1, 2. Nté bia yaé nsisim, bia yé’é na bia bo jé? Nyoñe’ éve’an.

BA DASÉ mone mongô éziñe jôm. Bebiaé bé be nye na: “Jô’ô na akiba.” Éyoñ éte mongô ke a jô fo’o ve na akiba. Nté a yaé, a tu’a wô’ô mfi ya tôñe ñye’elane bebiaé bé, a wu ya yeme mvaé bôt ba bo nye. Sa ke môte nnye a beta jôô nye na a ve akiba, émien a ne ntindane ya bo de. Amu jé? Amu mvean akiba ô ntoo nye fulu.

² Aval ete fe, éyoñ bi nga taté na bia yé’é benya mejôô, be nga ye’ele bia mfi ya tôñe memvinda me Yéhôva méziñ. Ve nté bia ke ôsu a yaé nsisim, bia tu’a wô’ô ôsimesane Yéhôva, mam a nye’e, a mam a vini. Éyoñ bia yé’é na bia yene mam ane Yéhôva, a na bia bo mam ma lu’an a ôsimesane wé, bia liti na bi bili ôsimesane Yéhôva.

3. Amu jé e ne bo ayaé na bi yen mam ane Yéhôva?

³ To’o jam ete da soo bia abui mevak, e nji bo tyi’ibi ya yene mam ane Yéhôva éyoñ ése. Mbôle bi be’e metyi ya abé, e wô’ô kui na bi dimi fas. Bi ne kate wô’ô  ôsimesane Yéhôva a lat a nkeane binoñ, ôzañ akum, ésaé nkañete, nyoñane metyi, akeke. Jé bia yiane bo nge nalé a kui bia? Jé é ne volô bia na bi ke ôsu a bo na ôsimesane wongan ô lu’an a wu Yéhôva? Aval avé nalé a ne volô bia den, a melu ma zu?

4. Aval avé bi ne ‘bo minsisime miangane mimfefé’?

⁴ Lañe’e Beromain 12:2. Nlômane Paul wo liti bia aval avé bi ne bi ôsimesane Yéhôva. Ayé’é ya sondô a nga man é nga liti na bi nji yiane ke “jô’é na nta’ane mame wu ñwô ô mé bia,” a na bi nji yiane kôéban ôsimesane ya émo a mbia mefulu ya été. Ve Paul a nga jô fe na bia yiane ‘bo minsisime miangane mimfefé. Ajô te, bia yiane yé’é Bible a nsôñane ya yene mam ane Yéhôva, bi bindi’i, bi jeñe’e na ôsimesane wongan ô lu’an a wu Yéhôva.

5. Nsela’ane mbé a ne zañ zezé nlañan a ayé’é?

⁵ Ayé’é da selan a zezé nlañan. Nde fe na, éyoñ bia yé’é, bia su’u ki ve na bia tene biyalane ya minsili; ve bia sili biabebiene na: ‘Mefulu me Yéhôva mevé ayé’é di da ngôné?’ Bia jeñe fe na bi wô’ô mezene mé, ôsimesane wé, a amu jé Yéhôva a yi na bi bo anô si anô ka, a bene ki na bi bo jame si jame ka. Bia jeñe fe na bi yemelane mefulu a asimesane bia yiane tyendé. E ne été na, nlô ajô wua ô vo’o mane ngôné mam ma mese, ve éyoñ ése bia yé’é, bia yiane nyoñe ngum éyoñe na bi bindi mam bia lañ.​—Bs. 119:97; 1 Tim. 4:15.

6. Jé ja kui bia éyoñ bia bindi asimesane Yéhôva?

⁶ E ne nya mfii na bi bo bi bindi’i Mejô me Zambe. Éyoñ bia bo nalé, sa ke môt nnye é kate bia na ôsimesane Yéhôva ô ne nya zôsôô, ‘biabebien bia ye yemelane’ de. Bia ye taté na bia yene mam ane nye, a na bia semé ôsimesane wé. Ane bia ye ‘bo minsisime miangane mimfefé,’ a tyendé ñyenane mame wongan. Ôte’ete’ ôte’etek, bia ye bi ôsimesane Yéhôva.

7, 8. (a) Aval avé Yéhôva a yene biôme bi mo? (Fombô’ô befôtô ya atata’a.) (b) Jé bia ye telé ôsu nge bia yene mam ane nye?

⁷ Ve bi nji yiane buni na ôsimesan ô ne ve jam da boban nlô été. Ôsimesane wongan ô tii a mimboane miangan. (Marc 7:21-23; Jc. 2:17) Bi tame nyoñe bone bive’an. Kalate Matthieu, Marc, Luc a Jean ba kôme liti bia ôsimesane Yéhôva a lat a biôm bi mo. Yéhôva a nga tobe minzôzoé mi bôte na mmie mi yale Mone wé. (Lv. 12:8; Luc 2:24) Éyoñe Yésus a nga bialé, Marie “a nga bôé nye éwolo vôm binyaka bi nga bo bi ja’ak, amu a mbe te vôme ya tabe nda beyeñ.” (Luc 2:7) Yéhôva a mbe ngule ya bo na Mone wé a bialé mfañe nda biañ. Ve jam é mbe é dañe mfi asu dé é mbe na, Yésus a yaé nda bôt é ne étôtôlô nsisim.

⁸ Nkañete ôte wo ye’ele bia avale  Yéhôva a yene biôme bi mo. Bebiaé béziñe ba vebe ze ve na bone bap be bi biôme bi mo, to’o ba lose nsisim. A too ke na, mfa’a Yéhôva, mame ya nsisim mme ma dañe mfi. Ye wo yene fo’o mam ane Yéhôva? Mimboane miôé mia liti aya?​—Lañe’e Behébreu 13:5.

9, 10. Aval avé bi ne liti na, ane Yéhôva bi nji kômbô kolé bôt ôbak?

⁹ Bi tame fe zu fas avale Yéhôva a yene bôte ba kolé ba bevo’o ôbak. Yésus a nga jô na: “Môt ase a ye dutu wua ya ayôme bongô da buni ma dina na a ku . . . , jam da dañe mvaé mfa’a wé e ne na, be fane nye ako’o nnen ba ko’o de bidi tyiñ, a wua nye e mañ été.” (Marc 9:42, Mfefé Nkôñelan) Mejô mete me ne édok! Mbôle Yésus a fas ane Ésaa wé, bia yiane kôme yeme na Yéhôva a ve’ele ki bo fianga a bôte ba vañe kolé bebo bisaé bé ôbak.​—Jean 14:9.

¹⁰ Ye bi bia yene fo’o mam ane Yéhôva ba Yésus nga? Mimboane miangan mia liti aya? Bi tame jô na bia nye’e fatane mbot nge nyanga éziñ, ve mbot ôte wo bo na bôte béziñe ya akônda be bi mbia minkômban. Nga nye’ane wo yiane tindi bia na bi tyendé fatane mbot a nyanga éte, to’o bia nye’e je?​—1 Tim. 2:9, 10.

11, 12. Aval avé bi ne sa’ale mame Yéhôva a vini éyoñ bia yeme jôé biabebien?

¹¹ Jame lale: Yéhôva a vini ékotekot. (És. 61:8) To’o a yeme na bi be’e metyi ya abé, a lebe bia na bi vini abé ane nye. (Lañe’e Besam 97:10.) Éyoñ bia jeñe na bi wô’ô amu jé Yéhôva a vini abé, nalé a ve bia ngule ya wosane de.

¹² Nge bi bili ôsimesane Yéhôva a lat a ékotekot, bia ye kui na bi yemelane na mboan éziñ ô ne abé, to’o Bible a nji kobô ajô ya mboan ôte ne sañesañ. Ane nyé mebô’ô bôte ba jeme den. Bôte béziñ ba ve de mvaé be jô’ô na, a nji bo ane fam ba minga ba jô’ôbô. * Ve ye avale mebô’ô ete da lu’an a ôsimesane Yéhôva nga? Bia yiane kôme jôé biabebien asu na bi tebe mam mese Yéhôva a vini ôyap.​—Bero. 12:9.

13. Amu jé bia yiane fas avale mam bia yé’é me ne volô bia melu ma zu?

¹³ Éyoñ bia yé’é, bia yiane fe fas aval avé mam bia lañ me ne volô bia melu ma zu. Nalé a ye bo na bi bo te jañele fek nge bia tebe été ja sili na bi ji’a nyoñe ntyi’an éziñ. (Min. 22:3) Bi tame zu yen aval bebo bisaé be Zambe béziñe ya melu mvus be nga bo de.

14. Jé nkañete Joseph wo ye’ele bia?

¹⁴ Éyoñ minga Potiphar a nga kômbô jô’ôbô a nye, Joseph a nga liti na a yem ôsimesane Yéhôva a lat a mejian, amu a nga tub été été. (Lañe’e Metata’a 39:8, 9.) A nga jô fe minga Potiphar na: “Me ne ngule  ya bo beta mbia jame nyina aya, a bo Zambe abé?” Éyalan éte ja liti na a mbe a yene’e mam ane Yéhôva. Wo ki? Ô wô’ô bo aya éyoñ môt a bo wo ayas nda bisaé? Nge wo teme kalate nge ke fôtô téléfône wôé, môt a too nsoé, nge ke a jô’ô wo na mi ke binoñ, wo ye bo aya? * Da ye bo tyi’ibi na bi nyoñe mbamba ntyi’an, nge valé bi mbe bi tatéya jeñe na bi bi ôsimesane Yéhôva a lat a avale bité éte, a fas avale bia ye bo nge bia tebe bie môs éziñ.

15. Aval avé bi ne vu bone Behébreu éyoñ mbunane wongan ô tele meve’ele été?

¹⁵ Éyoñe ji, bi tame zu kobô ajô Schadrac, Meschac, a Abed-Nego, bone Behébreu. Ntyi’ane wobe ya bo te kañ éve’ela gôlôt Njôô bôte Nebucadnetsar a nga kôm, a éyalan ébien be nga ve nye, bia liti na, be nga kôme yé’é a wôk jôm ja tinane na e wulu ba’aba’a a Yéhôva. (Nk. 20:4, 5; Dn. 3:4-6, 12, 16-18) Bi tame jô na masa wôé a sili wo moné asu abô’ô é tii a évuse ñyebe, wo ye bo aya? Éyoñe ji nje ñhe wo yiane taté na wo fas avale wo ye bo, te yange na ô taté tebe aval été éte. Nalé a ye bo na ô tebe ne bip ane bone Behébreu ba, nge avale jam ete da kui fe wo.

16. Aval avé e kabetan ôsimesane Yéhôva den a ne volô bia nge ôkone wo bi bia atemetem?

¹⁶ Bia yiane fase jame bia ye bo asu na bi bo te ku Zambe nge ôkone wo bi bia atemetem. Bia yeme na bi vo’o kañese metyi a beta mengabe menyine ya metyi, ve môt ase ya be bia a yiane fase ntyi’an a ye nyoñ a lat a bone mengabe ya metyi. (Mam. 15:28, 29) E nji bo mvo’é na môt a ke nyoñe ntyi’an ôte éyoñ a mbôô énoñ ôkon. Éyoñe ji nje wo yiane kôme jeñ mam ékôane Yéhôva ja ye’ele a lat a ajô te, éyoñe ji nje wo yiane jalé carte DPA wôé, nge ke mefebe mefe ma kamane na be ve  wo metyi, éyoñe ji nje wo yiane laan a dokita wôé. *

17-19. Amu jé dene nnye bia yiane jeñe na bi yene mam ane Yéhôva? Bia yiane tabe nkômesan asu avale bité évé?

¹⁷ Bi tame zu man a éyalane Yésus éyoñ Pierre a nga jô nye na: “Mvama’ane womien a Tat.” Éyalan éte ja liti na Yésus a mbe a tatéya kôme fase jôme Yéhôva a yi na a bo, a mam minkulane mejô mia jô a lat a ényiñe jé si va, a awu dé. Ñyeman ôte ô nga yemete ntyi’ane wé ya ke ôsu a kabetane Yéhôva, a nkômbane wé ya nyum émiene mam a butan Ésaa.​—Lañe’e Matthieu 16:21-23.

¹⁸ Den, Yéhôva a yi na bebo bisaé bé be yemete élat é ne zañe ba be nye, a na be telé ésaé jé ôsu ényiñe jap. (Mt. 6:33; 28:19, 20; Jc. 4:8) Bia fe bi ne tebe été Yésus, bôte béziñ be ne tindi bia na bi ye’e biabebien. Bi tame jô na masa wôé a jô wo na a zu bete wo minkôñ, ve ésaé éte ja zu di wo éyoñe wo yiane bo je mame ya nsisim; wo ye bo aya? Nge ke na ô ngenane mongô sikôlô, éyoñ éte ba jô wo na ô kandan a bebiaé bôé, a kee sikôlô ôsu vôm mfe. Éyoñ nalé a kui, ô ne ye’elane Yéhôva a jeñ ôsimesane wé, ô ne fe sili nda bôte jôé nge ke bemvendé ya akônda melep ôsusua na wo nyoñe ntyi’an. Ve amu jé wo yange na ô taté tebe aval été éte? Ke dene nnye ñhe wo yiane taté na wo fase mam mete! Nalé a ye bo na, nge wo tebe aval été éte môs éziñ, wo ye ke bili bebubu. Amu wo yeme jôme wo sôñ, a nleme wôé été, ô maneya tyi’i tyik avale wo ye bo.

¹⁹ Bi vo’o mane kobô ajô bité bise môt a ne tebe. E ne été na, bi vo’o mane kômesan asu mam mese me ne kui bia ényiñ. Ve nge wo bo ô jeñe’ na ô tu’a wô’ô ôsimesane Yéhôva éyoñ ése wo bo ayé’é étam, nalé a ye volô na ô bo te vuane mam ô nga yé’é, a na ô belane me éyoñ ô tele été éziñ. Ajô te, enkôma jeñané na bi tu’a yem ôsimesane Yéhôva, na bi kabetane wô, a na bi belane wô den a melu ma zu.

20, 21. (a) Amu jé éto fili bia ye bu’ubane je mfefé émo ja ye bi minné? (b) Aval avé bi ne taté na bia bu’ubane meva’a mete den?

²⁰ Bi ntoo ôjeja’a ya nyiñe mfefé émo. Abui ya be bia da feb ôkaé na paradis a so. Éjôé Zambe ja ye zu vaa minju’u mise mia tya’a bone be bôte nlem mbia émo nyi. Ve to’o éyoñ été, bôte ba ye ke ôsu a belan éto fili jap. Môt ase a ye belan éto fili jé na a bo mam a nye’e, a ma a kômbô.

²¹ Ve éto fili éte ja ye fe bi minné. Bezôsôô be bôte ba ye ke ôsu a tôñe metiñe me Yéhôva mfa’a ya yeme jôm é ne mvaé a ji é ne abé. Mboan ôte wo ye soo bia abui mevak a mvo’é. (Bs. 37:11) Dene fe, bi ne bu’ubane meva’a mete abim éziñ, nge bia ke ôsu a jeñe na bi bi ôsimesane Yéhôva.