Mbala’a si ô mbe vôme bôte be mbe be tii asu na be ke vôme ya Temple a ne étyi. Kalate Zambe, Nkôñelane ya mfefé émo be nga kuli ôsusua mbu 2023 a jô na: “Mbala’a si ô nga too asu nda ô mbe nté menyi’i me mo mewôme mebaé, abim ane ndame ya nda, a nté ya yôp ô mbe menyi’i me mo ntet a mewôme mebaé.” (2 Mka. 3:4) Minkôñelane mife mia jô fe na mbala’a si ô mbe “menyi’i me mo 120” nté ya yôp, nalé a liti na ô mbe ô yiane bo ndame meta 53 (medaa mebo 175)!

Ve Nkôñelane ya mfefé émo be nga kuli mbu 2023 wo jô a lat a mba’ala si ya Temple Salomon na: “Nté ya yôp ô mbe menyi’i me mo mewôme mebaé,” nge bebé meta ébul (medaa mebo 30). a Bi tame zu yene bone beamu be nga bo na be bo ntyendan ôte.

Kalate 1 Bejô bôt 6:3 a nji kobô ajô nté ya yôp ya mbala’a si. Éfus éte, Jérémie a kobô ajô nté a ndame ya mbala’a si, a nji kobô ajô nté ya yôp. E kabetôlô a tôé valé, Jérémie a kobô ajô beta be biôme be mbe be bela’ane be e Temple, aval ane mañ a mvot, biteba’a awôm a mekône memvote mebaé me mbe me tele nseñe ya mbala’a si. (1 Bb. 7:​15-37) Nge nté ya mbala’a si ô mbe ô lôte’e meta 50 a na ô mbe ôyabe yôp a dañe Temple, amu jé Jérémie a nji kobô ajô ya nté wé ya yôp? To’o mvuse mintete mimbu, betili bekalate bejuif be mbe be jô’ô na nté ya mbala’a si ô nji mbe ô dañe’e Temple Salomon.

Beyeme mame ba sili bebiene nge mimfime ya Temple mi mbe ngule ya be’e mbala’a si, ñwô ôte nté ya yôp ô mbe menyi’i me mo 120. Melu mvus, menda be mbe be lôñe’e a mekok a bebrique aval ane temple ya Égypte, me mbe angôndô ya anen, me kele’e fe nsoñe mfa’a ya yôp. Ve Temple Salomon nye a nji mbe nalé. Beyeme mame ba jô na mimfime mié mi nji be mi lôte’e menyi’i me mo mesaman afip, nge ke meta 2.7 (medaa mebo 9). Jôme te nje beta ñyeme mame ya ésaé melôñe ya melu mvus, Theodor Busink a nga jô na: “Éyoñe bia yen abim afibe mfime ya [anyiine ya Temple] ô mbe, teke na [nté ya yôp] ya mbala’a si ô mbe ve bo menyi’i me mo 120.”

Éko éziñe be nga bo ékop éyoñe be nga beta tili 2 Minkañete 3:4. Akusa bo minnôme mintilane miziñe mi nga tili “120” éfuse ji, mintilane mife aval ane Codex Alexandrinus ya ntete mimbu tane a Codex Ambrosianus ya ntete mimbu samane, mi nga tili “menyi’i me mo 20.” Aval avé mone scribe a nga yeme kui na bo ékobe ya tili “120”? Bifia “ntet” a “menyi’i me mo” bia funane nkobô Hébreu. Ajô te, mone scribe a nga yiane kop éfia “ntet” a viane futi “menyi’i me mo.”

É ne été na, éyoñe bia ve ngule ya kôme wô’ô bone be mame bete bese a éyoñe bia jeñe na bi yem atinane ya Temple Salomon, bia bem ôsimesane wongan éfunane ya Temple, nnye ate a ne beta Temple ya nsisim. Ngo’o abime meva’a bi ne éyoñe bia yeme na Yéhôva a nga bañete bebo bisaé bé bese na be zu nye kañ e Temple ate!—Héb. 9:​11-14; Nlitan 3:12; 7:​9-17.