1, 2. (a) Yésus a nga yalane Pierre aya éyoñ a nga jô nye na a mvaman émien? (Fombô’ô fôtô ya atata’a.) (b) Amu jé a nga yalane nye nalé?

BEYÉ’É be Yésus be ne fe’e ne vema, be ndeme wô’ô étua jam. Nté be ba si’a koo na Yésus a ye beta telé éjôé ya Israël, nye a nga viane kate be na a yiane tôban abui minjuk, a na a ye wu. Pierre ve taté na a komekane nye a jô’ô na: “Mvama’ane womien a Tat, jam ete da ye ke kui wo.” Yésus nye’ nye na: “A Satan, kele’e me mfa’a ya mvus! Ô ne ékolé ôbak, amu wo simesane ki ane Zambe, ve ane bôt.”​—Mt. 16:21-23, MN; Mam. 1:6.

² Mejô me Yésus mete ma liti nsela’ane a ne zañ ôsimesane Zambe a ôsimesane ya nta’ane mame Satan. (1 Jean 5:19) Pierre a nga simesan ane bôte ya émo Satan, mbe bete ba vumulu ve ayôñe ya tô’ô jap. Yésus a mbe a yeme’e na Ésaa nye a fas aval afe. A mbe a yeme’e na Zambe a yi na a tabe nkômesan asu awu dé a minju’u mia yange nye. Éyalane Yésus ja liti ne ngeññ na a telé ôsimesane Yéhôva ôsu, sa ke wu ya émo.

3. Amu jé é ne ayaé ya sa’ale ôsimesane ya émo?

 ³ Bia ki, bia simesan ane za : ye ane Zambe, ye ane émo? Éko éziñ bi bili mbamba ntaban. Ve ye bia jeñe fe na ôsimesane wongan ô lu’an a ôsimesane Yéhôva nga? Jam ete e nji fo’o bo tyi’ibi. Ve e ne tene tyi’ibi ya viane kôéban ôsimesane ya émo. Amu ô ne vôm ase. (Beép. 2:2) A fe na, mbôl émo ja tindi bôte na be simesane ve bebien, e ne bo tyi’ibi na bi bi nsisime ya été. Ayaé ajô fo’o na môt a fas ane Yéhôva, ve angôndô ya tyi’ibi na bi bi ôsimesane ya émo.

4. (a) Jé é ne kui bia nge bia jô’é na émo nje é mé ôsimesane wongan? (b) Jé bia zu yen ayé’é di?

⁴ Nge bi jô’é na émo nje é mé ôsimesane wongan, bia ye simesane ve biabebien, a bia ye ke yi na môt éziñ a kate bia avale bia yiane nyiñ. (Marc 7:21, 22) Jôm ete nje é ne nya mfii ya ‘simesan ane Zambe,’ sa ke “ane bôt.” Ayé’é di da zu volô bia abui mfa’a ôte. Da zu liti bia na, ôsimesane Yéhôva wo bo ki na môt a wô’ôtan na a ne mimbôk, ve wo viane soo nye abui bibotan. Da zu fe liti bia mam bi ne bo asu na nta’ane mame wu ô bo te mé bia. Wônaa ayé’é da zu, de da ye liti bia avale bi ne jeñe na bi bi ôsimesane Yéhôva bité biziñe ya ényiñ.

5. Amu jé bôte béziñ ba vini na môte mfe nnye a mé ôsimesane wop?

⁵ Bôte béziñ ba wô’ô abé éyoñ môte mfe a kômbô mé ôsimesane wop, nge ke yemete be na be yene mam ane nye. Be wô’ô jô na: “Sa ke wo wo fase señe jam wô’a!” E ne fo’o été na môt émiene nnye a yiane nyoñe mintyi’ane mié. Ajô te, be nji yi na môt a jôé be, ba kômbô bo mam a bebien. *

6. (a) Abim éto fili évé Yéhôva a ve bia? (b) Ye éto fili éte é ne te minné?

⁶ Jam bia yiane taté yem é ne na, e jeñe na ôsimesane wongan ô lu’an a wu Yéhôva a nji tinane na, bi nji beta bo fili ya fas, nge bo mam a biabebien. Kalate 2 Becorinthien 3:17 a jô na: “Vôm nsisime [Yéhôva] ô né, vôm ate éto beti é né.” Bi ne fili ya tob avale môt bia ye bo. Biabebiene bi ne tobe na bia nye’e jôme si jôme ka, a na bia ye bo jame si jame ka. Nne Yéhôva a nga té bia nalé. Ve éto fili jangan é bili minné. (Lañe’e 1 Pierre 2:16.) Yéhôva a yi na bi jeñ ôsimesane wé Bible été éyoñ bia kômbô yeme jôm é ne abé a ji é ne mvaé. Ye nalé a volô bia, ye momo?

7, 8. Amu jé bia jañele ki éto fili jangan éyoñ bia jeñe na bi bi ôsimesane Yéhôva? Nyoñe’ éve’an.

⁷ Bi tame nyoñ éve’an. Bi tame jô na bebiaé ba yi na bone bap be bi mbamba mefulu. Ba ye ye’ele be mfi ya bo zôsôô, mfi ya nye’e ésaé, a mfi ya semé bôte bevok. Ye ñye’elan ôte wo vaa be éto fili nga? Momo, wo ye viane volô be na be bo bôt akiti. Éyoñ ba ye kôlô éjôé bebiaé babe si, ba ye bo fili ya nyoñe mintyi’ane miap. Nge ba  tobe na ba tôñe ñye’elane bebiaé bap be nga ve be, ba ye nyoñe mbamba mintyi’an ényiñe jap. Ô lôô ane ba ye sa’ale abui minjuk.

⁸ Yehôva a ne ane bebiaé bete, nsôñane wé ô ne na bone bé be bi mbamba ényiñ. (És. 48:17, 18) Jôm ete nje a ve bia miñye’elane mia volô bia na bi bi mbamba ntaban. Miñye’elane mite mia liti bia mfi ya bi ôsimesane Yéhôva a mefulu mé. Nalé a vaa ki bia éto fili jangan, ve a bo na bi tu’a yeme fas. (Bs. 92:5; Min. 2:1-5; És. 55:9) Nalé a volô fe bia na bi nyoñe mintyi’an mia ye soo bia mevak, nté bia ke ôsu a bu’uban éto fili jangan. (Bs. 1:2, 3) Ôwé, e ne nya mfii a nya mvaé na bi fas ane Yéhôva!

9, 10. Jé ja liti na ôsimesane Yéhôva wo dañ ôsimesane ya émo?

⁹ Bia jeñe fe na bi fas ane Yéhôva amu bia yeme na, ôsimesane wé wo dañ ôsimesane ya émo beta ndañan. Émo é jaéya zu ja ve melep a lat a ntaban, ényiñe ya nda bôt, ésaé, akeke. E wô’ô kui na melebe méziñe ya été me wosane miñye’elane ya Bible. Émo é wô’ô tindi bôte na be suñe minkôñ. Ja tindi be na be bo mvite mame ya bisôk. Ja lebe fe belu’u na be kandan, nge ke na be tyam alu’u dap, to’o teke mfañ ajô zañe jap. Melebe mete ma wosane ma ya Bible. Ve ye teke melebe méziñe ya émo me ne bo mfi melu mangane ma nga?

¹⁰ Yésus a nga jô na: “[Fe’e ja] kabe amu mimboane mié.” (Mt. 11:19) Émo é kuiya na ja kôm beta beminsini, ve ja ye ke kui na é vaa benya minju’u mia tya’a bôte minleme den, ane bita, minkandane mengam, a mewôé me bôt. Teke lañ minju’u mia kui amu émo Satan ja yebe mvine mame ya bisôk. Abui bôt é yeneya na mboan ôte wo soo mejô menda me bôt, wo soo fe akon, a minju’u mife. Ve benya Bekristen be ba bu’ubane mvo’é menda me bôte map, ba sa’ale mbia b’akon, ba nyiñe fe mvo’é a bobenyañe babe ya si ése, amu be bili ôsimesane Yéhôva. (És. 2:4; Mam. 10:34, 35; 1 Bec. 6:9-11) Nga nalé a liti na ôsimesane Yéhôva wo dañ ôsimesane ya émo?

11. Ôsimesane za ñwô ô mbe ô wulu’u Moïse, a nalé a nga soo nye bibotane bivé?

¹¹ Bebo bisaé be Yéhôva ya melu mvus be mbe be yeme’ abim avé ôsimesane Yéhôva ô ne mbetane yôp. Moïse a ne wua ya été; akusa bo “be nga ye’ele [nye] mam mese bôte ya Égypte be nga yem,” Moïse a mbe a yeme’e na, Zambe étam nnye a ne ve nye “nleme ya fek.” (Mam. 7:22; Bs. 90:12) A nga ye’elane Yéhôva na: “Liti’i me mezene môé.” (Nk. 33:13) Mbôl a a mbe a jô’é na ôsimesane Yéhôva ñwô ô wulu nye, Moïse a nga bi mvome ya su’u nsôñane Zambe a lat a ayoñ Israël, a ne fe môte wua ya nsamba bôt ô nga liti beta mbunan e Bible été.​—Beh. 11:24-27.

12. Paul a mbe a bela’ane fe’e fé éyoñ a mbe a kañete’ bôt?

¹² Paul a mbe nya ñyeme sikôlô, a yeme’ minkobô mibaé: Hébreu ba Grek. (Mam. 5:34; 21:37, 39; 22:2, 3)  Ve a lôte na a belane fe’e ya émo, a mbe a tôñe’ miñye’elane ya Bible. Mam a mbe a kañete’e me mbe me so’o ve Kalate Zambe. (Lañe’ Mam 17:2; 1 Becorinthien 2:6, 7, 13.) Nalé a nga bo na ésaé nkañete jé é wum abui bibuma a na a bi ndi nleme ya nyiñe nnôm éto.​—2 Tim. 4:8.

13. Za a yiane nyiñili ôsimesane Yéhôva minleme miangan été?

¹³ Teke bisô na ôsimesane ya émo wo subu ki wu Zambe bebé. Môt a tôñ ôsimesane Yéhôva a bi abui meva’a ényiñ. Ve Yéhôva a nyiñili ki bia ôsimesane wé minlem a ngul. “Ôlo ô ne mewôk a fe’e” fe a bemvendé ba yemete ki môte na a bi ôsimesane Yéhôva. (Mt. 24:45; 2 Bec. 1:24) Kristen ébien nje ja tyi’i na ja kañese ôsimesane Zambe. Aval avé bi ne bo de?

14, 15. (a) Mam mevé bia yiane bindi asu na bi yene mam ane Yéhôva? (b) Beromain 12:2 a liti na bia yiane sa’ale ôsimesane ya émo amu jé? Nyoñe’ éve’an.

¹⁴ Kalate Beromain 12:2 (MN) a lebe bia na: “Te mia ke ôsu a jô’é na nta’ane mame wu ñwô ô mé mia, ve mi veñesa’an ñveñesane ya bo minsisime mienane mimfefé, asu na miabebien mi yemelane nkômbane Zambe, ñwô ôte ô ne mvaé, mvo’é, a teke ayeñ.” Mejô mete ma liti na, môt a yé’é benya mejôô a ne ngule ya yene mam ane Yéhôva, to’o valé émo é tatéya na ja mé nye. E ne été na, ñyenane mame wongan ô tii a avale bebiaé bangan be nga ye’ele bia, nge ke a mam me nga kui bia ényiñ. Ve môt ase a ne ngule ya tyendé ôsimesane wé a ntabane wé éyoñe nalé a sili. Ajô te, bia yiane tabe ntyel a asimesane ya nleme wongan. Nge bia bindi mam me tii a nkômbane Yéhôva, bia ye tu’a yemelane na ôsimesane wé ô ne nya mvo’é a zôsôô. Ndemben bia ye yene mvaé a tyi’ibi ya yene mam ane nye.

¹⁵ Ve asu na jam ete é boban, bi nji yiane “ke ôsu a jô’é na nta’ane mame wu ñwô ô mé [bia].” Bia yiane wua asimesan ase da wosane di Zambe fé. Bi tame nyoñ éve’an. Bi tame jô na môt a di mbamba bidi amu a yi na a bo mvo’é minsôn. Ve nge a bo fe a ja’a bidi bi ne sun, mbamba bidi bite bia ye ke volô nye jôm. Aval ete fe, bi vo’o bo na, abo kindik, abo ndombok, nge bia yi na ôsimesane Yéhôva ô volô bia, bia yiane sa’ale ôsimesane ya émo.

16. Jé bia yiane tabe je ntyel?

¹⁶ Ve ye bi ne jô na nsisime ya émo ô vo’o subu bia bebé môs éziñe nga? Môt a jô de a laa minsos, amu bia nyiñ émo. A asimesan éziñe ya été da nyiine bia melo, to’o bia yi to’o bia yi ki. (1 Bec. 5:9, 10) Éyoñ ébien bi ne nkañete, bi ne laan a môt a bili bivuse miñye’elan. Ve nalé a nji tinane na bia yiane vôé a ôsimesane ya émo nge ke kañese wô. Ane Yésus, bia ji’a titan asimesan ase da so be Satan. Bi ne fe sa’ale bité bi ne bo na bi ke wu-wuban a ôsimesane ya émo.​—Lañe’e Minkana 4:23.

17. Mam mevé me ne volô bia na bi sa’ale ôsimesane ya émo?

¹⁷ Jam ôsu, bia yiane kôme tobe  bemvôé bangan. Kalate Zambe a bemene bia na, nge bia yeñ a bôte be nji kañe Yéhôva, bia ye taté na bia fas ane be. (Min. 13:20; 1 Bec. 15:12, 32, 33) Bia yiane fe kôme tobe mimvômane miangan. Nge bia sa’ale mimvômane mia ngôné évô, mvine mame ya bisôk, nge mi mia bo na bôte be buni na Nté biôm a nji bo, wônaa bia wosan a asimesan ese da “tebe ñyemane Zambe ngame yat.”​—2 Bec. 10:5.

18, 19. (a) Amu jé bia yiane tabe ntyel a ôsimesane ya émo to’o éyoñ ô nji kôme yené ne fômelé? (b) Minsili mivé bia yiane sili biabebien, a amu jé?

¹⁸ Biyoñ biziñ é ne bo ayaé ya ji’a yemelan ôsimesane ya émo; ajô te bia yiane bo atyeñ meyen. Bi tame jô na, ba se’e asimesane pôliti’ éziñ radio nge ke télé. Nge ke na mefoé bia bi ma wumulu beta be mam bôt ba bo émo ji, nge ke beta minsôñan be bili. Befilm a bekalate béziñ be ne yené mvo’é amu ba tindi bôte na be taté fase ve ajô dap, a ajô ya nda bôte jap. Bible ki a ye’ele na, ényiñe môt a ji ya nda bôte jé, ja ye dañe bo mvo’é nge Yéhôva nnye a telé ôsu. (Mt. 22:36-39) To’o mimvômane bia buni na mi ne asu bongô, mi ne tindi môte na a bi mbia b’asimesan.

¹⁹ Bi nji kômbô jô na mimvômane mise mi ne abé. Ve e ne mfi na bi sili biabebiene na: ‘Ye me ne fo’o ngule ya yemelan ôsimesane ya émo ja’a éyoñ ô nji kôme yené ne fômelé? Ye ma telé fo’o bone bam a mamien minné miziñ mfa’a ya mimvôman? Ye ma belane fo’o Kalate Zambe na, me wosan asimesane ya émo e ne nyiine bone bam melo?’ Nge bia kôme yeme nsela’ane a ne zañ ôsimesane Yéhôva a wu ya émo, bia ye ke jô’é na “nta’ane mame wu ô mé” bia.

20. Jé é ne volô bia na bi yeme nge Yéhôva nnye a mé ôsimesane wongan nge momo?

²⁰ Te bia vuane na bôte bebaé étam mbe be ne mé bia: nge sa ke Yéhôva wônaa émo Satan. Za nnye ñhe a mé wo? Womien ô bili éyalane ya nsili ôte. Nge ô bili nsisime ya émo, nsisim ôte wo ye mé ôsimesane wôé, a tindi wo na ô nye’e mame ya minsôn. Jôm ete nje bia yiane tabe ntyel a mam bia kañese na me nyiine nleme wongan.

21. Jé bia ye yene sondô a zu?

²¹ Avale bia te yé’é, asu na bi yene mam ane Yéhôva, bi nji yiane yebe na mbia émo nyi a mé bia. Ve bia yiane jeñe na bi bi ôsimesane Yéhôva. Ayé’é ya sondô a zu da ye liti bia avale bi ne bo de.