ASU AYÉ’É 41
Avale bi ne volô bôte bia be be bia yé’é na be duban: Ngab ôsu
“Mia yené na mi ne kalate Krist, mboane ya be bia.” —2 BEC. 3:3.
JIA 78 “Ye’ele be Mejô me Zambe”
ÔBALEBAS *
Ngo’o abim meva’a bia wôk éyoñ bia yen ane ñyé’é Bible ya akônda dangan a duban! (Fombô’ô abeñ 1)
1. Aval avé 2 Becorinthien 3:1-3 a volô bia na bi nyane mvome ya bo môt ayé’é akekui mbaptizô? (Fombô’ô fôtô ya ékô’ôla.)
Ô WÔ’Ô wô’ôtan aya éyoñe wo yene ñyé’é Bible ya akônda dôé a duba’an? Nga mevak me wô’ô jaé wo nleme ne lut? (Mt. 28:19) Nge a ne ke na wo wo bo ayé’é môt ate, meva’ môé ma tu’a fuluku, amu wo Yéhôva a te kôme belane nye na ô dutu môt ékôane jé. (1 Bet. 2:19, 20) Bible a jô na bôte be ndeme duban be ne ane “bekalate ya ékaña’a,” sa ke ve asu môt a nga bo ayé’é dap, ve asu akônda ese.—Lañe’e 2 Becorinthien 3:1-3.
2. (a) Bia yiane kôme fase beta nsili mbé, a amu jé? (b) Bi ne jô na bia bo môt ayé’é éyoñ évé? (Fombô’ô aton.)
2 Mimbu minyin mi ndeme lôte mi, Bengaa be Yéhôva ya si se be nga bo bôte bebé 10 000 000 meyé’é * ngon ése! Wônaa bôt a lôte 280 000 be mbe be duba’ane mbu ôse. Aval avé bi ne volô bemillion beyé’é Bible bevo’o ba na be duban? Nté Yéhôva a nga’an a va’a bôt éyoñe ya bo beyé’é be Krist, bia yiane jeñ a ngul ése na bi volô be na be dubane teke jañele éyoñ. Te bia vuane na asu’ulan e nto ñhe bebé!—1 Bec. 7:29a; 1 P. 4:7.
3. Jé bia zu yen ayé’é di a lat a avale bi ne bo meyé’é?
3 Mbôle bobejañe ya Tin ékôane ba kôme yeme na e ne nya mfii na bôte be bo beyé’é be Krist den, be nga sili bobejañe ba tebele ésaé Bebéthel jame bi ne bo asu na bi volô abui beyé’é Bible na e yaé nsisim a duban. Ayé’é di a di da tôé valé, bia zu yen aval avé bi ne vu biwôlô bekpwa’a mefan, bemissionnaire a bejome mekônda mfa’a ôte. * (Min. 11:14; 15:22) Ba timine bia mam beye’ele a beyé’é Bible be ne bo asu na ayé’é Kalate Zambe e wume mbamba bibuma. Bia zu taté yene mam metane ñyé’é Bible ase a yiane bo asu na a yaé nsisim a duban.
BO’ MI YÉ’ANÉ SONDÔ ASE
Sili’i môte mia nye mia yé’é mbé yôp nge mi ne kee minlañ ôsu mi too si vôm éziñ (Fombô’ô abeñ 4-6)
4. Jé bia yiane yem a lat a meyé’é ma bobane mbé yôp?
4 Abui bekañete mbamba foé da wulu bôte meyé’é mbé yôp. To’o a ne fo’o mbamba zene ya volô môte na a kômbô yeme benya mejôô, minlañe mite mi wô’ô dañe bo ve bone minut, teke ke bobane bobane sondô ase. Mfa’a ya na be tu’a ve bôt évé ya yé’é Mejô me Zambe, bobejañ béziñ be wô’ô sili môte nombo nkole wé, éyoñ éte ba loone nye nge ke tili nye éfus éziñe ya Bible é ne volô nye ôsusua na ba be nye ba beta yenan. Be ne bo de bengon bengon, ve teke kui na be kôme taté nya ayé’é. Ye mia simesane na môt a ne kôme yaé nsisim a duban nge nne ayé’é dé da bobane ve aval ete nga? Ko ko!
5. Aval avé bi ne belane mejô me Yésus ya kalate Luc 14:28-33 asu na bi volô bôte bia be be bia yé’é Bible?
5 Môs éziñ, Yésus a nga belan éve’an asu na a liti jame môt a kômbô bo ñyé’é wé a yiane taté fas. A nga kobô ajô bôte bebaé: Môt a kômbô lôñe nkum, a njôô bôt a kômbô ke bita. A nga jô na môt a kômbô lôñe nkum a “taté tabe si a fase tañ” asu na a yeme nge a ne mane melôñ. Wônaa njôô bôte ki a yiane “taté tabe si a bôndé fek” asu na a yem nge nkane bita wé ô ne ngule ya dañe bôt a kômbô ke wosane be. (Lañe’e Luc 14:28-33.) Yésus a nga nyoñ éve’an éte asu na a liti môt ase a kômbô bo ñyé’é wé na a yiane taté kôme fase nge a ne ngule ya be’e mbe’e ôte. Jôm ete nje bia yiane liti beyé’é Bible mfi ya bo bi yé’é sondô ase. Bi ne bo de aya?
6. Jé bi ne bo asu na bôte bia be be bia yé’é be yaé nsisim?
6 Bo’o ô kô’ôlane bone minut éyoñ ése wo wulu ayé’é mbé yôp. A lôte na ô lañe môte ve éfuse jia ya Kalate Zambe, ô ne bo ô beté’ éfus éfe éyoñ ése wo zu jome nye. Éyoñ a maneya yembane na ayé’é da boban ôbe ayap, ô ne sili nye nge mi ne kee minlañ ôsu mi too si vôm éziñ. Éyalan é ve wo ja ye volô wo na ô yem nge a nye’e ayé’é Bible nge momo. Ô ne fe sili nye nge a ne kañese na mi bo mi yé’é biyoñe bibaé sondô. Ve abim ete e nji yian, mam mefe ya bo me nga’an.
KÔMESA’AN AYÉ’É ESE
Kôme’e kômesane meyé’é môé, liti’i fe môte mia nye mia yé’é avale ba kômesan ayé’é (Fombô’ô abeñ 7-9)
7. Aval avé ñye’ele a yiane kômesan ayé’é Bible ese?
7 Ñye’ele Bible a yiane kôme kômesan ôsusua na a ke bo môt ayé’é. Nne ba kômesan ayé’é ya Bible aya? Ô ne taté mane lañe mebeñe mia ye yé’é, a bifuse ya kalate bi ne été. Jeñe’e na ô yemelane miñye’elane mia dañe mfi mebeñe mete. Fase’e nlô ajô, bone minlô mejô, minsili ya mebeñ, bifuse ya Kalate Zambe ba jô na mi lañ, a bevidéo bese ba lu’an a nlô ajô mii yé’é. Mvuse ya valé, fase’e fe aval ô ne volô ñyé’é Bible wôé na a wô’ô mam mete tyi’ibi, a na a tôñe me ényiñe jé.—Néh. 8:8; Min. 15:28a.
8. Jé mejô me Paul ya kalate Becolossien 1:9, 10 ma ye’ele bia a lat a mfi ya ye’elan asu beyé’é Bible bangan?
8 Éyoñe wo kômesan ayé’é, ye’ela’ane Yéhôva asu môte mia nye mia yé’é, ô kobô’ô Nye ajô ya miñyiane mié. Kôme’e kate Yéhôva na a volô wo na ô yeme belane bifuse ya Bible asu na ô nambe nleme môte mia nye mia yé’é. (Lañe’e Becolossien 1:9, 10.) Sili’i womiene nge ñyé’é Bible a ne yen ayaé ya wô’ô miñye’elane miziñ, nge ke kañese mie. Te vuane na nsôñane wôé ô ne na ô volô môte mia nye mia yé’é na a yaé nsisim a duban.
9. Aval avé ñye’ele a ne volô ñyé’é Bible na a kômesan ayé’é dé? Timi’in.
9 Bia ve ngule ya yé’é a bôte sondô ase amu bia yi na be tu’a yemelane mvaé ése Yéhôva ba Yésus be nga bo be, ndemben be bi nkômbane ya tu’a yeme be. (Mt. 5:3, 6) Ñyé’é Bible a kôme yene mfi ya ayé’é éyoñ a futi nlô wé ôse mam a yé’é. Jôm ete nje wo yiane liti nye mfi ya kôme kômesan ayé’é ese. Jô’ô nye na a lañe mebeñ a fas aval avé a ne tôñe mam a yé’é ényiñe jé. Aval avé ô ne liti nye avale ba kômesan ayé’é? Kômesa’an ngume nlô ajô a nye. * Liti’i nye aval a ne yene biyalane ya minsili tyi’ibi. Kate’e nye na nge a tene ve mintene bifia, nalé a ne volô nye na a ba’ale éyalan. Kate’e fe nye na a belane bifia bié éyoñ a yalan. Nalé a ye volô wo na ô yem nge a tu’a fo’o wô’ô mam mia yé’é. Ve abim ete e nji yian, mam mefe ya bo me nga’an.
LITI’I NYE MFI YA LAAN A YÉHÔVA MÔS ÔSE
Liti’i môte mia nye mia yé’é aval a ne bo a laan a Yéhôva (Fombô’ô abeñ 10-11)
10. Amu jé e ne mfi ya lañe Bible môs ôse, a jé ñyé’é Bible a ne bo asu na nlañan ôte ô bo nye nya mfii?
10 Ane ô vaa na mia nye mia yiane yé’é sondô ase, ñyé’é Bible a yiane fe bo mam méziñe môs ôse. A yiane bo a laan a Yéhôva. Jam ete e ne boban aya? A yiane vô’ôlô Yéhôva, a yiane fe Nye kate mam mé. A vô’ôlô Yéhôva éyoñ a lañe Bible môs ôse ya yôp. (Jos. 1:8; Bs. 1:1-3) Liti’i nye avale be ne belane nta’ane mam bia koone wô jw.org asu nlañane Bible. * Asu na nlañan ôte ô bo nye nya mfii, kate’e nye na a fase mame Bible a ye’ele a lat a Yéhôva, a aval avé a ne tôñe mam a lañ ényiñe jé.—Mam. 17:11; Jc. 1:25.
11. Aval avé ô ne ye’ele ñyé’é Bible wôé ane ba ye’elan, a amu jé é ne mfi na a bo mbane meye’elan?
11 Liti’i môte mia nye mia yé’é mfi ya ye’elane Yéhôva môs ôse. Ôsusua na ayé’é da kaa, a éyoñ da man, ye’elane Yéhôva a nlem ôse, ô kobô’ô nye ajô ya môte mia nye mia yé’é. Nté a vô’ôlô meye’elane môé, nye’e fe a yé’é aval a ne bo a laan a Yéhôva, a kate’e nye mam ma so nye nlem, a yé’é fe na ba ye’elane Zambe a ngala’ane ya be Mone wé Yésus Krist. (Mt. 6:9; Jean 15:16) Ye ô tameya fo’o simesan abim avé ñyé’é Bible wôé a ne subu Yéhôva bebé nge ba nye ba bo be laane môs ôse nga? Nté a kate Yéhôva mam me ne nye nlem a zene ya meye’elan, a vô’ôlô fe Nye a zene ya nlañane Bible môs ane môs. (Jc. 4:8) Nge a ba’ale fulu éte, nalé a ye volô nye na a su’ulane ve émiene ngumba be Yéhôva a duban.
VOLÔ’Ô NYE NA A BO MVÔÉ YÉHÔVA
12. Aval avé ô ne volô ñyé’é Bible wôé na a bo mvôé Yéhôva?
12 E nji sili ve na ñyé’é Bible a bi ñyeman, da sili fe na ñyeman ôte ô nambe nye nlem. Amu jé? Amu nleme ñwô wo tindi môte na a bo mam. Yésus a mbe ntyetyeñe ñye’ele, bôte be nye’e be vô’ôlô nye. Ve bôte be nga tôñe nye amu mam a mbe a ye’ele’e be me mbe me bo’o na be fas, me nambe’e fe be nlem. (Luc 24:15, 27, 32) Da sili na ô liti ñyé’é Bible wôé na Yéhôva a ne vevea Môt a na ba Nye be ne bi ngul élat. Bo’o na a yene Yéhôva ane Ésaa wé, Zambe wé, a Mvôé jé. (Bs. 25:4, 5) Kôme’e liti nye mbamba mefulu me Yéhôva éyoñ mia yé’é. (Nk. 34:5, 6; 1 P. 5:6, 7) Bo’o de éyoñe ya éyoñ ése, ô fase’e avale nlô ajô ôse mi ne yé’é wo ngôné mbamba mefulu me Yéhôva méziñ. Volô’ô nye na a tu’a wô’ abim avé Yéhôva a ne nye’an, mbamba nlem, a mvam. Yésus a nga jô na “nyeke’e Éso Zambe wôé” a ne atiñ e “tele metiñ mese ôsu.” (Mt. 22:37, 38) Volô’ô môte mia nye mia yé’é na a kôme nye’e Yéhôva.
13. Jé ô ne bo asu na ô liti môte mia nye mia yé’é mbamba mefulu me Yéhôva?
13 Éyoñ ése wo laan a ñyé’é Bible wôé, kate’e nye amu jé wo nye’e Yéhôva. Jam ete e ne nambe nye a tindi nye na nye’e fe a kômbô bo mvôé Yéhôva a nye’e nye. (Bs. 73:28) Ye ô nga lañe jam éziñe da ngôné nye’ane Yéhôva, fe’e jé, zôsôô wé, nge ke ngule jé Bible nge ke bekalate bangan? Nge jam ete e nga nambe wo, kate’e de môte mia nye mia yé’é, a liti’i nye na a ne jame da ya mam ma bo na ô nye’e Yéhôva angôndô. Ve abim ete e nji yian, mam mefe ya bo me nga’an.
VOLÔ’Ô NYE NA A TABE BISULAN
Volô’ô ñyé’é Bible wôé na a ji’a taté na a tabe bisulan! (Fombô’ô abeñ 14-15)
14. Aval avé mejô bia koone me kalate Behébreu 10:24, 25 me ne volô ñyé’é Bible na a yaé nsisim?
14 Bia bese bia yi na beyé’é Bible bangan be su’ulane duban. Mbamba zene ya volô be mfa’a ôte a ne na bi liti be mfi ya tabe bisulan. Bobejañe be ne akap ésaé nkañete ba jô na, éyoñe ñyé’é Bible a ji’a taté na a tabe bisulan, a yaé fe nsisim étua avôl. (Bs. 111:1) Bobejañe béziñe be wô’ô kate beyé’é Bible baba na ba bi ve éfase ñyeman éyoñe ba be be ba yé’é, a na ba ye bi éfas évok nge ba tabe bisulan. Lañe’e Behébreu 10:24, 25 a môte mia nye mia yé’é, a liti nye amu jé e ne mfi na a bo a tabe’e bisulan. Liti’i fe nye vidéo a ne nlô ajô na: Jé ja boban Aba Éjôé été? * Ôwé, volô’ô ñyé’é Bible na a nyoñe ntyi’ane ya tabe bisulane bise.
15. Aval avé bi ne volô ñyé’é Bible na a tabe bisulane mban?
15 Jé ke ô ne bo nge môte mia nye mia yé’é a ngenane teke taté na a tabe bisulan, nge ke nge a tabe ki bisulane mban? Kate’e nye mbamba jam ô nga yé’é ésulane ya mvus. Nge ô bo de a ôsesa, nalé a ne volô nye na nye’e fe a kômbô taté na a tabe bisulan. Va’a nye Nkume mmombô a bete nge ke kalate Ényiñe Kristen a ésaé nkañete bia yé’é ésulane ngon éte. Liti’i nye mam bii yé’é ésulane wo bañete nye, a sili’i nye jam a dañe nye’e été. Jame ñyé’é Bible a ye wôk a yen éyoñ ôsu a ye tabe ésulane ja ye bo di ya laan, amu a ye bo a ngenane te tame yene jam e too aval abeñ ete, nge ke wô’ô jam e too zame melo nda zambe éfe éziñ ya émo minlañ. (1 Bec. 14:24, 25) A ye fe tôbane bôte befe be ne volô nye na a yaé nsisim.
16. (a) Wôlôkane mam bia yiane bo nge bia kômbô volô ñyé’é Bible na a duban. (b) Jé bii yen ayé’é da zu?
16 Nge bia wôlôkan, aval avé bi ne volô ñyé’é Bible na a duban? Bia liti ñyé’é Bible mfi ya ayé’é éyoñe bia jeñe na bi bo ayé’é dé sondô ase, a éyoñe bia volô nye na a kôme kômesane meyé’é mé mese. Bia volô fe nye na a bo a laan a Yéhôva môs ôse, a jeñe na a bo mvôé Jé. Bia liti nye mfi ya tabe bisulane ya akônda. (Fombô’ô nka’ale ô ne nô ajô na “ Mame ñyé’é Bible a yiane bo ôsusua na a duban,” afep 12.) Ve abim ete e nji yian, ayé’é da zu da kobô ajô mam metane mefe ñye’ele Bible a ne beta bo asu na a volô bôte ba be nye ba yé’é na be duban.
JIA 76 Wo wô’ôtan aya éyoñe wo kañete?
^ É.N. 5 Ba jô na môt a ye’ele nyô mbo’o jôm éyoñ a volô nye na a “yene mam aval afe, na a wô’ôtane mam aval afe, nge ke na a bo mam aval afe.” Éfuse ya mbu wu, Matthieu 28:19, ja liti bia mfi ya yé’é Bible a bôt, a volô be na be bo beyé’é be Yésus. Ayé’é di a di ya sondô a zu, bii yen avale bi ne tu’a bo akab ésaé nkañete.
^ É.N. 2 ASU NA BI TU’A WÔK: Nge ô ne mbane ya kañete môt ô bela’ane Bible éyoñ ése mia nye mia laan, yeme’e na wo bo ayé’é ya Kalate Zambe. Nge mi yé’éya biyoñe bibaé nté ane ô nga liti nye aval ayé’é Bible da boban, a ô too ndi na minlañe mienane mia ye ke ôsu, ô nto ve tili rapport wôé na wo bo ayé’é.
^ É.N. 3 Ayé’é di, bia koone fe melebe ya Ministère du Royaume a nga kui ataté Ngone zangbwale ya mbu 2004 akekui Ngone tane ya mbu 2005, nlô ajô ô ne na: “Dirigeons des études bibliques qui favorisent les progrès.”
^ É.N. 9 Yene’e vidéo a ne nlô ajô na Bi ye’ele bôte bia be be bia yé’é Bible na be kômesan ayé’é. E JW Library®, kele’e vôm a ne na MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILES.
^ É.N. 10 Kele’e vôm a ne na LA BIBLE ET VOUS > OUTILS D’ÉTUDE DE LA BIBLE.
^ É.N. 14 E JW Library®, kele’e vôm a ne na MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
