Ô WÔ’Ô bo aya éyoñ wo kômbô yem awolo? Éko éziñ ô wô’ô fombô nkolo wôé. Éyoñ mvôé jôé ja sili wo awolo ô wô’ô yalan aya? Aval ba lañ awolo da selane bevôme bevôm. Nalé aa?

Bi tame jô na bi ne mame ngô’é, awolo da é lôteya minute 30. Ô ne yalane mvôé jôé na, bi mbili awolo da a étun. Môte ya vôme mfe ki a ne yalane na, a ntoo mewolo awôm a melal a minute mewôm melal. Nalé a boban amu nkolo bia belane nye den a bili mewolo akekui 24. Bevôm befe, ba lañ awolo ete na, mewolo mebaé a li’iya minute mewôm melal.

Éko éziñ bia sili biabebien avale be mbe be lañe’ awolô melu Kalate Zambe a nga tiliban. Be mbe be lañe’ mewolo meval meva. Éfase kalate Zambe é nga tiliban nkobô Hébreu ja belane bifia ane mam me tyé, zañe môs, a mame ngô’é (Met. 8:11; 19:27; 43:16; Dt. 28:29; 1 Bb. 18:26) Ve biyoñ biziñ, Kalate Zambe a belane fe bifia bia tu’a kate bia awolo ébien.

Melu Kalate Zambe a nga tiliban, mingum mi bôt mi mbe mi mombô’ na mi ba’ale nlam. Be mbe be dañe bo de alu. Mintete mimbu ôsusua na Yésus a bialé, bone b’Israël be nga kab alu mengap menyin. (Bs. 63:6) Betyi’i Mejô 7:19 a kobô ajô “mmombane ya zañ” alu. Melu me Yésus, avale ane Begrek a Beromain, Bejuif fe be mbe be kabe’e alu da ngab ényin.

Kalate Zambe a kobô ajô mengabe mete abui biyoñ. A jô na, “mmombane nyini” nwô Yésus a nga wulu mañe yôp na a zu koone beyé’é bé. (Mt. 14:25, MN) Yésus a nga nyoñ fe éve’an a jô’ô na: “Nge mie ndaa a too yem awolo ya alu ñwuwup wo ye so, a nga ye mombô, teke jô’é na be tube mfine ya nda jé.”​—Mt. 24:43, Mfefé Nkôñelan.

Yésus a nga kobô ajô ya mengabe mese ya môs éyoñ a nga jô na: “Momba’an: amu mi ne te yem éyoñ mie ndaa a ye so, nge mame ngô’é, nge zañe alu, nge éyoñ nnôme kup a taté loñ, nge mame tyé.” (Marc 13:35) Ngab ôsu a jôô je va: mame ngô’é, ja taté éyoñ nlô jôbô a dim akekui mewolo ébulu ya alu. Ngabe baa: zañe alu, ja taté mewolo ébulu ya alu akekui zañ alu. Ngabe lale: éyoñ nnôme kup a taté loñ, ja taté zañ alu akekui mewolo melale ya mame tyé. Éko éziñ awolo ete nde nnôme kup a nga loñ alu be nga bi Yésus. (Marc 14:72) Ngabe nyini: mame tyé, ja taté mewolo melal ya mame tyé akekui éyoñ nlô jôbô a dim.

To’o na, melu me Yésus nkolo a abui mam bia belane me den asu na bi lañ awolo bi nji be, bôte ya éyoñ ete be mbe be bili mam me mbe me volô’ô be na, be yemelan éyoñ to’o alu, to’o amôs.