1-3. Jé é nga yiane bo na Évodie ba Syntyche be bi mejô, a aval avé bi ne sa’ale avale mejô te? (Fombô’ô fôtô ya atata’a ya ayé’é di.)

BEBO bisaé be Yéhôva ba semé Kalate Zambe nya nsemane. Mbôle bi ne bebo mam abé, bia bese bia bi melep ma so Kalate Zambe éyoñ ése. Aval avé bia yene me? Tame yen éve’ane bekale bangane ya ntete mimbu ôsu, Évodie ba Syntyche. Beta ajô a nga kui e zañe miñwo’ane mite mibaé. Ajô avé? Kalate Zambe a nji kate bia de. Éko éziñ na nde mam me nga boban avale di.

² Évodie a nga bañete bobenyañ a bendôme bé ya akônda na be ke di mone jôm éziñ, a laane mbamba minlañ e nda jé. Syntyche a nga wô’ô na Évodie a nga bañete bôt a teke bañete nye. Éko éziñ Syntyche a nga jô na: ‘Ma kame fo’o na Évodie a nji bañete ma! Ma to me buni’i na bi ne beta bemvôé!’ Syntyche a nga yene fo’o na monyañ a beneya nye, ane a nga taté na a tyetebe nye, a fombô fe nye a mbia bemis. Mvuse ya valé nde Syntyche fe a nga bo abô’ô dé, a bañete bobenyañ a bendôm Évodie a nga bañete​—ve  nye fe a teke bañete Évodie! Mejô me nga too e zañ Évodie ba Syntyche me mbe ngule ya bo na, mvo’é ya akônda é ndaman. Kalate Zambe a nji kate bia aval ajô te e nga su’ulan. Ve bia simesane na, éko éziñ bekale bangan bete be nga nyoñe melebe nlômane Paul ô nga ve be a mbamba nlem.​—Beph. 4:2, 3.

³ Melu ma, da kui biyoñe biziñ na avale mame te é soo mejô e zañe bebo bisaé be Yéhôva. Ve bi ne sa’ale avale mejô te nge kôme me, éyoñe bia tôñe melebe ma so e Kalate Zambe. Nge bia semé Kalate Zambe nya nsemane, bia ye nyiñ a zene ya melebe mé.​—Bs. 27:11.

4, 5. Melebe mevé Kalate Zambe a ve bia mfa’a ya yeme bi nlem?

⁴ E nji bo tyi’ibi ya bi nlem éyoñe bia simesane na, môt a te bo bia jam da taé bia nlem nge belane bia abé. Bi ne wô’ô nleme mintaé nge ba te belane bia abé amu ayoñe dangan, nyôl ékôbe jangan, nge éyeka’a jangan. Mintaé bia wôk mi ne dañe nen éyoñ a ne na, mojañe wongane ya nsisim nnye a te de bo! Ye Kalate Zambe a ve bia melebe me ne volô bia na bi dañ avale mbia mboane te?

⁵ Nté ane a nga té môta binam, Yéhôva a zuya a yen ane bôte ba nyiñ a ba bevok. A yeme mam bia bo, a avale bia wô’ôtan nlem été. Asimesane dangan, to’o di bi ne bi éyoñe nlem ô ne bia abé, e ne bo na bi kuli bifia, a bo mam bi ne su’ulane jôban. Ngo’o nge bia bo fek, a ba’ale melebe Kalate Zambe a ve bia na bi yeme bi nlem, a bo te ji’a wô’ô ôlun! (Lañe Minkana 16:32; Ecclésiaste 7:9.) Teke vaa nge beté, da sili na bia bese bi ve ngule na bi biasé mam ma kui bia, a dañe jamé. Yéhôva ba Yésus be nji bo fianga a ajô ya jamé bôte bevok. (Mt. 6:14, 15) Ye da sili na ô dañe yeme jamé, nge yeme bi nleme wôé?

6. Amu jé bia yiane tabe ntyel a fulu ôngase?

⁶ Bôte bese be nji yeme bi nlem be wô’ô su’ulane bo ôngase. Nalé a ne bo na bôte bevok be tube be. E môt a ne ôngase a ne kôé bôte ya akônda fulu éte. A ne jeñe na a solé bôte bevok ôngase wé nge ziñe jé, ve mbia b’asimesane be ne nye nlem été ‘b’aye kuluban atan ékôane bôt [akônda] été.’ (Min. 26:24-26) Bemvendé be ne bo ngule ya volô avale môte te na a yene na ôngase, ziñ, a évini, bi ne mefulu me nji yiane yené akônda Yéhôva été. Kalate Zambe a kobô ajô te ne sañesañ. (Lv. 19:17, 18; Bero. 3:11-18) Nga wo fe ô lôô nalé?

7, 8. (a) Aval avé Yéhôva a wulu ngap ékôane jé é ne si va? (b) Melebe mevé méziñ me ne e Kalate Zambe, a amu jé bia yiane me tôñ?

⁷ Yéhôva a wulu ékôane bôte jé é ne si va, a ve fe je bidi ya nsisim a zene ya ôlo ô ne mewôk a fek. Ôlo te ô ne éjôé Yésus Krist si, nnye ate a ne “nlô ya [akônda].” (Mt. 24:45-47; Beép. 5:23) Aval ane ôlo ô ne mewôk a fek ya ntete mimbu ôsu, wu ya melu ma wo kañese na Kalate Zambe a so fo’o be Zambe, wo semé fe foé é ne été nya nsemane. (Lane 1 Bethessalonicien 2:13.) Melebe mevé méziñ Kalate Zambe a ve asu mfi wongan?

⁸ Kalate Zambe a jô bia na bi bo mban e bisulan. (Beh. 10:24, 25) A tindi fe bia na bi bi avale ñye’elane da.  (1 Bec. 1:10) A jô bia na bi telé Éjôé Zambe ôsu ényiñe jangan. (Mt. 6:33) Mejô me Zambe ma ngôné fe mbe’e, a beta jam bi bili na bia kañete e menda menda, bevôme bia koon abui bôt, a bevôme bia tôbane bôt atemetem. (Mt. 28:19, 20; Mam. 5:42; 17:17; 20:20) Kalate Zambe a jô bemvendé na be ba’ale akônda Yéhôva mfuban. (1 Bec. 5:1-5, 13; 1 Tim. 5:19-21) Nde fe Yéhôva a jô na, bôte bese be ne ékôane jé ba yiane bo mfuban e minsôn a nsisim.​—2 Bec. 7:1.

9. Susu’a zene fé Yésus a belane je na bi yeme wôk Mejô me Zambe?

⁹ Bôte béziñ ba jô na, môt ase a ne wôk Kalate Zambe aval a kômbô. Ve jame da, Yésus a nga telé ôlo ô ne mewôk a fek na ô bo susu’a zene ja ve bidi ya nsisim. Ataté mbu 1919, Njô bôt Yésus Krist a belan ôlo te na, a volô beyé’é bé na be yeme wôk Mejô me Zambe a tôñe memvinda mé. Éyoñe bia bo metiñe ya Kalate Zambe mewôk, bia bo na mfuban, mvo’é a élat bi bo akônda été. Môt ase ya be bia a bo mvo’é ya sili émiene na, ‘Ye ma wulu fo’o ba’aba’a a zene Yésus a belane je melu ma?’

10. Aval avé kalate Ézéchiel a liti avale ngap ékôane Yéhôva é ne yôp été ja wulu?

¹⁰ Kalate Zambe a kate bia na, Yéhôva a bili ngap ékôan é ne yôp été. Éve’an é ne na, nkulu mejô Ézéchiel a nga yene wagon a wulu’u yôp été, wagon ate a ne ndeme ya ngap ékôane Yéhôva é ne yôp été. (Éz. 1:4-28) Yéhôva émien nnye a wulu wagon ate, a ke fe vôm ase nsisim wo jô na a ke. Ngap ékôane Yéhôva é ne yôp été, nje ja wulu ngap ékôan é ne si. Wagon ate a wulu fo’o! Simesa’ane mintyendan mise mi bobaneya ékôane Yéhôva mimbu mewôm mi lôteya mi​—ba’ale’e na Yéhôva nnye a soo mintyendan mite. A zene ya Krist a beéngele, wagon Yéhôva aye ke avôl na a zu tyam émo ji, na a fubu éyôlé Yéhôva, a liti na nnye étam a bili ngule ya jôé!

11, 12. Mam méziñ mevé ékôane Yéhôva é boya?

¹¹ Tame fas mam mese ékôane Yéhôva é ne si va é boya melu ma. Melôñ. Bôte mintet ba lôñe mfefé wofise tin ékôan é tele e Warwick, New York, Amelka. Service mondial développement/construction a tebele ésaé melôñ betoyini be bôt ba bo a ngule jap ése na, be lôñe mimfefé Meba m’Éjôé a nene be Béthel. Ngo’o abim akéva bia ve betoyini be bôt ba saé a ngule jap ése a nleme wop ôse! Simesa’an avale Yéhôva a botane bekañete ya si se be ne mbane ya ve abime moné be bili a nleme wop ôse, na be suk avale bisaé te.​—Lc. 21:1-4.

 ¹² Ñye’elan. Tame simesan abim besikôlô da ye’ele bôt Mejô me Zambe. (És. 2:2, 3) Bi bili Sikôlô bekpwa’a mefan, Sikôlô bekañete mbamba foé, Guiléad, Sikôlô bôte ba nyiin e Béthel, Sikôlô bejome mekônda a binga bap, Sikôlô bemvendé ya mekônda, Sikôlô bemvendé a bediakon, a Sikôlô bobejañ ba tebele ésaé ya Béthel a binga bap. Yéhôva a nye’e fo’o a ye’ele bebo bisaé bé! Anjeñe mefoé dangan jw.org, da ye’ele fe bia Kalate Zambe a zene ya bekalate ba kui e mintete minkobô. Anjeñe mefoé te é bili mingumba mi vôm asu bongô a menda me bôt, a vôm ô ne koone mimfefé minlô mejô. Ye ô belaneya jw.org nkañete, a ayé’é ya nda bôte jôé?

13. Mbe’e ôvé môt ase a jô na a kañe Yéhôva a be’e?

¹³ Ngo’o abime mbamba jam e ne na, bi ne bôte ya ékôane Yéhôva é ne si va! Ñyemane bia yeme metiñ a miñye’elan mi Yéhôva, wo ve bia mbe’e ya bo mam me ne zôsô, a suk ngul a bili na a jôé. Nté émo ji ja ke ve abé abé, bia yiane ‘vini abé’ avale Yéhôva fe a vini de. (Bs. 97:10) Bia bene bo tyiñ a mbia be bôt, bia bene fe jô na: ‘Mvaé é ne abé a abé é ne mvaé!’ (És. 5:20, Mfefé Nkôñelan.) Amu bia kômbô ve nleme Zambe mvaé, bia ve ngul ése na bi ke ôsu a bo mfuban e minsôn, e ntaban, a nsisim. (1 Bec. 6:9-11) Bia nye’e Yéhôva, a futi ndi nleme jangan be nye; bia tobe na, bi liti nye na bia wulu ba’aba’a a nye éyoñe bia nyiñ avale metiñe ya Kalate wé ma jô. A bia ve ngule jangan ése na bi bo metiñe mete mewôk éyoñe bi ne akônda, e nda bisaé, e sikôlô​—e vôm ase. (Min. 15:3) Bi tame zu yene mezene mefe bi ne liti na bia wulu ba’aba’a a Zambe.

14. Aval avé bebiaé Bekristen be ne liti na ba wulu ba’aba’a a Zambe?

¹⁴ E yalé bon. Bebiaé Bekristen ba liti na ba wulu ba’aba’a a Yéhôva éyoñe ba ye’ele bone bap avale Mejô me Zambe ma jô. Bebiaé ba ko Zambe woñ be nji kañese na, mefulu ya vôm be nga yaé mme me liti be avale ba yiane yalé bon. Nsisime ya émo ô nji bo jôme ya kañese e nda bôte Bekristen. (Beép. 2:2) Ésa bon a ne Kristen a ye ke simesane na, ‘E si jangan, binga mbe ba ye’ele bon.’ Kalate Zambe a jô ne sañesañe na: “A mia beésa, . . . mi yale’e [bone benan] melep a ñye’elane Tate été.” (Beép. 6:4) Bebiaé ba ko Zambe woñ ba yi na bone bap be bo ane Samuel, nnye ate Yéhôva a nga to be nye nté a mbe a yaék.​—1 Sa. 3:19.

15. Aval avé bia liti na bia wulu ba’aba’a a Yéhôva éyoñe bia nyoñe beta mintyi’an?

¹⁵ E nyoñe mintyi’an. Éyoñe bia nyoñe beta mintyi’an ényiñ, zene jia ya wulu ba’aba’a a Yéhôva é ne na, bi jeñe mvolane wo so Kalate wé a ékôane jé. Asu na bi yem mfi ô ne été, bi tame nyoñ éve’ane ya jam da dañe nambe abui bebiaé. Bebiaé béziñ be bili fulu na éyoñe be biaéya mon, éyoñe te ba lôme nye be bivuvumane biap na bi ba’ale nye, bebiene ke be jeñe moné vôme mfe. Ôwé, ntyi’ane te wo fombô môt émien, ve jame da, bia yiane ba’ale na, môt ase a ye yalan ajô ya mintyi’ane mise a nyoñ e mise me Zambe. (Lañe Beromain 14:12.) Ye bia ye bo fek nge bia nyoñe beta mintyi’an ényiñe  teke taté fas avale Kalate Zambe a jô? Teké’é fo’o! Bia yi mvolan Ésa wongane ya yôp, amu bi se ngule ya wulu ényiñe jangan biabebien.​—Jr. 10:23.

16. Éyoñe monafam wé a nga bialé, ntyi’an ôvé minga éziñ a mbe a yiane nyoñ, a jé é nga volô nye na a nyoñe mbamba ntyi’an?

¹⁶ Minga éziñ a mbe a saé si fe, nde a nga biaé monafam e wôé. Nté a mbe a kômesa’ane na a zu lôme mone wé e jale dé na bimvam bi ba’ale nye, nde a nga taté na a yé’é Mejô me Zambe a sita éziñ. A nga yaé nsisim, a yé’é na Yéhôva Zambe a nga ve nye mbe’e na émiene nnye a ye’ele mone wé na a kañe Yéhôva. (Bs. 127:3; Min. 22:6) Nde minga ate a nga ye’elane Yéhôva a nlem ôse, avale Kalate Zambe a jô bia na bi bo. (Bs. 62:7, 8) Mvuse ya valé, nde a nga kate de minga a mbe a ye’ele nye Mejô me Zambe, a bôte befe ya akônda. Akusa bo bivuvuman a bemvôé bé be mbe be yemete’e nye na, a lôme mone wé e be bimvame bié, a nga yene na mboane te ô nji bo zôsô. Nnôme wé a nga be anyu é yoo éyoñ a nga yen aval akônda é nga ba’ale minga wé ba mone wop, nde nye fe a nga taté na a yé’é Mejô me Zambe, a tabe e bisulan a nda bôte jé ése. Ye wo simesane na minga nyi a nga yene na Yéhôva a nga yalane meye’elane mé? Teke vaa nge beté a nga yene fo’o nalé.

17. Melebe mevé bi nga bi a lat a bôte bia be be bia yé’é Mejô me Zambe?

¹⁷ E tôñe melep. Beta zene wua bi ne liti na bia wulu ba’aba’a a Yéhôva a ne na, bi tôñe melep ékôane jé ja ve bia. Bi tame nyoñ éve’ane ya melep be nga ve bia ajô ya bôte bia be be bia yé’é Kalate Zambe. E nga jôbane na, nné ane môt a taté na a yé’é Jé Kalate Zambe a ne ye’ele bia? é ne mvo’é na bi nyoñe bone minut e memane ya ayé’é, asu na bi volô nye na a yem ékôane Yéhôva. Bi ne belane vidéo Jé j’aboban Aba Éjôé été? nge nsoé kalate Beza ba bo nkômbane Yéhôva den? Be nga lebe bia na éyoñe bi maneya ayé’é ya kalate ba loone na, Jé Kalate Zambe a ne ye’ele bia? a môt a yaé nsisim, bi yé’é fe kalate “Gardez-vous dans l’amour de Dieu” a nye, to’o a dubaneya. Ékôan é nga ve melebe mete na, mimfefé beyé’é mi ‘bo ngul mbunane wop été.’ (Beco. 2:7) Ye wo tôñe fo’o avale melebe te?

18, 19. Beamu béziñ bevé ba tindi bia na bi ve Yéhôva akéva?

¹⁸ Bi bili angôndô ya abui beamu ya ve Yéhôva akéva! Bia ve nye ényiñe jangan ése amu bia yeme na nge bi vee, a nge bia nyiñ, a ne amu nye. (Mam. 17:27, 28) A nga ve bia angôndô ya beta das​—Kalate Zambe. Bia yebe na Kalate Zambe a ne Mejô me Zambe avale Bekristen ya Thessalonique fe be nga bo.​—1 Bet. 2:13.

¹⁹ Éyoñe bia lañe Kalate Zambe, bia subu Yéhôva bebé a nye fe a subu bia bebé. (Jc. 4:8) Ésa wongane ya yôp été a nga bo bia beta jam: bi ne bôte ya ékôane jé. Ngo’o abim ane bia nye’e avale bibotane te! Ntili Besam a nga yeme de jô éyoñ a nga yia na: “Tameka veane Yéhôva akéva; amu a ne mvaé; amu mvame jé é to nnôm éto.” (Bs. 136:1) E Besam 136, bia koone nkañesan, “mvame jé é to nnôm éto” biyoñe mewôm mebaé a bisaman. Éyoñe bia liti na bia wulu ba’aba’a a Yéhôva a ékôane jé, bia yene na mbamba mejô ma me ne fo’o été amu bia ye nyiñe nnôm éto!