MONE nlô ajô éziñ a mbe a jô’ô na: “A bekañete y’Éjôé Zambe ya si Énglis​—Kôla’ané si!!” (Informateur, * édition de décembre 1937, [angl]) Nloene te ô mbe avôl avôl, a wu môt ase a mbe ngule ya wôk. Bôte be nga fase wô abui. Ô mbe ô beta jô na: “Tañe Bengaa é nji dañe nen, akusa bo bi kañeteya den mimbu awôm.” Afebe ôsu ya kalate ate é mbe é liti’i de, é mbe é bili ésaé nkañete ya mimbu awôm, ataté mbu 1928 akekui mbu 1937.

Amu jé Bengaa ya si Énglis be nga sé’é ésaé nkañete? Mekônda me nga bo abui mimbu teke tyendé befatane benkañete. Nde fe, wofise ya Béthel ô nga tyi’i na, bôte be dañe suk bekpwa’a mefan 200 be mbe bevôme bekañete mbamba foé be mbe tyôtyoé, a dañ abime ba suk mekônda. Mvuse ya valé, Wofise ya Béthel ô nga jô ba be mbe be bili nsôñane ya bo bekpwa’a mefane na bitune bi nda bi nto tyôtyoé, a jô be na be ke kañete minlame mife ya Europe. Beta nsamba bekpwa’a mefan a nga kôlô si Énglis, a ke kañete abui mesi afe aval ane France, akôsa bo be nji be be dañe yem, nge kobô nkobô ya wôé.

Informateur ya mbu 1937 a nga kobô ajô ya beta nsôñane ya mbu 1938: Mewolo million jia! Nsôñane te ô nga ye ji’a tôéban, nge be nga ye kañete mewolo 15 e ngon, bekpwa’a mefane ki mewolo 110. Be nga ta’a na, môt ase a kañete mewolo metan e môs, a bo minjoman, e dañedañe mame ngô’é, ataté môse mondé akekui môse nkul éwônga.

Abui bôt e nga kômbô kañete a ayôñ ése. Hilda Padgett a nga kañete na: “Wofise ya Béthel ô mbe ô loene bia na bi kañete; abui ya be bia e mbe e yange’e nloene te, a mvuse ya valé, mbamba bibuma bi nga taté na bia wum.” * Sita E. F. Wallis a nga jô na: “Melebe be nga ve bia me mbe mbamba melep! Mevak mevé me ne lôte ma bi bili éyoñe bia bo ésaé Tate môs ôse, ataté mame tyé akekui mame ngô’é? . . . Bi mbe bi bula’an nte’an, ve ye bi mbe mevak? Ôwé!” Ésoé Stephen Miller é nga kañese nloene te, amu é mbe é yeme na ésaé te ja yiane boban avôl avôl. A mbe a kômbô’ô bo ésaé te nté a mbe a bili fane ya bo je! A mbe a simesa’ane bôte be mbe be kañete’e mingumba mi môs a beminsini, ô bela’ane fe éko mezik mame ngô’é na bôte be vô’ôlô minkañete ya mengana bôt. Be mbe be kañete a ayôñ ése, be be’e bityimbi, be va’a fe bekalate mefoé njoñe njoñ.

Informateur a nga beta jô na: “Bia yi bekpwa’a mefane 1 000.” Be nga ta’a na, bekpwa’a mefan be bo teke beta saé étam, ve be saé fufulu a mekônda, be su’u me, be yemete fe me. Joyce Ellis (éyôlé abialé dé é mbe na Barber) a ngenan a tyô’ôk: “Abui bobejañ é nga kômbô bo bekpwa’a  mefan. Akusa bo me mbe me bili mimbu 13 éyoñe te, me mbe me kômbô’ô bo nkpwa’a mefan.” A nga tôé nsôñane wé e ngone zangbwale ya mbu 1940, a to mimbu 15. Peter, nnye ate a nga su’ulane bo nnôme Joyce, a nga wô’ô nloene “Kôla’ané si,” ñwô te ô nga tindi nye na a “fas aval a ne bo nkpwa’a mefan.” E ngone samane ya mbu 1940, a to mimbu 17, a nga wulu bekilimeta 105 a bete e minsini wé na, a ke e Scarborough na a ke taté ésaé nkpwa’a mefane jé.

Cyril ba Kitty Johnson be mbe mimfefé bekpwa’a mefan, be mbe mbamba éve’ela mfa’a ya nyume bebiene mam. Be nga kuane nda jap, a biôm biap na be bi abui éyoñe ya kañete. Cyril a nga kôlô bisaé bié, a e zañe ngone te ébien, be mbe be nto nkômesane ya taté ésaé nkpwa’a mefan. A mbe a simesa’an: “Bi mbe bi too de ndi. Bi nga bo de a nlem ôse, a mevak.”

Nté tañe bekpwa’a mefan é mbe é nenek, bobejañ be mbe be be’e mimbe’e akônda be nga fase mezene ya suk beta nsamba te. Jim Carr, a mbe serviteur de zone (ba loen éyoñe ji na, njome mekônda) mbu 1938, a nga tôñe melebe be nga ve na, be telé menda bekpwa’a mefan e bitison. Be nga jôô mengôse bekpwa’a mefane na, me nyiñ a bo mam fufulu. Nalé a nga bo na be nji dañe beta ndamane moné. E Sheffield, be mbe be ya’ane beta nda e ngon, a mojañ éziñ a mbe a tebele’e mame ya été. Bôte ya akônda be nga ve be moné a biôm bife. Jim a nga kañete na: “Môt ase a mbe a saék mfa’a ya na mam mese me wulu mvo’é.” Bekpwa’a mefan awôm be mbe be nyiñe wôé, be jibi ésaé, be ba’ale fe mbamba mefulu. “Éfuse ya môs é mbe é boba’an étyamakak mame tyé mese” a “môs ôse, bekpwa’a mefan be mbe be kañete’e e tison ése.”

Bekañete a bekpwa’a mefan bese be nga yalane nloene te avale da, be nga tôé nsôñane ya bo mewolo million jia mbu 1938. Mefoé me mbe me liti’i na, ésaé nkañete é nga wume bibuma e nlam ôse. E mimbu mitan, tañe bekañete é nga nen e kui biyoñe bilal. Be nga ba’alane be na be beme mis ésaé nkañete, jame te e nga bo na be dañe minju’u ya beta bita.

Melu ma, tañe bekpwa’a mefane ya si Énglis ja ke ôsu a nen, nté Harmaguédon, beta bita bi Zambe bia subu bebé. Tañe bekpwa’a mefan é beteya abui. Mimbu awôm mi ndeme lôte mi, e ngon awômô ya mbu 2015, tañe te é nga kui 13 224. Bekpwa’a mefane bete be nga kôme yeme na, e bo ésaé npkwa’a mefan a ne mbamba zene wua ya yeme belane binyiñe biap.