Mame ngô’é a nga kandane nyiñe si va, Yésus a nga lebe beyé’é bé na be bo teke suñe minkôñ. A nga jô be na: “Bejô bôte ya bôt be ne te yeme Zambe be ajôô be a ngu; be aloene bejô bape na, Bevolô bôt. Ve mia, mi aye bo nalé.”​—Luc 22:25, 26.

Beza a loene na Bevolô bôt? Mintilane bia koone mie meko’o méziñ, a bifase bi argent, nge ke bekalate, mia liti na melu mvus, Begrek a Beromain be mbe be loene beta be bôte ya ayoñe dab na Beévergète nge ke Bevolô bôt. Be mbe be va’a be jôé mese’esa éte amu be mbe be bo’o mam ma volô bôte bese.

Abui bejôô é nga be’e jôé mese’esa éte. Bi tame lañe ve Ptolémée III Évergète, a Ptolémée VIII Évergète II. Bejôô bôte ya Rome fe, ane Jules César ba César Auguste be nga be’e môé mese’esa, teke ki vuan Hérode le Grand, njôô bôte ya Judée. Be nga yiane ve Hérode jôé mese’esa ete amu a nga ve bôte ya ayoñe dé fembé a biyé éyoñe beta mfumbale ya zaé a nga kui.

Adolf Deissmann, ñyeme mam éziñ a fas ajô ya Bible, a nga jô na jôé mese’esa Mvolô bôt é nga mane yiane si ése ya éyoñ éte. A nga tili na: “E nji sili bia abui éyoñe na bi koone mintilan a lôte ntet mi be’e jôé mese’esa éte.”

Ve amu jé Yésus a nga jô beyé’é bé na: “Ve mia, mi aye bo nalé”? Ye a mbe a kômbô’ jô be na be nji yiane nyoñe ngab a bôt, nge ke na be nji yiane bisi miñyiane mi bôte ba bômane be? Momo. Yésus a mbe a kobô’ô ajô jam da tindi môte na a volô bôte bevok.

Bôte ya melu me Yésus be mbe be nye’e be yené’ mvaé mise me bôt, ajô te be mbe be su’u beta mebôk a bivôé ya nlame wop, be mbe fe be lôñe betemple a beparc, akeke. Be mbe be bo’o de asu na bôte be kute be mefas, na be wumulu be, a na be tobe be ane betebe ôsu bap. Kalate éziñ a jô na: “Bôte béziñe ya été be mbe fo’o nya akabe, ve abui ya be be e mbe e jeñe’ ve minkôñ.” Nsisim ôte ñwô Yésus a nga jô beyé’é bé na be sa’ale.

Paul fe a nga su’ulane yemete mfi ya ve a mbamba nlem. A nga tili bobenyañe bé ya Corinthe na: “Môt ase a bo’o aval a kômbôya nleme wé été: sa mboane ya ôlun, nge wu ya ntindan: amu Zambe a nye’e nyô a ve a mevak.”​—2 Bec. 9:7.