1-2. Amu jé bebo bisaé be Yéhôva be ne mevak? (Jacques 1:​22-25)

 YÉHÔVA ba édima mone jé ba yi na bi bo mevak. Ntili Besam 119:2 a jô na: “[Mevak] a ba ba ba’ale minjôane mié, ba ba jeñe nye a nlem ôse.” Yésus a nga jô jam afe da bôône bia minleme si. A nga jô na: “Mevak a bôte bese ba wô’ô mejô me Zambe a ba’ale me!”—Luc 11:28.

² Bia bebo bisaé be Yéhôva bi ne mevak. Amu jé? Bi bili abui beamu ya bo mevak, ve beta amu wua a ne na, bia lañe Kalate Zambe môs ôse a tôñe mame bia yé’é été.—Lañe’e Jacques 1:​22-25.

3. Bibotane bivé bia bi éyoñe bia tôñe mejô me Zambe?

³ Bia bi abui bibotan éyoñe bia “tôñe mejô me Zambe.” Ébotane jia é ne na, bia yeme na e tôñe mejô me Zambe a ne édiba’a ja ye volô bia na bi ve Yéhôva nlem avak. Bi ne mevak éyoñe bia yeme de. (Eccl. 12:13) Éyoñe bia tôñe mame bia yé’é, ényiñe ya menda me bôte mangane ja tu’a bo abeñ. Bia bi fe ngul élat a bobenyañe bangane ya nsisim. Éko éziñe na wo bu’uban avale bibotan éte ényiñe jôé. Ébotan éfe é ne na, bia sa’ale minju’u mia kui bôte ba tôñe ki mezene me Yéhôva. A ne fo’o avale Njô bôte David a nga jô. E jia a nga yia, a nga kobô ajô metiñ, mebendé a mintyi’ane mejô mi Yéhôva. A nga suu nkobô ya jia jé a jô’ô na: “Mba’alane ya ba’ale [mame mete] ô ne beta be ma’an.”—Bsa. 19:​7-11.

4. Amu jé e tôñe mejô me Zambe éyoñ ése a nji ve’ele bo tyi’ibi?

⁴ É ne été na, e tôñe mejô me Zambe éyoñ ése a nji ve’ele  bo tyi’ibi. Akusa bo bi bili abui mame ya bo, bia yiane fe bo nta’ane mam asu na bi lañ a yé’é Kalate Zambe ndembene bia ye wô’ô jame Yéhôva a yi na bi bo. Bi tame ñhe zu yene bone be mame ba ye volô bia na bi lañe Kalate Zambe môs ôse a nyoñ éyoñe ya fase mame bia lañ. Bia zu fe yen avale bi ne tôñe mame bia yé’é ényiñe jangane ya môs ôse.

JEÑE’E ÉYOÑE YA LAÑE KALATE ZAMBE

5. Mimbe’e mivé mia nyoñe bia abui éyoñ?

⁵ Abui bebo bisaé be Yéhôva é yeme a bisaé. Bia lôt abui éyoñe na bi bo mame Kalate Zambe a jô na me ne mfi. Éve’an é ne na, abui bebo bisaé be Yéhôva é bili asu ésaé da ve be fane ya nyoñe ngap a bebien a menda me bôte map. (1 Tim. 5:8) Abui bekristene da nyoñe ngap a bivuvumane biap bia kon, nge ke bi bi ntoo minnôm. Bia bese bia yiane fe nyoñe ngap a mvo’é jangane ya minsôn a jam éte da nyoñe bia éyoñ. Nge ô vaa mame mete mese, bi bili fe mimbe’e ékôane bekristen été. Beta mbe’e wua a ne na bia nyoñe ngap ésaé nkañete a ayôñ ése. Mbôl ô bili abui mimbe’e, aval avé ô ne kôme nyoñ éyoñe ya lañe Kalate Zambe môs ôse nge fase mame wo lañ a tôñe mame wo yé’é?

6. Aval avé ô ne telé nlañane Kalate Zambe ôsu ényiñe jôé? (Fombô’ô fe fôtô.)

⁶ Nlañane Kalate Zambe ô ne jame da ya “mame ma dañe mfi” asu bekristen; ajô te, bia yiane telé wô ôsu ényiñe jangan. (Philip. 1:10) Sam ôsu a kobô ajô môt a ne mevak a jô’ô na: “A nye’e metiñe me Yéhôva; a simesane metiñe mé môse ba alu.” (Bsa. 1:​1, 2) Nalé a tinane na, teke vaa nge beté, bia yiane fo’o jeñ éyoñe ya lañe Kalate Zambe môs ôse. Éyoñ évé é ne ñhe bo abeñ asu nlañane Kalate Zambe? Môt ase ya be bia a ne ve éyalane jé. Ve jame da dañe mfi é ne na, bi tobe ngum éyoñe bia ye bo bi lañe’e Kalate Zambe. Mojañ a too jôé na Victor  a jô na: “Ma nye’e ma lañe Kalate Zambe mame tyé. To’o ma dañe ki bi fulu ya kôlô si ndibe tyé, mewolo mete me ne abeñ, amu me nji bi abui mame ya bo. Nlô wom ô yoo a teke jôme ja ndeñele ma.” Ye nde wo fe wo yene nalé? Sili’i womiene na, ‘Éyoñ évé ma yene na é ne abeñ asu nlañane Kalate Zambe?’

KÔME’E FASE MAME WO LAÑ

7-8. Jé é ne kamane bia na bi bu’ubane nlañane wongane ya Kalate Zambe? Va’ak éve’an.

⁷ Nya ajôô a ne na, bi ne lañ abui mame ve teke tu’a wô’ô me. Ye é kuiya na ô lañe jam éziñ, ve mon éyoñe mvuse ya valé ô mane vuane jame wo te lañ? Bia bese bi tebeya aval été éte. Éngôngol ajô é ne na, bi ne fe vuane mame bia lañe to’o e Kalate Zambe été. Éko éziñe bi nga tyi’i na bia ye lañ abime bekabetôlô éziñe môs ôse. A ne fo’o mbamba ntyi’an. Bia yiane nyoñe mintyi’an a ve ngule ya bo avale bi nga tyik. (1 Cor. 9:26) Ve nge bia kômbô bu’ubane nlañane wongane ya Kalate Zambe, bi nji yiane su’u ve zezé nlañan.

⁸ Tame fas éve’ane ji: Asu na bilo’o bi yaé, da sili na mveñ é noñ. Ve nge mveñ é dañe noñ ayap, si é ne mane jaé a mendim. Éyoñe ke si é maneya jaé a mendim, mveñ é nji beta bo mfi. Abim éyoñ éziñe da ye sili asu na si é mane nyu mendime mete mese a bo na bilo’o bi faa. Avale da fe, bi nji yiane lañe Kalate Zambe avôl ane nge ba leñe bia, aval é ne na bi kate wô’ô nge ba’ale mame bia lañ a tôñe me môs ane môs.—Jacq. 1:24.

9. Jé bi ne bo nge bi bili fulu ya lañe Kalate Zambe avôl?

⁹ Ye é kuiya éyoñ éziñe na, ô lañe Kalate Zambe avôl? Jé wo yiane ñhe bo? Lañek ôte’etek. Éyoñe wo lañe Kalate Zambe, va’a ngule ya fase mame wo lañ. Ô ne bo de nté wo bo nlañane wôé nge ke éyoñ ô maneya. A ne jam ô ne kui na ô bo. Ô ne tyi’i na wo zu kô’ôlan abim éyoñe wo nyoñ asu ayé’é, asu na ô bi fe éyoñe ya fase mame mese wo yé’é. Ô ne fe  tyi’i na wo zu lañe fo’o ve bone bifus a belan éyoñe ja li’i asu na ô fase mame mese wo te lañ. Victor bia te jôô nye yôp a jô na: “Ma tyi’i nlañane wom étun, éko éziñe kabetôlô wua. Mbôle ma lañe Kalate Zambe mame tyé, me ne ngule ya fase mame ma te lañe ngume nté môs.” Ô ne belane zen ése wo kômbô na ô lañe Kalate Zambe, ve jam é ne mfi é ne na, ô lañe nye avale da ye ve wo fane ya kôme bu’ubane nlañane wôé.—Bsa. 119:97; fombô’ô nka’ale ô ne nlô ajô na, “ Minsili wo yiane fas éyoñe wo lañe Kalate Zambe.”

10. Va’ak éve’ane ja liti aval ô ne tôñe mame wo yé’é e Kalate Zambe été. (1 Bethessalonicien 5:​17, 18)

¹⁰ Éyoñe wo nyoñe na ô lañe Kalate Zambe a abim éyoñe wo bo de bi se ke ajô; jame da dañe mfi é ne na, ô jeñe mezene ya tôñe mame wo lañ. Nté wo lañe ngap éziñ, sili’i womiene na, ‘Aval avé me ne tôñe jame ma yé’é di éyoñe ji nge ke melu ma zu?’ Bi tame nyoñ éve’ane na wo lañe 1 Bethessalonicien 5:​17, 18. (Lañek.) Éyoñ ô maneya lañe bifuse bite bibaé, ô ne tebe a fas abime biyoñe wo ye’elan a abim édo’o meye’elane môé me ne. Ô ne fe fas ajô ya mame me ne tindi wo na ô ve Yéhôva akiba. Ô ne nyoñe ntyi’ane na wo zu ve Yéhôva akiba asu mame melale méziñ. Nge wo nyoñe to’o ve bone minute na ô fase mame nalé, wo ye bo avale môte da wôk a tôñe mejô me Zambe. Tame simesan abime meva’a wo ye bi nge wo bo jam éte éyoñ ése, asu mengabe mevo’o ya Kalate Zambe! Ôwé, wo ye tu’a bo môt a tôñe mejô me Zambe. Ve jé wo yiane bo nge wo yene na wo yiane tyendé abui mam ényiñe jôé?

TÔÉ MINSÔÑANE MIÔÉ ÔTE’ETEK ÔTE’ETEK

11. Jé é ne bo na ô bili atek biyoñe biziñ? Va’ak éve’an.

¹¹ Ô ne bili atek biyoñe biziñ éyoñe wo lañe Kalate Zambe a jeñe na ô tôñe mame wo yé’é. Tame simesane jame di: Ngabe wo lañe den, ja ve melebe ma liti avale bi ne sa’ale fulu ôbangam. (Jacq. 2:​1-8) Wo yene na wo yiane tyendé avale wo nyiñ a bôte bevok. Ajô te, wo tyi’i na wo zu bo mintyendane miziñ. A ne fo’o mbamba jam! Môse wo tôé valé, wo lañe vôm a ngôné mfi ya tabe ntyel a mame wo jô. (Jacq. 3:​1-12) Wo yene na môs éziñ, ô nga belane bifia bia te’e bôte bevo’o nyul. Ajô te wo tyi’i na wo zu belane bifia bia lôñe bôte bevok a ve be ngule nyul. Môs ôvok, nlañane wôé wo kobô ajô ya mam ô ne bo asu na ô  bo teke bo amvôé a émo. (Jacq. 4:​4-12) Wo yene na wo yiane kôme tobe mimvômane miôé. Ve môse nyini, ô ne taté na wo bili atek éyoñe wo yene mame mese ô ngenan ô yiane tyendé ényiñe jôé.

12. Amu jé ô nji yiane bili atek nge nlañane wôé ya Kalate Zambe wo liti na wo yiane tyendé mame méziñ ényiñe jôé? (Fombô’ô fe ayemé.)

¹² Nge wo yene na wo yiane bo abui mintyendan ényiñe jôé, te bili atek. Nalé a ne ndeme ya na ô ne éjote nyul. Môt a ne éjote nyul a too fe zôsô a émien a lañe Kalate Zambe a nsôñane ya yene mam a yiane tyendé ényiñe jé. a Nde fe, te vuane na ésaé ya jaé “mfefé môt” é ne ésaé môt a bo ngum ényiñe wé ôse. (Col. 3:10) Jé ja ye volô wo na ô ke ôsu a tôñe mejô me Zambe?

13. Aval avé ô ne jalé minsôñane miôé ôte’etek ôte’etek? (Fombô’ô fe fôtô.)

¹³ Te jeñe na ô mane tôñe mame mese wo yé’é e Kalate Zambe éyoñe jia. Yeme’e minné miôé a tôé minsôñane miôé ôte’etek ôte’etek. (Mink. 11:2) Ô ne ve’ele jame di: Tili’i mame mese wo yiane tyendé ényiñe jôé. Mvuse ya valé, tobe’e jame da nge mame mebaé ya mame wo te tili a li’i ma mevo’o wo ye su’ulane sôan ôte’etek ôte’etek. E vé nnye wo yiane taté?

14. Minsôñane mivé ô ne taté tôé?

¹⁴ Ô ne taté a nsôñane wo yene tyi’ibi ya tôé. Nge ke na ô ne tobe na wo zu saé bevôme wo simesane na beta mintyendane mia sili. Éyoñ ô nga yeme nsôñane wôé, bo’o minjeñan e bekalate bangan été. Ô ne belan Index des publications des Témoins de Jéhovah nge ke  Ékpwelé asu ayé’é Bengaa be Yéhôva. Ye’ela’ane Yéhôva a kobô nye ajô ya nsôñane wôé; sili’i nye na a ve wo “nkômban a ngule ya bo jam éziñ.” (Philip. 2:13) Mvuse ya valé tôñe’e mame wo yé’é. Éyoñe wo ye yene na ô tôéya nsôñan éziñ, nalé a ye ve wo évak ya tôé wu ôvok. Teke vaa nge beté, nge ô jeñe na wo tyendé jam éziñ ényiñe jôé nge bi fulu éziñe kristene ja yiane bi, wo ye yene na é ne tyi’ibi ya bo mintyendane bevôme befe.

MEJÔ ME ZAMBE ME ‘BO’OK ÉSAÉ BE MIA’

15. Amu jé bebo bisaé be Yéhôva ba selan a abui bôte da lañe Kalate Zambe? (1 Bethessalonicien 2:13)

¹⁵ Bôte béziñe ba jô na be lañeya Kalate Zambe biyoñe biyoñ. Ve ye be too fo’o ndi a nye? Ye ba tôñe fo’o mame ba lañ été nge jô’é na me wulu binyiñe biap? Éngôngole jam é ne na, éyalane ya nsili ôte é wô’ô bo na, momo. Ve beta nsela’ane a yené be bebo bisaé be Yéhôva! Aval ane bekristene ya ntete mimbu ôsu, bia fe bia kañese na Kalate Zambe ‘a ne fo’o mejô ma so be Zambe.’ Bia ve fe ngule jangan ése na bi liti na mejô me Zambe ma bo ésaé be bia.—Lañe’e 1 Bethessalonicien 2:13.

16. Jé é ne volô bia na bi bo bôte ba tôñe mejô me Zambe?

¹⁶ E lañ a tôñe mejô me Zambe a nji bo tyi’ibi éyoñ ése. Bi ne njemban éyoñe ya lañe Kalate Zambe. Nge na, bi ne lañe nye avôl a bo teke tu’a wôk abui mame bia lañ. Bi ne fe bili atek éyoñe bia yene mintyendane mise bia yiane bo. Teke njuk éziñe wo tôbane wô ô ne kate kômban. A mvolane Yéhôva, ô ne dañe nju’u wôé. Ngo’o nge bia nyoñe ntyi’ane ya kañese mvolane wé a bo bôte ba tôñe mejô me Zambe, sa ke ba ba vô’ôlô a vuan. Teke bisô na, nté ôse bia ye ke ôsu a lañe Kalate Zambe a tôñe mame bia yé’é binyiñe biangan, nde fe meva’a mangane ma ye tu’a fuluku nalé.—Jacq. 1:25.