1. Jé ja bo na abui bôt e bo teke yeme vôme be futi minlô den?

MELU ma, abui miñyebe da jô na e ne Bekristen, a na da kañe Zambe avale da yian. Jôme te bi ne wôk amu jé abui bôte e nji beta yeme vôm be futi nlô. Ba sili bebiene na: “Ye nya ñyebe a ne fo’o ve wua? Ye miñyebe mise mi mia kañe Zambe avale da yian?” Nde ñhe, ye bi bi too ndi na Bengaa be Yéhôva ba ye’ele benya mejôô, a na mbe étam ba kañe Yéhôva avale da yian? Ye ô too ndi nalé? Bi tame zu yene mam ma bo’olô jam ete.

2. Amu jé nlômane Paul ô mbe ô too ndi a benya mejôô? (1 Bethessalonicien 1:5)

² Nlômane Paul ô nji be ô bili biyebe biziñe nlem a lat a benya mejôô. (Lañe’e 1 Bethessalonicien 1:5.) Mbôka’a ya mbunane wé ô nji be mam a mbe a wô’ôtane nlem été. Paul a mbe a lañe’e Kalate Zambe mban. A mbe a too ndi na “ntilan ôse ô ne nsoane be Zambe.” (2 Tim. 3:16) Mejô mete ma ye’ele bia jé? A zene ya mimfufup mintilan, Paul a nga kui na a bi benya beamu ba bo’olô na Yésus nnye a mbe Messie, jam betebe ôsu ya ñyebe Bejuif be mbe be vini’i be wô’ôk. Betebe ôsu bete be mbe be joñôlô’ô bôt, be liti’i mise me bôte na ba kañe Zambe, ve be sôane nye a mimboone miap. (Tt 1:16) Paul nye a mbe a sela’ane be, a nji be a tobô’ô mingum bifuse ya Kalate Zambe, a biasé’é ke bi bivok. A mbe nkômesane ya ye’ele a tôñe “mejô me Zambe mese.”​—Mam. 20:27.

3. Ye da sili na bi bi biyalane ya minsili mise asu na bi tabe ndi na bi ne fo’o benya mejôô été? (Fombô’ô nka’ale ô ne nlô ajô na “ Mimboone mi mam mi Yéhôva a asimesane dé bia ‘dañ abim me ne ngule ya lañeban.’”)

³ Bôte béziñe ba buni na nya ñyebe a yiane bi biyalane ya minsili mise, to’o mi Kalate Zambe a nji ve biyalan.  Ye ôsimesan ôte ô ne fo’o mvo’é? Bi tame nyoñ éve’ela Paul. A nga lebe bobenyañe bé ya nsisim a jô’ô be na: “Mi ve’ela’ane mam mese.” Ve a nga meme fe na, a nji kui na a wô’ô mam méziñ. (1 Bet. 5:21) A nga jô na “bia yem ve étun,” a na “éyoñe ji bia yen bijujuk.” (1 Bec. 13:9, 12) Paul a nji kui na a mane wô’ô mam mese me ne Kalate Zambe été, bia fe bi vo’o de bo. Ve Paul a nga kui na a kôme wô’ô nsôñane Yéhôva. Abime mam a nga yem me nga ve nye njika’ane na a ne fo’o benya mejôô été.

4. Jé é ne yemete ndi nlem jangane na bi ne benya mejôô été, a mam mevé ma liti na bi ne benya Bekristen?

⁴ Nge bia yi na bi yeme nge bi ne benya mejôô été, jam ôsu bia yiane bo e ne na bi ve’e fatan ékaña’a Yésus a nga lik, a avale Bengaa be Yéhôva ba bo den. Ayé’é di, bii yene na benya Bekristene (1) ba sa’ale bengunemelan, (2) ba semé éyôlé Yéhôva, (3) ba nye’e benya mejôô, a (4) ba nye’esane nya abuii.

5. Jé éve’ela Yésus ja ye’ele bia a lat a ékaña’a bia yiane ve Yéhôva, a aval avé bi ne vu nye?

⁵ Mbôle Yésus a nye’e Yéhôva nya abuii, a nga kañe ve Nye étam ataté éyoñ a mbe yôp, azukui éyoñ a nga zu si va. (Lc 4:8) A nga ye’ele beyé’é bé na be fe be kañe ve Yéhôva étam. Teke môs éziñe Yésus nge ke beyé’é bé be nga kañe Yéhôva a zene ya bive’ela. Mbôle Yéhôva a ne nsisim, ajô te, teke môt éziñ a ne kui na a kôme jôme ja funane Nye. (És. 46:5) Nde, Yéhôva a simesan aya éyoñ a yene bôte be ye’ela’ane Nye a zene ya bive’ela bebiene ba loone na bive’ela mimfufup? Éyoñe Yéhôva a nga ve bone b’Israël metiñ awôm, a nga jô be atiñe baa na:  “Te bo ngunemelan é ne nkpwelan, nge éve’ela’a ya jôm é ne yôp été, nge si nyô . . . Te kute bie meboñe si.” (Nk. 20:4, 5) Bôte bese ba kômbô ve Yéhôva ékaña’a ja ve nye nlem ava’a ba yiane kôme wô’ô na Yéhôva a nji yi na bi belane bive’ela éyoñ bia kañe Nye.

6. Fatan ékaña’a fé Bengaa be Yéhôva ba tôñe den?

⁶ Beyeme mam ba jô na Bekristene ya ntete mimbu ôsu be mbe be kañe’e ve Yéhôva étam. Éve’an é ne na, kalate éziñ a jô na Bekristene bete “be nga ye wô’ô angôndô ya abé” nge môt éziñ a nga ye bi ve zezé ôsimesane ya kañ éve’ela. Den, Bengaa be Yéhôva fe ba tôñ éve’ela jap. Bia kute ki bive’ela “mimfufup” meboñe si nge ke ye’elane beéngele; to’o Yésus émien, bi nji ye’elane nye. Bia ba’a ke nlinga, nge ke bo jam éziñe da liti na bia kañ ayoñe dangan. To’o avale jam avé da kui bia, bi nyoñeya ntyi’ane na bia tôñe mejô me Yésus ma: “Kañe’ [Yéhôva] Zambe wôé.”​—Mt. 4:10.

7. Nsela’ane mbé a yené ne fômelé zañe Bengaa be Yéhôva a miñyebe mivo’o mise?

⁷ Melu ma, abui bôte da nye’e e vô’ôlô’ô betebe ôsu ya miñyebe ba wum abui. Bôte béziñe ba wumulu be angôndô ya abui, a ntoo ve ane nge be ne bezambe. Menda me Zambe map me ne njalane ne lut, bôte ba kuse bekalate bap, a ba ve abui moné asu na be su’u be. Bôte béziñ ba buni éfia ése ja so be anyu, a éyoñe ba yene be, be ne avale meva’a e ne na, ô ye’e buni na be yeneya Yésus émien. Ve benya bebo bisaé be Yéhôva be be nji tôñe môt a binam. Bia semé bobejañ be tele bia ôsu, ve bia kôme yem mejô me Yésus ma: “Mia bese mi ne bobenyañ.” (Mt. 23:8-10) Bi nji kañ môt éziñ, a kusa bo ntebe ôsu ya nda Zambe nge ke beta môte a bo pôlitik. Bia su’u ki mam mese ba bo, amu bi nji bo bôte ya émo ji. Mfa’a ôte, bia selane miñyebe mise mia jô na mi ne Bekristen.​—Jn 18:36.

8. Aval avé bia yeme na Yéhôva a yi na bi wumulu éyôlé jé, a liti je bôte bevok?

⁸ Éyoñ éziñe Yésus a nga ye’elan a jô’ô na: “A Tat, wumu’u jôé dôé.” Yéhôva émien a nga yalane meye’alane mete éyoñe beta tyiñ a nga so yôp été, a ka’ale’e na é wumulu éyôlé jé. (Jean 12:28) Yésus a mbe a wumulu’ éyôlé Ésaa wé éyoñ a mbe a kañete’e. (Jean 17:26) Avale te fe, benya Bekristene ba yeme na a ne beta mvom asu dap na be belan éyôlé Zambe, a volô bôte bevo’o na be yeme je.

9. Aval avé Bekristene ya ntete mimbu ôsu be nga liti na ba semé éyôlé Zambe?

⁹ Ntete mimbu ôsu, e zu koone be ndôme telé akônda Bekristen, Yéhôva a nga taté na a “bo meyoñe mefe mvam, a nyoñe bôte bevo’o ya meyoñe mefe amu jôé dé.” (Mam. 15:14) Bekristene ya ntete mimbu ôsu be mbe be bela’an éyôlé Zambe, be kate’e fe je bôte bevok a meva’a mese. Minlôman a beyé’é bevok be mbe be tote’e éyôlé Zambe éyoñe be mbe be kañete’e mbamba foé, a éyoñe be mbe be tili’i bekalate ya Bible. * Éyoñe be nga bo nalé, be nga liti na mbe étam be mbe ayoñe da kañete bôte jôé Yéhôva.​—Mam. 2:14, 21.

10. Mam mevé ma bo’olô na Bengaa be Yéhôva mbe be ne ayoñ e be’e éyôlé jé?

 ¹⁰ Ye Bengaa be Yéhôva mbe étam be ne ayoñ e be’e éyôlé jé? Bi tame yene mam ma bo’olô jam ete. Abui betebe ôsu ya menda me Zambe e veya ngul ése na éyôlé Zambe é ke abo si. Be vaaya je minkôñelane mi Kalate Zambe miap. Bevôme béziñ, ba kate bôte ya miñyebe miap na be bo teke beta tot éyôlé éte. * Ye môt a ne kôme sôô dene na Bengaa be Yéhôva étam mbe ba semé éyôlé Yéhôva, a wumulu je? Bia bia dañe volô bôte na be yeme nya éyôlé Zambe a lôte miñyebe mise mivok. A zen éte, bia kôme liti na bia yiane fo’o éyôlé “Bengaa be Yéhôva.” (És. 43:10-12) Bi kuliya Bebible (Traduction du monde nouveau) e lôte bemillion 240. Nkôñelane Kalate Zambe wongan ôte ô bili éyôlé Yéhôva bevôme bese bekôñelane Kalate Zambe bevo’o be nga vaa je. Bi kuliya fe bekalate befe be bili éyôlé Yéhôva e lôte minkobô 1000.

11. Aval avé Bekristene ya ntete mimbu ôsu be nga liti na ba nye’e benya mejôô?

¹¹ Yésus a mbe a nye’e benya mejôô a lat a Zambe, a minsôñane mié. Mam mese Yésus a mbe a bo’o me mbe me  liti’i na a buni benya mejôô, a nga ve fe ngule na a kate me bôte bevok. (Jean 18:37) Beyé’é bé fe be mbe be nye’e benya mejôô nya abuii. (Jean 4:23, 24) Jôme te nje nlômane Pierre ô nga loone ñyebe benya Bekristene na “zene ya benya mejôô.” (2 P. 2:2) Mbôle Bekristene ya ntete mimbu ôsu be mbe be nye’e benya mejôô nya abuii, be mbe be sa’ale’e miñye’elan, metum, a asimesan e nji lu’an a Kalate Zambe. (Beco. 2:8) Dene fe, benya Bekristen ba ve ngul ése na be “wulu benya mejôô été,” ajô te Kalate Zambe nnye a ne mbôka’a ya mbunane wop a mam mese ba bo.​—3 Jean 3, 4.

12. Jé bobejañe ya Tin Ékôan ba bo éyoñe ba yene na ba yiane sôane ñye’elan éziñe be nga ve melu mvus, a amu jé ba bo de?

¹² Melu ma fe, bebo bisaé be Yéhôva be vo’o jô na ba wô’ô mam mese Kalate Zambe a ye’ele. E nga kui biyoñe biziñ na be timine bifuse biziñe ya Kalate Zambe aval e nji yian, a na be ta’a mame ya akônda avale da lu’an ki a Kalate Zambe. Jam ete e nji yiane bo na bi vembe, amu Kalate Zambe émien a jô na, bebo bisaé be Yéhôva bé tu’a wô’ô benya mejôô ane éyoñe ja ye lôt. (Beco. 1:9, 10) Yéhôva a ve bia éfufube ya benya mejôô ôte’etek ôte’etek, ajô te bia yiane yange na émien a volô bia na bi tu’a wô’ô bifuse biziñe ya Kalate Zambe. (Min. 4:18) Éyoñe bobejañe ya Tin Ékôan ba yene na ba yiane sôane ñye’elan éziñe be nga ve melu mvus, ba koo ki woñe ya bo de. Betebe ôsu ya abui miñyebe be wô’ô tyendé miñye’elane miap amu ba yi na be kate bôte mam ba nye’e be wô’ôk, a asu na bôte ya ñyebe wop be wô’ô be mvaé. Ve Bengaa be Yéhôva be ba tyendé miñye’elane miap asu na be subu Yéhôva bebé, a na ékaña’a jap é tu’a lu’an a miñye’elane Yésus a nga lik. (Jc. 4:4) Éyoñe bia tyendé ñye’elan éziñ, a nji bo amu bia kômbô tôñ émo, a ne amu bia te tu’a wô’ô jam éziñe Kalate Zambe a ye’ele. Bia nye’e benya mejôô angôndô ya abui!​—1 Bet. 2:3, 4.

13. Fulu fé ja yiane dañe yené zañe benya Bekristen, a biyoñe bivé é wô’ô kôme yené zañe Bengaa be Yéhôva?

¹³ Bekristene ya ntete mimbu ôsu be mbe be bili abui mbamba mefulu, ve nye’an ñwô ô ne fulu é mbe é dañe yené zañe jap. Yésus a nga jô na: “Zene nyô bôte bese ba ye yeme na mi ne beyé’é bam, nge mia nye’esan.” (Jean 13:34, 35) Den, Bengaa be Yéhôva ya si se meku’u menyine be ne nlatan, a ba nye’esan. Bia selane miñyebe mise mivok amu bi ne ane nda bôte jia, bi kusa so bevôme bevôm, nge kobô minkobô mevale meval a selane nyul ékop. Bia kôme yene nye’an ôte bisulan, bitôkan, a beta bitôkane biangan. Jam ete da kôme yemete ndi nleme jangan na bia fo’o bia kañe Yéhôva aval a nye’e.

14. Bela’ane Becolossien 3:12-14 asu na ô kat aval avé bi ne liti na bia tu’a nye’esan?

¹⁴ Bible a jô na “mi bo’an ayôñ mfa’a ya nye’ane wônan miabebien mia nye’esan.” (1 P. 4:8) Zene jia bi ne liti na bia nye’e bobejañ é ne éyoñe bia jamé be, a jibi be. Bia jeñe fe na bi bo akap a anyep a bobejañ bese ya akônda, to’o ba be nga bo bia mbia jam. (Lañe’e Becolossien 3:12-14.) Éyoñe bia nye’e bobejañ nalé, bia liti fo’o na bi ne benya Bekristen.

15. Mimfa’a mivé mife bia liti na bia vu mbamba éve’ela Bekristene ya ntete mimbu ôsu?

¹⁵ Bia jeñe fe na bi vu mbamba éve’ela Bekristene ya ntete mimbu ôsu aval afe. Éve’an é ne na, ékôane Bengaa be Yéhôva ya den é ne nta’an aval ane akônda Bekristene ya ntete mimbu ôsusua. Bia fe bi bili bejome mekônda, bemvendé, a bediakon. (Beph. 1:1; Tt 1:5) Bia semé fe metiñe me Yéhôva a lat a nkeane binoñ, aluk, a metyi. Mbôle bia yi na akônda Yéhôva e bo mfuban, bi ne étyi teke kañese na bôte ba bene jôban abé dap be ke ôsu a tabe été.​—Mam. 15:28, 29; 1 Bec. 5:11-13; 6:9, 10; Beh. 13:4.

16. Ñye’elan ôvé bia koone wô kalate Beéphésien 4:4-6?

¹⁶ Yésus a nga jô na abui bôte da ye tametane na e ne beyé’é bé, ve sake bese mbe ba ye fo’o bo benya beyé’é bé. (Mt. 7:21-23) Bible a nga jô fe na melu ya asu’ulan, abui bôte da ye bi “éve’ela’a ya mboane mame ya Zambe mfa’a ya atan.” (2 Tim. 3:1, 5) Ve Kalate Zambe a jô teke buti anyu ékume na “mbunane wua” ñwô Zambe a kañese.​—Lañe’e Beéphésien 4:4-6.

17. Beza be ne benya beyé’é be Yésus den?

¹⁷ Beza be bili nya mbunane melu ma? Bi maneya la’ase mam mese ma ve éyalane ya nsili ôte. Bi maneya yene mame Yésus a nga ye’ele a lat a nya ékaña’a, a avale Bekristene ya ntete mimbu ôsu be nga tôñe miñye’elane mite. Éyalan é ne fo’o ve jia jia: Bengaa be Yéhôva. Nga beta mvome le bi bili? Bi ne bebo bisaé be Yéhôva, a bia yeme nsôñane wé! Ngo’o nge bia ke ôsu a bi nya ékaña’a a mo mebaé, amu e ne abôm a ne koé na bia bi ne benya mejôô été!