1. Ntyi’ane mejô ôvé ô ntoo bebé?

 BI NGA nyiñ éyoñe beta mintyendane mia ye boban. Yésus a mbeme zu tyi’i môt ase ya be bia mejô. A nga kate mame ma ye boban émo ôsusua na a tyi’i bôte mejô. A nga ve beyé’é bé “ndeme” ja ye liti na a ntoo valé, a na “memane ya émo” me ntoo bebé. (Matt. 24:3) Bia koone ndem éte Matthieu kabetôlô 24 a 25 a minkañete mi ne Marc kabetôlô 13 a Luc kabetôlô 21.

2. E vé nye bia ye bem ôsimesane wongan, a aval avé mboon ôte wo ye volô bia?

² Yésus a nga ve mebendé me ne mfi a zene ya minkana milal. Minkana mite mia kobô ajô mintômba a bikela, mimfefek a mekute bindune bengon a betalent. Nkana ôse ya été wo volô bia na bi wôk aval avé mboone môt éziñe wo tyik ajô dé. Nté bia zu la’ase minkana mite, bia zu yene besikôlô bi ne nyoñ été a avale bi ne tôñe mame bia zu yé’é. Nkana ôsu bia zu yen ô ne wu mintômba a bikela.

MINTÔMBA A BIKELA

3. Éyoñ évé nje Yésus a ye tyi’i bôte mejô?

³ Nkana mintômba a bikela, Yésus a liti na a ye tyi’i bôte mejô a lat a avale ba ye nyoñe mbamba foé, a su’u bobenyañe bé be ne miñwo’on. (Matt. 25:​31-46) Éyoñe ya “beta étibila’a,” Yésus a ye bo ntyi’ane mejô ôte ôsusua na Armaguédon a taté. (Matt. 24:21) Aval ane mba’ale mintômba a kandé mintômba a bikela, aval éte fe Yésus a ye kandé bôte ba su’u beyé’é bé be ne miñwo’on a nleme wop ôse a ba be nji bo de.

4. Aval Ésaïe 11:​3, 4 a liti, amu jé bia yiane tabe ndi na Yésus a ye tyi’i bôte mejô e zôsô été? (Fombô’ô fe ya ékô’ôla.)

 ⁴ Nkulan ajô ya Kalate Zambe wo liti na, mbôle Yésus nnye Yéhôva a nga top ane Ntyi’i mejô, ntyi’ane mejô wé wo ye bo zôsô. (Lañek Ésaïe 11:​3, 4.) Yésus a nyoñ éyoñe ya fombô ntaban, asimesan a mame bôte ba jô, akekui avale ba belane bobenyañe bé be ne miñwo’on. (Matt. 12:​36, 37; 25:40) A ye yeme bôte be nga su’u bobenyañe bé be ne miñwo’on a ésaé ba bo. a Beta zene wua ya mintômba mi ne su’u bobenyañe be Krist a ne éyoñe mia volô be ésaé nkañete. Ba ye tyi’i bôte ba su’u be ésaé éte mejô ane “bôte be ne zôsô,” a ba ye bi ndi nleme ya ‘nyiñe nnôm éto’ e si va. (Matt. 25:46; Nlitan 7:​16, 17) A ne fo’o beta ébotan asu dap! Ñwulane ba’aba’a wop a Yéhôva éyoñe ya beta étibila’a a mvuse ya valé, wo ye bo na biyôlé biap bi tabe ntilane “kalate ya ényiñ.”—Nlitan 20:15.

5. Ñye’elan ôvé bi ne nyoñe nkana mintômba a bikela a za a yiane yene mfi ya été?

⁵ Lita’ané na mia wulu ba’aba’a a Yéhôva a na mia yeme ba’ale élat. Nkana mintômba a bikela wo dañe fombô bôte ba ye nyiñe si va. Ba liti na be bili mbunan éyoñe ba su’u bobenyañe be Krist ésaé nkañete, a éyoñe ba tôñ a nleme wop ôse zen ôlo ô ne mewôk a fek wo liti be, ñwô ôte Yésus a nga top. (Matt. 24:45) Ve bôte be bili ndi nleme ya nyiñe yôp, be fe ba yiane kôme baa alo dap abendé ya nkana ôte. Amu jé? Amu Yésus a véé mis ntabane wop, asimesane dap a mame ba jô. Be fe ba yiane liti na ba wulu ba’aba’a a Yéhôva. Yésus a nga laane fe minkana mibaé mi bili mingume mebendé ma fombô fo’o ve miñwo’on. Bia koone minkana mite Matthieu kabetôlô 25. Bi tame ñhe zu kobô ajô mimfefek a mekute bindune bengon.

MIMFEFEK A MEKUTE BINDUNE BENGON

6. Aval avé bindune bengone bitane bi nga liti na bi ne fek? (Matthieu 25:​6-10)

⁶ Nkana bindune bengon, Yésus a nga kobô ajô bindune bengon awôme bi nga ke tôbane fame ja zu lu’u minga. (Matt. 25:​1-4) Bese be mbe be kômbô’ô ke litane nluk abôk alu’u dé. Yésus a nga jô na betane be ne “mimfefek,” a ba bevo’o betane be ne “mekut.” Bindune bengone bi ne mimfefek bi mbe nkômesan a évevé. Be mbe nkômesane ya yange fame ja zu luk abim éyoñ ése é nga ye sili, to’o ja so zañ alu. Nde, be nga nyoñe belambe bap a mende’e mimbon asu na be faé be éfufup alu. Be nga naane fe abui mbon asu na belambe bap be ke ôsu a yôñe nge da kui na nluk a bo teke ji’a so. Ajô te, be mbe nkômesane ya ba’ale belambe bap be yôñe’ek. (Lañe’e Matthieu 25:​6-10.) Nde éyoñe nluk a nga suan, mimfefe’e bindune bengone mi mbe nkômesane mi nga ke nyiine nda abôk a nye. Avale te fe, bekristene be ne miñwo’one ba liti na be ne nkômesan, éyoñe ba ke ôsu a mombô a wulu ba’aba’a a Yéhôva akekui Krist a ye so. Ba ye bi ma’ane ya ke tôbane môt a luk, nnye ate a ne Yésus, Éjôé jé ya yôp. b (Nlitan  7:​1-3) Jé ki bi ne jô mfa’a ya bindune bengone bitane bi mbe mekut?

7. Jé é nga kui mekute bindune bengone bitan a amu jé?

⁷ Bindune bengone bitane bi mbe mekute bi mbe bi sela’an a bi bi mbe mimfefek, amu bi nji mbe nkômesan éyoñe nluk a nga so. Belambe bap be mbe be nga zu dim a be nji soo abui mbon. Éyoñe be nga yeme na nluk a mbeme so, é nga sili na be beta ke kuse mbon. Ve be mbe be ngenane teke bulan éyoñe nluk a nga so. Éyoñ éte “bindune bengone bi mbe nkômesan, bi nga ke nyiine nda abôk a nye, ane be nga fete mbé.” (Matt. 25:10) Mvuse ya valé, éyoñe bindune bengone bi mbe mekute bi nga bulan, bi nga kômbô nyiine nda abôk, ane nluk a nga jô bie na: “Me nji yeme mia.” (Matt. 25:​11, 12) Bindune bengone bite bi nji mbe nkômesane ya yange nluk abim éyoñ ése é nga ye sili. Ñye’elan ôvé miñwo’one mi ne nyoñ été?

8-9. Ñye’elan ôvé miñwo’one mi ne nyoñe nkana bindune bengon? (Fombô’ô fe fôtô.)

⁸ Lita’ané na mi ne nkômesan a na mia mombô. Yésus a nji be a kômbô’ô jô na miñwo’one mia ye bo ngap ébaé: Ngap é ne nkômesane ya yange akekui memane ya émo ji, a nyu é nji bo nkômesan. Ve a mbe a kômbô’ô liti mame ma ye kui miñwo’one nge mi nji bo nkômesane ya jibi akekui asu’ulan. Nge be bo teke jibi akekui asu’ulan, ba ye ke bi ma’ane map. (Jean 14:​3, 4) A ye ñhe fo’o bo mbia jam! To’o bi bili ndi nleme ya nyiñe yôp nge si va, bia bese bia yiane kôme baa alo abendé ya nkana bindune bengon. Môt ase ya be bia a yiane mombô a tabe nkômesane ya jibi akekui asu’ulan.—Matt. 24:13.

⁹ Éyoñe Yésus a maneya laane nkana bindune bengon asu ya na a liti mfi ya tabe nkômesan a mombô, a nga beta fe laane wu betalent. Nkana ôte wo liti mfi ya saé a ngul ése.

 BETALENT

10. Aval avé alo abaé é nga liti na da wulu ba’aba’a a masa wop? (Matthieu 25:​19-23)

¹⁰ Nkana betalent, Yésus a nga kobô ajô alo abaé é nga kabetane masa wop, a wu ô nji ke de bo. (Matt. 25:​14-18) Alo éte abaé é nga liti na da wulu ba’aba’a a masa wop éyoñ é nga bo na a bi abui moné. Ôsusua na a ke dulu, a nga ve be betalent nge ke abui moné. Alo abaé é nga wulu ba’aba’a a nye, é nga saé a ngul ése a belane moné a nga ve be a fek. Asu’ulane ya été é mbe aya? Éyoñe masa wop a nga so dulu, be nga kô’ôlane moné a nga ve be biyoñe bibaé. A nga se’e be, a be nga ‘vak a masa wop.’ (Lañe’e Matthieu 25:​19-23.) Ve jé ki bi ne jô mfa’a ya ôlo lale? Jé ô nga bo a moné masa wé a nga ve wô?

11. Jé é nga kui ôlo ô ne “nleles” a amu jé?

¹¹ Ôlo lale ô nga bi talent wua, ve ô nga too “nleles.” Masa wé a mbe a yange’e na a ye belane talent a nga ve nye a fek. Ve a li’i bo nalé, a nga viane ke solé nye si été. Éyoñe masa a nga so, ôlo ôte ô nji mbe ô bili jôm éfe ya ve nye. Ô nji be ô bili mbamba été nsisim. Ô li’i sili njaman amu ô nji kui na ô kô’ôlan akume masa wé, ô nga viane bôte masa wé ajô na a ne “ayete môt.” Ôlo ôte ô nji bi ébotane masa wé. Ane ô vaa nalé, be nga vaa wô talent wé a titane wô nda masa wé.—Matt. 25:​24, 26-30.

12. Melu ma, beza ba funan alo abaé é nga wulu ba’aba’a a masa wop?

¹² Alo abaé é nga wulu ba’aba’a a masa wop, é ne éfunane ya bekristene be ne miñwo’one ba wulu ba’aba’a a Yésus. Masa wop Yésus a bañete be na be zu vak a nye. Ba bi ma’ane map ya ke nyiñe yôp été, mme mete me ne nwômane miñwuan ôsu. (Matt. 25:​21, 23; Nlitan 20:5b) Mfa’a ôvo’o ki, mbia éve’ela ôlo ô ne nleles a ve miñwo’on abendé. Aval avé?

13-14. Sikôlô mbé miñwo’one mia nyoñe nkana betalent? (Fombô’ô fe fôtô.)

¹³ Lita’ané na mia saé a ngul ése a na mi  ne ayôñe mfa’a ya nsisim. Nkana betalent a wu bindune bengon, Yésus a nji be a kômbô’ô jô na miñwo’one mia ye bo minleles. Ve a mbe a kômbô’ô liti be mame ma ye kui be nge ba voé mfa’a ya nsisim. Ba ye ke kui na be bo na “nloone [wop] a ntobane [wop] bi bo fo’o été asu [dap],” a ba ye ke kañese na be nyiin Éjôé ya yôp.—2 P. 1:10.

¹⁴ Minkana mi Yésus a lat a bindune bengon a betalent mia kôme liti ne fômelé na, bekristene be ne miñwo’one ba yiane tabe nkômesan a mombô, a na ba yiane saé a ngul ése a bo ayôñe mfa’a ya nsisim. Ve, ye Yésus a nga jô jôm éfe é ne ve miñwo’on abendé? Ôwé a nga bo de. Mejô Yésus a nga jô bia koone me Matthieu 24:​40, 41 me tii a ntyi’ane mejô wo su’ulan a lat a miñwo’on.

ZA BA YE ‘NYOÑ’?

15-16. Aval avé Matthieu 24:​40, 41 a liti na miñwo’one mia yiane mombô?

¹⁵ Ôsusua na Yésus a laan ajô ya minkana milal, a nga jô na ntyi’ane mejô wo su’ulan a lat a miñwo’on, ñwô wo ye liti za a ne ntoban. A nga kobô ajô befame bebaé be mbe be saék afup, a binga bebaé be mbe be ko’o bidi akok ba ko’o bidi. E bité bite bise, da yené ve ane bese bebaane ba bo ésaé jia, ve Yésus a nga jô na ‘Zambe a ye nyoñe môte wua a li’i ke nyi mbok.’ (Lañe’e Matthieu 24:​40, 41.) Mvuse ya valé, a nga jô beyé’é bé na: “Kelané ôsu a mombô, amu mi nji yeme môse Tate wônan a ye so.” (Matt. 24:42) Yésus a nga jô fe avale mejô éte éyoñ a nga laane nkana bindune bengon. (Matt. 25:13) Ye nja éziñ ô ne zañe mam a nga jô? Éko éziñ. Fo’o ve benya miñwo’one a ba be nga wulu ba’aba’a a Yéhôva mbe Yésus a ye “nyoñ” Éjôé ya yôp.—Jean 14:3.

¹⁶ Lita’ané na mia mombô. Miñwo’one mise mia ye ke ke ôsu a mombô mfa’a ya nsisim, ba ye ke tôkane mie a “mintobane” mi Yésus. (Matt. 24:31) Nge ô vaa miñwo’on, bebo bisaé be Yéhôva bese, to’o be bili ndi nleme ya ke nyiñe vé, be nji yiane biasé abendé Yésus a nga ve na bi ke ôsu a mombô a wulu ba’aba’a a Yéhôva.

17. Amu jé bi nji yiane tyelé minleme yôp éyoñe bia yen ane Yéhôva a tobe miñwo’one miziñ?

¹⁷ Bi kômeya yé’é na bia yeme Yéhôva, ajô te bi too ndi a ntyi’ane mejô wé. Bi nji yiane tyelé minleme yôp nge Yéhôva a tobe miñwo’one miziñe melu ma. c Bia simesane jame Yésus a nga jô éve’ane ya afube mindik a nga nyoñ, éyoñ a nga kobô ajô bebo bisaé be nga zu saé bebé mewolô 11. (Matt. 20:​1-16) Bôte be nga loone na be zu taté ésaé mame tyé a ba be nga taté ésaé mame ngô’é, bese be nga bi abime ma’ane da. Avale te da da, be kusa tobe miñwo’on aval éyoñ avé, ba ye bi ma’ane ya ke nyiñe yôp nge ba ke ôsu a wulu ba’aba’a a Yéhôva.

NTÔÑA’ANÉ MEBENDÉ

18-19. Jé bia te yé’é minkana ya ayé’é di?

¹⁸ Jé bia te yen ayé’é di? Asu bôte be bili ndi nleme ya nyiñe nnôm éto si va, nkana mintômba a bikela wo liti mfi ya ke ôsu a wulu ba’aba’a a Yéhôva a ba’ale élat éyoñe ji a éyoñe ya beta étibila’a a zu. Éyoñ éte, Yésus a ye tyi’i bôte ba ye ke ôsu a wulu ba’aba’a a Yéhôva mejô, ane ba ba yiane “bi ényiñe ya nnôm éto.”—Matt. 25:46.

 ¹⁹ Bia te yene minkana mibaé mia ve miñwo’one mebendé. Nkana mimfefek a mekute bindune bengon, bitane ya été mbie étame bi nga liti na bi ne fek. Be nga tabe nkômesan a mombô be yange’e nté ôse nluk a ye so. Ve mekute bindune bengone bi nji mbe nkômesan. Ajô te, nluk a nga bene na be nyiin abôk alu’u dé. Bia fe bia yiane tabe nkômesane ya yange abim éyoñ ése bi ne ngule ya yange akekui Yésus a ye zu mane jian émo ji. Bia te fe yene nkana betalent na, alo abaé é nga wulu ba’aba’a a masa wop é nga saé a ngul ése a bo ayôñ. Be nga saé a ngul ése asu masa wop a a nga botane be. Ve be nga titan ôlo ô mbe nleles. Ñye’elan ôvé bia nyoñ été? Bia yiane ke ôsu a bi abui mame ya bo asu Yéhôva akekui asu’ulan. Bia te su’ulane yene na, miñwo’one mia yiane ke ôsu a mombô asu na Yésus a “nyoñe” mie a ve mie ma’ane map e yôp été. Miñwo’one mite mia yange a ôjeja’a ôse na mi “bo nsamba” a Yésus e yôp été. Mvuse bita ya Armaguédon, ba ye bo a Yésus, ane minga wé alu’u Mone ntômba.—2 Thes. 2:1; Nlitan 19:​7, 9.

20. Jé Yéhôva a ye bo asu bôte ba tôñe mebendé mé?

²⁰ To’o ane ntyi’ane mejô ô nga subu bebé, bi nji bi amu éziñe ya ko woñ. Nge bia ke ôsu a wulu ba’aba’a a Yéhôva, Ésa wongane ya yôp été a ne nye’an a ye ve bia “ngule ja dañe nyi ja yian,” “ndembene [bia ye bi medañ] . . . a tebe ôsu Mona môt.” (2 Cor. 4:7; Luc 21:36) To’o bi bili ndi nleme ya nyiñe si va nge momo, bia ye ve Ésa wongane ya yôp été nlem avak nge bia tôñe melebe bia koone me minkana mi Yésus. Amu beta mvame Yéhôva, biyôlé biangane bia ye ‘bo ntilane kalate ya ényiñ.’—Dn. 12:1; Nlitan 3:5.