YÉSUS a nga jô na: “Môt a ve, a nyô a nyoñ, nyô a ve a dañe yen ébotan.” (Mam. 20:35) Jam ete da fombô fe élate jangan a Yéhôva. Aval avé? Yéhôva a ve bia abui biôm, a nalé a bo na bi wô’ô avak, ve ava’a dangan da ye tu’a nen nge bia fe bia ve Yéhôva. Jé fo’o bi ne ñhe ve Yéhôva? Minkana 3:9 a jô na: “Kañe Yéhôva a biôme biôé [bi ne édima].” Biôme biangan bi ne édima bi ne na: éyoñe jangan, atyeñe mboane mame dangan, ngule jangan, a biôm bi mo biangan. Éyoñ bia belane biôme bite na bia su’u nya ékaña’a, bia ve Yéhôva das, a nalé a soo bia abui mevak.

Nlômane Paul ô nga lebe Bekristene ya Corinthe na be “naane jôm” asu mimvean. (1 Bec. 16:2) Aval avé ô ne bo mimvean? Nka’ale wo tôñe le wo liti mam méziñ bi ne bo.

Be vo’o bo mimveane nko mesi mese. Ve bi ne yem mam mefe a lat a avale bi ne bo mimveane bepage web. Mesi méziñ, bepage web ba yalane minsili abui bôte da sili a lat a mimvean.