wo: éyoñ wo [ye] wulu nduan été, wo ye bo te dik, nalé fe nkaba’a nduan wo ye bo te kape be wo.” (És. 43:2) Biyoñe biziñ éyoñe bia bo ésaé nkañete jangan, bi wô’ô tôbane minju’u mia funane ndône mendim a meve’ele ma funane nduan. To’o nalé, Yéhôva a volô bia na bi kee ésaé nkañete jangan ôsu. (És. 41:13) Aval ane melu me Ézéchiel, abui bôte da bene vô’ôlô foé bia kañete den. Bia yeme na éyoñe ba bene vô’ôlô foé bia kañete, nalé a nji tinane na bia dimine bo ésaé nkañete jangan. Bia bi ngule nyul a mvolane nlem éyoñe bia yeme na Yéhôva a wô’ô mvaé éyoñe bia ke ôsu a kañete foé jé. Nlômane Paul ô nga jô na: “Môt ase a ye nyoñe ma’ane mé émien aval ane ésaé jé émien.” (1 Bec. 3:8; 4:1, 2) Sita éziñ a boya ésaé nkpwa’a mefan den a nto abui mimbu a jô na: “Ma bi mevak éyoñe ma simesane na Yéhôva a botane ngule bia ve.”

7. Éyoñ Ézéchiel a mbe a simesane ñyenan a nga bi, nalé a nga ve nye ndi nleme fé? (Fombô’ fôtô ya ékô’ôla.)

⁷ Ézéchiel a nga yen abim avé mbamba nsisim Yéhôva a ne ngul. Ñyenan Ézéchiel a nga bi ô nga volô nye na a yemelan abim avé mbamba nsisim a volô mingugule beéngele, a na nnye a bo na beta char Yéhôva a wulu. (Éz. 1:20, 21) Jé Ézéchiel a nga bo éyoñ a nga yene mam mete? A kañete bia jam é nga boban a jô’ô na: “Éyoñ me nga yene je, me nga buti asu si.” Ézéchiel a nga ko angôndô ya woñ, ane a nga ku si. (Éz. 1:28) Mvuse ya valé, éyoñ ése Ézéchiel a mbe a simesan étua ñyenan éte, jam ete e mbe e yiane yemete ndi nleme jé na mbamba nsisim Yéhôva é volô nye na a jalé ésaé nkañete jé.

8-9. (a) Jé Yéhôva a nga jô Ézéchiel na a bo? (b) Aval avé Yéhôva a nga su’u Ézéchiel asu na a ke ôsu a kañete bôte be mbe minlem ayet?

⁸ Yéhôva a nga jô Ézéchiel na: “A mone môt, tebe’e tetele a mebo môé, a ma ye kobô wo.” Mejô mete a mbamba nsisim me nga ve Ézéchiel ngule ya kôlô si. Ézéchiel a nga jô na: “Ane nsisim ô nga nyiine be ma .  . . a telé ma tetele a mebo mam.” (Éz. 2:1, 2) Mvuse ya valé, nté ôse Ézéchiel a nga bo ésaé nkañete jé “wo” Zambe​—nge ki mbamba nsisim Yéhôva, a nga wulu a nye. (Éz. 3:22; 8:1; 33:22; 37:1; 40:1) Mbamba nsisim Zambe a nga ve Ézéchiel ngule ya ke kañete bôte be ne “ayet a nlem ayet.” (Éz. 3:7) Yéhôva a nga jô Ézéchiel na: “Me boya asu dôé ayete na, e wosane mesu map, a mvom asu jôé ayete na, é wosane memvom mesu map. Me boya mvom asu jôé ayet aval ane señ, ayet a lôt ako’o ba tya’a de nduan: te ko be woñ, nge fô’ôban a mefombô map.” (Éz. 3:8, 9) A ne ve ane Yéhôva a mbe a jô’ô Ézéchiel na: ‘Te jô’é na ayete minleme dap é bo na ô bili atek. Ma ye tômôlô wo.’

⁹ Mvuse ya valé, mbamba nsisim Zambe  a nga kee Ézéchiel abeñe nkañete dé. Ézéchiel a nga jô na: “Wo Yéhôva ô nga to ngule be ma.” É nga sili Ézéchiel ngumba sondô asu na a tu’a bindi a wôk foé a mbe na a kañete, a na a kañete je a ayôñ ése. (Éz. 3:14, 15) Mvuse ya valé, Yéhôva a nga jô nye na a ke nje’ese nde “nsisim ô nga nyine be [nye].” (Éz. 3:23, 24) Ézéchiel a mbe a nto nkômesane ya taté ésaé nkañete jé.

10. Jé é ne volô bia na bi kee ésaé nkañete jangan ôsu, a amu jé?

¹⁰ Jé é ne volô bia na bi bo ésaé nkañete jangan? Asu na bi bi éyalane ya nsili ôte, bia yiane beta simesane jam e nga kui Ézéchiel. Ôsusua na a taté ésaé nkañete jé, mbamba nsisim a nga ve nye ngul é mbe é sili nye. Aval ane Ézéchiel, bia fe bi ne kui na bi bo ésaé nkañete jangan den fo’o ve amu mbamba nsisim Zambe a volô bia. Amu jé? Amu na Satan a jeñe mezene mese na a télé ésaé nkañete jangan. (Nli. 12:17) Abui bôte da simesane na Satan a ne ngule abui, ajô te bi vo’o dañe nye. Ve da, a zene ya ésaé nkañete jangan, bia kui na bi dañe Satan! (Nli. 12:9-11) Aval avé bia bo de? Éyoñe bia kañete, bia liti na bia ko ki nye woñ. Éyoñ ése bia kañete, bia bibi Satan bekpwasa memañ. Nde bi ne jô na jé ja bo na ésaé nkañete jangan é ke ôsu akusa bo mewosane bia tôbane me? Bi ne fo’o yemete na mbamba nsisim Yéhôva nnye a wulu ésaé jangan, a na Yéhôva a wô’ô je mvaé.​—Mt. 5:10-12; 1 P. 4:14.

11. Jé mbamba nsisim a ne bo asu dangan, a jé bia yiane bo asu na bi bi nye?

¹¹ Ndi nleme fé bia bi éyoñe bia simesane na Yéhôva a nga ve Ézéchiel ngul é mbe é sili’i nye asu na a kañete? Mbamba nsisim Yéhôva a ne ve bia ngule ja yiane asu na bi dañ aval nju’u ese bi ne tôbane de ésaé nkañete jangan. (2 Bec. 4:7-9) Jé ñhe bi ne bo asu na bi bi mbamba  nsisim Zambe? Bia yiane ye’elane mban, bi too ndi na Yéhôva é vô’ôlô meye’elane mangan. Yésus a nga jô beyé’é bé na: “Jaka’an, . . . jeñan, . . . kutan mbé.” Mvuse ya valé, Yéhôva a ye “ve bôt ba ja’é nye Mbamba Nsisim.”​—Luc 11:9, 13; Mam. 1:14; 2:4.

12. Ézéchiel 2:9-3:3 a liti na mvulukane kalate ô mbe ô so’o vé, a jé é mbe ntilan été?

¹² Sake mbamba nsisim étam nnye a nga suk Ézéchiel? Mejô me Zambe fe me nga ve nye ngule nyul. Ñyenan a nga bi, Ézéchiel a nga yene wo ô bili mvulukane kalate. (Lañe’e Ézéchiel 2:9-3:3.) Mvulukane kalate ôte ô mbe ô so’o vé? A jé é mbe ntilan été? Aval avé Ézéchiel a nga di wô? Bi tame zu yene de. Mvulukane kalate ô mbe ô so’o éto njôane Zambe. Éko éziñe Yéhôva a nga belane éngele wua ya beéngele benyin Ézéchiel a nga taté yen asu na a kalane nye mvulukane kalate ôte. (Éz. 1:8; 10:7, 20) Mvulukane kalate ô be ô bili Mejô me Zambe​—foé ya ntyi’ane mejô Ézéchiel a mbe a yiane kate bebo éngana’a be mbe minkôm. (Éz. 2:7) Foé éte é mbe ntilane mimfa’a mibaé ya mvulukane kalate.

13. Yéhôva a nga jô Ézéchiel na a bo mvulukane kalate aya, amu jé ô mbe ézezek?

¹³ Yéhôva a nga jô nkulu mejô wé na a di mvulukane kalate a “jalé miñya [mié] a [wô].” Ézéchiel a nga bo mewôk, ane a nga mane di mvulukane kalate ôse. Jé ngabe ya ñyenan Ézéchiel ôte ja tinan? Ézéchiel a mbe a yiane kôme wôk foé a mbe na a ke kañete. Émien a mbe a yiane tabe ndi a foé jé asu na a bi éva’a ya kañete je. Ve, étua jam é nga boban. Ézéchiel a nga teme na mvulukane kalate ô too “ézeze’ ane wôé.” (Éz. 3:3) Amu jé? Ézéchiel a mbe meva’a ya kobô ajô Yéhôva, a mbe a yene’e fe jam ete ane beta mvom. (Bs. 19:8-11) A mbe angôndô ya mevak amu Yéhôva a nga tobe nye na a bo nkulu mejô Wé.

14. Jé é nga volô Ézéchiel na a bo nkômesane ya bo ésaé Yéhôva a nga ve nye?

¹⁴ Mvuse ya valé, Yéhôva a nga jô Ézéchiel na: “Nyoñe’e mejô mese ma ye kobô wo nleme wôé été, a wô’ô a melo môé.” (Éz. 3:10) Yéhôva a nga jô Ézéchiel na a ba’ale mejô me mbe ntilane mvulukane kalate a bindi me. Éyoñ Ézéchiel a nga bo jam ete, mbunane wé ô nga tu’a bo ngul. A nalé a nga volô nye na a bi foé ya ke kañete bôt. (Éz. 3:11) Mbôle Ézéchiel a mbe a bili foé ja so be Zambe nleme wé a biyaé bié, a mbe a nto nkômesane ya jalé ésaé Yéhôva a nga ve nye.​—Fombô’ô Besam 19:14.

15. Asu na bi ke ésaé nkañete jangan ôsu, jé bia yiane bo?

¹⁵ Asu na bi kee ésaé nkañete jangan ôsu, bia fe bia yiane yé’é Mejô me Zambe ndemben bia ye yemete mbunane wongan. Bia yiane kañese mam mese Yéhôva a jô bia “nleme wongan été.” Den, Yéhôva a kobô bia a zene ya kalate Wé, Bible. Aval avé bi ne tabe ndi na Mejô me Zambe ma ke ôsu a nambe nleme wongan, asimesane dangan a minsôñane miangan?

16. Yéhôva a yi na bi bo Mejô mé aya, a aval avé bi ne bo de?

¹⁶ Éyoñe bia di a nyoñ éyoñe na bidi bite bi bo ésaé ja sili menyule mangan, bia bi mvo’é ya minsôn, aval ete fe bia  di bidi ya nsisim éyoñe bia yé’é Kalate Zambe a bindi mam me ne été. Ñye’elane bi ne nyoñ a lat a mvulukane kalate ô ne na, Yéhôva a yi na bi “jalé miñya [miangan] a” mejô Mé, nalé a tinane na bia yiane jeñe na bi kôme wô’ô Kalate Zambe. Bi ne de bo a zene ya meye’elan, ayé’é Kalate Zambe a éyoñe bia bindi mam bia yé’é. Jam ôsu, bia ye’elan asu na nleme wongan ô tabe nkômesane ya kañese mejô me Zambe. Mvuse ya valé, bia lañ éfuse ya Kalate Zambe. Éyoñe bi maneya lañ, bia tebe mone jôm a bindi, a tu’a fas mam bia te mane lañ. Bibotane bivé bii bi éyoñe bia bo de? Bii tu’a wô’ô Mejô me Zambe a bii bi ngule mbunan.

17. Amu jé e ne mfi na bi bindi mam bia lañe Kalate Zambe?

¹⁷ Amu jé é ne mfi na bi lañe Kalate Zambe a bindi mam bia yé’é? Ayé’é Kalate Zambe da volô bia na bi bi ngule ja sili asu na bi kañete mbamba foé ya Éjôé Zambe den, dé volô fe bia na bi bi ngule ya kañete foé ya ntyi’ane mejô melu ma zu. Nde fe, éyoñe bia bindi mbamba mefulu me Yéhôva élate bia be nye ja tu’a bo ngul. Nalé é volô na bi bu’uban a jôm é ne ézezek a mvaé, nje éte é ne mvo’é ya nlem, a bia ye yeme vak a abime bi bili.​—Bs. 119:103.

18. Jé bôte ya abôta nkañete dangan bé yemelan, a amu jé?

¹⁸ Bi nji bo bekulu mejô ane Ézéchiel. Ve, bi nyoñeya ntyi’ane ya ke ôsu a kañete benya mejô Yéhôva a nga bo na be tili Kalate Wé akekui éyoñ é jô na ésaé nkañete é tebe. Éyoñe môse ya ntyi’ane mejô wé kui, bôte ya abôta nkañete dangan ba ye ke jô na be nji wô’ô mebendé me Yéhôva. (Éz. 3:19; 18:23) Ve, bé yeme na mbamba foé bi nga kañete be a mbe a so’o be Zambe.

19. Jé ja ye ve bia ngule ya sondô ésaé nkañete jangan?

¹⁹ Jé ja ye ve bia ngule ya sondô ésaé nkañete jangan? Mam melal me nga volô Ézéchiel na a bi ngule nyul. Bia ke ôsu a kañete amu bia yeme na Yéhôva nnye a nga lôme bia, mbamba nsisim Wé nnye a ve bia ngule ya ke ôsu a kañete, a Mejô me Zambe ma ve fe bia ngule ya kee ésaé éte ôsu. A mvolane Yéhôva, bi bili éva’a ya kee ésaé nkañete jangan ôsu a bo je “akekui asu’ulan.”​—Mt. 24:13.