1, 2. (a) Ésaé évé nje Yésus a nga télé ôsu, amu jé? (b) Jé é ne volô bia na bi bo benya “beébe bebo bisaé be Zambe”?

YÉSUS a mbe kafinda a nkañete mbamba foé. (Marc 6:3; Bero. 15:8) A mbe a bo’o bisaé bite bibaane étua ya abeñ. A nga yé’é avale ba belane bikpwelé bi kafinda, asu na a kôme mbamba be biôm a mebam. A mbe fe a yeme’ belan abui ñyeman a mbe a bili, na a volô bôte na be tu’a wô’ô Mejô me Zambe. (Mt. 7:28; Lc 24:32, 45) Éyoñ a nga bi mimbu 30, Yésus a nga jô’é ésaé kafinda, amu a mbe a yeme’e na ésaé nkañete nje é mbe é dañe mfi. A nga jô na, Zambe a nga lôme nye si nyô na, a zu kañete mbamba foé ya Éjôé. (Mt. 20:28; Luc 3:23; 4:43) Ajô te, ésaé nkañete nje Yésus a mbe a telé’ ôsu ényiñe jé, a nga bañete fe bôte befe na be zu bo ésaé éte a nye.​—Mt. 9:35-38.

² To’o bi bi nji bo bekafinda, bi ne bekañete mbamba foé. Ésaé éte é ne angôndô ya mfi amu bia be Zambe bia bo je; Bible a loone bia na “beébe bebo bisaé be Zambe.” (1 Bec. 3:9; 2 Bec. 6:4) Bia kôme yeme na “[mbôka’a] ya ajô [Yéhôva] ô ne benya mejôô.” (Bs. 119:159, 160) Jôm éte nje bia tu’a jeñe na bi “ye’ele bôt benya mejôô zôsôô.” (Lañe’e 2 Timothée 2:15, Mfefé Nkôñelan.) Amu nalé, bia jeñ a ngul ése na bi yeme belane Bible, ékpwelé ôsu bia ye’ele je  bôte benya mejôô a lat a Yéhôva, a Yésus, a Éjôé Zambe. Ve ékôane Yéhôva é nga kuli bikpwelé bife bia volô bia ésaé nkañete, bia yiane jeñe na bi yem avale ba belane bie. Amu bikpwelé bite bia volô bia na bi ye’ele bôte Mejô me Zambe.

3. Bia yiane bi nsôñan ôvé éyoñ bia kañete, Mam Minlôman 13:48 a liti na bia yiane jeñ avale bôt avé?

³ Amu jé bia kobô ajô Bikpwelé bia ye’ele bie bôt, sa ke asu nkañete? Môt a kañete a kate foé, ve môt a ye’ele a bo na foé a kate môt é nambe nye nlem, ndemben môt ate a bo mam a yé’é. Éyoñ bia kañete bôt, nsôñane wongan wo yiane bo na bi taté meyé’é a be. Nalé a tinane na, bia yiane kôme jeñ ba bese be bili “nkômbane ya kañese benya mejôô ba ve ényiñe ya melu mese,” a volô be na be bo bebo bisaé be Yéhôva.​—Lañe’e Mam. 13:44-47, lañe’ ki éfuse 48 ayemé é ne afebe si. *

4. Aval avé bi ne yeme na môt a bili “nkômbane ya kañese benya mejôô”?

⁴ Aval avé bi ne yeme na môt a bili “nkômbane ya kañese benya mejôô”? Ntete mimbu ôsu, nkañete ñwô ô mbe ô vôlô’ na be tôban avale môt ete. Ajô te, bia fe bia tôñe mejô me Yésus ma: “Minlam mise a male mese mi akui, jeñané môt a ye bo mia mvam.” (Mt. 10:11) Bia jeñe ki bôt ba bo bia njoñ, nge ba be ne mebun, nge ba ba biasé mame ya Zambe. Ve bia jeñe bôt ba kômbô yem benya mejôô, ba be ne éjote nyul, a ba ba wô’ô évé ya vôlô’ô Mejô me Zambe. Bi ne ve’e ésaé éte a ésaé Yésus a mbe a bo’o éyoñ a mbe kafinda: a mbe a jeñe’ élé ja yian a jôm a yi na a kôm. Éyoñ a yeneya élé éte, éyoñ éte a mbe a tôkan bikpwelé bia sili, a taté ñhe na a belan atyeñ mboane mame dé, mfa’a ya kôm biôm ane mimbé, bekobot, bito, akeke. Bia fe bia yiane bo nalé éyoñ bia jeñe na bi bo bôte beyé’é.​—Mt. 28:19, 20.

5. Jé bia yiane jeñe na bi yem a lat a bikpwélé Tin Ékôan ja ve bia? Va’a éve’an. (Fombô’ô fôtô ya atata’a.)

⁵ Aval bia yem, ékpwelé ése é bili ngum asu ésaé. Bi tame yen avale Yésus a mbe a bela’ane bikpwelé bi kafinda. * E mbe sili’i nye bikpwelé asu na a ve’e mebam, asu na a futii mendem, asu na a si’i mebam, na a wom me, a na a bômôlô me. Aval ete fe, ékpwelé ése bia belane je na bi ye’ele bôt é bili ngum nsôñan. Bi tame ñhe zu kobô ajô bikpwelé bite, a yen aval avé bi ne yeme belane bie.

6, 7. (a) Aval avé ô nga belane mefebe me mbañete? (b) Mefebe me mbañete ma sôñe mam mebaé, mevé?

⁶ Afebe njoman. Ékpwelé éte e ne yené tyôtyoé ve é ne akap, ja volô bôte na yeme bia, ja lôme fe be anjeñe mefoé dangan, vôm be ne yé’é abui mam a lat a Bengaa be Yéhôva, a sili ayé’é. Den, bôt a lôte 400 000 be siliya ayé’é Bible a zene ya jw.org, a môs ôse, mintete mi bôt mife mia sili meyé’é nkol! Jeñe’e na ô bi mefebe me njoman ékpwaé jôé éyoñ ése, to’o ô nji bo nkañete.

 ⁷ Afebe mbañete. Bi wô’ô dañe belane de na bi bañete bôte bisulan, ve da sôñe mam mebaé. E ne ntilan été na: “Bia loene wo na ô zu yé’é Kalate Zambe a Bengaa be Yéhôva.” Nalé a nga ve môte fane ya tobe na a tabe “bisulane biangan,” nge ke nyi ya bi “ñye’ele Kalate Zambe.” Nde ñhe, bikpwelé bite bi nji volô ve na be yeme za bi né, bia volô fe bôte ba “yemelane na be ne azoé nsisim” na be yé’é Bible a bia. (Mt. 5:3, MN) Ve to’o môt a kañese ayé’é nge momo, a ne fili ya tabe bisulane biangan. Bôte ba tabe bisulane biangan bebien ba yen avale Bengaa be Yéhôva ba belane Bible na be ye’ele bôt.

8. Amu jé é ne mfi na môt a tabe to’o ve ésulane jia a bia? Va’a éve’an.

⁸ E ne mfi na bi bo mbane ya bañete bôt, to’o ba zu tabe ve ésulane jia. Amu jé? Ba ye yene na, nté Beta Babylone a wu zaé, bebo bisaé be Yéhôva be be bili abui bidi ya nsisim. (És. 65:13) Ray ba minga wé Linda be nga yene jam ete. Ba nyiñ Amelka, a môs éziñ be nga tyi’i na ba zu taté na ba ke nda zambe. Be mbe be buni’ na Zambe a ne, be bili fe nkômbane ya yeme nye, ane be nga taté na ba ke menda me zambe mese ya vôm be mbe be too. Menda me zambe a miñyebe ki mi mbe angôndô ya abui vôm ate, ve be nga tyi’i na ba zu mane bômane mise. Mam mebaé mme me nga ye bo na be tobe nda zambe jap. Jam ôsu, be nga yiane yé’é jam é ne mfi nda zambe éte; jame baa, é nga yiane yené na bôte ya été ba kañe Zambe. Mvus abui mimbu, be nga mane bômane menda me zambe mese, ve teke ndoñ. Be nji yé’é ve atañe jôm, a bôte bebien be mbe be tabe’e bisulan bite be nji be éjijin. Éyoñ be kandaneya tabe ésulan nda zambe éziñ, Linda a nga jibi bulane bisaé bié, Ray ki a bulane nda. Nté Ray a mbe a bula’an, a nga yen Aba Éjôé, nye’ na: ‘Jé ja kamane ma na me nyiin?’ Bia ye kee mia nlô asaé! Môt ase a mbe mfuban, ôsesa a nyanga. Ray a nga kôme ke tabe éto ya mvus, mam a nga yé’é me nga nambe nye abui. Fo’o ve avale Paul a nga jô a lat a môt a tabe ésulan éyoñ ôsu, Ray fe a nga kôme wô’ôtane na: “Zambe a to fo’o be [bia].” (1 Bec. 14:23-25) Ataté éyoñ éte, a nga tabe bisulan môse Sondô ôse, mvuse ya valé a nga taté fe na a tabe bisulane ya zañe sondô. Linda a nga bo fe avale da, akusa bo a mbe a lôteya mimbu 70, a nga kañese yé’é Bible a duban.

9, 10. (a) Amu jé é ne tyi’ibi na bi belane betract? (b) Kate’ avale ba belane tract a ne nlô ajô na Éjôé Zambe é ne jé?

⁹ Betract. Bi bili betract mwom ba volô bia na bi taté minlañe tyi’ibi. Ataté mbu 2013 azukui den, be kuliya be bebé milliard étan. Mbamba jam a ne na, nge ô yeme belane tract wua ya été, wo ye fe yeme belane ba bevo’o bese, amu be ne avale da. Aval avé bi ne taté minlañ a betract?

¹⁰ Bi tame jô na wo kômbô belane nyô a ne nlô ajô na Éjôé Zambe é ne jé? Liti’i môt nlô ajô ya tract a sili nye na: “Ye ô siliya womiene jé é ne ne Éjôé Zambe? Wo ye yalan aya . . . ?” Jô’ô nye na a tob éyalane jia ya biyalane bilal bia tôñe nsili. Éyoñ a yalaneya, te kate nye na a bele nge na a kop, ve liti’ nye  bifuse ya Bible (Daniel 2:44 a Ésaïe 9:6) bi ne vôm a ne ntilane na “Éyalane Kalate Zambe a ve.” Ô ne kee minlañ ôsu nge nalé a sili. Mvuse ya valé, lañe’e nsili ô ne afebe da su’ulan, vôm a ne ntilane na “Fasek,” nsili ôte ô ne na: “Éyoñ Éjôé Zambe j’aye so, ényiñ j’aye bo aya?” Ô ne li’i nsili ôte ô bôô. Éyoñ mia môt ate mia ye beta yenan, te vuane na ô ne belane ñye’elane 7 ya nsoé kalate Mbamba mefoé m’aso be Zambe!, nsoé kalate ôte ô ne ékpwelé jia ya bi bia taté bie meyé’é.

11. Nsôñane ya Nkume mmombô a bete ba Vee ôyo! ô ne ôvé, ve jé bia yiane yem a lat a bekalate mefoé bete?

¹¹ Bekalate mefoé. Bekalate mefoé ba dañe kuli a kôñelan si ése be ne Nkume mmombô a bete a Vee ôyo! Bia bo na minlô mejô ya été mi nambe bôte ya vôm ase, amu ba kabe bekalate bete si ése. Bia yiane belane be na bi ve môt évé ya yeme mam ma dañe mfi ényiñe den. Ve bia yiane yem za a yiane kalate ase ya été, mfa’a ya na bi bo te bo éndaman.

12. (a) Be nga kuli Vee ôyo! asu za, nsôñane wé ô ne ôvé? (b) Mbamba bibuma bivé ô nga bi amu ô nga belane Vee ôyo! nkañete?

¹² Vee ôyo! a ne asu bôte be nji dañe yeme Bible, nge ke asu ba be nji ye-yeme atañe jôme Bible. Bôte bete be nji yem miñye’elane mi Krist, éko éziñ na miñyebe mi te’eya fe be nyul, nge ke na ba buni na Kalate Zambe a volô ke jôm. Jam ôsu Vee ôyo! a sôñ é ne na, a liti bôte na Zambe a ne. (Bero. 1:20; Beh. 11:6) A liti fe na Bible a “ne fo’o . . . Mejô me Zambe.” (1 Bet. 2:13) Minlô mejô ya Vee ôyo! ya mbu 2018 mi: “Zene ja soo mevak,” “Mam 12 ma bo na menda me bôt me bo abeñ,” a “Mvolan asu bôte ba wô’ô mintaé.”

13. (a) Nkume mmombô a nji bo asu ayé’é a nga tiliban asu za? (b) Mbamba bibuma bivé ô nga bi amu ô nga belane nye nkañete?

¹³ Nkume mmombô a bete, nyô a nji bo asu ayé’é, a nga kui asu bôte ba semene Zambe a Mejô mé abim éziñ. To’o ba yeme Bible mone jôm, be nji tu’a wô’ô nye ne sañesañ. (Bero. 10:2; 1 Tim. 2:3, 4) Minlô mejô ya Nkume mmombô ase ya mbu 2018 mi: “Ye Kalate Zambe a ngenane mfi den?,” “Jé ja yange bia melu ma zu?,” a “Ye Zambe a nyoñe wo ngap?”

14. (a) Bevidéo benyine ya nka’ale Bikpwelé bia ye’ele bie bôt ba sôñe jé? (b) Mbamba bibuma bivé ô nga bi amu ô nga belane be?

¹⁴ Bevidéo. Melu me Yésus, kafinda a nji be a bili mimfañe beéngin ba belane be den. Ve den, mam me tyendéya, bekafinda be mbili beéngin ba volô na ésaé é bo be tyi’ibi. Ane ô vaa bekalate bia kuli mefep, ékôane Yéhôva é kuliya fe mbamba bevidéo; bi ne taté lañe ve ba benyine ba: Amu jé wo yiane yé’é Bible?, Nne ba bo ayé’é ya Kalate Zambe aya?, Jé j’aboban aba éjôé été?, a Bengaa be Yéhôva: bi ne beza? Éyoñ ôsu bia tôbane môt, e ne mvo’é na bi belane bevidéo be nji lôte minute mibaé. Bi ne belane ba be ne ôbe ayap éyoñe bia bo minjoman, nge ke éyoñ bia tôbane môt a bili abui éyoñ. Bevidéo be ne ve môt éva’a ya yé’é Bible a tabe bisulan.

15. Kate’ aval avé vidéo wua a nga nambe bôt amu be nga yene nye nkobô wop?

¹⁵ Sita éziñe ya Micronésie a nga tôbane minga, minga ate a mbe a kobô’  nkobô ba loone na Yap, a nga zu nyiñe Micronésie; nde kale jañ é nga liti nye vidéo Amu jé wo yiane yé’é Bible? nkobô wé. Vidéo a taté’ taté, minga na: “Naa! Sa nkobô wome wu! A ne ve ane bôte bebiene ya jal dam mbe ba kobô. A Zambe wom!” Ane a nga jô na a ye bo a kele’ yen a lañ biôm bise ya nkobô wé bia kui jw.org. (Nkañete ôte wo funane wu ya Mam Minlôman 2:8, 11.) Sita ya Amelka fe a nga lôme mone ndôme jé lien ya vidéo ate nkobô wé. Éyoñ a maneya yene nye, ndôman éte é nga tili ésanga na: “Me nga dañe nye’e vôm ba jô été na Satan nnye a jôé émo. Me nga sili ayé’é ya Kalate Zambe.” Ndôman éte ke ja nyiñe vôm ba tyili ésaé nkañete.

16. Kate’e nsôñane ya minsoé mi kalate mi: (a) Vô’ôlô Zambe ndemben wo ye nyiñe nnôm éto. (b) Mbamba mefoé m’aso be Zambe! (c) Beza ba bo nkômbane Yéhôva den?

¹⁶ Minsoé mi kalate. Aval avé ô ne ye’ele môte Bible éyoñ teke atañ kalate nkobô wé, nge ke éyoñ a nji yeme lañ? Nsoé kalate Vô’ôlô Zambe ndemben wo ye nyiñe nnôm éto * ô nga kui asu avale bôt ete. Wônaa, nsoé kalate Mbamba mefoé m’aso be Zambe! wo volô na bi taté meyé’é a bôt. Ô ne liti môt minlô mejô 14 mi ne afebe mvus, a sili nye wu a dañe nye’e. Éyoñ a tobeya, mi taté ñhe ayé’é. Ye ô boya fo’o de njoman éziñ? Nsoé kalate lale ô ne Beza ba bo nkômbane Yéhôva den? Wo volô beyé’é Bible na be yem ékôane Yéhôva. Nge wo kômbô yem avale ba belane wô, lañe’ Ényiñe Kristen a ésaé nkañete jangan​—Kalate ésaé asu bisulan ya Ngone lale, mbu 2017.

17. (a) Nsôñane ya bekalate bebaé bia belane be asu meyé’é ô ne ôvé? (b) Jé môt ase a yiane bo to’o a dubaneya, amu jé?

¹⁷ Bekalate. Nge wo te taté ayé’é a nsoé kalate, te yange na mi man nsoé kalate ôse, ô ne kee ayé’é ôsu a kalate Jé Kalate Zambe a ne ye’ele bia? Kalate ate a volô môte na a yem mbôka’a ya miñye’elane ya Bible. Éyoñ mi maneya yé’é nye, kela’ané ayé’é ôsu a kalate Ba’ale’e womien nye’ane Zambe été, nge môt ate a bo mam ma liti na a yaé nsisim. To’o môt a dubaneya, a yiane mane yé’é bekalate bete bebaane. Nalé a ye volô nye na a kôme lôñeban benya mejôô été.​—Lañe’e Becolossien 2:6, 7.

18. (a) Melebe mevé 1 Timothée 4:16 a ve môt ase a ye’ele benya mejôô, nge bia tôñe me nalé a ye wume bibuma bivé? (b) Jé bia yiane sôñ nté bia belane Bikpwelé bia ye’ele bie bôt?

¹⁸ Zambe a nga ve Bengaa bé “benya mejôô ya mbamba foé” mfa’a ya volô bôte na be bi ényiñe ya nnôm éto. (Beco. 1:5; lañe’e 1 Timothée 4:16.) Jôm éte Tin Ékôan ja kuli bikpwelé bia volô bia mfa’a ôte. (Fombô’ô nka’ale ô ne nlô ajô na: “ Bikpwelé bia ye’ele bie bôt.”) Bia yiane jeñe na bi yeme belane bikpwelé bite. Môt ase a ne fili ya top bikpwelé a ye taté bie minlañ. Ve nsôñane wongan ô nji bo ve na bi kabe bôte bekalate bangan; ajô te, bi nji yiane ve môte kalate, nge da kôme yené na a nji bisi foé bia kate nye. Nsôñane wongan ô ne na bi bo bôte beyé’é, ajô te bia jeñ bôt ba kômbô yem benya mejôô, ba be ne éjote nyul, a ba ba wô’ô évé ya vô’ôlô Mejô me Zambe.​—Mam. 13:48; Mt. 28:19, 20.