ÉTIENNE a tele bizilengan ôsu. Bôte bete be ne bibu’a ya Sanhédrin, beta aba mejô ya Israël; be ne betyi’i mejô 71, ayoñ ése da koo be woñ. Caïphe, Njôô beprêtre nnye a te bañete be, nnye fe a nga taté wulu émo’o ya awu Yésus bone bengone mvus. (Mt. 26:57, 59; Mam. 6:8-12) Ba te soo abui bôt na e zu bôt Étienne mejô, nté bôte bete ba bu’u nye mejô, étua jam ja boban: ba “yen asu [Étienne] é funa’ane di éngele.”​—Mam. 6:13-15, Mfefé Nkôñelan.

Jé ja volô Étienne na a tabe ne mieññ, teke nyeñeban? Ôsusua na ba kee nye aba mejô, Étienne a mbe a bo’o ésaé nkañete jé a ayôñ ése, mbamba nsisime Yéhôva a too nye njalane nlem ne lut. (Mam. 6:3-7) Nde éyoñ a nga tôban étibela’a éte, mbamba nsisim ate a nga volô nye nlem, a bo fe na a simesane mam méziñ. (Jean 14:16) Éyoñ Étienne a nyoñe nkobô Mam Minlôman kabetôlô 7, mbamba nsisim a volô nye na a simesane bifuse ya Kalate Zambe ya nkobô Hébreu a lôte 20. (Jean 14:26) Ve ñyenan a nga bi ñwô ô nga tu’a yemete mbunane wé, a nga yene Yésus a too mbo nnôme Zambe.​—Mam. 7:54-56, 59, 60.

Bia fe bi ne tôban étibela’a a mam me ne bo na bi koo woñ. (Jean 15:20) Nge bia lañe Bible mban, a nge bi ne ayôñ ésaé nkañete, nsisime Zambe wo ye fe wulu bia. Bia ye bi ngule ya dañ étibela’a éte nlem ô bôô bia si ne mieññ.​—1 P. 4:12-14.