Mbu ôse, bidima bebo bisaé bi Yéhôva bia bulan ékôane jé. Tame ve’ele simesan abim “ava’a [é ne] nlame ya yôp” éyoñ môte wua a bulane be Yéhôva. (Luc 15:7, 10) Nge ô bulaneya be Yéhôva, tabe’e ndi na Yésus, beéngele a Yéhôva émien be ne meva’a ya yen ane wo beta bulane benya mejôô. Ve mam méziñ me ne ndeñele wo na ô beta lat amvôé dôé a Yéhôva. Mam mete me ne mevé, a jé é ne volô wo?

Abui bobejañ a besita be bulaneya be Yéhôva den, ve ba ke ôsu a wosan mbia b’asimesan. Éko éziñ wo fe ô wô’ô wô’ôtan ane njôô bôt David. To’o éyoñ a biya njamane ya mam abé mé, David a nga ke ôsu a jô’ô na: “Mbia be mam ma dañe me ngu.” (Bs. 40:12; 65:3) To’o éyoñ môt a bulaneya be Yéhôva, a ne beta bo abui mimbu a va’a émien bijô amu mbia be mam a nga bo. Isabelle, a nga bo mimbu 20 a mvuk a tele feñ. * A jô na: “E mbe ma ayaé na me kañese na Yéhôva a jaméya ma.” Nge ô sili mo si, élate mia Yéhôva é ne su’ulane mane ndaman. (Min. 24:10) Te ve’ele kañese jam ete.

Bôte bevo’o ba koo woñ na bé kate bo mam mese ma sili asu na be beta bi mbamba élat a Yéhôva. Éyoñ a nga bulan be Yéhôva, Antoine a nga jô na: “Me nga vuane abui mam me nga yé’é a ma me mbe me bo’o éyoñ me mbe Kristen.” Aval asimesan ete e ne viane bo na bôte béziñ be bili atek a sili mo si.

Bi tame nyoñ éve’an. Beta ôkôs a te mane ndamane môt abeñe nda dé. Môt ate a ne bili ate’e tyi’ibi nge a taté na a simesan abim ésaé a éyoñ da sili asu na a beta mane kôme nda jé. Avale te da da, nge élate mia Yéhôva ja te ndaman amu na wo te bo mbia nsem, ô ne simesane na wo yiane ve abui ngul asu na ô beta kôm élate jôé a Yéhôva. Ve ô nji bo ntindane ya bo jam ete étam.

Yéhôva a jô môt ase ya be bia na: ‘Za’an éyoñe ji, bi tame kôm mam avale da yian.’  (És. 1:18) Ô veya ngul asu na ô beta bo “mam aval da yian.” Yéhôva a wô’ô jam ete angôndô ya mvaé. Yeme’e na éyoñ wo bulan be Yéhôva, wo ve nye fane ya liti Satan na a ne nlaa minsos!​—Min. 27:11.

Éyoñ wo bulan be Yéhôva, wo liti na wo subu nye bebé, a nye fe a ka’ale na é subu wo bebé. (Jc. 4:8) Bôte bevo’o be ne meva’a ya yen ane wo beta bulan akônda, ve wo yiane ke ôsu a yemete nye’an wo nye’e Ésaa a Mvôé jôé, Yéhôva. Aval avé ô ne bo de?

Jeñe’e minsôñan ô ne tôé. E ne été na ô ngenan ô simesa’an bone be mam ô nga yé’é a lat a Yéhôva a ngaka’a jé ya bo na si é bo Paradis. Ve wo yiane jeñe na ô beta taté na wo bo mam mese me tii a ényiñe Kristen, nalé a tinane na wo yiane kañete a tabe bisulan mban a yeñ a bobejañ a besita ya akônda. Bi tame zu yen minsôñane miziñ ô ne ngule ya tôé.

Ye’ela’ane Yéhôva mban. Nge wo ke ôsu a ve womien bijô asu mbia jam ô nga bo, nge ke koo woñe ya ye’elane Yéhôva, tabe’e ndi na A kôme yem avale wo wô’ôtan. (Bero. 8:26) Ve bo’o “mban meye’elan été,” a kate’e Yéhôva abim avé wo kômbô bo mvôé jé. (Bero. 12:12) Andrej a simesan aval a mbe a wô’ôtan, a jô na: “Me mbe me va’a mamien bijô, me wô’ô fe mamien angôndô ya ôson. Ve éyoñ ése me mbe me mane ye’elan, me mbe me yene’e abui mvolan, me wô’ô fe ane nlem ô bôô ma si ne mieññ.” Nge ô nji yeme jam ô ne sili Yéhôva meye’elan été, mejô David a nga tili Besam kabetôlô 51 a kabetôlô 65 éyoñ a maneya mem abé dé me ne volô wo.

Yé’é Bible mban. Nalé é volô wo na ô tu’a yemete mbunane wôé, a na nye’an wo nye’e Yéhôva ô yaé. (Bs. 19:7-11) Felipe a jô na: “Mbôle me nji telé mam ya nsisim ôsu ényiñe jam, nalé a nga bo na me mane voé nsisim a ve Yéhôva ôsone nyul. Mbôle me nji kômbô beta ku ôlam ôte, nde me nga nyoñ ntyi’an ya bo ayé’é Bible dam mban.” Wo fe ô ne bo ane Felipe, nge wo yi mvolan mfa’a ya minlô mejô mi ne bo wo mfi asu ayé’é étam dôé, ô ne sili nyo mvôé mvolan nge ke étôtôlô Kristen éfe.

Jeñe’e na ô bi mbamba élat a bobejañ a besita. Bôte béziñ ba bulan ékôane Yéhôva ba koo woñ na bôte bevok be kobô be abé. Larissa a jô na: “Me mbe me wô’ô mamien angôndô ya ôson. Me mbe me wô’ôtane ve ane nge me nga koñ akônda ese. Me nga bi ôsimesane ôte angôndô ya ayab éyoñ.” Ve tabe’e ndi na bemvendé a Bekristen bevok ba kômbô volô wo na ô bo mam mese ma sili asu na ô beta bi mbamba élat a Yéhôva. (Fombô’ô nka’ale ô ne nlô ajô na “ Jé bemvendé be ne bo?”) Bemvendé ba wô’ô mvaé amu wo te bulan be Yéhôva, a be ne meva’a ya volô wo!​—Min. 17:17.

Mam mevé wo yiane bo asu na ô subu akônda bebé? Bo’o bisaé bise bobejañ a besita bevo’o ba bo akônda a ngul ése, tabe’e bisulan a kui nkañete mban. Nalé a ne volô wo mfa’a ôvé? Felix a jô na: “Bobejañ ya akônda be mbe be yange’e na me bulane be Yéhôva a ôjeja’a ôse. Me nga wô’ôtane na me ne mfi. Bobejañ bese be nga bo na me beta wô’ôtane na me betaya bo ébu’a ya nda bôt bebo bisaé be Yéhôva, na Yéhôva a jaméya ma, a na me ne ke ôsu a bo nye ésaé.” Fombô’ô nka’ale ô ne na “ Jé ô ne bo?”

Nté wo ve ngule na wo beta kôm élat jôé a Yéhôva, Satan é jeñe mezene mese asu na ô bili atek. (Luc 4:13) Nde, kôme’e yemete élate jôé a Yéhôva éyoñ ji.

Yéhôva a kobô ajô mintômba mié a jô’ô na: “Ma ye jeñe wu ô nga dimi, a bulane wu be nga titan, a ma ye tiñeti wu ô nga bu’i, a ve wu ô nga kon ngu.” (Éz. 34:16) Yéhôva a volôya abui bôte na e beta bi mbamba élat a nye. Nde, tabe’e ndi na Yéhôva a kômbô volô wo na ô yemete élate jôé a nye.