SI SE meku’u menyin, bemvendé ba wô’ô mvaé ya be’e mimbe’e ékôane Yéhôva été. Bemvendé bete be ne beta ébotan asu bia bese. Ve den a ntoo bone mimbu, ékoane Yéhôva é nga bo bone mintyéndane miziñ. Be nga jô bemvendé be ntoo benya bôtô na, be ve bisoé bemvendé mimbe’e miap miziñ. Ane mimbe’e mivé?

Mfefé ntyendan ôte ô mbe na, bejom mekônda a beye’ele sikôlô ya Éjôé be telé bisaé bite éyoñ be kuiya mimbu 70. A na, bobejañ be mbili mimbu 80 be ve bemvendé be ne bisoé beta mimbe’e miap, aval ane wu ya tebele bemvendé ba wulu Wofis ya Béthel, nge ke wu ya tebele bemvendé ya akônda. Éyoñ benya bôtô bete be nga wô’ô foé éte, be nga bo aya? Be nga ke ôsu a wulu ba’aba’a a Yéhôva, a su’u ékoane jé!

Mojañ Ken, a nga tebele bemvendé ba wulu Wofis ya Béthel mimbu 49 a jô na: “Me nga kañese ntyi’an ôte a nleme wom ôse. Tyé ébiene ya môse be nga kate bia foé éte, me nga sili Yéhôva meye’elane nge a ne bo na, be ve mvendé é ne ésoé mbe’e wom.” Bobejañ ya mesi mese be nga bo  ane mojañ Ken, be nga kañese fe ntyendan ôte a mevak. Ve mbôle be mbe be nye’e be saane bobenyañe bap, foé été é nga taté bo be mintaé nlem.

Esperandio a mbe ntebele bemvendé ya akônda dé a jô na: “Foé éte é nga bo ma nlem mintaé mone jôm.” Ve a meme na: “Mbôle me mbe me ntoo ntutuñ, é mbe fo’o e sili’i ma abui éyoñ na me saéban.” Den, Esperandio a ke ôsu a kañe Yéhôva a nlem ôse, a ne fe beta ébotan asu akônda dé.

Minnôme bejome mekônda mi mbe mi tatéya be’e mimbe’e mife ôsusua, mi mi nga bo aya? Allan, a nga bo mimbu 38 a too njome mekônda, a jô na: “Foé éte é nga bo ma nlem angôndô ya abé.” Ve a jô na a nga yene mfi ya yañele bisoé, a den, a ke ôsu a bo Yehôva Zambe ésaé a nlem ôse.

Mojañ Russell ki a nga bo mimbu 40 a too njome mekônda a ñye’ele sikôlô ya Éjôé; a jô na atata’a, ba ngal be nga wô’ô ntyi’an ôte abé. “Bi mbe bi nye’e mbe’e wongan, a bi mbe bi simesa’an na bi ngenan ngule ya kee ésaé jangan ôsu.” Bobejañe ya akônda dap be bili ma’a ya bi be, amu Russell ba ngal ba belane mam mese be nga yé’é asu ya na be volô be.

To’o ô ngenane teke tebe aval été bobejañ bete be nga tebe, nkañete bia koone wô kalate 2 Samuel ô ne volô wo na ô tu’a wo’ô be.

Ye ô ngenan ô simesa’an éyoñ Absalom a nga koñ ésaa? David a nga tup Jérusalem a ke sobô Mahanaïm, est ya Jourdain. Éyoñ be kuiya wôé, David ba be bôte bé be mbe teke jôme ya di, nge nyu, nge ke vôme ya bômbô. Ye ô ngenan ô simesa’an jam é nga boban?

Bôte belal ya nlam ôte be nga soo be binoñ, bidi meval meva, bisua a meviek. Barzillaï a mbe môte wua ya be be. (2 Sa. 17:27-29) Éyoñ fe’e Absalom a nga bôndé na, a wôlé ésaa éjôé é boya momo, ane David a nga bulane Jérusalem; Barzillaï a nga ke litane nye akekui Jourdain. Ane David a nga ye’elane nye na be ke Jérusalem nsamba. To’o na Barzillaï a mbe “beta nkukume môt,” njôô bôt a nga ka’ale nye na a ye ve nye jôme ya di. (2 Sa. 19:31-33) David a mbe a yii ve na ba nya môtô ate be ke, amu Barzilaï a mbe mfefek. E ne été na, e ke nyiñ nge saé nda njôô bôt a mbe beta ma’a.

Ve Barzillaï a mbe a yeme’ minné mié, ane a nga kate David na a mbili mimbu 80. A nga sili nye na: “Ye me ne ngule ya beta kandé zañ mvaé a abé?” Mejô mete ma tinan aya? Barzillaï a mbe  a yiane bo mfefe’e môt amu a mbe a jaéya yene mam. A mbe fe a ngenane ngule ya ve mbamba melep, aval ane “minnôm mi bôt” mi nga lebe Njôô bôte Roboam. (1 Bb. 12:6, 7; Bs. 92:12-14; Min. 16:31) Nde, éyoñ a nga jô na a nji bo ngule ya kandé mvaé a abé, a mbe a kômbô’ô jô na, mbôl a ntoo nnôm, a nji beta bi ngule ya bo mam méziñ. A nga meme na ôyeme wé ô nji beta bo ngule ya wô’ô bidi mvaé, a na melo mé me nji beta wô’ô mvo’é. (Ec. 12:4, 5) Ane Barzillaï émien a nga lebe David na, a jiba ke nyoñe ndômane môte ba loene na Kimham e Jerusalem, éko éziñ mone wé.​—2 Sa. 19:35-40.

Ntyi’an Tin ékôan é nga nyoñ wo lu’an a ôsimesane Barzillaï. Den, jam Tin ékôan ja fombô, é nji dañe bo été ngume môt ô tele, nge ke atyeñ mboane mame dé. Bitôtôlô bi bobejañ bite bia tu’a fombô jam e ne bo mvo’é asu bobejañe ya si se.

Minnôm mi bobejañ mia yeme minné miap, mi ne ji’a yemelane na, ékôane Yéhôva ja ye dañe bo ngul nge ba jô’é na bisoé mbie bi be’e mimbe’e bebien be jaéya taté be’e. E nga kui abui biyoñ na benya bôtô be yañele bisoé, avale Barzillaï a nga yiane yañele mone wé, a aval Paul a nga yañele Timothée. (1 Bec. 4:17; Beph. 2:20-22) Bisoé benya bôtô be nga yañele nalé bi nga su’ulane bo “bôte mimvean,” avale bemvendé é ne ngule ya “lôñe nyôle Krist.”​—Beép. 4:8-12, Mfefé Nkôñelan; ve’e a Nlañane Bôt 11:16, 17, 29.

Benya bôtô be nga jañele beta mimbe’e, be ngenane be bili fane ya bo abui mam afe ékôane Yéhôva.

Marco, mojañ a nga bo mimbu 19 a jome’e mekônda, a jô na: “Ma belan éyoñ jam asu na me volô beyôm besita be nji bo Bengaa.”

Geraldo ki a nga bo mimbu 28 ane njome mekônda, a jô na: “Nsôñane wongan ô ne na bi volô bobejañ be voéya nsisim, a na bi bi abui meyé’é.” A jô na ba ngal be mbili meyé’é 15, a na, abui bobejañ é mbe avoé nsisim akônda dap, é betaya taté na da tabe bisulan.

Allan ki bia te jôô nye mvuse li a jô na: “Éyoñ ji, bia fe bi mbili fane ya kôme kañete. Bia nye’e bi kañete’ a meta’a bekalate, bevôm ba bo makit, bia kañete fe bôte be to bia fefel, bebaé ya be be be nga tabe bisulan.”

Nge be ndeme tyendé wo mbe’e amu ba yeme na ô ne étôtôlô a éwôlô Kristen, yeme’ na ô ngenan ô bili fane ya su’u mame ya Éjôé. Ô ne su’u ésaé Yéhôva éyoñ wo yañele bisoé bi bobefam ya akônda dôé. Russell bia te jôô nye mvus a jô na: “Yéhôva a yañele bisoé bi bili mbamba mefulu a atyeñ mboane mam, a belane fe bie. Bobejañ ya si se ba yene mfi ya ésaé bisoé bite bia bo na, bia ye’ele a ayôñ ése, bia yeme fe ba’ale mintômba mi Yéhôva.”​—Fombô’ô nka’ale ô ne nlô ajô na, “ Volô’ô bisoé na bi yeme belane mimveane mi ne be be.”

Nge be ndeme tyendé mimbe’e miôé ékôane Yéhôva, te wô’ô ôlun. Ô jaéya volô abui bôt a mbamba ésaé wôé, a wo ye ke ôsu a volô be. Bôte be jaéya zu ba nye’e wo a teke bisô na, ba ye ke ôsu a nye’e wo.

Jam da dañe dañ e ne na, Yéhôva émien a yem mam mese ô boya. A vo’o ‘vuan ésaé jôé a nye’an ô nga liti mfa’a ya jôé  dé, vôm ô nga bo bôte ya Zambe ésaé, a ô ngenan ô bo’o be ésaé.’ (Beh. 6:10) Ngaka’a Yéhôva éte é nji bo ve asu ésaé bia bo den. Ô ne édima mise me Yéhôva, a vo’o ve’ele vuane wo nge ke vuan ngul ô nga ve melu mvus na wo bo nye ésaé, a mam wo ke ôsu a bo.

Ye nlô ajô wu wo fombô fe bobejañ be nji tyendé mimbe’e miap akônda? Ôwé! Aval avé?

Nge wo yeme nya môtô wua ya ba be nga tyendé mimbe’e, subu’u nye bebé. Sili’i nye melep. Tuka’a fombô aval a bo bisaé ba ve nye akônda, a nalé a ye tômôlô wo. Amu benya bôtô bete be ne bitôtôlô Bekristen, be jaéya fe yene mam.

To’o ô ne nya môtô wua ya ba be nga tyendé mimbe’e, to’o ô ne mojañ nge ke sita mfe ya akônda, tuka’a ba’ale na, benya bôtô ba ke ôsu a kabetane Yéhôva be ne édima mise mé.